Ukunceda Abantwana Abanengxaki Yokufunda
NGUMBHALI KAVUKANI! EMEXICO
USteven unengxaki yokufunda. Xa esazi ukuba ufanele afunde phambi kweklasi, uba nedyudyu.
Nakuba utitshala ezama ukumnceda, uMaria akakwazi ukubhala kakuhle. Uthabatha ixesha elide gqitha xa esenza umsebenzi wakhe wesikolo ekhaya.
UNoah uwufunda ngokuphindaphindiweyo umsebenzi wakhe wesikolo. Sekunjalo, uyayilibala into ayifundileyo yaye utsala nzima esikolweni.
USTEVEN, uMaria noNoah banengxaki yokufunda. Abantwana abanedyslexia, bayababhidanisa oonobumba abafanayo. Kanti abanye banedysgraphia (ukungakwazi ukubhala), yaye abanye banedyscalculia (ukungakwazi ukubala). Sekunjalo, abantwana abanengxaki yokufunda bayafana nje nabanye abantwana, maxa wambi bade babe krelekrele nangakumbi kunabanye.
Abantwana abanengxaki yokufunda bathabatha ixesha ukufunda ulwimi, abakwazi ukwahlula amagama anesandi esifanayo, abakwazi ukuwabiza kakuhle amagama, bateketa ixesha elide, kunzima ukufunda oonobumba namanani, abakwazi nokubiza amagama alula, bayawabhidanisa amagama anesandi esifanayo, yaye bakufumanisa kunzima ukulandela imiyalelo.a
Ukunceda Umntwana Wakho
Yintoni onokuyenza ukuba umntwana wakho ubonakala enengxaki yokufunda? Okokuqala, mse kwagqirha ukuze ahlolwe iindlebe namehlo.b Emva koko cela ugqirha amhlole enoba akanangxaki yokufunda kusini na. Ukuba unayo, kuza kufuneka umthantamise. Khumbula ukuba, oku akuthethi kuthi umntwana wakho akakho krelekrele.
Ukuba isikolo somntwana wakho sinalo ilungiselelo lokufundisa umntwana ecaleni, lisebenzise. Mcele utitshala wakhe akuncedise kwimizamo yakho. Mhlawumbi umntwana wakho angahlala phambili eklasini aze anikwe ixesha elingakumbi lokugqiba umsebenzi wakhe. Utitshala wakhe unokumcacisela imiyalelo ebhaliweyo, kwaye imibuzo yeemviwo unokuyiphendula ngomlomo. Ekubeni abantwana abanengxaki yokufunda bedla ngokulibala yaye bedla ngokungalungelelani, basenokunikwa iincwadi ezingakumbi zesikolo abanokuzisebenzisa ekhaya. Eklasini nasekhaya unokusebenzisa ikhompyutha enenkqubo yokuhlolisisa enoba amagama abhalwe ngendlela efanelekileyo kusini na.
Xa umntwana wakho enedyslexia, funda naye nje ixesha elifutshane. Kufuneka afunde ngokuvakalayo ukuze umzali amncede. Qala ufunde ngokuvakalayo, aze umntwana ahambisane nawe. Emva koko, fundani nobabini ngokuvakalayo ngexesha elinye. Andule ke umntwana azifundele yedwa. Yalatha ngeruler xa efunda uze ukrwele amagama anzima. Oku kunokuthabatha imizuzu eli-15 kuphela ngosuku.
Izibalo zinokufundiswa ngezinye iindlela, njengaxa usenza umlinganiselo wokutya xa upheka, usebenzisa iruler xa uchwela, okanye xa usiya kuthenga. Unokusebenzisa igraph paper okanye imizobo xa nisenza izibalo. Ukuba umntwana wakho unengxaki yokubhala, sebenzisa amaphepha anemigca emikhulu nepensile ebhala ngqindilili. Unokuxhoma oonobumba abenziwe ngemagnethi kwinto ethile, ukuze bancede umntwana wakho akwazi ukupela amagama.
Zikho nezinye iindlela ezinokunceda umntwana oneADHD. Xa uthetha nomntwana onale ngxaki, mjonge emehlweni. Qiniseka ukuba umsebenzi wakhe wesikolo uwenzela kwindawo engenangxolo, amane ephumla xa efunda. Mnike nomnye umsebenzi ofuna amandla, njengokunyamekela inja.
Unako Ukuphumelela
Mkhuthaze umntwana wakho ukuba enze izinto anobuchule kuzo. Mncome xa enze okuthile, enoba kuncinane kangakanani na. Xa enomsebenzi omkhulu, wahlule ube yimisetyenzana aza kukwazi ukuyenza ukuze azive ephumeze okuthile. Sebenzisa imifanekiso ukuze umbonise oko afanele akwenze.
Kubalulekile ukuba umntwana akwazi ukufunda, ukubhala nokubala. Ngoko ke, unokuqiniseka ukuba xa umntwana wakho umkhuthaza yaye umnceda, unako ukufunda—nakuba esenokungafundi njengabanye abantwana yaye enokuthabatha ixesha elide.
[Imibhalo esemazantsi]
a Abantwana abanengxaki yokufunda badla ngokungakwazi ukunikela ingqalelo epheleleyo ngenxa yokudlamka ngokugqithiseleyo (iADHD [iAttention Deficit Hyperactivity Disorder]). Funda uVukani! kaMatshi 8, 1997, kwiphepha 27-31.
b Idyslexia nehyperactivity iqheleke kumakhwenkwe ngokuphindwe kathathu kunamantombazana.
[Ibhokisi ekwiphepha 11]
IINGENELO ENDIZIFUMANAYO NOXA NDINENGXAKI YOKUFUNDA
“Xa ndijonga amagama ephepheni, ayekhangeleka njengemigca egoso. Kwakungathi ndibona amagama olunye ulwimi endingalwaziyo. Ndandingakwazi ukuwafunda amagama, de ndifundelwe ngomnye umntu. Ootitshala babecinga ukuba ndiyonqena, andinantlonelo, andifuni kufunda okanye ukuphulaphula esikolweni. Kodwa kwakungenjalo. Ndandiphulaphula kwaye ndizibhokoxa, kodwa ndandingakwazi ukufunda nokubhala. Into endandiyithanda zizibalo. Ngoxa ndandisengumntwana, kwakulula kum ukunikela ingqalelo kwizinto ezifana nezemidlalo, ukwenza umsebenzi wezandla nokuzoba, kodwa into endandinengxaki yayo yayikukufunda nokubhala.
“Ukukhula kwam, ndakhetha ukwenza umsebenzi wezandla. Ngenxa yoku ndiye ndafumana ilungelo lokusebenza kwizakhiwo ezihlanu ezahlukahlukeneyo zamaNgqina kaYehova. Ekubeni kufuneka ndiyiphindaphinde into xa ndiyifunda, kuba lula ukuyikhumbula. Njengomfundi weBhayibhile, oku kuluncedo gqitha, ingakumbi kwinkonzo yasentsimini. Ngoko, kunokuba oku kundikhathaze, ndijonga iingenelo.”—UPeter, one-“dyslexia” nomlungiseleli wexesha elizeleyo lamaNgqina kaYehova.
[Umfanekiso okwiphepha 10]
Abantwana banokufundiswa ukubhala amanqaku ngokuzoba imifanekiso ngoxa bephulaphule