Yilawule Ngoku Indlela Ophila Ngayo!
UPHANDO olwenziwe yinzululwazi ngemikhwa yomntu noko kumqhubela kuyo luye lwasizisela iingenelo ngeendlela ezininzi. Mhlawumbi luye lwasinceda ukuba sijamelane nesigulo esithile ngokusenza sisiqonde ngokunzulu ngakumbi. Kwangaxeshanye, sifanele sizilumkele iingcamango ezibonakala zivus’ umdla gqitha, ingakumbi ezo zibonakala ziphikisana nemigaqo emiselweyo.
Ngokuphathelele umbandela wemizila yemfuza nemikhwa, kuphakama le mibuzo: Ngaba sinokuzibaleka iimbopheleleko zethu size singabekek’ ityala ngezenzo zethu? Ngaba sinokuzama ukuzikhulula okanye sibek’ ityala omnye umntu okanye enye into ngayo nayiphi na imposiso okanye isono, ngaloo ndlela sithelela inani elandayo kwesi sizukulwana “sika-asindim”? Akunjalo konke konke. Inkoliso yabantu iyakuvuyela ukunconywa ngayo nayiphi na impumelelo yayo ebomini, ngoko ngokufanayo kutheni ingenakukuvuyela ukuvuma impazamo zayo?
Ngenxa yoko, sisenokubuza, Lithini iLizwi likaThixo, iBhayibhile Engcwele, ngomntu okanye ngento elawula indlela esiphila ngayo namhlanje?
Ithini Imbono YeBhayibhile?
Into yokuqala ekufuneka siyiqonde kukuba sonke sizalelwe esonweni esasizuz’ ilifa kubazali bethu bokuqala, uAdam noEva. (INdumiso 51:5) Ukongezelela, siphila kwixesha elikhethekileyo, elibizwa ngokuba ‘yimihla yokugqibela,’ apho abantu batyhubela “amaxesha amanqam ekunzima ukuqhubana nawo.” (2 Timoti 3:1) Xa sithetha ngeliphandle, oku kubonisa ukuba sijamelana neengxaki ezingakumbi xa siyilawula ngendlela efanelekileyo indlela esiphila ngayo kunokuba oobawomkhulu bethu benzayo.
Sekunjalo, bonke abantu bazizidalwa ezinenkululeko yokukhetha imikhwa, ezinokuzenzela ukhetho lwazo lobuqu. Ukusa kumlinganiselo othile bayakwazi ukulawula indlela abaphila ngayo. Oku bekusoloko kunjalo ukususela kumaxesha amandulo, yaye kunokubonwa kumazwi kaYoshuwa awawathetha kuhlanga lwakwaSirayeli: “Zinyuleleni namhla oyena niya kumkhonza.”—Yoshuwa 24:15.
IBhayibhile iyavuma ukuba uSathana uMtyholi wagxothwa emazulwini ibe ngoku, kunanini na ngaphambili, unempembelelo enamandla nembi kuhlanga loluntu ngokubanzi. Kwakhona isixelela ukuba kwanangemihla yompostile uYohane, ihlabathi liphela lalilele emandleni alowo ungendawo. (1 Yohane 5:19; ISityhilelo 12:9, 12) Noko ke, kanye njengokuba uThixo uSomandla engalawuli into nganye esiyenzayo okanye amisele isiphelo sethu esaziwa nguye yedwa kusengaphambili, asinakulibeka ngokuthe ngqo ityala kuSathana ngazo naziphi na iimpazamo neentsilelo zethu. Inyaniso elungeleleneyo yeZibhalo ikukuba “ngamnye ulingwa ngokutsalwa nokuwexulwa ngumnqweno wakhe. Wandula ke umnqweno, xa uthe wakhawula, uzale isono.” (Yakobi 1:14, 15) Umpostile uPawulos wabhala la mazwi aphefumlelweyo: “Ningalahlekiswa: UThixo akanguye lowo wokwenziwa intlekisa. Kuba nantoni na umntu ayihlwayelayo, uya kuvuna kwayona.”—Galati 6:7.
Ngoko uYehova uThixo uya kuphendulisa ngamnye wethu ngoko sikwenzayo. Simele sikulumkele ukuzingxengxezela ngenxa yemizila yemfuza nokungafezeki esakuzuz’ ilifa. UThixo wabaphendulisa abantu ababenogonyamelo nababengamafanasini beSodom neGomora yamandulo ngenxa yezenzo zabo zokuqaqadeka. Ngokucacileyo, akazange abagqale abemi balapho njengabaziintsizana, izidalwa ezingakwaziyo ukuzinceda ekwenzeni okungendawo ngenxa yeziphako zemizila yemfuza ezicingelwayo. Ngendlela efanayo, abantu ababephila ngomhla kaNowa babengqongwe ziimpembelelo ezininzi ezingendawo; kodwa ke, kwakufuneka benze ukhetho, isigqibo sobuqu, ukuba babeza kusinda kuNogumbe owawuza kufika kungekudala. Abambalwa benza ukhetho olufanelekileyo. Inkoliso ayizange yenjenjalo.
Umprofeti ongumHebhere uHezekile uyasiqinisekisa ukuba kufuneka siyilawule indlela esiphila ngayo ukuba sifuna ukufumana inkoliseko kaThixo: “Wena ke, xa uthe wamvuselela ongendawo, akabuya endleleni yakhe, endleleni engendawo: wofa ngobugwenxa bakhe, kodwa wena uwuhlangule umphefumlo wakho.”—Hezekile 3:19.
Olona Ncedo Lululo Esinokulufumana
Kambe ke, sifuna uncedo ukuze sikwazi ukubulawula ubomi bethu bemihla ngemihla, yaye kuninzi lwethu, oku kulucelomngeni. Kodwa asimele siphelelwe lithemba. Nangona utyekelo lwethu lwesono esaluzuz’ ilifa lungamkeleki kuThixo, ukuba sifuna ukulungisa indlela esiziphatha ngayo, uya kusinika olona ncedo lululo esinokulufumana—umoya wakhe oyingcwele nenyaniso yakhe ephefumlelweyo. Phezu kwalo nje naluphi na utyekelo lwemizila yemfuza esisenokuba nalo kunye nayo nayiphi na impembelelo yezinto ezisingqongileyo esenokusichaphazela, ‘sinokubuhluba ubuntu obudala kunye noqheliselo lwabo, size sambathe ubuntu obutsha, obuthi ngolwazi oluchanileyo benziwe bube butsha ngokomfanekiso waLowo wabudalayo.’—Kolose 3:9, 10.
AmaKristu amaninzi kwibandla laseKorinte enza iinguqulelo eziphawulekayo kwindlela yawo yokuziphatha. Ingxelo ephefumlelweyo isixelela oku: “Abahenyuzi, nabanquli-zithixo, nabakrexezi, namadoda agcinelwe iinjongo ezingezozamvelo, namadoda alala namadoda, namasela, nabantu ababawayo, namanxila, nabatshabhisi, nabaphangi abayi kubudla ilifa ubukumkani bukaThixo. Ukanti oko koko bambi kuni babekuko. Kodwa niye nahlanjwa nahlambuluka, kodwa niye nangcwaliswa, kodwa niye navakaliswa ningamalungisa egameni leNkosi yethu uYesu Kristu nangomoya kaThixo wethu.”—1 Korinte 6:9-11.
Ngoko ukuba silwa nokungafezeki kwethu, masingoyiswa kuko. AmaKristu amaninzi aphila kule mihla, aye angqina ukuba ngoncedo lukaYehova, ayakwazi ‘ukuguquka ngokutshintsha iingqondo zawo, ukuze akungqine ngokwawo ukulunga nokwamkeleka nokugqibelela kokuthanda kukaThixo.’ Azalisa iingqondo zawo ngazo naziphi na izinto eziyinyaniso, ezibubulungisa, ezinyulu, ezithandekayo, ezinesidima, nezifanelwe yindumiso; yaye ‘ayaqhubeka ezigqala ezi zinto.’ Azondla ngokutya okuqinileyo kokomoya yaye ngokukusebenzisa aqeqeshela amandla awo okuqonda ekwahluleni phakathi kokulungileyo nokubi.—Roma 12:2; Filipi 4:8; Hebhere 5:14.
Kuyavuyisa ukwazi ngemigudu ayenzayo, iintsilelo zawo zokwexeshana nokuba ekugqibeleni aya kuphumelela ngoncedo lomoya oyingcwele kaThixo. UThixo uyasiqinisekisa ukuba ukutshintsha indlela esiziphethe ngayo ngokufuthi kubandakanya intliziyo neminqweno yayo: “Kuba ubulumko buya kungena entliziyweni yakho, ukwazi kwenze mnandi umphefumlo wakho. Ukunkqangiyela kokugcina, ukuqonda kokulondoloza; ukuba kukuhlangule endleleni embi.”—IMizekeliso 2:10-12.
Ngoko ke, ukuba ufuna ukwenza ubomi obungunaphakade usukelo lwakho—ubomi obungenazo iinkathazo zeli hlabathi lingendawo nobuthathaka bokungafezeki—‘zibhokoxe’ ekulawuleni indlela obuphila ngayo ubomi bakho ngoku uze ukhokelwe bubulumko basezulwini. (Luka 13:24) Vumela umoya oyingcwele kaYehova ukuncede ukuze ukwazi ukuvelisa isiqhamo sokuzeyisa. Kwenze umnqweno wentliziyo yakho ukuphila ubomi bakho ngokuvisisana nomthetho kaThixo, uze uthobele eli cebiso: “Nazintweni zonke zigcinwayo, londoloza intliziyo yakho; kuba aphuma kuyo amathende obomi.” (IMizekeliso 4:23) Ukufumana “ubomi benene” kwihlabathi elitsha likaThixo—apho uYehova uThixo eya kulungisa zonke iziphene zemizila yemfuza ngesizinzi sokholo kwidini lentlawulelo likaYesu Kristu—kuyifanele yonke imigudu oyenzayo yokulawula indlela ophila ngayo kweli hlabathi!—1 Timoti 6:19; Yohane 3:16.
[Umfanekiso okwiphepha 23]
Ukufundisisa iBhayibhile kunokusinika amandla okoyisa ubuthathaka obendeleyo
[Umfanekiso okwiphepha 23]
Isifundo seBhayibhile sinokusinceda sibambelele ngokwenene kwimilinganiselo kaThixo yokuziphatha