Ngubani Onetyala—Nguwe Okanye Yimfuza?

IZAZINZULU zimaxhaphetshu zizama ukuhlola enoba kukho imizila yemfuza ebangela ubunxila, ubufanasini, ukuziphatha kakubi ngokwesini, ugonyamelo, nokunye ukuziphatha okungaqhelekanga kwanokufa. Ngaba bekungayi kuvuyisa ukufumanisa ukuba asinatyala ngezinto ezimbi esizenzayo kodwa sifuzile nje? Kuyinto eqhelekileyo ngabantu ukutyhola omnye umntu okanye into ethile ngeempazamo zethu.

Ukuba yimfuza enetyala, izazinzulu zithi zinako ukuyiguqula, ziguqule iimpawu ezingathandekiyo zemizila yemfuza. Impumelelo yakutshanje yokucalula inkqubo iphela yemizila yomntu yemfuza iye yabangela ukwanda kwamathemba anjalo.

Ngoko ke, eli linge lisekelwe kwingcamango yokuba imizila yethu yemfuza inetyala ngezono neempazamo esizenzayo. Ngaba abecuphi abaziinzululwazi bafumene ubungqina obaneleyo bokutyhola imizila yethu yemfuza? Ngokucacileyo, impendulo iya kuyichaphazela ngamandla indlela esizijonga ngayo nekamva lethu. Noko ke, ngaphambi kokuba siqwalasele ubungqina, kuya kusinceda ukukhangela imvelaphi yomntu.

Apho Konakala Khona

Inkoliso yabantu iqhelene, okanye ubuncinane ikhe yeva ngengxelo yokuwela esonweni kwabantu bokuqala ababini, uAdam noEva, kumyezo wase-Eden. Ngaba kwasekuqaleni kwakukho isiphako kwindlela ababedalwe ngayo, nto leyo eyayinokubenza bone baze bangathobeli?

UMdali wabo, uYehova uThixo, onemisebenzi egqibeleleyo, wathi emva kokuba ezidalile izinto zakhe zasemhlabeni “zilunge gqitha.” (Genesis 1:31; Duteronomi 32:4) Ukubonisa ukuba wayenelisekile ngumsebenzi wakhe, wabasikelela aba bantu babini bokuqala waza wabayalela ukuba baqhame, bazalise umhlaba ngezidalwa ezingabantu, baze banyamekele indalo esemhlabeni—nto leyo ebingenakwenziwa ngumntu ongaqinisekanga ngomsebenzi wakhe.—Genesis 1:28.

Ngokuphathelele ukudalwa kwabantu bokuqala ababini, iBhayibhile ithi: “UThixo wamdala umntu ngokomfanekiso wakhe, wamdala ngokomfanekiso kaThixo; wadala indoda nebhinqa.” (Genesis 1:27) Oku akuthethi ukuba abantu benziwa banomzimba ofana noThixo, kuba “uThixo unguMoya.” (Yohane 4:24) Kunoko, oku kuthetha ukuba abantu badalwe beneempawu ezifana nezikaThixo, nesazela. (Roma 2:14, 15) Kwakhona babenenkululeko yokuzikhethela, bekwazi ukucingisisa ngombandela othile baze bazenzele isigqibo ngoko baza kukwenza.

Noko ke, abazali bethu bokuqala abazange bashiywe bengenalo ukhokelo. Kunoko, balunyukiswa ngemiphumo yokwenza okubi. (Genesis 2:17) Ngoko ubungqina bubonisa ukuba xa uAdam wayefanele akhethe phakathi kokwenza okulungileyo nokubi, wakhetha ukwenza okwakubonakala kuyinzuzo kuye ngelo xesha. Walandela umfazi wakhe ekwenzeni okubi kunokuba acinge ngolwalamano lwakhe noMdali wakhe okanye imiphumo eya kuhlala ixesha elide yesenzo sakhe. Kwakhona, kamva wazama ukumbek’ ityala uYehova, esithi ukhohliswe ngumfazi anikwe nguye.—Genesis 3:6, 12; 1 Timoti 2:14.

Indlela uThixo awasisingatha ngayo isono sika-Adam noEva ityhila okuthile. Akazange azame ukulungisa nto ithile ‘kwindlela awayebadale ngayo.’ Kunoko, wenza kanye into awayebaxelele ukuba iya kwenzeka ngenxa yezenzo zabo, nto leyo eyabakhokelela ekufeni. (Genesis 3:17-19) Le mbali yesiqalo somntu isinceda siqonde indlela umntu aziphatha ngayo.a

Ubungqina Bokuba Asiyomfuza

Kangangexesha elide, izazinzulu bezisiwa zivuka zifuna imizila yemfuza ebangela ukugula kwanendlela yokuziphatha kwabantu nendlela ezinokubanyanga ngayo. Emva komsebenzi wophando weminyaka elishumi owenziwa ngamaqela amathandathu, kwafunyanwa umzila wemfuza obangela isifo sikaHuntington, nangona aba baphandi bengazi indlela lo mzila wemfuza osibangela ngayo esi sifo. Noko ke, xa ithetha ngolu phando, iScientific American icaphula isazi ngebhayoloji saseHarvard uEvan Balaban, owathi “phantse ukuba akunakwenzeka ukufumana imizila yemfuza ebangela iingxaki zokuziphatha.”

Enyanisweni, uphando lokuzama ukunxulumanisa imizila yemfuza nendlela abantu abaziphatha ngayo luye lwawa phantsi. Ngokomzekelo, kwiPsychology Today, ingxelo ethetha ngamalinge okufumana imizila yemfuza ebangela udandatheko ithi: “Inkcazelo engokulawulwa kwezigulo zengqondo yenze kwacaca ukuba ezi zigulo azibangelwa kuphela yimizila yemfuza.” Le ngxelo inikela umzekelo isithi: “Kubemi baseMerika abazalwa ngaphambi kowe-1905 ngumntu omnye kwabalikhulu owaba nengxaki yokudandatheka xa eneminyaka engama-75 ubudala. Kubemi baseMerika abazalwe kwiminyaka engama-50 kamva, abathandathu kwabalikhulu baba nengxaki yokudandatheka xa beneminyaka engama-24 ubudala!” Ngenxa yoku kwafikelelwa kwisigqibo sokuba kuphela zizinto ezenzeke ekuphileni ezinokubangela umahluko omkhulu kangaka kwixesha nje elifutshane.

Olu phando nolunye olwenziweyo lusixelela ntoni? Ngoxa imizila yemfuza isenokuba nendima ekwakheni ubuntu bethu, kucacile ukuba zikho nezinye izinto eziyimpembelelo. Eyona nto ingamandla yindawo esihlala kuyo, eguquke ngamandla kweli xesha lethu. Xa sicinga ngendlela elizonwabisa ngayo ulutsha lwanamhlanje, incwadi ethi Boys Will Be Boys ithi akunakwenzeka ukuba abantwana babe nemilinganiselo yokuziphatha okuhle xa “bekhula bebukela iinkqubo nemiboniso bhanyabhanya kumabonwakude ixesha elide apho abantu behlaselwa, bedutyulwa, behlatywa, bekhutshwa amathumbu, benqunqwa, bexotyulwa isikhumba, okanye besuswa amalungu omzimba, xa abantwana bekhula bephulaphula umculo okhuthaza ukudlwengula, ukuzibulala, ukusebenzisa iziyobisi, ukunxila nokuba neenkani.”

Kucacile ukuba, uSathana, “umlawuli weli hlabathi,” uye wabangela umoya wokwanelisa iminqweno yabantu yokuziphatha okonakeleyo. Yaye ngubani onokulikhanyela elokuba sonke siphantsi kwempembelelo enamandla enjalo?—Yohane 12:31; Efese 6:12; ISityhilelo 12:9, 12.

Unozala Weengxaki Zoluntu

Njengoko sesibonile, iingxaki zoluntu zaqala xa abantu bokuqala ababini bonayo. Oku kwaphumela entwenini? Ngoxa izizukulwana eziyinzala ka-Adam zingenatyala ngesono sakhe, sekunjalo zonke zizalwa zinesono, zingafezekanga, yaye ngenxa yoku zizuze ilifa elikukufa. IBhayibhile iyacacisa: “Ngenxa yoko, kanye njengokuba isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”—Roma 5:12.

Ukungafezeki komntu kumfak’ engxakini. Kodwa oko akumenzi angaphenduliswa ngezenzo zakhe. IBhayibhile ibonisa ukuba abo banokholo kwilungiselelo likaYehova lobomi baze baphile ngokuvisisana nemilinganiselo kaThixo uya kubamkela. Ngenxa yothando lwakhe lobubele, uYehova uye wenza ilungiselelo lenceba lokuhlawulela uluntu, ngokungathi kunjalo, ukuthenga oko kwalahlwa nguAdam. Elo lungiselelo lidini lentlawulelo loNyana wakhe ofezekileyo, uYesu Kristu, owathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16; 1 Korinte 15:21, 22.

Umpostile uPawulos wavakalisa uxabiso olunzulu ngeli lungiselelo. Wadanduluka esithi: “Hayi usizana endilulo! Ngubani na oya kundihlangula kulo mzimba usisisulu sokufa? Ndiyambulela uThixo ngaye uYesu Kristu iNkosi yethu!” (Roma 7:24, 25) UPawulos wayesazi ukuba xa enokonganyelwa sisono ngenxa yobuthathaka, wayenokucela uxolo kuThixo ngesizinzi sedini lentlawulelo likaYesu Kristu.b

Njengakwinkulungwane yokuqala, namhlanje abantu abaninzi ababephila ubomi bokuziphatha okubi okanye ababebonakala bengooncanyelweni baye bazuza ulwazi oluchanileyo lweenyaniso zeBhayibhile, benza iinguqulelo ezifunekayo, baze bafanelekela iintsikelelo zikaThixo. Iinguqulelo ekuye kwafuneka bazenze bezingelula, yaye abaninzi kubo kusafuneka balwe nemikhwa emibi. Kodwa ngoncedo lukaThixo, bayakwazi ukugcina ingqibelelo baze bafumane uvuyo ekumkhonzeni. (Filipi 4:13) Cinga nje ngomnye umzekelo walowo wenza iinguqulelo ezinkulu ukuze akholise uThixo.

Amava Akhuthazayo

“Xa ndandiseyinkwenkwana efunda esinaleni, ndaba nenxaxheba kwizenzo zobufanasini, nangona ndandingacingi ukuba ndilifanasini. Abazali bam babeqhawule umtshato, yaye ndandinqwenela uthando lwabazali endingazange ndilufumane. Emva kokuba ndigqibile esikolweni, ndaya kwinkonzo yasemkhosini eyayisisinyanzelo. Kwinkampu eyayisecaleni kwaleyo endandihlala kuyo kwakukho iqela lamafanasini. Ndandiyinqwenela indlela awayephila ngayo, ngoko ndaqalisa ukunxulumana nawo. Emva kokunxulumana nawo kangangonyaka, ndaqalisa ukucinga ukuba nam ndilifanasini. Ndaqiqa ngelithi: ‘Le yindlela endiyiyo, yaye akukho nto ndinokuyenza ngayo.’

“Ndaqalisa ukuthetha ngendlela athetha ngayo yaye ndisiya apho ahlanganisana khona, apho iziyobisi notywala zazidlal’ abantwana. Nangona oko kwakubonakala kumnandi yaye kubangel’ umdla, eneneni kwakusenyanyeka. Ngaphakathi ndandivakalelwa kukuba olu hlobo lolwalamano lwalungeyonto yokwemvelo yaye lwalungenakamva.

“Kwenye idolophana, ndabona iHolo yoBukumkani yamaNgqina kaYehova ngoxa iintlanganiso zaziqhubeka. Ndangena ndaza ndaphulaphula intetho, eyayithetha ngeemeko zeParadesi ezayo. Emva koko ndadibana namanye amaNgqina aze andimemela endibanweni. Ndaya, yaye oko kwandivul’ amehlo—ukubona iintsapho ezonwabileyo zinqula kunye. Ndaqalisa ukufundisisa iBhayibhile namaNgqina.

“Nangona oko kwakunzima, ndaqalisa ukusebenzisa oko ndandikufunda eBhayibhileni. Ndakwazi ukwahlukana nayo yonke imikhwa yam engcolileyo. Emva kokufundisisa iinyanga ezili-14, ndazahlulela kuYehova ndaza ndabhaptizwa. Okwesihlandlo sokuqala ebomini, ndandinabahlobo bokwenene. Ndiye ndakwazi ukunceda abanye ukuba bafunde inyaniso yeBhayibhile, yaye ngoku ndisisicaka solungiselelo kwibandla lamaKristu. Ngokwenene uYehova uye wandisikelela.”

Sinembopheleleko

Ukuzama ukutyhola imfuza ngenxa yendlela yethu yokuziphatha akusincedi nganto. IPsychology Today ithi, kunoba kusincede sicombulule okanye soyise iingxaki zethu, ukwenjenjalo “kunokusenza sicinge ukuba akukho nto sinokuyenza nto leyo engunozala weengxaki zethu ezininzi. Kunokuba sizinciphise ezi ngxaki, siyazandisa.”

Liyinyaniso elokuba sisenokujamelana nemiqobo emikhulu, kuquka ukutyekela kwethu esonweni namalinge kaSathana okufuna singamthobeli uThixo. (1 Petros 5:8) Kuyinyaniso nokuba imizila yethu yemfuza isenokuba nempembelelo ngandlel’ ithile. Kodwa ngokuqinisekileyo, asishiywanga kwesinomhlwa. AmaKristu okwenyaniso afumana uncedo olunamandla—kuYehova, kuYesu Kristu, kumoya kaThixo oyingcwele, kwiLizwi lakhe iBhayibhile nakwibandla lamaKristu.—1 Timoti 6:11, 12; 1 Yohane 2:1.

Ngaphambi kokuba uhlanga lwakwaSirayeli lungene kwiLizwe Lesithembiso, uMoses wakhumbuza abantu ngembopheleleko yabo kuThixo, esithi: “Ndibeke phambi kwakho ubomi nokufa, intsikelelo nesiqalekiso; nyula ke ubomi ukuze uphile, wena nenzala yakho, ngokuthi umthande uYehova uThixo wakho, uliphulaphule ilizwi lakhe, unamathele kuye.” (Duteronomi 30:19, 20) Ngokufanayo namhlanje, mntu ngamnye unembopheleleko yokuzenzela isigqibo sokukhonza uThixo aze enze oko akufunayo. Into ikuwe.—Galati 6:7, 8.

[Imibhalo esemazantsi]

[Imifanekiso ekwiphepha 9]

Ngaba uAdam noEva bona ngenxa yesiphako esikwindlela abadalwa ngayo?

[Imifanekiso ekwiphepha 10]

Ngaba umntu ngamnye unembopheleleko ngezigqibo azenzayo?

[Inkcazelo]

Drug user: Godo-Foto

[Umfanekiso okwiphepha 11]

Amalinge okuzama ukunxulumanisa imizila yemfuza kwindlela abantu abaziphatha ngayo aye awa phantsi

[Umfanekiso okwiphepha 12]

Ukusebenzisa oko iBhayibhile ikuthethayo kunokunceda abo banyanisekileyo ukuba baguqule iindlela zabo