Imbono YeBhayibhile

Isizathu Sokuba Ukususa Kubudlelane Kulilungiselelo Lothando

UKUSIKWA—ingcamango enjalo yenza iingqondo zabantu abaninzi bonqulo zibethabethane.a Abantu abaninzi bayavuma ukuba unqulo lufuna uhlobo oluthile lwengqeqesho. Kodwa abaninzi bakujonga ukusikwa njengokudla ngendeb’ endala—uhlobo olungqongqo lwengqeqesho olubakhumbuza ngokutshutshiswa kwabantu abonileyo neenkundla zokuncina amakholwa.

Okwenza le ngxaki ithi chatha yimpembelelo egqwethekileyo yehlabathi. Ngenxa yoko, unqulo oluninzi lweNgqobhoko alusazikhathazi ngesono. Ngoko ke, akumangalisi ukuba omnye umfundisi wamaEpiscopal wathi: “Ukusikwa yinxalenye yesithethe sethu, kodwa andiqondi ukuba bekusetyenziswa kule nkulungwane.”

Noko ke, abantu abaninzi basenokumangaliswa kukwazi ukuba phakathi kwamaNgqina kaYehova, ukususa kubudlelane (okufana nokusikwa) kusathatyathwa nzulu. Enyanisweni, akusosenzo kulula ukusithabatha, kodwa lilungiselelo lothando. Njani?

Kuphakamisa Igama LikaThixo

UYehova nguThixo ongcwele. Akasinyamezeli isono sangabom esenziwa ngabo bathi bayamnqula. Umpostile uPetros wabhalela amaKristu: “Yibani ngcwele nani kuyo yonke ihambo yenu, ngenxa yokuba kubhaliwe kwathiwa: ‘Nimele nibe ngcwele, ngenxa yokuba mna ndingcwele.’” (1 Petros 1:15, 16) Ngoko ke ukususa kubudlelane aboni abangaguqukiyo kuphakamisa igama likaThixo elingcwele; kubonisa uthando ngelo gama.—Thelekisa amaHebhere 6:10.

Ngaba oku kuthetha ukuba xa umKristu eyekelela kubuthathaka okanye ewela kwisono esinzulu, ngokuzenzekelayo uyagxothwa ebandleni? Akunjalo! UYehova akangozwilakhe ongenaluvelwano. Unenceba kwaye unovelwano. Uyakhumbula ukuba asifezekanga. (INdumiso 103:14) UYehova uyaqonda ukuba “bonke bonile baza basilela kuzuko lukaThixo.” (Roma 3:23) UThixo ulungiselele uncedo lokomoya phakathi kwebandla ukuze xa umKristu ethabatha “inyathelo elithile eliphosakeleyo” okanye kwanaxa esenza isono esinzulu, abe ‘nokulungiswa’ ngothando ngomoya wobulali. (Galati 6:1) Ngokwamkela isiluleko esivela eLizwini likaThixo nokubonisa ukuzisola ngokusuka entliziyweni nokuguquka ngokwenene, lowo uye waphambuka kwindlela yobulungisa ‘unokuphiliswa’ ngokomoya.—Yakobi 5:13-16.

Noko ke, kuthekani ukuba umKristu obhaptiziweyo wona ngokunzulu yaye yonke imigudu yokuzama ukumbuyisa iwa phantsi? Ngamanye amazwi, kuthekani ukuba ngenkani uyala ukulungisa ikhondo lakhe lesono?

Kugcina Ibandla Likhuselekile

IBhayibhile iyalela amaKristu: ‘Yekani ukuxubana kunye naye nabani na obizwa ngokuba ngumzalwana ongumhenyuzi okanye umntu obawayo okanye umnquli-zithixo okanye umtshabhisi okanye inxila okanye umphangi, ningadli kwaukudla nomntu onjalo.’—1 Korinte 5:11.

Ngaba lo mthetho weBhayibhile ungqongqo kwaye uthoba isidima? Khawucinge nje ngoku: Xa isaphuli-mthetho esiphum’ izandla sithunyelwa entolongweni ngokwaphula umthetho, ngaba oko kujongwa njengokuba ngqongqo okanye ukungabi naluvelwano? Akunjalo, kuba wonke umntu unelungelo lokulondoloza uxolo nonqabiseko lwendawo ahlala kuyo. Ngokungathi kunjalo, eso saphuli-mthetho siyasuswa kubudlelane bebutho labantu elithobela umthetho ebudeni baxa sisentolongweni.

Ngokufanayo, ibandla lamaKristu liyathetheleleka ngokugxotha abenzi bobubi abangaguqukiyo abaphakathi kwalo. Kutheni? Kuba ibandla lifanele libe yindawo engenabo abantu abaziphethe kakubi nabanye abaqhelisela isono ngabom.

Eqonda ukuba “umoni emnye utshabalalisa okulungileyo okuninzi,” umpostile uPawulos wayalela abo wayekholwa nabo: “Mshenxiseni ongendawo phakathi kwenu.” (INtshumayeli 9:18; 1 Korinte 5:13) Esi senzo sithintela umoni ukuba angasasazi ukonakala ebandleni, ibe sikhusela igama elihle lebandla.—Thelekisa eyoku-1 kuTimoti 3:15.

Kukhusela Abanye

Kwakhona ukususa kubudlelane kukhusela amanye amalungu ebandla. Masenze umzekelo: Yiba nomfanekiso-ngqondweni uvuswa ulele yingxolo yexilongo lenqwelo-mafutha okanye yialarm. Ingxolo ehlabayo kunzima ukuyibetha ngoyaba; eneneni, iyakothusa! Ngokufanayo, xa ubani egxothwa ebandleni, ngokuqinisekileyo esi senzo siyayithimba ingqalelo yelungu lomhlambi ngalinye. Siphazamisa iingqondo zawo. Asinakubethwa ngoyaba. Sinokukhusela njani?

Elinye iNgqina lithi: “Ukuqala kwam ukuva kwiHolo yoBukumkani ukuba ubani uye wasuswa kubudlelane, ndothuka ndabanda. Kwandula kwandenza ndathobeka. Kwandenza ndaqonda ukuba nam ndinokuwa.” Njengoko amazwi akhe ebonisa, ukususwa kubudlelane kunokushukumisela abaninzi ukuba bahlolisise ihambo yabo.—1 Korinte 10:12.

Ngokuzibuza imibuzo enjengalo ‘Ngaba zikho iinkalo zobomi bam endisilelayo kuzo ngokomoya?’ sinokuncedwa sihlolisise ukuma kwethu noThixo. Ngale ndlela sinokuqhubeka ‘sisebenzela usindiso lwethu ngoloyiko nangokungcangcazela.’—Filipi 2:12.

Buyela KuThixo

Wathi omnye umKristu owayegxothiwe kangangexesha elithile: “Nangona kwakubuhlungu, uqeqesho lwaluyimfuneko ibe kwakufuneka okungakumbi, yaye oko kwangqineka kusindisa ubomi.” Oku kubalaselisa enye inkalo ebalulekileyo yokususa kubudlelane. Kunokushukumisela aboni ababengafuni ukuguquka ngaphambili ukuba babuyele kuThixo.

Umpostile uPawulos wathi: “UYehova amthandayo uyamqeqesha.” (Hebhere 12:6) Yaye nangona kuyinyaniso ukuba “akukho ngqeqesho ibonakala ivuyisa okwangoku, kodwa ibuhlungu; kodwa kamva ivelisa isiqhamo soxolo, oko kukuthi, ubulungisa.”—Hebhere 12:11.

Oko koko kwenzeka kuRichard. Emva kokususwa kubudlelane phantse iminyaka emibini, waguquka, walungisa ihambo yakhe yokungahloneli Thixo, yaye wamkelwa kwakhona kwibandla lamaKristu. Ekhumbula oku, wathi ngokuphathelele la mava: “Ndiyaqonda ukuba ndandifanele ndisuswe kubudlelane yaye kwakundifanele ngokupheleleyo oko ndakufumanayo. Kwakuyimfuneko ngenene yaye kwandinceda ndabona kanye indlela elalilibi ngayo ikhondo lam nokufuna ukuxolelwa nguYehova.”

Uqeqesho kusenokungabi lula ukulunyamezela. Ukulwamkela kufuna ukuthobeka, kodwa abo bafunda ngalo bavuna isiqhamo esiyintabalala.

Ngoko ke, ukususa kubudlelane lilungiselelo lothando kuba kuphakamisa igama elingcwele likaThixo kwaye kukhusela ibandla kwimpembelelo eyonakalisayo yesono. Kwakhona, kubonisa uthando ngomenzi wobubi ngokumkhuthaza ukuba aguquke “aphethuke khon’ ukuze zicinywe izono [zakhe], ukuze amaxesha okuhlaziya eze evela kuYehova ngenkqu.”—IZenzo 3:19.

[Umbhalo osemazantsi]

[Inkcazelo Ngomfanekiso okwiphepha 26]

The New Testament: A Pictorial Archive from Nineteenth-Century Sources, by Don Rice/Dover Publications, Inc.