Ukuhlangabezana Nocelomngeni

UKUHLASELWA kokuziphatha okuhle ngokwesini kuqala kwasebuntwaneni xa kukho umabonwakude, iincwadi, amaphephancwadi, imifanekiso eshukumayo nomculo obalaselisa isini. Ulutsha luphenjelelwa ukuba lwamkele iindlela zokuziphatha ngokwesini zabantu abakhulileyo lungekakwazi ukulawula iimvakalelo zalo. Bambi abazali bade bongezelele kule ngcinezelo ingokwesini ngokuvumela abantwana ukuba benze amadinga besebancinane. Ingcinezelo yoontanga ibaqhubela ekwenzeni amadinga, ibe ulutsha oluninzi oluthandana nabafana okanye namantombazana kungekudala luyekelel’ umxakatho luze lube neentlobano zesini. ULuther Baker, ongunjingalwazi wezifundo ngemicimbi yentsapho wathi: “Hayi indlela ekuqheleke ngayo . . . ngentombazana eselula nekwishumi elivisayo evakalelwa ukuba ayithandwa ngabazali bayo . . . ukuba ibandakanyeke kwiintlobano zesini nenkwenkwe ethandana nayo izibetha ngemf’ iphindiwe ngelithi iya kufumana uthando nolwalamano olusenyongweni.”

Ulutsha lutyekele ekwenzeni iminyaka yalo yeshumi elivisayo iminyaka yokuzifica okokugqibela ebomini kunokuba luzilungiselele ukuphila ubomi balo bonke. UNjingalwazi Baker wathi: “Luthabatheke ngamandla olunawo ibe luseyiselwa ngoontanga balo kwelokuba ukuba liqhawe ngokwesini yeyona nto ibonisa ukuba uyindoda, ulutsha oluninzi luyasinqula isini” xa lukwishumi elivisayo. Kwiminyaka emalunga nama-30 eyadlulayo, umbhali-mbali uArnold Toynbee wakukhalazela oku kukhohliswa kolutsha lwethu, njengoko wayekholelwa kwelokuba imbali iye yabonisa ukuba ubuchule bokwenza izinto bamazwe aseNtshona ezi mini abusenzelwa ukususa iingqondo zabakwishumi elivisayo ‘kwinkanuko yesini’ ukuze banikele ingqalelo ekufumaneni ulwazi.

Abazali Abanempembelelo Entle

Abazali abangavumeli abakwishumi elivisayo ukuba bazonwabise ngokwenza amadinga babonisa inkxalabo yokwenene ngempilo nolonwabo lwabantwana babo kwixa elizayo. Ngokuba nemilinganiselo ephakamileyo yokuziphatha nokuhlala benxibelelana nabo banokuba nempembelelo kubomi babantwana babo. Ngokutsho kweJournal of Marriage and the Family uphando ngokuziphatha ngokwesini kolutsha lubonisa ukuba, “le mpembelelo inokukhokelela ekubeni abantwana bangabandakanyeki kwiintlobano zesini.”

Abazali ababethelela ukubaluleka kokuziqeqesha nokuba nembopheleleko ebantwaneni babo bafumana imiphumo emihle gqitha. Lungqinela oku olunye uhlolisiso luthi: “Xa abakwishumi elivisayo nabazali babo bebambelela kwimilinganiselo ekhuthaza ukuba nembopheleleko, amathuba okuba aba bakwishumi elivisayo babe nabantwana bengatshatanga mancinane gqitha.” Oku kuquka ukubandakanyeka ngokupheleleyo kwizinto ezenziwa ngabantwana—ukuhlola umsebenzi wabo wesikolo owenzelwa ekhaya; ukwazi indawo abaye kuyo nezinxulumani zabo; ukubabekela usukelo olusengqiqweni olungokwemfundo; nokwabelana nabo ngemilinganiselo yokomoya. Abantwana abakhula benolu lwalamano lusenyongweni nabazali bayazixabisa ibe baziva bonwabile yindlela abaziphethe ngayo ngokwesini.

Icebiso elilungele abazali nabantwana bubulumko obufumaneka eBhayibhileni. Abazali bakwaSirayeli bayalelwa ukuba bafundise imilinganiselo efanelekileyo yokuziphatha kubantwana babo. UYehova wababuza lo mbuzo: “Luluphi na uhlanga olukhulu olunemimiselo namasiko anobulungisa, njengalo myalelo wonke ndiwubekayo phambi kwenu namhla?” Yayingala ‘masiko anobulungisa’ ababeza kuwafundisa abantwana babo phakathi kokufudumala nothando lwentsapho. “Uze uwatsolise koonyana bakho, uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.” Abantwana balulekwa ngelithi: “Bamba . . . umthetho kayihlo, ungasilahli isiyalo sikanyoko.” Olu nxibelelwano lusenyongweni nolufudumeleyo nemiyalelo evela kutata nomama zakha ebantwaneni isimo sengqondo esilungeleleneyo ngobomi nesini, ‘esiya kumgcina’ oselula ubomi bakhe bonke.—Duteronomi 4:8; 6:7; IMizekeliso 6:20, 22.

Lutsha, kutheni nisonakalisa ikamva lenu ngokuyekelela kwinkanuko yesini? Iminyaka yeshumi elivisayo imalunga neminyaka esixhenxe. Nifanele niyisebenzisele ukukhula ngokwengqondo, ngokweemvakalelo, ngokomoya nokukhulisa isimo sengqondo esilungeleleneyo ngesini, nilungiselela iminyaka engama-50 okanye engama-60 elandelayo yobomi. Bazali, yithabatheni nzulu imbopheleleko eniyinikwe nguThixo nize nikhusele abantwana ekubeni neentliziyo ezibuhlungu ezibangelwa zizifo ezidluliselwa ngeentlobano zesini nokumitha okungafunwayo. (INtshumayeli 11:10) Abantwana benu mababone kubomi benu bemihla ngemihla indlela uthando nolwazelelelo ngabanye olulwakha ngayo ulwalamano oluhlala luhleli.

Ukuhlangabezana Ngokuphumelelayo Nolu Celomngeni

Musa ukuvumela ukuthi phithi thwanga sisini okukhoyo kugqwethe imbono yakho ngobomi kuze konakalise ithuba onalo lokunandipha ikamva elanelisayo nelonwabisayo. Cinga ngemizekelo emininzi yolwalamano lwabantu eBhayibhileni. Qiniseka ukuba ubomi nothando busoloko busonwabisa yaye bunentsingiselo ixesha elide emva kweminyaka yeshumi elivisayo. Xa oku kuqwalaselwe kakuhle ngokuvisisana nokuthanda kukaThixo ngamadoda namabhinqa angamaKristu, kwandula ke kubekwe isiseko somanyano olusenyongweni noluhlala luhleli lwabantu ababini abathandanayo.

Njengoko uhlolisisa izibini eziseBhayibhileni njengoYakobi noRakeli, uBhohazi noRute nomfana ongumalusi nenzwakazi engumShulamikazi, uya kubona ukuba yayikho intlantsi yomtsalane wesini kulwalamano lwabo. Noko ke, njengoko ufunda ngenyameko iGenesis isahluko 28 nesama-29, incwadi kaRute, iNgoma yazo iiNgoma, uya kuphawula ukuba kukho ezinye izinto ezibalulekileyo ezifak’ isandla kulwalamano olunjalo.a

Lamkele Ilungiselelo LikaYehova Lobomi

UYehova, uMdali wohlanga loluntu uyazazi iimpawu zesini zomntu nenkanuko anayo. Ngothando, uye wasidala ngokomfanekiselo wakhe, akasidalanga “nemizila yemfuza esiqhubela ukuba sithandane naye nabani na,” kodwa usenze sanamandla okulawula iimvakalelo zethu ngokuvisisana nokuthanda kukaThixo. “Kuba oku kukuthanda kukaThixo, . . . ukuba nikhwebuke kuhenyuzo; ukuba ngamnye wenu akwazi ukufumana esakhe isitya ngobungcwalisa nembeko, kungekhona ngenkanuko yomnqweno wesini njengaleyo zinayo neentlanga ezingamaziyo uThixo; ukuba kungabikho bani usa kwinqanaba lokwenzakalisa aze atyhobozele kumalungelo omzalwana wakhe kulo mbandela.”—1 Tesalonika 4:3-6.

Oku kuyenziwa ngamaNgqina kaYehova ehlabathini lonke. Ayayihlonela imilinganiselo kaThixo ebekelwe amadoda namabhinqa angamaKristu. Amadoda amakhulu awajonga njengoobawo, ‘amadodana njengabantakwabo, abafazi abakhulu njengoonina, abafazazana njengoodadewabo enobunyulu bonke.’ (1 Timoti 5:1, 2) Enjani ukuba ntle imekobume enanditshwa ngamadoda namabhinqa aselula njengoko elufikelela ngokupheleleyo usukelo lwawo, engaphazanyiswa yingcinezelo yokwenza amadinga nokutshata ngaphambi kwexesha okanye zizifo ezidluliselwa ngeentlobano zesini! Intsapho ekhutheleyo yamaKristu, eyomelezwa libandla lamaKristu, yindawo ekhuselekileyo kwihlabathi elithe ti sisini.

Lusebenzisa imilinganiselo yeBhayibhile kubomi balo, ulutsha olungamaKristu lukhululekile ekuthini phithi thwanga sisini ibe lufumana uvuyo ekunikeleni ingqalelo kwesi siluleko siseLizwini likaThixo: “Vuya, ndodana, ebutsheni bakho, ikuchwayithise intliziyo yakho ngemihla yobudodana bakho, uhambe ngeendlela zentliziyo yakho, nangokukhangela kwamehlo akho; kodwa yazi ukuba ngenxa yezo zinto zonke uThixo uya kukusa ematyaleni. Yisuse ke ingqumbo entliziyweni yakho, ubudlulise ububi enyameni yakho; ngokuba ubutsha nobudoda bungamampunge.”—INtshumayeli 11:9, 10.

[Umbhalo osemazantsi]

[Amagama acatshulweyo akwiphepha 10]

Musa ukuvumela ukuthi phithi thwanga sisini konakalise ithuba onalo lokunandipha ikamva elanelisayo nelonwabisayo

[Imifanekiso ekwiphepha 9]

Ulutsha olubandakanyeka kwimisebenzi eyenziwa entsatsheni alufane luthi phithi kukuba neentlobano zesini