Ukuziqonda Nokuzinyanga Iimpawu Zaso

XA KUBONAKALA iimpawu zesifo sentliziyo, kubalulekile ukufuna uncedo lwezonyango ngokukhawuleza, njengokuba ubomi busengozini gqitha kwithuba leyure enye emva kohlaselo. Unyango olukhawulezileyo lunokusisindisa isihlunu sentliziyo kumonakalo onganyangekiyo. Okukhona sisikhulu isihlunu sentliziyo esisindayo, kokukhona intliziyo iya kumpompa kakuhle emva kolo hlaselo.

Noko ke, kumbi ukuhlasela kwesifo sentliziyo akubonakali, akubikho zimpawu zangaphandle zibonakalayo. Kwiimeko ezilolo hlobo ubani usenokungazazi ukuba une(CAD). Okubuhlungu kukuba, kwabathile uhlaselo oluqatha lusenokubonisa isiqalo sengxaki yentliziyo. Xa imithambo yentliziyo ingabethi (intliziyo iyayeka ukumpompa), lincinane kakhulu ithuba lokusinda ngaphandle kokuba kubizwe iqela labahlanguli ngokukhawuleza kuze ngoko nangoko kwenziwe inkqubo yokwexeshana yokuncedisa indlela eqhelekileyo yokuphefumla (CPR [cardiopulmonary resuscitation]) kusenokwenzeka loo mntu angasinda.

Kwinkoliso yabo baneempawu zeCAD, iHarvard Health Letter ithi, bamalunga nesiqingatha abaya kuziziliza ukufuna uncedo olukhawulezileyo. Ngoba? “Ngenxa yokuba badla ngokungaziqondi iimpawu zayo okanye abazithabathi nzulu.”

UJohn,a olixhoba lokuhlaselwa sisifo sentliziyo nokwangomnye wamaNgqina kaYehova, uthi: “Xa ungaziva mnandi, musa ukuzilazila ukufumana uncedo lwezonyango kuba usoyika ukuba kuya kuthiwa uyazigulisa. Ndaphantse ndaphulukana nobomi bam ngenxa yokurhuq’ iinyawo.”

Okwenzekayo

UJohn uyabalisa: “Unyaka onesiqingatha ngaphambi kokuba ndihlaselwe sisifo sentliziyo, ndaye ndalunyukiswa ngugqirha esithi umlinganiselo we-cholesterol uphakamile, nto leyo engunobangela oyintloko we-CAD. Kodwa ndadukisa, ndivakalelwa kukuba ndiselula—ndingaphantsi kweminyaka engama-40 ubudala—yaye ndingumqabaqaba. Ndizisola kakhulu kuba ndingazange ndithabathe inyathelo kwangelo xesha. Ndandinazo nezinye iimpawu ezazisisilumkiso—ukuba nephika ndiphelelwe ngamandla, iingqaqambo endandicinga ukuba zibangelwa kukuqunjelwa nokudinwa ngokugqithiseleyo iinyanga eziliqela ngaphambi kolo hlaselo. Inkoliso yezi zinto ndandisithi zibangelwa kukungalali ngokwaneleyo nokuxinezeleka ngenxa yomsebenzi omninzi. Kwiintsuku ezintathu zangaphambi kokuba ndihlaselwe sisifo sentliziyo, ndaba nento endandicinga ukuba kukudidizela kwesihlunu esisesifubeni. Yayiluhlaselo nje olungephi olwalusandulela olwaluza kulandela kwintsuku ezintathu kamva.”

Ukuba buhlungu kwesifuba okanye uxinezeleko, okwaziwa ngokuba yiangina, kusisilumkiso kwisiqingatha sabo baza kuba nesifo sentliziyo. Bambi baba nephika okanye badinwe ngokugqithiseleyo baze batyhafe, mpawu ezo zibonisa ukuba intliziyo ayiyifumani ioksijeni eyaneleyo ngenxa yokuvaleka kwemithambo ehambisa igazi. Ezi zizilumkiso ezifanele zenze ubani aye kwagqirha ukuze axilongwe intliziyo. UGqr. Peter Cohn uthi: “Emva kokuba i-angina inyangiwe, oko akusosiqinisekiso sokuba ukusayi kuhlaselwa sisifo sentliziyo, kodwa ithuba elincinane ebelikho lokuhlaselwa liyancipha.”

Uhlaselo

UJohn uhlabela mgama esithi: “Ngaloo mini sasiyokudlala i-softball. Njengoko ndandibimbiliza i-hamburger neetapile ezigcadiweyo ezazisisidlo sam sasemini, kwathi xhokro, ndaba nesicaphucaphu waza lo mzimba ungasentla wabambeka. Kodwa sathi sakufika kwibala le-softball ndaza ndaqalisa ukudlala, ndaqonda ukuba ukho undonakele. Ebudeni baloo mva kwemini izinto zaye zithabath’ unyawo.

“Izihlandlo eziliqela, ndandilala kwizitulo ezibekelwe abadlali, ndijonge phezulu, ndize ndizame ukolula izihlunu zesifuba, kodwa ndatsho phantsi. Ngoxa ndandidlala, ndathi ngaphakathi ‘Mhlawumbi ndinomkhuhlane,’ njengoko maxa wambi ndandiziva ndinyakamile yaye ndityhafile. Xa ndandibaleka, ndaphawula ukuba ndiba nephika elingathethekiyo. Ndalala esitulweni kwakhona. Xa ndandiphakama, kwacaca mhlophe ukuba ndandisengxakini enzulu. Ndakhwaza unyana wam uJames ndisithi: ‘Ndifuna ukuya esibhedlele NGOKU!’ Isifuba sam sasingathi saphukele ngaphakathi. Le ntlungu yayindongamele kangangokuba ndandingakwazi nokuphakama. Ndathi, ‘Ayinakuba sisifo sentliziyo, ingaba siso? Ndineminyaka engama-38 kuphela ubudala!’”

Unyana kaJohn, owayeneminyaka eli-15 ubudala ngelo xesha, uyabalisa: “Kwimizuzu nje embalwa utata waphelelwa ngamandla, kangangokuba kwafuneka athwalwe ukusiwa kwinqwelo-mafutha. Umhlobo wam waqhuba inqwelo-mafutha ngoxa uTata ndandimbuza imibuzo ngemeko yakhe. Ekugqibeleni, uTata akazange aphendule. Lo mhlobo wam wamkhwaza: ‘John!’ Kodwa sekunjalo utata akazange aphendule. Emva koko uTata waxhuzula esihlalweni sakhe, waxhuzula waza wahlanza. Ndakhwaza ndiphindaphinda: ‘Tata! Ndiyakuthanda! Nceda ungafi!’ Emva kolo hlaselo, umzimba wakhe wonke waba lutywantsi esihlalweni. Ndandisithi ufile.”

Esibhedlele

“Sabalekela esibhedlele ukuya kufumana uncedo. Kwakusele kudlule imizuzu emibini okanye emithathu ekubeni ndandicinga ukuba uTata ufile, kodwa ndandinethemba lokuba wayenokuvuka. Ndamangaliswa kukubona amanye amaNgqina kaYehova angama-20 esasinawo kwibala le-softball ekwigumbi lokulinda. Andenza ndaziva ndithuthuzelekile yaye ndithandwa, nto leyo eyaba luncedo kakhulu ngelo xesha losizi. Malunga nemizuzu eli-15 kamva, ugqirha weza waza wasicacisela esithi: ‘Sikwazile ukumvusa utata wakho, kodwa isifo sentliziyo besimhlasele ngamandla. Asiqinisekanga ukuba uza kuphila.’

“Wandula ke wandivumela ukuba ndiye kumbona uTata okwexeshana. Andizange ndikwazi ukuzibamba yindlela uTata awavakalisa ngayo uthando ngentsapho yethu. Esentlungwini enkulu, wathi: ‘Nyana, ndiyakuthanda. Ngamaxesha onke khumbula ukuba uYehova ngoyena mntu ubalulekileyo ebomini bethu. Ungaze uyeke ukumkhonza, uze uncede unyoko nabantakwenu bangaze bayeke ukumkhonza. Sinethemba eliqinisekileyo lovuko, yaye ukuba ndiyafa, ndifuna ukunibona nonke xa ndibuya.’ Sobabini sasilila iinyembezi zothando, zoloyiko nezethemba.”

Umfazi kaJohn, uMary, wafika kwisithuba esingangeyure kamva. “Xa ndandisiya kwigumbi lonyango longxamiseko, loo gqirha wathi: ‘Umyeni wakho uhlaselwe ngamandla sisifo sentliziyo.’ Ndandikhwankqisiwe. Wandicacisela ukuba intliziyo kaJohn iye yazanywa ukuba ibethe kakuhle izihlandlo ezisibhozo. Olu nyango longxamiseko lubandakanya ukusetyenziswa kwamandla ombane athintela ukuphazamiseka kwendlela intliziyo ebetha ngayo ize ibethe ngendlela yayo eqhelekileyo. Ndawonye neCPR, kunokufakwa ioksijeni nokufakwa iyeza emithanjeni, ukuncediswa kwentliziyo ibethe kakuhle yindlela yokusindisa ubomi ekumgangatho ophezulu.

“Xa ndabona uJohn, intliziyo yam yaba buhlungu. Wayexwebe ngeyona ndlela, yaye kwakukho imibhobho neengcingo ezininzi emzimbeni wakhe. Ngokuzolileyo, ndathandaza kuYehova ukuba andinike amandla okunyamezela esi silingo ngenxa yoonyana bethu abathathu, yaye ndathandazela ukhokelo lokuba ndenze isigqibo sobulumko ngoko kwakusenokwenzeka. Njengoko ndandisondela kwibhedi kaJohn, ndacinga, ‘Kanene uthini kulowo umthandayo ngamaxesha anje? Ngaba ngokwenene siyilungiselele imeko esongela ubomi ngolu hlobo?’”

UJohn wathi: “‘Sithandwa, uyazi ndisenokungaphili. Kodwa kubalulekile ukuba wena namakhwenkwe nihlale nithembekile kuYehova kuba kungekudala le nkqubo iza kuphela yaye ukugula nokufa akusayi kuphinda kubekho. Ndifuna ukuvuka kwinkqubo entsha ndize ndibone wena namakhwenkwe ethu nilapho.’ Zanqamleza umbombo iinyembezi kuthi sobabini.”

Ugqirha Uyacacisa

“Kamva ugqirha wandibizela ecaleni waza wandicacisela ngophando olubonise ukuba ukuhlaselwa kukaJohn sisifo sentliziyo kubangelwe kukuvaleka ngokupheleleyo komthambo ongaphambili ngasekhohlo othumela igazi entliziyweni. Nomnye umthambo othumela igazi entliziyweni uye wavaleka. Ugqirha wandixelela ukuba ndandimele ndenze isigqibo ngonyango uJohn awayemele alufumane. Kwafuneka ndikhethe phakathi kweendlela ezimbini zonyango ezazifumaneka olwamayeza notyando i-angioplasty. Wayecinga ukuba le yamva yeyona yayilungile, ngoko sakhetha utyando i-angioplasty. Kodwa oogqirha abazange bathembise nto, njengoko inkoliso yabo bahlaselwa lolu hlobo lwesifo sentliziyo ingasindi.”

Iangioplasty luhlobo lotyando olwenziwa ngobuchule ngokufaka isixhobo esinjengombhobho esinencam eyibhaloni kwimithambo ethumela igazi entliziyweni size sivuthelwe ukuze siyivule. Le nkqubo iye yaba yephumelelayo kakhulu ekwenzeni igazi limpompoze kwakhona. Xa imithambo eyahlukahlukeneyo ehambisa igazi ivaleke kakhulu, kudla ngokunconyelwa utyando lokuxokomezela imithambo.

Imeko Engaginyisi Mathe

Emva kotyando oluyiangioplasty, ubomi bukaJohn baqhubeka busengozini ezinye iiyure ezingama-72. Ekugqibeleni, intliziyo yakhe yaqalisa ukuchacha koko kwenzakala. Kodwa intliziyo kaJohn yayimpompa kuphela umlinganiselo ongangesiqingatha sendlela eyayisebenza ngayo ngaphambili, yaye inxalenye enkulu yayo yaba nesiva kwisicwili, ngoko ke, isibakala sokuba wayeya kuhlala enesifo sentliziyo phantse sasiqinisekile.

Ecinga nzulu ngokwenzekayo, uJohn ululeka esithi: “Sinembopheleleko kuMdali wethu, kwiintsapho zethu, kubazalwana bethu nakoodade wethu bokomoya nakuthi ngokuthobela izilumkiso size sinyamekele impilo yethu—ngokukodwa ukuba sisengozini. Ubukhulu becala, sithi esinokubangela ulonwabo okanye intlungu. Oko kuxhomekeke kuthi.”

Imeko kaJohn yayinzulu yaye ifuna ingqalelo ngokukhawuleza. Kodwa oko akuthethi kuthi bonke abantu bamele bathi nje ngokuphazanyiswa sisitshisa esingephi babe sele bebalekela kwagqirha. Sekunjalo, amava akhe asisilumkiso, yaye abo bavakalelwa kukuba banezi mpawu bafanele baxilongwe.

Yintoni ke enokwenziwa ukunciphisa ingozi yokuhlaselwa sisifo sentliziyo? Inqaku elilandelayo liza kuxubusha oku.

[Umbhalo osemazantsi]

[Ibhokisi ekwiphepha 18]

Iimpawu Zesifo Sentliziyo

• Ukubethwa luvalo uzive uminxekile, ukhamekile okanye ukuba buhlungu kwesifuba okuthabatha imizuzu eliqela. Oku kunokuphazanyiswa nesitshisa esingamandla

• Intlungu esenokutyhutyha ukusa—okanye esenokubakho kuphela—emhlathini, entanyeni, emagxeni, ezingalweni, ezingqinibeni okanye kwisandla sasekhohlo

• Ingqaqambo ezingisileyo emantla esisu

• Iphika, isiyezi, ukutyhafa, ukubila okanye ukuziva unyakamile xa ubanjwa

• Ukudinwa kakhulu—okusenokuvakala iiveki ngaphambi kokuhlaselwa yintliziyo

• Ukuba nesicaphucaphu okanye ukuhlanza

• Ukusoloko uhlaselwa kukufuthaniseleka kakhulu okungabangelwa kukusebenza ngamandla

Iimpawu zisenokwahluka ukusuka kwezo zingekho qatha ukusa kweziqatha yaye azibikho kubo bonke abahlaselwa sisifo sentliziyo. Kodwa ukuba ezi zinto zenzeka ngaxesha nye, funa uncedo ngokukhawuleza. Noko ke, kwezinye iimeko kuye kungabikho zimpawu zibonakalayo; ezo ke kuthiwa luhlaselo lwesifo sentliziyo olungavakaliyo.

[Ibhokisi ekwiphepha 19]

Amanyathelo Okusinda

Ukuba wena okanye umntu omaziyo ubonakalisa iimpawu zokuhlaselwa sisifo sentliziyo:

• Qiniseka enoba ziimpawu zaso kusini na.

• Yeka nantoni na oyenzayo uze uhlale phantsi okanye ungqengqe.

• Ukuba iimpawu zithabatha imizuzu eliqela, tsalel’ umnxeba kwinombolo yemfonomfono yongxamiseko yasekuhlaleni. Xelela igosa elo ukuba ukrokrela ukuba uza kuhlaselwa sisifo sentliziyo, yaye mnike inkcazelo efunekayo ukuze akwazi ukufika kwindawo okuyo.

• Ukuba unokukwazi ukumsa umguli esibhedlele kwigumbi lonyango longxamiseko ngokukhawuleza nokumqhuba ngokwakho, yenjenjalo. Ukuba ucinga ukuba unesifo sentliziyo, cela omnye umntu akuqhubele akuse apho.

Ukuba ulindele iqela lonyango longxamiseko:

• Nyenyisa impahla embambayo, kuquka ibhanti okanye iqhina elisentanyeni. Nceda umguli ahlale kakuhle, mxhase ngomqamelo ukuba kuyimfuneko.

• Musa ukutatazela, enoba nguwe umguli okanye ungumncedi. Ukudyuduzela kungayenza mbi ngakumbi imeko esongela ubomi. Umthandazo unokuba luncedo ekubeni ungatatazeli.

Ukuba umguli ubonakala eyeka ukuphefumla:

• Mkhwaze umbuze, “Uyandiva?” Ukuba akukho mpendulo, intliziyo yakhe ayibethi, yaye ukuba umguli akaphefumli, qalisa inkqubo yokuncedisa ukuphefumla (CPR).

• Khumbula amanyathelo amathathu asisiseko eCPR:

1. Qethula isilevu somguli, ukuze kuvuleke imibhobho engenisa umoya.

2. Yakuba ivulekile, vala iimpumlo zomguli, uvuthele kancinane emlonyeni kube kabini de isifuba sinyuke.

3. Mcinezele izihlandlo ezili-10 ukusa kwezili-15 embindini wesifuba phakathi kweengono ukutyhala igazi liphume phakathi kwentliziyo nesifuba. Rhoqo ngemizuzwana eli-15, mphefumlise kabini ulandelise ngokumcinezela izihlandlo ezili-15 de intliziyo ibethe akwazi ukuphefumla kwakhona okanye kufike iqela longxamiseko.

ICPR ifanele yenziwe ngumntu oqeqeshelwe ukuyenza. Kodwa xa engekho umntu oqeqeshiweyo, “nayiphi na iCPR ibhetele kunokuba kungenziwa nto kwaphela,” utsho njalo uGqr. R. Cummins, ongumalathisi onyamekela isifo sentliziyo kwisebe longxamiseko. Ngaphandle kokuba ubani aqalise la manyathelo, amathuba okusinda mancinane kakhulu. ICPR yeyokubambisa nje ixesha elincinane de kufike uncedo.

[Umfanekiso okwiphepha 17]

Unyango olukhawulezileyo lunokubusindisa ubomi luze lunciphise nokwenzakala kwentliziyo