Indlela Onokubuguqula Ngayo Ubuntu Bakho
YINTONI engakhankanywanga ngoxa bekuxutyushwa ngeendlela zokwakha iimpawu zobuntu ezifanelekileyo nezokwenza inguqulelo? Yiminqweno yomntu nokunamathela kuzimiselo lwakhe! Ukusebenzisa inkululeko yakhe yokuzikhethela ngokhetho lobuqu ekuqonda okubandakanyekileyo. Ngamafutshane, into engakhankanywanga kukuzeyisa kwakhe!
Abo banikela unyango kwiimpawu zobuntu bafumanise ukuba baba nethuba elihle lokufumana imiphumo ehlala ihleli xa umntu onyangwayo enelungelo lokwenza isigqibo ngohlobo lweempawu zobuntu azinqwenelayo. UVance Packard ubhala oku kwincwadi yakhe ethi The People Shapers: “Kucacile ukuba ngesiluleko esincinane, nawuphi na umntu oqiqayo nokrelekrele ngoku unokuzilungisa ngokwakhe iimpawu zakhe zobuntu.” Oku kubizwa ngokuba kukuzilawula. Ngamany’ amazwi, xa kusetyenziswa umlinganiselo othile wokuzeyisa kuye kwabonwa iinguqulelo ezibalaseleyo.
AmaKristu awatsali nzima xa kufuneka esebenzise ukuzeyisa, kuba aye afunda ukukubonakalisa njengesinye seziqhamo ezisithoba zomoya oyingcwele kaThixo. (Galati 5:22, 23) Oku kuthetha ukuba amandla asebenzayo kaThixo uSomandla anokuziguqula iimpawu zobuntu bakho aze akuncede uphumelele.
Ngoko, yintoni ofuna ukuyenza ngeempawu zakho zobuntu? Ngaba ngokwenene uyafuna ukuziguqula? Ukuba uyafuna, ufuna ukuziguqula zisuka entwenini? Uziguqulela entwenini? Yaye ngoba? Ngaba unethemba lokuba ungazenzela oku ngamandla akho? Unokulufumana phi uncedo oluvelisa ezona ngenelo zifunekayo?
Makhe sihlolisise ezinye iindlela nezinto zokuguqula iimpawu zobuntu.
Inyathelo 1: Fumanisa Oko Ukuko Ngokwenene
Usisiqalelo soko ufuna ukuba kuko. Ubuntu bakho obutsha bufanele bakhiwe ngokuguqula ubuntu bakho obudala. Ngoko ufanele uzazi ngokuchanileyo. Ngaba unokuzichaza iinkalo zeempawu zakho zobuntu obungathanda ukuziguqula?
Ekubeni kunzima ukuzihlolisisa iimpawu zakho zobuntu, kufuneka ufune umthombo ohlonelwayo nonokuthenjwa. IBhayibhile Engcwele iyanconyelwa koku. Sebenzisa iBhayibhile, yaye uya kuziqonda ngendlela ekusenokwenzeka ukuba akuzange uziqonde ngayo ngaphambili. Usekwanokungakuthandi oko kuboniswayo ngawe, kodwa unokuqiniseka ukuba iya kuba ngumfanekiselo ochanileyo.
IBhayibhile iye yafaniswa nesipili, yaye abantu bayabongozwa ukuba baqondele kuyo. “Ngokuba umntu, ukuba ungumphulaphuli nje welizwi, engemenzi walo, lowo ufana nendoda eqiqa [ejonga] ubuso bayo bobuntu esipilini; kuba iyaziqiqa [iyazibona], imke, ilibale kwaoko ukuba ibinjani na. Ke yena oqondele emthethweni ogqibeleleyo wayo inkululeko, ahlale ehleli kuwo, lowo, ethe nje akaba ngumphulaphuli olibalayo, esuke waba ngumenzi womsebenzi: yena uya kuba noyolo ekwenzeni kwakhe.” (Yakobi 1:23-25) IBhayibhile, xa iqondwa yaye isetyenziswa ngokuchanileyo, inamandla amakhulu okuhlalutya nacacileyo angayi kubonakalisa kuphela uhlobo lomntu onguye kodwa akwatyhila iintshukumisa nesimo sengqondo sakho. Ngenxa yoko, uPawulos wabhala wathi: “Ilizwi likaThixo liphilile, liyasebenza, libukhali ngaphezu kwamakrele onke antlangothi mbini; . . . linokugweba iingcingane nezicamango zentliziyo.” ILizwi likaThixo likwahlabela mgama ngokunikela ukhokelo ngokuphathelele oko kulungileyo ngokwenene noko kuphosakeleyo ngokwenene.—Hebhere 4:12; 5:14.
IBhayibhile inokukwenzela zonke ezi zinto kuba iliLizwi likaYehova, uThixo oyinyaniso noqondayo. Ngokutsho kweNdumiso 139, uThixo uyakugocagoca aze enze uhlalutyo oluchanileyo ngoko ukuko. Kunjengokuba indinyana 1 isithi: “Yehova, undigocagocile, wandazi.” UThixo ebekuhlola ukususela ekukhawulweni kwakho. Ukwazi ukusuka nokuhlala. Uye walungiselela ukuba eBhayibhileni kubhalwe inkcazelo engazo zonke iindidi zobomi babantu. Uya kuzifumana uchaziwe ndaweni ithile eBhayibhileni, enoba kungecala elihle okanye elibi.
Ngoko, unokufumanisa oko ukuko ngokwenene—ukuba uyafuna.
Inyathelo 2: Gqiba Ngoko Ufuna Ukuba Kuko
Ukuba uza kwenza inguqulelo, qiniseka ukuba wenza inguqulelo eyimfuneko. Qinisekisa ukuba oko koko ukufunayo yaye kulunge ngakumbi kunoko unako ngoku. Luluphi usukelo lweempawu zobuntu eziphuculiweyo ofanele uzibekele lona? Ungalifumana phi icebiso elilungileyo lokufumana iimpawu zobuntu ozinqwenelayo? Kwakhona, kunconyelwa ukuba usebenzise iBhayibhile kule nkalo.
IBhayibhile ikubongoza ukuba uguqukele kokulungileyo, wamkele “ubuntu obutsha.” UPawulos waluleka: “Nithi ngakwihambo yangaphambili nimlahle umntu omdala, owonakaliswayo ngokokweenkanuko zokulukuhla; . . . nimambathe umntu omtsha [“ubuntu obutsha,” NW], othe ngokukaThixo wadalelwa ebulungiseni, nasebungcweleni benyaniso.” (Efese 4:22-24) IBhayibhile ikubonisa oko ezi mpawu zilunge ngakumbi zikuko. Ngaba uyalikhumbula ihlabathi elifezekileyo elichazwe ngaphambilana? Ukuba ufuna ukuphila kwelo hlabathi, ufanele uyibone imfuneko yokuvelisa iimpawu ezichazwe kwabaseKolose 3:12-17, iimpawu ezinjengemfesane, ububele, ukuthobeka, ubulali, umonde, ukuxolela, uthando, uxolo nombulelo.
Ngoko wakube uyihlolisisile iBhayibhile, zimisele usukelo. Lubhale phantsi. Sukelo ngalunye lubeke kwindawo yokuqala. Sebenzela kulo!
Inyathelo 3: Funa Imizekelo Efanelekileyo
Ubukhulu becala iimpawu zakho zobuntu ziye zaphenjelelwa kukulandela kwakho umzekelo wabanye—abahlobo, izinxulumani, abazali, abafundisi-ntsapho.
Ngoko, kutheni ungathi emva kokwenza isigqibo ngosukelo lwesimilo lweempawu zobuntu ozinqwenelayo, ukhangele umntu oziphethe ngendlela ofuna ukuyilandela? Emva koko funa uncedo lwaloo mntu. Umzekeliso weBhayibhile ubonisa ubulumko boku xa usithi: “Ohamba nezilumko uba sisilumko naye.”—IMizekeliso 13:20.
IBhayibhile iqulethe ingxelo engobomi boyena mntu ungumzekelo ubalaseleyo esifanele sonke siwulandele, uYesu Kristu. Funda indlela awaziphatha ngayo kuzo zonke iimeko, ihambo yakhe yokuziphatha, ukuqonda nobulumko bakhe, ukundiliseka kwakhe, ulwazelelelo nobubele bakhe obubalaseleyo nokuba nenkxalabo ngabantu awayephila kunye nabo. Hayi indlela ekuhlaziya ngayo ukumva esithi: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla imiphefumlo yenu. Kuba idyokhwe yam imnandi, nomthwalo wam ulula”!—Mateyu 11:28-30.
Izigidi kuwo onke amazwe sele ziphethukele kuKristu njengomzekelo ezifanele ziwulandele ibe zenza konke okusemandleni azo ukulandela emanyathelweni akhe, kanye njengokuba naye wahamba ngendlela awayiyalelwa nguYise wasemazulwini, uYehova uThixo. Ezi zigidi, zidiniwe ziimpawu zabantu ezimbi eziqhelekileyo ehlabathini namhlanje, ziye zaphethukela kumabandla asekuhlaleni amaNgqina kaYehova ukuze zifumane uncedo nokhokelo ibe azikhange zidaniswe. KwiiHolo zawo zoBukumkani, kukho abantu abaninzi abayimizekelo ebalaseleyo enjengekaKristu, ibe uncedo olungakumbi luye lwanikelwa kwabo bafuna ukuphucula iimpawu zabo zobuntu. Kambe ke, amaNgqina aneentsilelo eziqhelekileyo kuluntu olungafezekanga; kodwa akwanawo namandla omoya osebenzayo nophembelela ukuqiqa kwawo.—Efese 4:23.
Inyathelo 4: Fumana Amandla Okuphumelela
Kuya kuba yintuthuzelo kwabo banqwenela ukuguqula iindlela zabo ukwazi ukuba uncedo luyafumaneka. “Ubuntu obutsha” buchazwa ‘njengobudalwe ngokokuthanda kukaThixo ebulungiseni benyaniso nokunyaniseka.’ (Efese 4:24, NW) Oku kuyasiqinisekisa ukuba uThixo uya kunikela uncedo olungaphaya kolomntu kwabo balunqwenelayo. Unokulufumana njani uncedo lukaYehova uThixo?
Olunye lolona ncedo luphambili ngumthandazo wobuqu. Umthandazo uyindlela ebalulekileyo yokunxibelelana noMthombo wamandla afunekayo ukuguqula iindlela zakho. Umthandazo ukunika ithuba lokuthetha ngokukhululekileyo nangokungafihlisi nangaliphi na ixesha, kwanaphakathi kwamaxesha anzima. Ilungelo elinjalo lokufuna uncedo kuThixo wokwenene nonenyameko kuwodlula lee amalungelo okufuna uncedo lwakhe nawuphi na umntu ibe lisebenza ngokukhawuleza. Ngenxa yoku, umpostile uYohane wayenokubhala aze athi: “Kuko oku ukungafihlisi esinako kuye: Ukuba sithi sicele into ngokokuthanda kwakhe, uyasiva.” (1 Yohane 5:14) Ibe amazwi omprofeti uIsaya ayasikhuthaza: “Funani uYehova esenokufunyanwa; mbizeni esekufuphi. Ongendawo makashiye indlela yakhe, indoda enobutshinga mayishiye iingcingane zayo, ibuyele kuYehova: Woba nemfesane kuyo; ibuyele kuThixo wethu ngokuba woxolela ngokukhulu.”—Isaya 55:6, 7.
Kwakhona ufundisiso lweBhayibhile luyomeleza, luya kuhlaziya, lukwenze ukuba imihla ngemihla ukhangele kusukelo lwakho. IBhayibhile ikunika amandla afanelekileyo njengoko uzabalazela ukufikelela usukelo lweempawu zobuntu ozinqwenelayo. Ngaphezu koko, ishukumisa imvakalelo yokuzicekisa iindlela zakho zangaphambili. Ukungenisa yonke imihla ulwazi lweBhayibhile noko ikuquletheyo kuya kukunceda nasekushenxiseni nayiphi na ingcamango engafanelekanga ebinokungena ivela kumaziko osasazo ehlabathi nakwiinkqubo zalo zemfundo.
Iintlanganiso zamaKristu, eziqhutyelwa kwiHolo yoBukumkani yasekuhlaleni yamaNgqina kaYehova, azinikeli kuphela imfundiso ngemilinganiselo yeBhayibhile kodwa kuzo ukwafumana nenkxaso yeqela nokulolana okuluncedo ekuphuculeni iimpawu zakho zobuntu. Le nkxaso elungiselelwe ngebandla iye yanceda abaninzi baphumelela ekuguquleni iimpawu zabo zobuntu. Kutheni ungaxubushi ngoncedo olunjalo nomntu olifumene kuye eli phephancwadi?
Inyathelo 5: Ukuhlangabezana Nokuvukwa Likakade
Abaninzi baye bazama ukuphucula iindlela zabo kodwa baye badimazeka ngenxa yokuvukwa likakade okusenokubonakala kungaphepheki. Umphumo uye waba kukuba abathile banikezele ngokupheleleyo. Abanjalo badla ngokucinga ukuba ukuba oko babekugqala njengethemba labo ngoku kusilele, akukho themba limbi konke konke. Ngoko basenokuziyekelela ekubeni ngamaxhoba eempembelelo zehlabathi. Ngokufuthi imeko yabo iba mandundu kunokuba babenjalo ngaphambi kokuba bazame ukwenza inguqulelo.
Hlala uziqinisekisa ukuba naliphi na ikhondo langaphambili elinganqwenelekiyo lifanele ukuphetshwa. Umpostile uPawulos wabhekisela kwiimpawu zakhe zobuntu zangaphambili nendlela yokuphila njengeziyinkunkuma. (Filipi 3:8) Ngoko ukuba wena, ekwenzeni inguqulelo, uphazanyiswa ngumqobo othile okanye kukuvukwa likakade, qula, uze uqhubekele phambili. Zingisa! Yilwa! Kuya kuwufanela loo mgudu!
Khumbula ukuba, iindlela nemizila yakho emininzi yanyanzelwa kuwe ngamandla angaphandle nangaphaya kokhetho okanye ulawulo lwakho ngelo xesha. La mandla asasebenza. Ngaba uza kuwavumela akukhokelele koko kuthandwa ngawo? Akunjalo? Ngoko ungaze unikezele!
Izigidi zabantu ezineemvelaphi ezahlukahlukeneyo—kwanezikrelemnqa nabantu ababebandakanyeke ngokunzulu ekuziphatheni okubi—ziye ngokunempumelelo zaziguqula iimpawu zazo zobuntu. Ziye zayilondoloza imilinganiselo yazo ephuculiweyo kude kube namhlanje, uninzi lukwenze oku kangangamashumi eminyaka, zinamathele kwiindlela zazo ezilunge ngakumbi nakukhetho lwazo oluhle lokugcina ingqibelelo. Kodwa nguThixo owazinika amandla nentshukumisa yokwenza oko. Kunjengokuba umpostile uPawulos wathi: “Ndinokuzenza izinto zonke, ndikulowo undomelezayo.”—Filipi 4:13.
Ziyaphumelela kumlo wokwenza okulungileyo. Nawe unokuyenza inguqulelo ukuba ngokwenene uyafuna yaye unokunandipha ubomi kwihlabathi elitsha likaThixo.—INdumiso 37:29; 2 Petros 3:13.
[Umfanekiso okwiphepha 7]
Inyathelo 1: Fumanisa oko ukuko ngokwenene
[Umfanekiso okwiphepha 8]
Inyathelo 2: Gqiba ngoko ufuna ukuba kuko
[Umfanekiso okwiphepha 8]
Inyathelo 3: Funa imizekelo efanelekileyo
[Umfanekiso okwiphepha 9]
Inyathelo 4: Fumana amandla owafunayo ukuze uphumelele
[Umfanekiso okwiphepha 9]
Inyathelo 5: Hlangabezana nokuvukwa likakade
[Umfanekiso okwiphepha 10]
Abo benza inguqulelo banokuzuz’ ilifa umhlaba oneenguqulelo