Inokuncitshiswa Njani Ingozi?

ISIFO semithambo yentliziyo (CAD) sinxulunyaniswa noothunywashe abaliqela njengofuzo, imeko-bume nendlela yokuphila. ICAD nokuhlaselwa sisifo sentliziyo zinokuba yimiphumo yeminyaka okanye amashumi eminyaka, yeengozi ezibangelwa ngomnye okanye abangakumbi kwaba thunywashe.

Ubudala, Isini Nofuzo

Ukukhula ngeminyaka kwandisa ingozi yokuhlaselwa sisifo sentliziyo. Malunga nama-55 ekhulwini labo banesifo sentliziyo ngabantu abangaphezu kweminyaka engama-65 ubudala. Bambi abangama-80 ekhulwini kwabo baye babulawa kukuhlaselwa sisifo sentliziyo baneminyaka engama-65 okanye ngaphezulu ubudala.

Amadoda aneminyaka engaphantsi kwama-50 ubudala asengozini ngakumbi kunabafazi abalingana nawo. Emva kokuba eyekile ukuya exesheni, amabhinqa aba sengozini ngakumbi ngenxa yokuncipha kakhulu kwencindi yedlala lesini elikhuselayo. Ngokutsho koqikelelo oluthile, le ndlela yokunciphisa incindi yedlala lesini isenokunciphisa ingozi yesifo sentliziyo kumabhinqa ngama-40 ekhulwini okanye ngaphezulu, nangona kusenokwanda ingozi yezinye iindidi zemihlaza.

Ufuzo lunokuba nendima enkulu. Abo banabazali abahlaselwa yintliziyo ngaphambi kokuba neminyaka engama-50 ubudala basengozini ngakumbi yoku. Enoba abazali bakha bahlaselwa yintliziyo emva kweminyaka engama-50 ubudala, kukho ingozi engakumbi. Xa kwimbali yentsapho kukho ingxaki yentliziyo, inzala inokuba nazo iingxaki ezifanayo.

ICholesterol Ngomnye Uthunywashe

Icholesterol, luhlobo oluthile lwamafutha afunekayo ebomini. Ikhutshwa sisibindi, lize igazi liyise kwiiseli, ezikwiimolekyuli ekuthiwa ziilipoproteins. Ezi zizindidi ezimbini ekuthiwa yilow-density lipoproteins (iLDL cholesterol) nehigh-density lipoproteins (iHDL cholesterol). Icholesterol iba nguthunywashe oyingozi kwiCAD xa iLDL cholesterol ininzi kakhulu egazini.

Kucingelwa ukuba iHDL iba nendima enkulu ekukhuseleni ngokususa icholesterol kwizicwili yaye ihambisa igazi ilise kwisibindi, apho ijika khona ize ikhutshwe emzimbeni. Ukuba kufunyaniswe ukuba iLDL inyukile yaye iHDL ihlile kukho ingozi enkulu yesifo sentliziyo. Ukuhlisa iLDL kunokuphumela ekuncipheni okukhulu kwale ngozi. Ukunikel’ ingqalelo kwinto ubani ayityayo ngundoqo ekunyangeni yaye umthambo unokuba luncedo. Amayeza ahlukahlukeneyo anokuba luncedo, kodwa anokuba nemiphumo emibi kamva.a

Kunconyelwa ukutya okunecholesterol namafutha amancinane. Ukutya okungenamafutha kakhulu, njengeoli yecanola okanye yomnquma zinokuyinciphisa iLDL zize zilondoloze iHDL. Kwelinye icala, iAmerican Journal of Public Health ithi imifuno enamafutha amaninzi inokuyinyusa iLDL ize inciphise iHDL. Ukutya inyama engenamafutha kakhulu yenkuku okanye yekarikuni nako kuyanconyelwa.

Uphando lubonise ukuba ivithamin E, ibeta-carotene nevithamin C zinokuyinciphisa iatherosclerosis kwizilwanyana. Olu phando lwaqukumbela ngokuthi nazo ezi zikwanako ukunciphisa ukuhlaselwa kwabantu sisifo sentliziyo. Ukutya yonke imihla imifuno neziqhamo ezinebeta-carotene nezinye icarotenoids nevithamin C, njengetumato, amagqabi emifuno amnyama, ipepile, iminqatha, ibhatata nomxoxozi, kusenokuyikhusela iCAD.

Kuthiwa ikwaluncedo ivithamin B₆ nemagnesium. Ukutya okuziinkozo njengerhasi nomgubo wehabile, iimbotyi, ilentile nezinye izinto eziyimbewu etyiwayo namandongomane zinokuba luncedo. Ukongezelela, kucingelwa ukuba ukutya intlanzi enjengesalmon, imackerel, iherring okanye ituna ubuncinane kabini ngeveki kusenokuyinciphisa ingozi yeCAD, njengoko ezi zinamafutha amaninzi ekuthiwa yiomega-3.

Ukuphila Ubomi Bokuba Libonde

Abantu abangamabonde nje angenzi nto basengozini yokuhlaselwa sisifo sentliziyo. Bachitha usuku lonke umzimba wabo ungasebenzi yaye bengawenzi rhoqo umthambo. Isifo sentliziyo siyabahlasela abantu abalolo hlobo emva kwemisebenzi enzima njengokusebenza nzima esitiyeni, ukunkcunkca, ukuphakamisa izinto ezinzima okanye ukususa ikhephu. Kodwa amathuba okuhlaselwa ayancipha kwabo benza umthambo rhoqo.

Ukuhamba ngokukhawuleza nje imizuzu engama-20 ukusa kwengama-30 kathathu okanye kane ngeveki kusenokuwanciphisa amathuba okuhlaselwa. Ukwenza umthambo rhoqo kuphucula indlela yokumpompa kwentliziyo, kunceda ukunciphisa umzimba, yaye kusenokunciphisa umlinganiselo wecholesterol kuze kuthobe uxinzelelo lwegazi.

Uxinzelelo Lwegazi, Ukutyeba Kakhulu Nesifo Seswekile

Uxinzelelo lwegazi (hypertension) lunokwenzakalisa umphakathi wemithambo esa igazi entliziyweni luze lubangele iLDL cholesterol ingene kwinwebu yemithambo ize ibangele ukufumba kokungcola. Njengoko ukungcola kusanda, kuba nzima ukuba igazi limpompoze ngokulula yaye ngaloo ndlela uxinzelelo lwegazi luyanyuka.

Uxinzelelo lwegazi lufanele luhlolwe rhoqo, njengoko kusenokungabikho ngxaki zibonakalayo ngaphandle. Nanini na idiastolic pressure isihla ngeqondo elinye (inani elisemazantsi), ingozi yesifo sentliziyo isenokuncipha ukususela kwisi-2 ukusa kwisi-3 ekhulwini. Amayeza okunciphisa uxinzelelo lwegazi anokuba luncedo. Ukukhetha ukutya okufanelekileyo nokungasebenzisi ityuwa kwezinye iimeko, kunye nokwenza umthambo rhoqo ukunciphisa ukutyeba kunokunceda ukulawula uxinzelelo lwegazi.

Ukutyeba kakhulu kubangela uxinzelelo lwegazi nokugula okubangelwa kukuba namafutha amaninzi. Ukukuphepha okanye ukunciphisa ukutyeba kakhulu kuyindlela ephambili yokuthintela isifo seswekile. Isifo seswekile sikhawulezisa iCAD yaye sandisa amathuba okuba nesifo sentliziyo.

Ukutshaya

Ukutshaya umdiza kunguthunywashe omkhulu obangela isifo seCAD. EUnited States, kungunobangela wokufa kwabantu abamalunga nama-20 ekhulwini ababulawa zizifo zentliziyo yaye kubangela ukufa kwamabhinqa phantse angama-50 ekhulwini abulawa zizifo zentliziyo angaphantsi kwama-55 eminyaka ubudala. Ukutshaya umdiza kwandisa uxinzelelo lwegazi yaye kubangela ityhefu yemichiza, enjengentshongo nekharbon monokside, eya egazini. Le michiza, yiyo eyenzakalisa imithambo esa igazi entliziyweni.

Iintshayi zikwabeka ubomi babo bachanabeke kulo engozini. Uphando lutyhila ukuba abangatshayiyo abahlala nabatshayayo basengozini enkulu yokuhlaselwa sisifo sentliziyo. Ngaloo ndlela, ngokuyeka ukutshaya, ubani unokuzinciphisela ingozi yaye usenokusindisa kwanobomi babo bangatshayiyo abathandayo.

Uxinezeleko

Xa bexinezeleke gqitha ngokweemvakalelo okanye ngokwasengqondweni, abo baneCAD bajamelene nengozi enkulu yokuhlaselwa sisifo sentliziyo nokufa ngequbuliso yintliziyo kunabantu abanemithambo yentliziyo ephilileyo. Ngokutsho kolunye uhlolisiso, uxinezeleko lunokubangela ukuba imithambo ethumela igazi entliziyweni ezele kukungcola iminxeke yaye oku kucuthe ukumpompoza kwegazi kangangama-27 ekhulwini. Kuye kwaphawulwa nokuminxeka okukhulu kwimithambo engenaso kangako esi sifo. Olunye uphando lubonisa ukuba uxinezeleko olukhulu lunokubangela ukungcola kuyigqabhuze imithambo esa igazi entliziyweni, nto leyo ebangela isifo sentliziyo.

IConsumer Reports on Health ithi: “Bambi abantu babonakala bephila benesimo sengqondo esibi. Bayakuthanda ukugxeka, ukuba nomsindo, yaye bacaphuka ngokukhawuleza. Ngoxa inkoliso yabantu beziyeka zidlule nje izinto ezingenamsebenzi ezicaphukisayo, abantu abanobutshaba baba neengcwangu.” Ukuba nomsindo ngokugqithiseleyo kunyusa uxinzelelo lwegazi, kwandisa nokubetha kwentliziyo, yaye kubangela isibindi sidlulisele icholesterol eninzi kwigazi elityhutyha umzimba. Oku kwenzakalisa imithambo yentliziyo yaye kunegalelo kwiCAD. Kucingelwa ukuba umsindo unokuwandisa ngokuphindiweyo amathuba okuhlaselwa yintliziyo, yaye oku kuhlala kuyingozi enokwenzeka ubuncinane iiyure ezimbini. Yintoni enokunceda?

Ngokutsho kweThe New York Times, uGqr. Murray Mittleman wathi abantu ababezama ukuhlala bezolile xa becatshukiswa basenokuba bayinciphisa ingozi yokuhlaselwa sisifo sentliziyo. Oku kuvakala kungumceph’ ucandiwe namazwi abhalwa eBhayibhileni kwiinkulungwane ezadlulayo athi: “Bubomi benyama intliziyo epholileyo.”—IMizekeliso 14:30.

Umpostile uPawulos wayekwazi ukuxinezeleka. Wathetha ngamaxhala awayemhlasela imihla ngemihla. (2 Korinte 11:24-28) Kodwa wafumana uncedo oluvela kuThixo yaye wabhala: “Musani ukuxhalela nantoni na, kodwa kuyo yonk’ into zaziseni izibongozo zenu kuThixo ngomthandazo nesikhungo kunye nombulelo; yaye uxolo lukaThixo olugqwesa yonke ingcamango luya kuzilinda iintliziyo zenu namandla enu engqondo ngoKristu Yesu.”—Filipi 4:6, 7.

Ngoxa kukho abanye oothunywashe abanxulumene neengxaki zentliziyo, ezi zixutyushwe apha zinokunceda ubani ayibone ingozi ukuze athabathe amanyathelo afanelekileyo. Noko ke, bambi, baye babuza ngendlela abaphila ngayo abo babekhe bahlaselwa sisifo sentliziyo. Banokuchacha kangakanani?

[Umbhalo osemazantsi]

[Imifanekiso ekwiphepha 21]

Ukutshaya, ukucaphuka ngokukhawuleza, ukudla ukutya okunamafutha nokuphila ubomi bokuba libonde ungenzi nto kunokwandisa ingozi yokuhlaselwa sisifo sentliziyo