Ekugqibeleni—Urhulumente Oya Kuphelisa Ulwaphulo-mthetho

IBHAYIBHILE yaxela kwangaphambili ukuba ngomhla wethu abantu baya kuba “ngabazithandayo, abathandi bemali, abazidlayo, abanekratshi, abanyelisi, abangabathobeliyo abazali, abangenambulelo, abanganyanisekanga, bengenawo umsa wemvelo, abangayifuni kwaphela imvisiswano, abajindi, abangenakuzeyisa, iindlobongela, abangenakuthanda kulunga.” (2 Timoti 3:2, 3) Iindidi ezinjalo zabantu zizaphuli-mthetho.

Ekubeni abantu besaphula umthetho, xa beguquka babe ngabalunge ngakumbi, ulwaphulo-mthetho luyancipha. Kodwa akukhange nanini na kube lula ngabantu ukuba baguquke babe ngabalunge ngakumbi. Namhlanje kunzima kunanini na ngaphambili, kuba ukususela ngowe-1914, unyaka ochazwa lubalo-maxesha lweBhayibhile, besiphila ‘kwimihla yokugqibela’ yale nkqubo yezinto. Njengokuba iBhayibhile yaxela kwangaphambili, eli thuba lizaliswe ‘ngamaxesha amanqam ekunzima ukuqhubana nawo.’ La maxesha amanqam abangelwa nguSathana uMtyholi, esona saphuli-mthetho sikhulu kunazo zonke, ‘esinomsindo omkhulu, kuba sisazi ukuba sinesihlandlo esifutshane sexesha.’—2 Timoti 3:1; ISityhilelo 12:12.

Oko kungunobangela wokwanda kolwaphulo-mthetho namhlanje. USathana uyazi ukuba yena nenkqubo yakhe baza kutshatyalaliswa kungekudala. Kweli xesha lifutshane lisaseleyo, uzama nayiphi indlela anokuyisebenzisa ukukhuthaza ebantwini iimpawu ezimbi ezichazwe kweyesi-2 kuTimoti isahluko 3. Ngenxa yoko, ukuze urhulumente aphelise ulwaphulo-mthetho, umele aphelise impembelelo kaSathana aze kwakhona ancede abantu baguquke ukuze bangenzi ngendlela echazwe ngasentla. Kodwa ngaba ukho urhulumente okwaziyo ukuphumeza lo msebenzi ungaphaya kwamandla omntu?

Akukho rhulumente wabantu ukwaziyo ukukwenza oku. UJ. Vaskovich, umfundisi womthetho waseUkraine, ubonisa imfuneko “yentlangano enye enamandla, eza kumanyanisa ize ilungelelanise imigudu yemibutho karhulumente neyasekuhlaleni.” Yaye uMongameli uFidel Ramos wakwiiPhilippines wathi kwinkomfa yehlabathi eyayingolwaphulo-mthetho: “Ngenxa yokuba impucuko iye yenza ihlabathi labonakala lilincinane, ulwaphulo-mthetho luye lwakwazi ukunqumla imida yeentlanga yaye luye lwakhula lwaba yingxaki yamazwe ngamazwe. Ngenxa yoko nezicombululo zifanele ngokufanayo zibe zezamazwe ngamazwe.”

“Intlekele Yehlabathi Lonke”

IZizwe Ezimanyeneyo yintlangano (yezizwe ngezizwe) yamazwe ngamazwe. Ukususela ekusekweni kwazo, bezisoloko zizabalazela ukuthintela ulwaphulo-mthetho. Kodwa azinazicombululo kanye njengokuba oorhulumente bamazwe bengenazo. Incwadi ethi The United Nations and Crime Prevention ithi: “Amazwe amaninzi ayoyiswa lulwaphulo-mthetho olwenzeka phakathi kwawo yaye intlangano yezizwe ngezizwe ayikwazi ukuthintela isantya olunwenwa ngaso ulwaphulo-mthetho phakathi kwamazwe ngamazwe. . . . Ulwaphulo-mthetho olwenziwa ngamaqela alungelelanisiweyo ezaphuli-mthetho luye lwanda ngomlinganiselo oxhomis’ amehlo, lunemiphumo emibi ngakumbi yogonyamelo lwasemzimbeni, izoyikiso nokunganyaniseki kwamagosa karhulumente. Ubugrogrisi buye basuba ubomi bamashumi amawaka amaxhoba angenatyala. Urhwebo lokubawa ngeziyobisi ezikhobokisayo luye lwayintlekele yehlabathi lonke.”

UJames Madison, owaba ngumongameli wesine waseUnited States, wakha wathi: “Xa kumiselwa urhulumente apho abantu baza kulawula abanye, eyona nto inzima yeyokuba: okokuqala kufuneka uvumele urhulumente alawule abo baphantsi kwakhe; uze okwesibini umnyanzele ukuba azilawule.” (Thelekisa INtshumayeli 8:9.) Ngoko esona sicombululo sifanelekileyo besiya kuba kukuthabathel’ indawo oorhulumente “apho abantu balawula abanye” ngenkqubo eza kulawulwa nguThixo. Kodwa ngaba eso sicombululo sisengqiqweni?

Urhulumente Oya Kuphelisa Ulwaphulo-mthetho

AmaKristu okwenyaniso ayakukholelwa oko kuthethwa yiBhayibhile ngoBukumkani bukaThixo.a Ngurhulumente wokwenene. Nangona obu Bukumkani bungabonakali ngenxa yokuba busezulwini, izinto obuzifezayo emhlabeni ziyabonakala. (Mateyu 6:9, 10) Bubunjwe nguKristu Yesu nabantu abali-144 000 ‘abaphuma kuzo zonke izizwe neelwimi nabantu neentlanga ukuze balawule njengookumkani phezu komhlaba.’ Njengokuba iBhayibhile ixele kusengaphambili, lo rhulumente unamandla uya kulawula “isihlwele esikhulu” sabalawulwa, naso “siphuma kuzo zonke iintlanga nezizwe namaqela abantu neelwimi.” (ISityhilelo 5:9, 10; 7:9) Ngaloo ndlela, abalawuli nabalawulwa baphuma kwizizwe ngezizwe, ngabantu abamanyene ngokwenene abaphuma kuzo zonke iintlanga, nabamkelekileyo kuThixo.

Esamkela ulawulo lukaThixo, amaNgqina kaYehova aye ngomlinganiselo omkhulu azoyisa iingxaki zolwaphulo-mthetho phakathi kwawo. Njani? Ngokufunda ukubuxabisa ubulumko obufumaneka kwimigaqo yeBhayibhile, ngokuyisebenzisa kubomi bawo, nangokuzivumela ukuba aqhutywe ngowona moya unamandla kwindalo iphela, umoya kaThixo nesiqhamo sawo—uthando. ILizwi likaThixo lithi: “Yambathani uthando, kuba lungumxokelelwane ogqibeleleyo womanyano.” (Kolose 3:14) Kumazwe angaphezu kwama-230, amaNgqina kaYehova anothando nomanyano, ebonakalisa amanyathelo asele ethatyathwe buBukumkani bukaThixo ukuphelisa ulwaphulo-mthetho.

Oku sinokukubona kwiziphumo zohlolisiso olwenziwa ngowe-1994 awathi amaNgqina kaYehova ali-145 958 eJamani aba nenxaxheba kulo. Uninzi lwawo lwavuma ukuba kwafuneka loyise iziphoso ezinzulu ukuze lube ngamaNgqina. Okwawakhuthazayo ukuba enze oko kukufundisisa iBhayibhile. Ngokomzekelo, angama-30 060 oyisa ukukhotyokiswa licuba okanye iziyobisi; ali-1437 ayeka ukungcakaza; angama-4362 ayeka ukuba nogonyamelo nokuba zizaphuli-mthetho; angama-11 149 oyisa iimpawu ezinjengomona okanye intiyo; yaye angama-12 820 aye abuyisela inzolo kubomi bentsapho obuzele ziingxabano.

Nangona ezi nkcukacha zafunyanwa kumaNgqina kaYehova elizwe elinye, ziyafana kumaNgqina asehlabathini lonke. Ngokomzekelo, khawucinge ngomfana waseUkraine ogama linguYuri. Ngexesha awaqala ngalo ukufundisisa iBhayibhile namaNgqina kaYehova, wayengumkhuthuzi. Wayesele eye naseMoscow apho wayesazi ukuba kwakukho izihlwele ezaziza kuwenza lula “umsebenzi” wakhe.

Ngowe-1993, uYuri waya eMoscow kwakhona, ephakathi kwezihlwele zabantu. Kodwa akukho namnye kubantu abangaphezu kwama-23 000 ababekho eLocomotive Stadium ngoLwesihlanu, ngoJulayi 23, owayemoyika, kuba ngoku wayengomnye wamaNgqina kaYehova. Eneneni, uYuri wayeseqongeni enenxaxheba kucwangciso olwalunikelwa kubaphulaphuli abasuka kumazwe ngamazwe. Eguqukile waba ngumntu olunge ngakumbi, uthobela lo myalelo weBhayibhile: “Lowo ubayo makangabi seba.”—Efese 4:28.

Baninzi abanye abafana noYuri abaye balahla ubomi bokuba zizaphuli-mthetho ukuze bafanelekele ukuphila kwihlabathi elitsha likaThixo lobulungisa. Oku kubonisa ukuba yinyaniso koko kwathethwa nguMhlekazi uPeter Imbert, owayesakuba ligosa lamapolisa aseBritani xa wathi: “Ulwaphulo-mthetho lunokuthintelwa ngokukhawuleza ukuba wonk’ ubani ebekulungele ukwenza umgudu.” Inkqubo yokufundiswa iBhayibhile enikelwa ngurhulumente kaThixo inika abantu abaneentliziyo ezinyanisekileyo ukhuthazo abalufunayo ukuze ‘benze umgudu.’

Ihlabathi Elingenalo Ulwaphulo-mthetho

Naluphi na uhlobo lolwaphulo-mthetho lubonisa ukuswela uthando ngabanye. AmaKristu alandela umzekelo kaYesu, owathi: “Umele umthande uYehova uThixo wakho ngentliziyo yakho iphela ngomphefumlo wakho uphela nangengqondo yakho iphela.” Yaye, “Umele umthande ummelwane wakho njengawe siqu.”—Mateyu 22:37-39.

Ekuphela korhulumente ozimiseleyo ukuphelisa ulwaphulo-mthetho ngokufundisa abantu ukuba bathobele le miyalelo mibini buBukumkani bukaThixo. Namhlanje, amaNgqina kaYehova angaphezu kwezigidi ezihlanu ayangenelwa kule mfundiso. Azimisele ukungavumeli utyekelo lokwaphula umthetho lumile ezintliziyweni zawo, ekulungele ukwenza nawuphi na umgudu oyimfuneko ekufakeni isandla kwihlabathi elingenalo ulwaphulo-mthetho. Oko uThixo akufezileyo ebomini bawo kubonisa oko aya kukwenza kwihlabathi lakhe elitsha phantsi kolawulo lorhulumente wakhe wasezulwini. Khawufan’ ucinge nje ngehlabathi apho kuya kube kungekho mfuneko yamapolisa, iijaji, amagqwetha, okanye iintolongo!

Ukuphunyezwa koku kwihlabathi lonke kuya kuquka esona siphendu embalini yoorhulumente, esiya kubangelwa nguThixo. UDaniyeli 2:44 uthi: “Ngemihla yabo kumkani [abakhoyo namhlanje], uThixo wamazulu uya kumisa ubukumkani [basezulwini] obungayi konakala naphakade. Obo bukumkani abuyi kusala nabantu bambi; buya kuzicola buzigqibe zonke ezo zikumkani, bona bume ngonaphakade.” Kwakhona uThixo uya kutyumza uSathana, ephelisa impembelelo yakhe embi.—Roma 16:20.

Xa oorhulumente babantu bethatyathelwe indawo ngurhulumente kaThixo wasezulwini, abantu abasayi kuphinda balawulane. Ookumkani basezulwini—ookumkani abangaphezulu nakwiingelosi—baya kukhokelela uluntu kwiindlela zobulungisa. Emva koko, akusayi kuphinda kubulawe abantu, kubekho uhlaselo lweegesi ezinetyhefu, okanye iziqhushumbisi zabagrogrisi! Akusayi kuphinda kubekho izinto ezingekho sikweni ezenzeka ekuhlaleni nezingunozala wolwaphulo-mthetho! Akusayi kuphinda kubekho izityebi namahlwempu!

UNjingalwazi uS. A. Aluko, weYunivesithi iObafemi Awolowo eNigeria, wathi: “Amahlwempu akakwazi kulala ebusuku ngenxa yokuba alambile; izityebi azikwazi kulala ebusuku ngenxa yokuba amahlwempu akalalanga.” Kodwa kungekudala wonk’ ubani uya kukwazi ukulala kakuhle esazi ukuba loo rhulumente—urhulumente kaThixo—uluphelise ngokupheleleyo ulwaphulo-mthetho!

[Umbhalo osemazantsi]

[Umfanekiso okwiphepha 10]

Owayesakuba lisela nexhoba lakhe, ngoku bamanyene njengabazalwana abangamaKristu