“Umtshato Ongokwesithethe” EGhana

NGUMBHALELI KAVUKANI! EGHANA

UMTSHATO—amakhulu amawaka abantu angenela olu lwalamano nyaka ngamnye ehlabathini lonke. Ngokuqhelekileyo oku bakwenza ngokuvisisana nesithethe somtshato esisetyenziswa kwindawo abahlala kuyo.

EGhana kusetyenziswa kakhulu uhlobo lomtshato olubizwa ngokuba ngumtshato ongokwesithethe. Olu hlobo luquka ukuhlawulwa kwekhazi yintsapho yakulomyeni kweyakulomtshakazi. Abantu benza umtshato ongokwesithethe kwiindawo ezininzi eAfrika nakwiindawo ezinjengeHong Kong, iPapua New Guinea, nakwiSolomon Islands kwanaphakathi kwamaIndiya angamaGoajiro akumntla-mpuma weColombia nakumntla-ntshona weVenezuela, xa sikhankanya nje iindawo ezimbalwa.

Ukuhlawulwa kwekhazi kwakusisithethe ngamaxesha okubhalwa kweBhayibhile. (Genesis 34:11, 12; 1 Samuweli 18:25) Kumaxesha amandulo nawanamhlanje oku kuqondwa njengokubuyekeza abazali bentombi ngokuphulukana neenkonzo zayo nangexesha, amandla, nemali eye yachithwa ekuyifundiseni nasekuyinyamekeleni ngaphambi kokuba itshate.

Imbopheleleko Yabazali

Mandulo phayaa eGhana, ukwenza amadinga nokuthandana ngaphambi komtshato kwakungenziwa ngabantu abaselula. Abazali babebabonela ngokwabo abantwana babo abakhulileyo emva kokubhula besela beqwalasela abafana okanye amabhinqa asele esexabisweni lokutshata ebuthweni. Bambi abazali eGhana basakwenza oku.

Abazali bomfana baqwalasela iinkalo ezinjengobuntu bentombi; indlela yona nentsapho yakowayo abaziwa ngayo; isifo esidluliselwa ngemfuza esinokutyhutyha intsapho; ibe kumaNgqina kaYehova, kuqwalaselwa imeko yakhe yokomoya. Ukuba bayaneliseka, abazali bathetha nabazali bentombi ngendlela endilisekileyo baze benze isicelo somtshato.

Ngoku abazali bentombi baphanda imvelaphi yomfana nentsapho yakowabo. Ukongezelela kwiinkalo ezikhankanywe ngasentla, baqwalasela amandla omfana okuxhasa umfazi—ngaba uyasebenza okanye ngumahlalela? Ukuba abazali bentombi banelisekile, bazisa abazali bomfana, ibe aba bazali bayahlanganisana ukuze benze amalungiselelo obucukubhede bomtshato, emva kokuba umfana nentombi bevumelene ngawo.

Kutheni bambi abazali besakwenza imhemhe yabo ukubonela abantwana babo abakhulileyo? Omnye umfazi waseIndiya owabonelwa ngabazali bakhe wathi: “Angakwazi njani umntu oselula ukwenza isigqibo esinzulu ngolo hlobo? Kulunge ngakumbi ukushiyela oodiza-dala ukuba benze isigqibo sobulumko.” Amazwi akhe abonisa iimbono zoninzi lwabantu baseAfrika.

Noko ke, amaxesha ngamanye eGhana. Ukwenza amadinga nokuthandana ngaphambi komtshato kuya kusiba yinto esexesheni. Xa sele sinethuba elithile sithandana ngaphambi komtshato, isibini sixelela abazali ngeenjongo zaso. Emva kwengxoxo phakathi kwabazali baso nasemva kokuba abazali banelisekile kukuba siyafanelana, ezi ntsapho zihlabela mgama ngomsitho ondilisekileyo ngokuqhelekileyo owaziwa kwiintlanga ezahlukahlukeneyo zaseGhana ngokuba ngumsitho wokunkqonkqoza, kumnyango womtshato.

Umsitho Wokunkqonkqoza

Abazali besi sibini bazisa amalungu entsapho ngomhla nangenjongo yaloo ntlanganiso. Ibinzana elithi “amalungu entsapho” libhekisela kwintsapho enkulu yaseAfrika equka oomalume, oomakazi, oomza, oomakhulu nootatomkhulu besi sibini. Ngosuku olumisiweyo, oonozakuzaku bezi ntsapho zombini bayahlanganisana ukuze kwenziwe lo msitho. Umtshakazi uyazikhethela ukuba abekho. Oku kulandelayo yingxelo nje emfutshane yoko kwenzeka komnye umsitho wokunkqonkqoza.

Unozakuzaku Wentombi: [Ethetha noonozakuzaku bomyeni] Siyawazi umbandela enize ngawo, kodwa isithethe sinyanzelisa ukuba siphinde sinibuze, Nibekwa yintoni apha?

Unozakuzaku Womfana: Unyana wethu uKwasi ebedlula kweli khaya lenu wabona intyatyambo entle ibe ufuna ukuyikha ngemvume yenu.

Unozakuzaku Wentombi: [Ezenza ongazi nto] Akukho ntyatyambo kweli khaya. Nawe uyazibonela ngawakho amehlo.

Unozakuzaku Womfana: Unyana wethu akaphazamanga. Siqinisekile ukuba ikho intyatyambo entle kweli khaya. Igama laloo ntyatyambo nguAfi.

Unozakuzaku Wentombi: Kanti uthetha ngentyatyambo engumntu. Eneneni, uAfi uhlala apha.

Unozakuzaku Womfana: Sifuna ukunkqonkqoza size sicele uAfi ukuba endele kunyana wethu uKwasi.

Ngoku intsapho yakulomfana idlulisela izinto ezithile, ezinjengeziselo ezahlukahlukeneyo kunye nemali. Ngokuxhomekeka kuhlanga olo, kukho umahluko kubungakanani nakwizinto ezidluliselwayo. Lo msitho uphantse ufane nomsitho wokuganana wohlobo lwaseNtshona, ibe kwezinye iimeko umsesane wokuganwa uye ube phakathi kwezinto ezifunwayo.

Unozakuzaku womtshakazi umbuza elubala enoba izinto ekuziwe nazo zimele zamkelwe kusini na. Ngempendulo yakhe evumayo, bonke abezileyo baba ngamangqina okuzibonela ukuba uyafuna ukutshata. Ezi ntsapho zimbini zimisa usuku lomsitho womtshato. Lo mcimbi uqosheliswa ngokutyiwa kwezimuncumuncu.

Umsitho Womtshato

Inani labantu abahlanganisana kulontombi okanye ekhayeni lonozakuzaku okhethiweyo ukuze kuhlawulwe ikhazi, sihlandlo eso esiquka umtshato ngokuqhelekileyo liba likhulu kunenani labeza kumsitho wokunkqonkqoza. Oku kungenxa yokuba ngoku kukho izihlobo ezininzi.

Kuyimincili. Abafana namantombazana aselula angekatshati alangazelela ukubona izinto eziphathelwe umtshakazi. Kodwa ulonwabo luyaphela njengoko intsapho yakulomtshakazi ikhalaza ngelokuba izinto ezenza ikhazi aziphelelanga. Bambi kubaphulaphuli babamb’ amazinyo njengoko intsapho yakulomtshakazi ibonakala ingafuni ukuyekelela. Unozakuzaku womyeni esebenzisa ubuciko uzama ukubenza bayiqwalasele ngovelwano imeko yentsapho yakulomyeni. Kuthi qabu njengoko intsapho yakulontombi iyekelela. Kwakhona imeko iyatshintsha. Ngoku kuyabhiyozwa yaye kuhanjiswa izimuncumuncu.

Ukuqalisa umsitho womtshato, unozakuzaku womtshakazi ucela bonke abakhoyo ukuba bazole aze abamkele. Ubuza oonozakuzaku bomyeni ngoko bakuzeleyo. Omnye unozakuzaku womyeni uchaza isizathu sokuba babelapho, ekhumbuza abo bezileyo ukuba sele benkqonkqozile ibe bavunyelwe ukuba bangangena.

Unozakuzaku wentsapho nganye kwezi wazisa amalungu asondeleyo entsapho kwabezileyo, kuquka lowo unika le ntombi imvume yokwenda kwakunye nalowo uncedisa lo mfana ukuba atshate. Umsitho uyaqhubeka.

Unozakuzaku Wentombi: [Ethetha noonozakuzaku bomyeni] Khanisibonise ezi zinto zomtshato besicele ukuba nize nazo.

Unozakuzaku womtshakazi uyazibala ezi zinto zenza ikhazi ukuze bonke bazibonele ukuba zikho. Ukuba oonozakuzaku bomyeni bavakalelwa kukuba intsapho yakulomtshakazi ilinyusile inani lezinto ezifunayo, bawuxubusha ngasese lo mbandela ngaphambi kosuku lomtshato. Noko ke, intsapho yakulomyeni iza kulo msitho ineqikili lokuba iza kulithoba inani lezi zinto ukuba bambi kwintsapho yakulomtshakazi babonakala bebatsalisa nzima. Enoba umntu uhlala phi, ikhazi—enoba liphezulu okanye liphantsi—limele lihlawulwe lonke.

Ezinye iintsapho zifuna izinto ezinjengeziselo, iimpahla, iintsimbi zemiqala, amacici, nezinye izinto zamanenekazi. Kumntla weGhana, ikhazi lisenokuquka ityuwa, iinqoba zekola, impangele, iigusha kwaneenkomo. Kubakho nemali ethile phakathi kwezinto ezenza ikhazi.

Ngoxa kuthethathethwana, umtshakazi akabandakanyekanga kodwa uhleli kufuphi, ubukele. Umyeni unokuzikhethela ukuba eze okanye angezi. Ngenxa yoko, umntu ohlala kude unokunika abazali bakhe ilungelo lokumlungiselela umtshato. Noko ke, ngesi sihlandlo, umyeni ukho. Ngoku lithuba lentsapho yakowabo ukuba icele into eyifunayo.

Unozakuzaku Womfana: Siye sayikhupha yonke into ebilindelwe kuthi, kodwa asikamboni umolokazana wethu.

Umsitho womtshato asingombandela onzulu kangako; ikwasisihlandlo solonwabo. Ngoku intsapho yakulontombi isabela kwisicelo esenziwe yintsapho yakulomfana sokubona umtshakazi.

Unozakuzaku Wentombi: Akwaba umtshakazi ebelapha. Ngelishwa, uhambele kwelikude ibe asinazo iincwadana zokundwendwela okanye iimpepha-mvume zokuya kumphuthuma kwilizwe akulo.

Wonk’ ubani uyakwazi okuthethwa koko. Ngokukhawuleza, intsapho yakulomyeni ikhupha isixa semali—enoba ingakanani na enokufikelelwa ngumyeni—ngokukhawuleza! incwadana yokundwendwela nephepha-mvume lokuya kwelinye ilizwe lokomfuziselo sele zilungile. Nomtshakazi sele ebuyile kolo hambo lwakhe!

Ukongezelela kolo lonwabo, ezinye izizwe zilungiselela bambi abahlobo bomtshakazi ukuba bazenze yena. Mntu ngamnye olinganisayo ugxwalwa siso sonke eso isihlwele de, kuvele oyena mtshakazi owamkelwa ngentswahla enkulu. Emva koko uyacelwa ngunozakuzaku wakhe ukuba aze kubona izinto ezahlukahlukeneyo zekhazi lakhe. Uyabuzwa enoba oko kuze nomyeni kunokwamkelwa kusini na. Kuthi nzwanga njengoko wonk’ ubani ngolangazelelo elindele impendulo. Wambi amantombazana aneentloni ibe amanye akhaliphile, kodwa ngokungathandabuzekiyo impendulo iba nguewe, olandelwa yintswahla yemincili.

Ukuba umyeni ukho, intsapho yakulomtshakazi iye ifune ukumazi. Ulonwabo luyaqhubeka lungaphazanyiswanga ukuba bekulungiselelwe ukuba omnye wabahlobo bakhe amlinganise. Ngokukhulu ukuzithemba, umhlobo wakhe uma ngeenyawo, kodwa ngokukhawuleza ugxwalwa ngumntu wonke ukuba makahlale phantsi.

Kwakhona abazali bomtshakazi bafuna ukubona umkhwenyana wabo. Ngoku oyena myeni uma ngenyawo, etsho ngoncumo olubonisa ulonwabo. Intsapho yakulomtshakazi ivumela intombi ukuba iye kumyeni wayo, othi ayifake umsesane ukuba ubukho phakathi kwezinto ezenza ikhazi. Umsesane yinto entsha evela eNtshona. Nomtshakazi, ngokunjalo, umfaka umsesane. Kuvuyiswana nabo yaye kuyonwatywa. Ukuze izinto zihambe lula nangenxa yeemeko zoqoqosho, bambi ngoku badibanisa umsitho wokunkqonkqoza nomtshato ngosuku olunye.

Ngoku amagqala eentsapho zombini nabanye bayala aba basandul’ ukutshata ngendlela abanokuwenza ngayo umtshato wabo uphumelele de bahlukaniswe kukufa. Ukuqoshelisa olo suku, kuhanjiswa izimuncumcuncu.

Umsitho womtshato sele uqoshelisiwe! EGhana, ukususela ngolo suku ukuya phambili, esi sibini sigqalwa njengesitshate ngokusemthethweni ebuthweni. Ukuba ngasizathu sithile nawaphi amalungu abalulekileyo entsapho yakulontombi akakwazanga kuzimasa lo msitho, ezinye kwiziselo ekuziwe nazo zisiwa kuwo njengesiqinisekiso sokuba umsitho womtshato uqoshelisiwe. Ukuba umtshakazi nomyeni bangamaNgqina kaYehova, kwezinye iimeko amaNgqina alungiselela ukuba kunikelwe intetho yeBhayibhile, kuze kuhanjiswe izimuncumuncu emva koko.

Ezinye izibini eGhana ziba nomsitho womtshato wohlobo lwaseNtshona, ukutshata phambi komantyi okanye ukutshata ngokomthetho. Oku kunokwenziwa ngemvume okanye ngaphandle kwemvume yabazali logama nje isibini sikubudala obungokwasemthethweni. Kunyanzelekile ukuba umtshato ongokwesithethe wenziwe ngemvume yabazali.

Xa kutshatwa phambi komantyi isibini senza izifungo zomtshato. Kodwa akukho zifungo kumtshato ongokwesithethe. URhulumente ufuna yonke imitshato engokwesithethe ibhaliswe, ibe amaNgqina kaYehova ayahambisana noko. (Roma 13:1) Emva koko kukhutshwa iphepha lesiqinisekiso somtshato.

Ukususela kumaxesha amandulo de iGold Coast, ngoku eyiGhana, yaba lithanga laseBritani, umtshato ongokwesithethe wawukuphela komtshato okhoyo kwelo lizwe. Yandula ke iBritani yeza nohlobo lomtshato waseNtshona ukwenzela abemi bayo abahlala apho. Kwakhona abemi bomthonyama beli lizwe banikwa imvume yokusebenzisa olu hlobo lomtshato, ibe ngoku kangangeminyaka emininzi, umtshato wohlobo lwaseNtshona nomtshato ongokwesithethe ibikho ngexesha elinye. EGhana yomibini yamkeleke ngokwasemthethweni, kungoko yamkelekile nakumaNgqina kaYehova. Kuxhomekeke kwabo bantu ukukhetha uhlobo abaluthandayo.

Kwamanye amazwe aseAfrika, imitshato engokwesithethe kufuneka ibhaliswe ngaphambi kokuba izibini zigqalwe njengezitshate ngokusemthethweni. Noko ke, eGhana, umtshato ongokwesithethe njengoko uchazwe ngasentla ufaneleke ngokusemthethweni ungabhaliswanga, izibini zigqalwa njengezitshate ngokusemthethweni xa kuqosheliswa umtshato ongokwesithethe. Kamva, umtshato ongokwesithethe ubhaliswa ukuze nje kugcinwe iingxelo.

Eneneni umtshato usisipho sikaThixo sothando kuluntu, isipho esikhethekileyo esingazange sinikwe nkqu neengelosi. (Luka 20:34-36) Lulwalamano oluxabisekileyo olufanele lulondolozwe ukuze kuzukiswe uMsunguli walo, uYehova uThixo.

[Umfanekiso okwiphepha 14]

Ukufakana imisesane