Ngoobani Abaphila Kummandla Womoya?

IHLABATHI liye laba “yivenkile enkulu” yeenkolelo zonqulo nezivumo zokholo. EAfrika kuphela kukho amawaka amaqela onqulo, ngalinye lineembono zalo ngoko kuqhubekayo kummandla womoya. Kodwa ukuze sifumane inkcazelo ecacileyo neyinyaniso, kufuneka sinikele ingqalelo yethu eBhayibhileni. Iyayichaza imimoya—elungileyo nengalunganga—ehlala kummandla womoya. Ibonisa kwanalowo esinokubhenela kuye ngempumelelo ukuze sifumane uncedo nokhuseleko.

UYehova, UThixo USomandla

Unqulo lwesithethe eAfrika lufundisa ukuba owongamela iminyanya nabavumisi nguThixo usomandla. Incwadi ethi African Mythology ithi: “Alithandabuzeki elokuba phantse bonke, ukuba asingabo bonke, abantu baseAfrika abakholelwayo kuMntu Ophakamileyo, umdali wezinto zonke.” Incwadi ethi African Religion in African Scholarship ithi: “Ekubeni uThixo elawula indalo ngokupheleleyo, bonke abanye abantu benziwa Nguye. Igunya namandla apheleleyo aKuye.”

IBhayibhile iyavuma ukuba kukho Lowo ulawula njengophakamileyo kummandla womoya. Imchaza ‘njengoThixo woothixo yena, nguNkosi kankosi, nguThixo omkhulu, oligorha, owoyikekayo, ongakhethi buso, ongamkeli sicengo.’—Duteronomi 10:17.

Kulo lonke elaseAfrika kukho amakhulu amagama nezibizo ezinikwa lowo ugqalwa njengophakamileyo. Kodwa, lithini iLizwi likaThixo ngegama likaThixo? Umdumisi wabhala: “Wena, ugama linguYehova, unguwe wedwa Osenyangweni phezu kwehlabathi lonke.” (INdumiso 83:18) Eli gama lingcwele livela izihlandlo ezingaphezu kwama-7000 kwingxelo yeBhayibhile, nangona bambi abaguquleli beBhayibhile beye balisusa baza endaweni yalo bafaka ezinye izibizo ‘njengoThixo’ okanye “Nkosi.”

Ngenxa yokuba uYehova engusomandla, unokusinceda. Uzichaza ‘njengoThixo onemfesane, onobabalo, ozeka kade umsindo, omninzi ngenceba nenyaniso: olondolozela amawaka inceba, oxolela ubugwenxa, nokreqo, nesono, ongakhe amenze msulwa onetyala.’—Eksodus 34:6, 7; 1 Samuweli 2:6, 7.

Iingelosi, Abalungiseleli BakaThixo Abanamandla

Kudala ngaphambi kokuba uYehova adale abantu okanye kwanehlabathi, wadala abantu bokomoya ezulwini. IBhayibhile ithi ngexesha uThixo ‘aseka ihlabathi . . . , baduma bonke oonyana [iingelosi] bakaThixo.’ (Yobhi 38:4-7) Kukho izigidi zeengelosi. Umkhonzi kaYehova uDaniyeli wabhala ngombono wezinto zasezulwini awabona kuzo ‘amawaka amawaka ayelungiselela [kuThixo], nezigidi zezigidi zizimisa phambi kwakhe.’—Daniyeli 7:10.

Umntu womoya wokuqala uYehova awamdalayo yayingulowo waye waziwa ngokuba nguYesu Kristu. (Yohane 17:5; Kolose 1:15) Ngaphambi kokuphila njengomntu emhlabeni, uYesu wayephila ezulwini njengesidalwa somoya esinamandla. Emva kokufa kwakhe njengomntu, uYesu wavuselwa ezulwini, apho wayebuqale khona ubomi njengesidalwa somoya esinamandla.—IZenzo 2:32, 33.

UYesu unegunya elikhulu ezulwini. KuYuda 9, uYesu, okwaziwa njengoMikayeli, ubizwa ngokuba “sisiphatha-zingelosi,” oko kuthetha ukuba uyinkosi okanye ingelosi ephambili. (1 Tesalonika 4:16) Ukwanegunya nasemhlabeni. UYehova umnike “igunya, nobuhandiba, nobukumkani, ukuze iintlanga, nezizwe, neelwimi, zimbuse.” (Daniyeli 7:13, 14) Phezu kwalo nje igunya lakhe elikhulu, uYesu usamthobela uYise, uYehova.—1 Korinte 11:3.

Ngoxa iingelosi ezithembekileyo zilungiselela uYehova, ziyabalungiselela nabakhonzi bakaThixo abasemhlabeni. Umpostile uPawulos wabhala: “Azingabo na [iingelosi] zonke oomoya benkonzo kawonke-wonke, abathunyelwa ukulungiselela abo baza kuzuz’ ilifa usindiso?” (Hebhere 1:14) Zixhalabe ngokukhethekileyo ukuba abantu bafunde ngenyaniso engoYehova. Umpostile uYohane wabona embonweni “ingelosi iphaphazela esazulwini sezulu, kwaye yayineendaba ezilungileyo ezingunaphakade ukuba izivakalise njengesigidimi esichulumancisayo kwabo bahleli emhlabeni, nakuzo zonke iintlanga nezizwe neelwimi nabantu, isithi ngelizwi elikhulu: ‘Moyikeni uThixo nize nimnike uzuko.’”—ISityhilelo 14:6, 7.

USathana Needemon, Baziintshaba ZikaThixo Nomntu

Okulusizi kukuba, asizizo zonke iingelosi ezaye zathembeka kuThixo. Zimbi zamvukela, zaba ziintshaba zikaThixo noluntu. Umvukeli oyintloko nguSathana uMtyholi.

Ngoxa abaninzi bebukhanyela ubukho bukaSathana, akukho mntu ukhanyelayo ukuba ububi bukho. Ukukholelwa kubungendawo ngoxa ungakholelwa ukuba bubangelwa ngothile kukhokelela “kwingxaki engenakuphepheka,” itsho incwadi ethi The Death of Satan. “Siyeva ukuba kukho nto ithile abantu abangasenaso isigama sokuyivakalisa.”

Ngokwahlukileyo koko, iBhayibhile inaso isigama esicacileyo esingomthombo wobungendawo. Icacisa ukuba izidalwa eziziingelosi ezadalwa nguYehova zonke zazingamalungisa yaye zilungile; akazange adale nanye ingelosi engendawo. (Duteronomi 32:4; INdumiso 5:4) Sekunjalo, iingelosi, njengabantu, zanikwa amandla okukhetha okulungileyo nokubi. Omnye waba nyana bomoya bafezekileyo wakhulisa umnqweno wokuzingca wokufuna ukufumana unqulo olwalulilungelo likaYehova. Ngaloo ndlela wafumana igama lokuba nguSathana, elithetha “uMxhathisi.” (Thelekisa uYakobi 1:14, 15.) USathana akaloqili, njengokuba zimbi iinkonzo zaseAfrika zifundisa oko; engenguye “nomkhuseli” okhusela abo bamenzela amadini. IBhayibhile imbonisa ngokucacileyo engulowo ungendawo ngokupheleleyo nokhohlakeleyo.

Ezinye iingelosi zamthelela uSathana kwimvukelo yakhe nxamnye noThixo. Ezi ngelosi ziziidemon zikwaziintshaba zabantu abasemhlabeni. Nazo zinolunya nobungendawo. Kumaxesha amandulo, zazibenza abantu babe zizimumu neemfama. (Mateyu 9:32, 33; 12:22) Abanye, kuquka nabantwana, babethwaxwa zizifo okanye izigulo zengqondo. (Mateyu 17:15, 18; Marko 5:2-5) Ngokucacileyo, akukho mntu unengqondo onokufuna ukuba nento yokwenza noSathana okanye ezo demon.

Iphi Iminyanya?

Izigidi zabantu eAfrika nakwezinye iindawo zikholelwa ukuba ukufa asikokuphela kobomi kodwa kukutshintshela nje kwenye imeko okanye kukudlulela kummandla womoya, olawulwa ngabavumisi neminyanya. Umphengululi uJohn Mbiti, ingcungela kwezonqulo eAfrika, ebhala ngokukholelwa kwiminyanya, ayibiza ngokuba “ngabafi abaphilayo” uthi: “Le ‘yimimoya’ leyo abantu baseAfrika bayixhalabele gqitha . . . Iyazi yaye inomdla koko kuqhubekayo kwintsapho [esemhlabeni]. . . . Igcina imicimbi yentsapho, izithethe, amasiko nemisebenzi yentsapho. Ukuyityeshela le micimbi kukutyeshela ookhokho abathi, bekweso sikhundla, basebenze njengabakhuseli beentsapho nebutho labantu abangabonakaliyo. Ngoko ke, ngenxa yokuba ‘besengabantu’, aba bafi baphilayo baliqela elilungileyo elingabalamleli phakathi kwabantu noThixo: bayazazi iimfuno zabantu, ‘kutshanje’ bebelapha kunye nabantu, yaye kwangaxeshanye bangumjelo wokunxibelelana noThixo.”

Noko ke, ithini iBhayibhile ngemeko yabafi? Ibonisa ukuba akukho “bafi baphilayo.” Abantu bafile okanye bayaphila—abanakuze bazenze zombini ezo zinto. ILizwi likaThixo lifundisa ukuba abafi abanako ukuva, ukubona, ukuthetha okanye ukucinga. Abafi abakho kwimeko yokugcina abaphilayo. IBhayibhile ithi: “Abafileyo . . . abazi lutho . . . Seluphelile kade uthando lwabo nentiyo yabo, nekhwele labo; . . . Akukho kwenza, nakucinga nakwazi nakulumka kwelabafileyo [engcwabeni], apho uya khona wena.” (INtshumayeli 9:5, 6, 10) “[Umntu] abuyele yena emhlabeni wakhe: ngaloo mini ayatshitsha amabhongo akhe.”—INdumiso 146:4.

Ubuyela Eluthulini

Ukuba ukufumanisa kunzima ukukwamkela oku, qwalasela oko kwenzekayo kumntu wokuqala, uAdam. UYehova wambumba uAdam “ngothuli lomhlaba.” (Genesis 2:7) Akuba uAdam engawuthobelanga umyalelo kaYehova, isohlwayo saba kukufa. UThixo wathi kuye: “[Uya] kubuyela emhlabeni, kuba uthatyathwe kuwo. Ngokuba uluthuli, uya kubuyela kwaseluthulini.”—Genesis 3:19.

Ngaphambi kokuba uYehova adale uAdam ngothuli, uAdam wayengekho. Ngoko ke xa ‘wabuyela emhlabeni,’ kwakhona waphinda akabi nabo ubomi, njengothuli. Akazange awelele ngaphaya kummandla weminyanya kwelemimoya. Akazange aye ezulwini okanye esihogweni. Xa wafayo, yaba kukuphela kwakhe oko.

Ngaba kwenzeka into efanayo kwabanye abantu ekufeni? Ewe, kwenzeka yona. IBhayibhile ithi: “Zonke ezo zinto [abantu nezilwanyana] ziya ndaweni-nye. Zonke ezo zinto zavela eluthulini, zonke ezo zinto zibuyela eluthulini.” (INtshumayeli 3:20) IBhayibhile ithembisa ukuba uThixo uya kuvusela abantu abafileyo ebomini kwiparadesi esemhlabeni, kodwa kwixesha elizayo. (Yohane 5:28, 29; IZenzo 24:15) Okwangoku, asifanele siboyike okanye sibenzele amadini abafi, ekubeni bengenakusinceda okanye basenzakalise.

USathana needemon zakhe bafuna ukulahlekisa abantu ngemeko yookhokho babo abafayo, ngaloo ndlela basasaza ubuxoki bokuba abantu bayaphila emva kokufa. Enye indlela abakwenza ngayo oku kungamabali abubuxoki. (1 Timoti 4:1) Basebenzisa imibono, amaphupha nangokunxibelelana nomoya baqhathe abantu babenze bacinge ukuba banxibelelene nabafileyo. Kodwa abanxibelelananga nabafi. Kunoko, ziidemon ezizenza abantu abafayo. Kungeso sizathu uYehova ekugweba kabukhali ukubuza kwabafileyo, enoba kungokungqalileyo okanye ngokungangqalanga ngezinye iindlela ezinjengokuvumisa.—Duteronomi 18:10-12.

[Umfanekiso okwiphepha 6]

Ngemibono, ngamaphupha nangokunxibelelana nemimoya, iidemon ziqhatha zize zoyikise abantu

[Imifanekiso ekwiphepha 7]

Ukuze zilahlekise abantu, iidemon zizenza abo bafileyo