Siyintoni Isicombululo?

IIMBACU azishiywanga kwesinomhlwa. Ehlabathini lonke, imibutho eququzelela intlalo-ntle yabantu iwa ivuka inceda abo bangenamakhaya ngenxa yemfazwe nezinye iingxaki. Indlela eyintloko enceda ngayo kungokuncedisa iimbacu ukuba zibuyele kumazwe azo okuzalwa.

Iimbacu zishiya amakhaya, abantu ezihlala nabo namazwe kuba zisoyika ukuba ziya kubulawa, zithuthunjiswe, zidlwengulwe, zivalelwe entolongweni, zenziwe amakhoboka, ziphangwe, okanye zilambe. Ngoko ngaphambi kokuba iimbacu zibuyele emakhaya zikhuselekile, iingxaki ezabangela ukuba zisabe zimele ziconjululwe. Naxa ekugqibeleni ukungquzulana ngezixhobo kuphela, ukungabikho komthetho nocwangco kudla ngokwenza abantu babe madolw’ anzima ukubuyel’ emakhaya. UAgnes, imbacu yaseRwanda nomama wabantwana abathandathu wathi: “Ukusibuyisela [emva] eRwanda kuya kufana nokusifaka kumangcwaba ethu.”

Sekunjalo, ukususela ngowe-1989, iimbacu ezingaphezu kwezigidi ezisithoba ziye zabuyela emakhaya. Malunga nezigidi ezisisi-3,6 zasuka eIran nasePakistan zabuyela eAfghanistan. Ezinye iimbacu ezisisi-1,6 ezikumazwe amathandathu zabuyela eMozambique, ilizwe eladlakazwa yimfazwe yamakhaya eyathabatha iminyaka eli-16.

Ukubuyela akukho lula. Ngokufuthi amazwe ezibuyela kuwo iimbacu abubugxwayiba—aneedolophana ezingamabhodlo, iibhulorho zitshatyalalisiwe yaye iindlela namathafa ahlwayelwe iziqhushumbisi. Ngenxa yoko, iimbacu ezibuyelayo zimele ziqale phantsi ziphinde zakhe kungekuphela nje ubomi bazo kodwa kwanamakhaya azo, izikolo, iikliniki nayo yonke enye into.

Kanti, naxa amadangatye ongquzulwano engasalephuzi kwenye indawo, evulela ithuba lokuba iimbacu zibuyele, aqala kwenye indawo, ebangela ezinye iimbacu. Ngoko ke, ukucombulula ingxaki yeembacu kuthetha ukucombulula iingxaki eziyibangelayo ezinjengemfazwe, ingcinezelo, intiyo, intshutshiso nabanye oothunywashe ababangela abantu basabe nobomi babo.

IThe State of the World’s Refugees 1995 iyavuma: “Inyaniso yokwenene . . . yeyokuba izicombululo [kwingxaki yeembacu] ekugqibeleni zixhomekeka kwezobupolitika, kwizinto ezibangelwa ngumkhosi nazezoqoqosho ezingenakulawulwa nanguwuphi na umbutho oququzelela intlalo-ntle yabantu.” Ngokutsho kweBhayibhile, ngokufanayo izicombululo azinakuziswa nanguwuphi umbutho wasemhlabeni, oququzelela intlalo-ntle yabantu okanye nawuphina omnye.

Ihlabathi Elingenazimbacu

Noko ke, sikho isicombululo. IBhayibhile ibonisa ukuba uYehova uThixo ubakhathalele abo baye bahlukaniswa namakhaya neentsapho zabo. Ngokungafaniyo noorhulumente bomhlaba, unamandla nobulumko bokucombulula zonke iingxaki ezintsonkothileyo olujamelene nazo uluntu. Uya kukwenza oko ngokusebenzisa uBukumkani bakhe—urhulumente wasezulwini oya kuthi kungekudala alawule yonke imicimbi yasemhlabeni.

UBukumkani bukaThixo buya kuthabathela indawo bonke oorhulumente babantu. Kunokuba kubekho oorhulumente abaninzi emhlabeni, njengoko kunjalo ngoku, kuya kubakho urhulumente omnye kuphela, oya kulawula sonke isijikelezi-langa. IBhayibhile yaxela kwangaphambili: “UThixo wamazulu uya kumisa ubukumkani obungayi konakala naphakade. Obo bukumkani abuyi kusala nabantu bambi; buya kuzicola buzigqibe zonke ezo zikumkani, bona bume ngonaphakade.”—Daniyeli 2:44.

Usenokuba uqhelene nomthandazo ongumzekelo ofumaneka eBhayibhileni kuMateyu 6:9-13. Inxalenye yaloo mthandazo ithi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” Ngokuvisisana naloo mthandazo, uBukumkani bukaThixo buya ‘kufika’ ngokukhawuleza buphumeze injongo kaThixo ngomhlaba.

Ngaphantsi kolawulo lothando loBukumkani bukaThixo, kuya kubakho uxolo nonqabiseko lwehlabathi lonke. Akusayi kuphinda kubekho intiyo nokulwa phakathi kwabantu namazwe omhlaba. (INdumiso 46:9) Kungasayi kuphinda kubekho izigidi zeembacu ezisaba nobomi bazo okanye ezinkolonkoloza ezinkampini.

ILizwi likaThixo lithembisa ukuba uKumkani woBukumkani bukaThixo, uKristu Yesu, “uya kulihlangula ihlwempu elizibikayo, nabaziintsizana abangenaluncedo. Abenzele inceba abasweleyo nabangamahlwempu; asindise imiphefumlo yamahlwempu. Akhulule imiphefumlo yawo ekuxinezelweni nasekugonyamelweni; linqabile emehlweni akhe igazi lawo.”—INdumiso 72:12-14.

[Umfanekiso okwiphepha 10]

Kungekudala bonke baya kuphathana njengabazalwana noodade