Abantu Abaselula Bayabuza . . .

Kutheni Ndingakwazi Ukufunda Nje?

UJessica ukhumbula oku: “Ndandingafuni ukugoduka, ndize ndijamelane nabazali bam. Kwakhona ndandingaziphumelelanga ezinye izifundo.”a Nangona eneminyaka eli-15 ubudala, uJessica ukrelekrele kwaye mhle. Kodwa njengolutsha oluninzi, unengxaki yokungaphumeleli esikolweni.

UKUNGAQHUBI kakuhle esikolweni ngokufuthi kungumphumo wesimo sengqondo esingafanelekanga ngakwimfundo okanye ngakumfundisi-ntsapho kabani. Kodwa akunjalo ngoJessica. Ukufumanisa kunzima ngokugqithiseleyo ukuqonda izinto ezinzima. Ngokuzenzekelayo, oku kwenza kwanzima ngoJessica ukuphumelela kwizibalo. Yaye ukuba nobunzima ekufundeni kwenza kwaba nzima ngaye ukuqhuba kakuhle nakwezinye izifundo.

Kwelinye icala, uMaria, akakwazi ukupela amagama ngokuchanileyo. Usoloko ewafihla amanqaku awabhala kwiintlanganiso zamaKristu ngenxa yokuba eneentloni kukungakwazi kwakhe ukupela amagama. Noko ke, uJessica noMaria abazizo izidenge. UJessica uyakwazi ukusebenzisana nabantu kangangokuba esikolweni unyulwe njengomlamleli, okanye umcombululi weengxaki, xa kuphakama iingxaki phakathi kwabo afunda nabo. Yaye kwezemfundo uMaria uphakathi kwe-10 ekhulwini labafundi abaqhuba kakuhle eklasini yakhe.

Ingxaki ikukuba: uJessica noMaria banengxaki yokufunda. Iingcali zikholelwa kwelokuba isi-3 ukusa kwi-10 ekhulwini labo bonke abantwana basenokuba banobunzima obufanayo ekufundeni. UTania, ngoku okwiminyaka yakhe yama-20, unengxaki ebizwa ngokuba Kukungakwazi Ukunikela Ingqalelo Epheleleyo Okubangelwa Kukudlamka Ngokugqithiseleyo (Attention Deficit Hyperactivity Disorder [ADHD]).b Uthi: “Kuba nzima kwiintlanganiso zamaKristu, kufundisiso lobuqu, naxa kuthandazwa ngenxa yokungakwazi kwam ukunikela ingqalelo okanye ukuhlala ndizole. Oku kuyabuchaphazela ubulungiseleli bam ngenxa yokuba ndisuka komnye umbandela ndiye komnye ngokukhawuleza okukhulu kangangokuba kungabikho mntu ukwaziyo ukuhambisana nam.”

Xa ingaphelekwa kukudlamka ngokugqithiseleyo, le ngxaki ibizwa ngokuba Kukungakwazi Ukunikela Ingqalelo Epheleleyo (Attention Deficit Disorder [ADD]). Abantu abanale ngxaki ngokufuthi bachazwa njengabavumela ingqondo ibhadule. Ngokuphathelele abo bane-ADD, isazi ngezifo zemithambo-luvo uGqr. Bruce Roseman sathi: Bahlala phambi kwencwadi kangangemizuzu engama-45, kodwa akukho nto bayifundayo.” Ngenxa yezizathu ezithile bakufumanisa kunzima ukunikela ingqalelo.

Abaphengululi bezamayeza bakholelwa kwelokuba kutshanje baye bamfumanisa unobangela wezi ngxaki. Sekunjalo, kusekuninzi abangekakwazi. Yaye imida ephakathi kweengxaki neziphene ezahlukeneyo eziphazamisana nokufunda ayisoloko icacile. Kungakhathaliseki ukuba uyintoni oyena nobangela okanye igama ebizwa ngalo ingxaki ethile—enoba yingxaki yokufunda, eyokukhumbula, eyokunikela ingqalelo, okanye eyokudlamka ngokugqithiseleyo—loo ngxaki inokuphazamisana nemfundo yomntu yaye inokubangela ukuba abe nobunzima obukhulu. Ukuba unengxaki yokufunda, unokuhlangabezana njani nayo?

Ucelomngeni Lokuhlangabezana Nayo

Khawucinge ngoJessica, okhankanywe kwingabula-zigcawu. Ezimisele ukoyisa ingxaki yakhe yokufunda, waqhubeka ezama ukufunda iincwadi ezahlukeneyo. Kwabakho inguqulelo xa wafumana incwadi yemibongo eyayinomtsalane kuye. Kwakhona wafumana incwadi efana naleyo, awakunandiphayo ukuyifunda. Kamva waba nomdla kungcelele lweencwadi zamabali, yaye ngokuthe ngcembe wayeka ukuba nengxaki enzulu yokufunda. Isifundo esisifundayo sesokuba umzingisi akanashwa. Nawe unokuyoyisa ingxaki yokufunda okanye ubuncinane unokwenza inkqubela kulo mbandela ngokunganikezeli.—Thelekisa amaGalati 6:9.

Kuthekani ngokuqhubana nengxaki yokulibala msinya? Isikhokelo esibalulekileyo sokucombulula le ngxaki sifumaneka kwiqhalo elithi: “Uhlanga lopha ngokuphindwa.” UNicky wafumanisa ukuba ukuphindaphinda ngokuvakalayo oko akuvileyo nakufundileyo kwamnceda wazikhumbula izinto. Khawuzame nawe. Kusenokukunceda. Ngokuphawulekayo, ngamaxesha okubhalwa kweBhayibhile abantu babedla ngokuwabiza ngokuvakalayo amagama. Ngenxa yoko uYehova wamyalela oku umbhali weBhayibhile uYoshuwa: “Uze uwufunde ngelizwi eliphantsi [uMthetho kaThixo] imini nobusuku.” (Yoshuwa 1:8, NW; INdumiso 1:2) Kwakutheni ukuze ukuwabiza ngokuvakalayo amagama kubaluleke kangaka? Kungenxa yokuba kwakubandakanya izivamvo ezibini—esokuva nesokubona—yaye kwakunceda ekubetheleleni ngokunzulu oko akufundayo engqondweni yalowo ufundayo.

Kwakhona kuJessica, ukufunda izibalo kwakungumsebenzi onzima. Noko ke, wazama ukufunda imigaqo yezibalo ngokuyiphindaphinda—maxa wambi echitha kangangesiqingatha seyure kumgaqo ngamnye. Ekugqibeleni imigudu yakhe yavuzwa. Ngoko phinda, phinda, phinda! Ubulumko kukuba nephepha nepensile xa uphulaphule eklasini okanye xa ufunda ukuze ubhale amanqaku.

Kubalulekile ukuzimisela ekufundeni. Kwenze umkhwa ukusala emva kokuphuma kwesikolo uze uthethe nabafundisi-ntsapho bakho. Qhelana nabo. Baxelele ukuba unengxaki yokufunda kodwa uzimisele ukuyoyisa. Inkoliso yabafundisi-ntsapho iya kukuvuyela ukunceda. Ngoko lufune uncedo lwabo. UJessica wakwenza oko yaye wafumana inkxaso kumfundisi-ntsapho onovelwano.

Funda Ukunikela Ingqalelo

Kwakhona kuyanceda ukubeka usukelo nenkqubo yokuzivuza. Ukuzibekela usukelo oluthile—njengokugqiba inxalenye yomsebenzi wesikolo owenzelwa ekhaya—ngaphambi kokuba uvule umabonwakude okanye umculo owuthandayo kunokukukhuthaza ekunikeleni ingqalelo. Qiniseka ukuba usukelo ozibekela lona lusengqiqweni.—Thelekisa amaFilipi 4:5.

Maxa wambi ukuphucula imekobume yakho kunokukunceda. UNicky wenza ilungiselelo lokuba ahlale phambili eklasini kufuphi nomfundisi-ntsapho ukuze anikele ingqalelo kakuhle. UJessica wakufumanisa kuyingenelo ukwenza umsebenzi wesikolo owenzelwa ekhaya kunye nomhlobo okukhuthaleleyo ukufunda. Usenokukufumanisa kuluncedo ukwenza igumbi lakho libe lihle yaye lifaneleke.

Ukunciphisa Ukungakwazi Ukuzola

Ukuba unotyekelo lokudlamka ngokugqithiseleyo, ukufunda kunokuba luvavanyo olubuhlungu. Noko ke, zimbi iingcali zithi ukudlamka ngokugqithiseleyo kunokusetyenziselwa ukwenza umthambo. I-U.S.News & World Report ithi: “Kukho ubungqina obandayo bokuba amandla omntu ngamnye okwazi inkcazelo entsha nokukhumbula endala aphuculwa lutshintsho olungokwemvelo engqondweni olubangelwa ngumthambo.” Ngenxa yoko, umthambo owenziwa ngomlinganiselo ofanelekileyo—ukuqubha, ukubaleka, ukudlala ibhola, ukukhwela ibhayisekile, iskating njalo njalo—unokuba luncedo emzimbeni nasengqondweni.—1 Timoti 4:8.

Kwenziwa unyango oluqhubekayo kwiingxaki zokufunda. Kuthiwa ama-70 ekhulwini abantwana abathwaxwa yi-ADHD abaye banikwa amayeza avuselela ingqondo baye bancedakala. Enoba uyalwamkela unyango lwezamayeza nguwe nabazali bakho abamele benze isigqibo emva kokuba niqwalasele ukuba nzulu kwale ngxaki, izinto olunokuzibangela, nezinye izinto.

Hlala Uzihlonela

Nangona ukuba nobunzima bokufunda kungagqalwa njengengxaki engokweemvakalelo, inokuyichaphazela indlela ovakalelwa ngayo. Ukungakholiseki nokugxekwa ngokuzingisileyo ngabazali nabafundisi-ntsapho, ukufumana amanqaku aphantsi okanye aphakathi esikolweni nokungabi nabahlobo abasenyongweni ngokulula kunokubangela ukuba ungazixabisi. Lumbi ulutsha luyayifihla le mvakalelo ngokuba nomsindo nangokusongela abanye.

Kodwa akuyomfuneko ukuba ungazixabisi ngenxa yeengxaki zokufunda.c Enye ingcali ejongene nabantwana abaneengxaki zokufunda ithi: “Injongo yam kukutshintsha indlela ababujonga ngayo ubomi—bayeke ukuthi ‘Ndisisidenge, yaye akukho nto ilungileyo endinokuyenza’ . . . baze bathi ‘Ndiyayoyisa le ngxaki, yaye ndinokwenza okungakumbi kunokuba ndakha ndacinga ukuba ndinokwenza.’”

Nangona ungenakwenza okungakumbi ngesimo sengqondo sabanye, kukho onokukwenza ngesakho. UJessica wakwenza oko. Uthi: “Xa ndazijonga ngokusekelwe koko kwakuthethwa ngabantwana esikolweni nendlela ababendigculela ngayo, ndanqwenela ukusishiya isikolo. Kodwa ngoku ndiyazama ukungakusiso oko bakuthethayo ndize ndiqhubeke ndisenza endinokukwenza. Kunzima, ibe kufuneka ndihlale ndizikhumbuza, kodwa oko kuyandinceda.”

UJessica kwafuneka ejamelene nesinye isibakala. Umntakwabo wayengumfundi ophumelela emagqabini ngo-A. UJessica uthi: “Oku kwakundenza ndingazixabisi de ndayeka ukuzithelekisa naye.” Ngoko musa ukuzithelekisa nabantakwenu.—Thelekisa amaGalati 6:4.

Kwakhona ukuthetha nomhlobo omthembayo kuya kukunceda ube nembono efanelekileyo ngezinto. Umhlobo wokwenene uya kukunceda ngokunyanisekileyo njengoko uzama ukuphucula. (IMizekeliso 17:17) Kwelinye icala, umhlobo ongenguye unokukuthob’ isidima okanye akwenze uziphakamise ngokungafanelekanga. Ngoko ke bakhethe ngobulumko abahlobo bakho.

Ukuba unengxaki yokufunda, usenokuba ulungiswa ngakumbi kunolunye ulutsha. Kodwa musa ukuvumela oko kukwenze ube nembono elandulayo ngawe. Lujonge ngendlela yobuthixo uqeqesho, njengento ebaluleke gqitha. Khumbula ukuba, uqeqesho olunikwa ngabazali bakho lububungqina bokuba bayakuthanda yaye bafuna ufumane okona kulungileyo.—IMizekeliso 1:8, 9; 3:11, 12; Hebhere 12:5-9.

Ewe, akumele udinyazwe yingxaki onayo yokufunda. Unokwenza okuthile ngayo yaye uphile ubomi obuphumelelayo. Kodwa kukwakho nesinye isizathu esibaluleke ngakumbi sokuba nethemba. UThixo uthembise ukuzisa ihlabathi elitsha lobulungisa apho kuya kubakho ulwazi oluninzi nalapho kuya kulungiswa naziphi na iingxaki zengqondo nezomzimba. (Isaya 11:9; ISityhilelo 21:1-4) Ngoko zimisele ukufunda okungakumbi ngoYehova uThixo neenjongo zakhe, uze wenze ngokuvisisana nolo lwazi.—Yohane 17:3.

[Imibhalo esemazantsi]

[Umfanekiso okwiphepha 30]

Zimisele ekufundeni