Banovuyo Kwihlabathi Elingenaluvuyo
INQAKU lomhleli kwiThe New York Times kaJanuwari 26, 1995, laqala ngala mazwi: “Xa siyijonga kwelona cala libi, le ibiyinkulungwane kaSathana. Alikho ixesha ngaphambili abaye abantu babonakalisa ubuchule obungaka, nomdla, wokubulala izigidi zabanye abantu ngenxa yohlanga, unqulo nodidi abakulo.”
Isikhumbuzo sonyaka wama-50 sokukhululwa kwamaxhoba amsulwa awayevalelwe kwiinkampu zamaNazi ekwakubulawa kuzo abantu sabangela ukuba kubekho amanqaku abahleli afana neli likhankanywe ngasentla. Noko ke, ukubulawa kwabantu ngenkohlakalo okunjalo kusaqhubeka kwimimandla yaseAfrika neyaseMpuma Yurophu.
Ukutshatyalaliswa kwabantu, ukutshayelwa kwabantu besizwe esithile, nabohlanga oluthile—enoba kubizwa ngaluphi na uhlobo—kubangela usizi olukhulu. Sekunjalo, phakathi kwaloo mbuqe kukho abantu abanovuyo. Ngokomzekelo, makhe siqwalasele elaseJamani ngeminyaka yee-1930.
NgoAprili we-1935, amaNgqina kaYehova ayegxothwe kuyo yonke imisebenzi karhulumente nguHitler neqela lakhe lamaNazi. Kwakhona amaNgqina abanjwa, avalelwa entolongweni, aza athunyelwa kwiinkampu zoxinaniso kuba egcine ubundilele bamaKristu. (Yohane 17:16) Ngasekupheleni kuka-Agasti we-1936, kwabanjwa amaNgqina kaYehova amaninzi. Amawaka awo afakwa kwiinkampu zoxinaniso, apho inkoliso yawo eyasindayo yahlala khona de kwangowe-1945. Noko ke, ayesabela njani amaNgqina xa ayephathwa ngenkohlakalo kwezo nkampu? Okumangalisayo kukuba akwazi ukuhlala enovuyo phezu kwabo nje ubugxwayiba awayehlala kubo.
“Ilitye Edakeni”
Umbhali-mbali waseBritani uChristine King wadlan’ indlebe nelinye ibhinqa elingumKatolika elalikwezo nkampu. UGqr. King wathi: “Lasebenzisa ibinzana endingazange ndililibale. Landichubela onke amasikizi alapho, neemeko ezimanyumnyezi elaliphila kuzo. Kwaye lathi laliwazi amaNgqina, yaye loo maNgqina ayelilitye edakeni. Ayefana nendawo eyomileyo kulo lonke olo daka. Lathi ayekuphela kwabantu ababengatshici xa kudlula abagcini-mabanjwa. Ayekuphela kwabantu ababengenantiyo kuyo yonke loo meko kodwa ayenothando nethemba nemvakalelo yokuba kwakukho injongo yaloo nto.”
Yintoni eyenza amaNgqina kaYehova aba ‘ngamatye edakeni’? Kukuba nokholo olomeleleyo kuYehova uThixo noNyana wakhe, uYesu Kristu. Ngoko ke, imigudu kaHitler yasilela ukutshabalalisa uthando novuyo lwawo lobuKristu.
Phulaphula njengoko ababini abasinda ezinkampini bekhumbula emva kwamashumi amahlanu eminyaka bephumelele olo vavanyo lokholo. Omnye uthi: “Ndizaliswa luvuyo ndakuqonda ukuba ndaba nelungelo elikhethekileyo lokungqina uthando nombulelo wam kuYehova phantsi kwezona meko zenkohlakalo. Akukho namnye owandinyanzelayo ukuba ndenze loo nto! Kunoko, abo babezama ukusinyanzela yayiziintshaba zethu ezazama ngokusisongela ukuba sithobele uHitler ngaphezu kukaThixo—kodwa zatsho phantsi! Andonwabanga ngoku kuphela kodwa, ngenxa yesazela esihle, ndandonwabile kwanaxa ndandivalelwe entolongweni.”—Maria Hombach, oneminyaka engama-94 ubudala.
Elinye iNgqina lithi: “Xa ndicinga ngeentsuku zokuvalelwa kwam entolongweni ndiba nombulelo novuyo. Iminyaka endayichitha entolongweni nakwiinkampu zoxinaniso phantsi kukaHitler yayinzima gqitha kwaye izaliswe ziimvavanyo. Kodwa bendingafuni ukuba indiphose, kuba yandifundisa ukukholosa ngokupheleleyo ngoYehova.”—Johannes Neubacher, oneminyaka engama-91 ubudala.
“Ukukholosa ngokupheleleyo ngoYehova”—leyo yayiyimfihlelo yovuyo awayenalo amaNgqina kaYehova. Ngaloo ndlela, anovuyo, nangona engqongwe lihlabathi elingenaluvuyo. Uvuyo lwawo luye lwabonakala kwiiNdibano Zesithili “Zabadumisi Abanovuyo” kwiinyanga zakutshanje. Masikhe senze impinda ngokufutshane ngezi ndibano zovuyo.
[Umfanekiso okwiphepha 4]
UMaria Hombach