ISingapore—Ibhongo Neqhayiya LaseAsia Eliphelelwe Bubuhle

KRALAKAQA! Zambakrazwa kabuhlungu ngolo hlobo iingcango ezingqindilili zentsimbi kwiNtolongo yamaBhinqa iChangi eSingapore kuvalelwa umhlolokazi obuthathaka noneminyaka engama-71 ubudala, ongumKristu. Njengomnye wamaNgqina kaYehova, wayezamile ukuchaza ukuma kwakhe kwijaji eyayichophele ityala: “Andisosisongelo kulo rhulumente.”

Kralakaqa! Walandelwa lixhegokazi elineminyaka engama-72 ubudala, nalo elingumKristu. Lalenze ntoni? Lalineempapasho zeBhayibhile ezine zeWatch Tower Society, kuquka umbhalo walo wobuqu weBhayibhile Engcwele.

Lilonke, abemi abangama-64 baseSingapore, abaneminyaka eli-16 ukuya kwengama-72 ubudala babanjwa baza babekwa ityala. Ngenxa yezizathu ezithile, abangama-47 bala ukuhlawula imali ababebizwa yona ibe bavalelwa entolongweni ithuba elingangeveki enye ukusa kwezine. Oku kunokwenzeka njani kwilizwana elizimeleyo ekuthiwa liyenye yezona ndawo zintle ekunokuhlalwa kuzo ehlabathini lonke? Oku kunokwenzeka njani kwilizwana elizimeleyo nelinendumasi ehlabathini lonke ngokuzinza ngokwezoqoqosho, ngenkqubela esemagqabini, nezakhiwo zala maxesha nelizibanga lizamkela iimbono zonqulo?

Ilizwana Elizimeleyo Lala Maxesha

Makhe siqale senze nje amabal’ engwe ngembali yalo. Imbali yala maxesha yaseSingapore yaqala ngowe-1819 ekufikeni kukaMhlekazi uThomas Stamford Raffles waseBritani. URaffles, ongummeli we-East India Company, wayekhangela iindlela zokusebenzisana namazwe aseMpuma. Wagqiba kwelokuba akhe aphonononge iSingapore. Ngoko lwaqala njalo urhwebo oluye lwaba negalelo kwinkqubela yeMpuma Asia unanamhla.

Ngaphambi kokuba ikhululeke iSingapore kuthiwa yayisisixeko esimdaka. Namhlanje, akakho umntu onokuze aphinde ayithethe loo nto ngeSingapore. Iyenye nje into. Kwiminyaka engaphezu kwama-30 eyadlulayo, phantse sonke esi sixeko sakhiwa ngokutsha, kwiindawo ekunokwenzeka kuzo bezama ukugcina laa ndlela yamhlamnene yokwakha okanye balondoloze udonga olungaphambili kwizakhiwo ezidala okanye badibanise zonke izakhiwo ezingokwembali zibe zezala maxesha. ISingapore yayisisiphambuka seenqanawa eMpuma, isoloko ineenqanawa ezingama-800 ezibukweni ngexesha. Ngenxa yezinto zobugcisa bezi mini inqanawa enkulu yemithwalo iyakwazi ukothulwa iphinde ilayishwe kwisithuba nje seeyure ezimbalwa. Esi sixeko sibiza size sifumane imali yokuthengisa imihlaba esusela kwii-R280 200 nangaphezulu ngesikwemitha ngasinye.

Abemi balapho abamalunga nezi-3400 000 bangumxube omninzi wamaTshayina, amaMalay, amaIndiya, abantu baseYurophu nabanye. Phakathi kweelwimi abazithethayo sisiMandarin, isiMalay, isiTamil nesiNgesi.

Iikhilomitha ezingama-83 zololiwe ohamba ngaphezulu nangaphantsi komhlaba zenza iSingapore ibe neyona nkqubo yezothutho yala maxesha neluncedo ehlabathini lonke. Iipaki ezinohlaza zimi kwiindawo ezintle kuso sonke esi sixeko, zisahlula izakhiwo ezingookrwec’ izulu ezakhiwe ngendlela yala maxesha. Enye into “enomtsalane” kubakhenkethi abeza okokuqala kwesi sixeko yiRaffles Hotel elungiswe ngokutsha, ngoku eyenziwe yasisikhumbuzo sesizwe ngenxa yemvelaphi yayo yowe-1889. Eyesibini yindawo eziihektare ezingama-52 enemiyezo emihle nelinyiweyo, iihektare zayo ezine ngamahlathi alondoloziweyo, apho kwakha kwahlala khona izingwe.

Inkululeko Yonqulo Iqinisekisiwe

Ukongezelela kwinkqubela yayo yezoqoqosho engenakuthelekiswa nanto, iSingapore ithembisa ukunika bonke abemi bayo inkululeko yonqulo. Okulusizi kukuba, iSingapore ayikasizalisekisi isithembiso sayo. Abantu abanxulumana nebandla lamaNgqina kaYehova ngokukhethekileyo baye bakufumanisa kuyinyaniso oko.

UMgaqo-siseko weRiphabliki yaseSingapore kwiGatya 15(1), unikela isiqinisekiso senkululeko yonqulo: “Wonke umntu unelungelo lokwamkela aze abe kunqulo aluthandayo aze axelele nabanye ngalo.”

IGatya 15(3) lalo Mgaqo-siseko linikela esi siqinisekiso: “Naliphi na iqela lonqulo linelungelo—

(a) lokulawula imicimbi yalo yonqulo;

(b) lokuseka lize lilondoloze amaziko onqulo okanye awokubonelela uluntu; lize

(c) lizuze lize libe nesakhiwo lisigcine lize lisisebenzise ngokuvisisana nomthetho.”

Kwangowe-1936, amaNgqina kaYehova ayekho phakathi kwabemi baseSingapore. Kangangeminyaka emininzi ayeqhuba rhoqo iintlanganiso zebandla kwiHolo yawo yoBukumkani ese-8 Exeter Road emelene nendawo yentengiso enabantu abaninzi. Eli bandla lahambela phambili, kwangaxeshaye lisiba negalelo ngokukhethekileyo ekuncediseni kwimeko yabahlali.

AmaNgqina KaYehova Avalwe Umlomo

Konke oku kwatshintsha ngoJanuwari 12, 1972. Kwakhutshwa umyalelo wokugxotha phantsi kweGovernment Banishment Act, isahluko 109, oyalela ukuba umvangeli wasemazweni ongumKristu uNorman David Bellotti nomfazi wakhe, uGladys, ababengabemi baseSingapore kangangeminyaka engama-23 baphume baphele kwelo lizwe. Ngokukhawuleza oko kwalandelwa ngumyalelo owawukhupha iBandla laseSingapore lamaNgqina kaYehova kwiincwadi zasemthethweni. Kwisithuba nje seeyure iHolo yoBukumkani yathinjwa ngamapolisa awatyhoboza aza angena kucango lwangaphambili. Okwalandela phantse ngokukhawuleza emva koko kukwalelwa ngokusemthethweni kokusetyenziswa koncwadi lweWatch Tower Society. Ngaloo ndlela kwaqalisa ixesha lokucinezelwa kwamaNgqina kaYehova.

Kwalandela ukuthengiswa kweHolo yoBukumkani ngurhulumente njengesinye isenzo sokungabi namfesane, konke oku kusenziwa engaxelelwanga—akuzange kuchotshelwe tyala, lingazange livavanywe, engazange anikwe nethuba lokuziphendulela.

Urhulumente waseSingapore wathetha ngokuphindaphindiweyo ngokungathabathi nxaxheba kwamaNgqina kaYehova kwinkonzo yasemkhosini njengesingxengxezo sokuvalwa kwawo umlomo ngokupheleleyo. Kutshanje ngoDisemba 29, 1995, uMnu. K. Kesavapany, ummeli wexesha elizeleyo weSingapore kwiZizwe Ezimanyeneyo eGeneva, wathetha oku kulandelayo kwileta awayibhalela uMhlekazi uIbrahim Fall, iSekela likaSosiba-Jikelele Wamalungelo Abantu, weZizwe Ezimanyeneyo eGeneva:

“URhulumente wam uwuvalile lo mbutho wamaNgqina kaYehova ngenxa yokuxhalabela ukhuseleko lwesizwe. Ukuqhubeka kwalo mbutho bekuya kuba yingozi kwintlalontle yabantu ngokubanzi nakucwangco lwaseSingapore. Enye into eyayifuneka ehambisana nokucinywa kwamaNgqina kaYehova kwiincwadi zomthetho kukwalelwa kwazo zonke iimpapasho zawo ukuze kuqiniswe ukuvalwa kombutho wawo kwanokuthintela ukusasazwa nokukhuthazwa kweenkolelo zawo.”

Kumbandela wokuba enza ilizwe laseSingapore libe sengozini yokungakhuseleki, kumele kuqondwe ukuba ngabafana abamalunga nesihlanu ngonyaka abangafuniyo ukuya kwinkonzo yasemkhosini. ISingapore inomkhosi onabantu abamalunga nama-300 000. Urhulumente waseSingapore uye wala nokuxoxa ngokuba igcuntswana labantu lenze inkonzo yakwarhulumente.

Ingcinezelo Ephandle

Emva kweminyaka emininzi, bekrikriza ukuwanika inkululeko ewafaneleyo, baqala phantsi ukuwacinezela ngokuphandle amalungelo abantu ngowe-1992 xa kwabanjwa abantu abaninzi—ababetyholwa ngokuba noncwadi olwalelweyo phantsi kweUndesirable Publications Act. Ngowe-1994 iWatch Tower Society yathumela eSingapore uW. Glen How, oneminyaka engama-75 ubudala, onguMcebisi kaKumkanikazi, oligqwetha nobengomnye wamaNgqina kaYehova ubomi bakhe bonke. Isikhundla sakhe njengoMcebisi kaKumkanikazi simenze wakufanelekela ukuvela phambi kweenkundla zaseSingapore. Ngenxa yesiqinisekiso sonqulo salo Mgaqo-siseko, kwenziwa isibheno kwiNkundla Ephakamileyo yaseSingapore, kuquka ukuhlola ukufaneleka kokubanjwa kwaba bantu nokuvalwa kwabo umlomo ngowe-1972. NgoAgasti 8, 1994 esi sibheno sakhatywa nguMgwebi Oyintloko uYong Pung How, weNkundla Ephakamileyo yaseSingapore. Imigudu eyongezelelekileyo yokubhena nxamnye nesi sigqibo ayizange iphumelele.

Ebutsheni bowe-1995 kwabonakala ngathi oku kuhlola kungokwasemthethweni nokusekelwe kuMgaqo-siseko waseSingapore kubangela ingcinezelo engakumbi. Esebenzisa indlela yasemkhosini ebizwa ngokuba yiOperation Hope, amagosa asebenza ngokufihlakeleyo asuka kwiSecret Societies Branch yeSebe Eliphanda Ngolwaphulo-mthetho, ahlasela amaqela amaninzi amancinane awayeqhuba iintlanganiso zamaKristu emakhayeni abantu. Amagosa amalunga nama-70 nomkhosi oncedisayo agqogqa engumkhosi, ebamba abantu abangama-69. Bonke bathuthelwa kumaziko okuncina, abanye bancinwa ubusuku bonke, ibe bonke bamangalelwa ngokuya kwiintlanganiso zamaNgqina kaYehova nokuba neempapasho zeBhayibhile. Abanye bahlukaniswa nabantu kangangeeyure ezili-18, bengakwazi nokutsalel’ umnxeba iintsapho zabo.

Abantu basemzini bafunyaniswa bengenatyala baza bakhululwa ngesihle. Kodwa abangama-64 abangabemi baseSingapore baya kuma phambi kwenkundla ngasekupheleni kowe-1995 nasekuqaleni kowe-1996. Bonke aba bangama-64 bafunyaniswa benetyala. Abangama-47, abaneminyaka ephakathi kweli-16 nengama-72 ubudala, abazange bavume ukuhlawula imali ababebizwa yona engamawaka eerandi ibe basiwa entolongweni kangangeeveki ezisusela kwenye ukuya kwezine.

Ngaphambi kokuba asiwe kwizisele zawo, amadoda namabhinqa akhululwa ahanjiswa ze aza ahlolwa phambi kwabantu abaninzi. Amanye amabhinqa kwathiwa makolule iingalo zawo achophe izihlandlo ezihlanu, aze avule imilomo yawo ephakamisa ulwimi. Kwathiwa elinye ibhinqa malivule iimpundu zalo. Entolongweni, wambi amadoda kwafuneka asele amanzi aphuma kumngxuma wendlu yangasese. Amanye amabhinqa aselula ayephathwa njengezaphuli-mthetho eziyingozi, evalelwa odwa ngalo lonke ixesha esentolongweni, ibe ayenikwa isiqingatha somxhesho wokutya. Bambi abagcini bentolongo babesala ukunika la maNgqina iiBhayibhile zawo.

Kodwa makhe sive amagqabaza ambalwa avela kwamanye amabhinqa aseluvalelweni. Oko kwatyhilwa yingxelo yawo yokuqala kwakwahluke gqitha kwiindonga ezingaphambili ezithi ndijonge zesi sixeko sala maxesha.

“Esi sisele sasimdaka. Isinki yokuhlambela nendlu yangasese zazikwimeko engaginyisi mathe. Zazimdaka zithe hlifi. Ngaphantsi kwesitulo endandihlala kuso kwakukho izindlu zezigcawu noburhonorhono.”

“Kwathiwa mandikhulule ndime ze, ndaza ndanikwa iimpahla zasentolongweni, isitya sesepha (esingenasepha), nebrashi yamazinyo. Amabanjwa endandikunye nawo kwesi sisele andixelela ukuba amabanjwa okwexeshana akayifumani intlama yokuhlamba amazinyo nephepha elisetyenziswa kwindlu yangasese.”

“Sasingama-20 kwisisele esinye. Indlu yangasese kuyachotshwa kuyo inodonga oluphela esinqeni. Igumbi lokuhlambela lalineshawa enye nesinki enye yokuhlambela enempompo. Kwakufuneka sihlambe ngokwamaqela anabantu abathandathu—thina sonke ababekwesi sisele kwakufuneka sihlambe kwisithuba sesiqingatha seyure kusasa.”

Phezu kwayo nje le ntlungu yokuvalelwa entolongweni, bonke babekugqala kulilungelo ukukhonza uThixo—nanini na, naphi na, ibe enoba iimeko zazisithini na. Khawuve la magqabaza alandelayo avela kwintombazana ekwishumi elivisayo:

“Ukususela nje kwixesha endangena ngalo entolongweni, ndandisoloko ndizikhumbuza ngesizathu sokuba ndibe lapho. Suku ngalunye ndandithandaza kuYehova ukuba aphulaphule imithandazo yam aze angandishiyi. Ndavakalelwa kukuba wayewuphendule umthandazo wam kuba yayingumoya wakhe oyingcwele owandincedayo ndanyamezela. Kusemva koko kuphela endathi ndayiqonda indlela endandisondelelene ngayo naye, ibe kuye kwandomeleza gqitha ukwazi ukuba usijongile. Ndiziva ndinelungelo ngokukwazi ukufumana esi silingo ngenxa yegama lakhe.”

Amaphephandaba asehlabathini lonke akhawuleza azi ngeli bali. Amaziko eendaba aseHong Kong, eKhanada, eMalaysia, eOstreliya, eUnited States, eYurophu nakwezinye iindawo anikela ingxelo ngokuphindaphindiweyo ngezi ziganeko. IThe Toronto Star, yaseKhanada, yachaza indlela ekwakukubi ngayo ngelo xesha ngomxholo wayo othi “Ixhegokazi Lifunyaniswe Linetyala Lokuba NeBhayibhile.” Kuyavunywa ukuba, ihlabathi lineengxaki ezinzulu ezininzi ezibandakanya abantu abaninzi gqitha, kodwa ngenxa yale meko wonke umntu okhwankqisiweyo ehlabathini ubuza umbuzo omnye. “YiSingapore leyo?”

Kunzima ukuqonda isizathu sokuba unqulo olusebenza esidlangalaleni phantsi kokhuseleko olupheleleyo lomthetho kumazwe angaphezu kwama-200 lube lixhoba lentshutshiso eSingapore. Kuba nzima ngakumbi ukusiqonda xa sicinga ukuba alukho olunye unqulo eSingapore oluye lwaphathwa ngendlela engekho ngqiqweni nengenamfesane ngolu hlobo.

Eneneni, isekela-ntsumpa yamapolisa elalikhokela iqela elaligqogqa amaNgqina kaYehova lavuma enkundleni ukuba eli yayikuphela kwexesha lona namagosa alo abathi bayalelwa ukuba baphazamise intlanganiso yonqulo. Ezi zicatshulwa zilandelayo zithatyathwe kubungqina obukhutshelweyo:

Umbuzo: (Obuzwa kwingqina) Ngokolwazi lwakho ngaba iSecret Societies Branch yakha yenza uphando yaza yagweba nawaphi na amaqela onqulo angabhaliswanga ngokusemthethweni, ngaphandle kwamaNgqina kaYehova?

Impendulo: Alikho endilaziyo.

Kwaphinda kwabuzwa.

Umbuzo: (Obuzwa kwingqina) Ngaba wena ngokobuqu nangaliphi na ixesha wakha wagqogqa ngendlela efanayo iqela elincinane lonqulo, elihlanganisana ekhayeni nelingabhaliswanga phantsi kweSocieties Act?

Impendulo: Andizange.

Kufuneka Kwenziwe Okuthile

IAmnesty International neInternational Bar Association nganye kuzo yathumela umakhi-mkhanya wayo okhethekileyo ukuze ajonge ukuba eli tyala lalichotshelwe ngendlela efanelekileyo kusini na. Umakhi-mkhanya ongakhethi cala weAmnesty International uAndrew Raffell, oligqwetha laseHong Kong, wathetha la mazwi alandelayo: “Kwingxelo yam ndibhale ukuba lalichotshelwe ngendlela engekho sikweni kwaphela.” Wacacisa ngokubhekele phaya ukuba amagosa karhulumente ekwathiwa makanikele ubungqina akazange akwazi ukuchazela inkundla isizathu sokuba uncwadi lwamaNgqina kaYehova lwalugqalwa njengolungafanelekanga. URaffell wadwelisa ezinye iimpapasho zeBhayibhile ezalelweyo kuquka ethi Happiness—How to Find It nethi Ubutsha Bakho—Ukufumana Okona Kulungileyo Kubo. Wongezelela ngelithi eneneni azinakugqalwa njengezingafanelekanga nangayiphi na indlela.

Umakhi-mkhanya ovela kwi-International Bar Association, uCecil Rajendra, wathetha la mazwi alandelayo:

“Zisuka nje, kwakucace gca kulo makhi-mkhanya ukuba olu vavanyo luchuku nje . . . olwenzelwa ukuba kube ngathi ehlabathini lonke isekho idemokhrasi eSingapore.

“Eli yelenqe lalisele liqulunqwe lagqitywa yaye ngaphandle kwamathandabuzo okuba xa kugqitywa ukuchotshelwa kweli tyala bonke abatyholwa abanakubhungca njengoko begwetyiwe.

“Nangona eli tyala lachotshelwa kwinkundla engaphantsi ibe nezityholo ezabekwayo zazikukusithela nje ngeSocieties Act, abantu babesoyika ibe begrogriswa kule nkundla.

“Le meko yayibangelwa ngokuyintloko kukuba amapolisa angaphezu kwali-10 agaxeleyo ayebekwe apho (ama-6 engaphakathi enkundleni ama-4 engaphandle) namadoda amaninzi eCandelo Elikhethekileyo anxibe ngokuqhelekileyo ehleli kwindawo ephakamileyo.”

Egqabaza ngendlela elachotshelwa ngayo eli tyala, uRajendra wahlabela mgama esithi:

“Indlela eyaqhuba ngayo le Jaji sele ikhankanyiwe ngexesha lohlolisiso (kwanangalo lonke ixesha lokuchotshelwa kwetyala, njengoko kungqinwe zizicatshulwa) yashiya abantu benganelisekanga. . . . Ingalichopheli ngendlela efanelekileyo ityala, ngokuphindaphindiweyo le Jaji yema ngakwicala lomtshutshisi, iphazamisana namagqwetha abamangalelwa xa ebuza amagqwetha omtshutshisi ngezinto eze nazo njengobungqina, ngokomzekelo umtshutshisi weza neBhayibhile eyiKing James ukungqina ukuba abatyholwa babeneempapasho ezalelweyo!”

Lalinxube ngolo hlobo ihlabathi liphela ngenxa yokucinezela kweSingapore amalungelo abantu kangangokuba iphephancwadi laseBelgium elinomxholo othi Human Rights Without Frontiers lapapasha ingxelo enamaphepha ali-18 eyayixubusha ngokupheleleyo ngokuhlaselwa kwamaNgqina kaYehova ngurhulumente waseSingapore. Ebhala kwinqaku lomhleli, uWilly Fautré, umhleli oyintloko waloo lindixesha, wabetha koomofu echaza eyona nto ithethwa yinkululeko yabantu abaphantsi kwakhe nawuphi na urhulumente wezobupolitika:

“Nangona inkululeko yonqulo iyenye yezona zinto zibalulekileyo ezibonisa uhlobo oluqhelekileyo lwenkululeko yabantu kulo naliphi na ibutho labantu, imbalwa gqitha imibutho yasekuhlaleni elwela amalungelo abantu eye yaba negalelo ekupheliseni ucalucalulo nokunganyanyezelwa kwabanye okulolo hlobo nokusekelwe kunqulo okanye koko bakukholelwayo, okanye ekwakhiweni kwemigaqo eya kukhusela ize ikhulise inkululeko yonqulo.”

IHuman Rights Without Frontiers yapapasha uludwe loncomelo ngamagama angqindilili kwiphepha elingasemva lengxelo yalo.

Buyingenelo ubukho bamaNgqina kaYehova eSingapore. Ayawahlonela amalungelo abamelwane bawo ibe awenzi lwaphulo-mthetho nxamnye nabo. Akukho mmi waseSingapore unokuxhalela ukuba indlu yakhe iya kuqhekezwa okanye aphangwe, abethwe, okanye adlwengulwe lelinye lamaNgqina kaYehova.

Ubulungiseleli bawo basesidlangalaleni abenza ngokuzithandela bomeleza buze buphucule ubomi bentsapho ibe bufak’ isandla ekubeni ngabemi abalungileyo kwawo. Aqhuba izifundo zeBhayibhile ngesisa kunye nabani na ofuna ukufunda imilinganiselo eyakhayo yeBhayibhile nendlela yokuyisebenzisa ebomini bakhe. Iintlanganiso zawo zokufundisisa iBhayibhile nomthandazo ziyinxalenye yemfundo yamaKristu. Oku kuye kwawabangela ukuba abe ngabemi abafanelekileyo.

Abemi baseSingapore abayihlonelayo iriphabliki yabo nabafuna ukuba ibe nekamva eliqaqambileyo bafanele babongoze urhulumente ukuba aphinde ayijonge ngokutsha indawo efanelekileyo yamaNgqina kaYehova phakathi kwebutho labantu baseSingapore. Ngoku lixesha lokuba kususwe imiqathango enxamnye nawo aze kwakhona anikwe into wonke ummi anelungelo layo—inkululeko yonqulo.

[Ibhokisi ekwiphepha 30]

Ihlabathi Londele

1. “Xa amapolisa aseSingapore ngokungalindelekanga agqogqa amakhaya amahlanu ngobunye ubusuku ngoFebruwari odluleyo engumkhosi, amadoda angama-69, amabhinqa, nabakwishumi elivisayo babanjwa basiwa kwikomkhulu lamapolisa ukuba baye kuncinwa. Le yayingeyondlela ezazifanele ziphele ngayo iintlanganiso zokufundisisa ibhayibhile.”−IThe Ottawa Citizen, yaseKhanada, kaDisemba 28, 1995, iphepha A10.

2. “Bekuya kubazisela ulwaneliseko lokwenene bonke abo bayixhalabeleyo inkululeko yonqulo namalungelo esazela ukuba uRhulumente waseSingapore ebenokulungisa indlela abajonga ngayo aba bantu bamsulwa nabangenabungozi aze abavumele baxelele abanye ngeenkolelo zabo ngaphandle kokoyika okanye ukuphazanyiswa.”—UNjingalwazi Bryan R. Wilson, weUniversity of Oxford, eNgilani.

3. “Ekuchotshelweni ngokulandelelanayo kwamatyala okwavusa izikhalazo kumaqela ehlabathi amela inkululeko yabemi, iinkundla zaseSingapore ziye zagweba amaNgqina kaYehova angama-63 ukususela kuNovemba wonyaka odluleyo.”—IAsahi Evening News, yaseJapan, kaJanuwari 19, 1996, iphepha 3.

4. “AmaNgqina kaYehova afanele avunyelwe ukuba ahlanganisane aze anqule ngokuseluxolweni ngaphandle kokusongelwa ngokubanjwa okanye ukuvalelwa entolongweni. Inkululeko yonqulo lilungelo elisisiseko eliqinisekiswe nguMgaqo-siseko waseSingapore.”—IAmnesty International, kaNovemba 22, 1995.

5. UChan Siu-ching, ongusihlalo weJustice and Peace Commission yeBhunga leNqila yamaKatolika aseHong Kong, wathi kwileta awayibhalela uLee Kuan Yew, uMphathiswa Oyintloko, kwiOfisi yeNkulumbuso, yomhla kaJuni 1, 1995: “Umba ophambili ngowokuba kwanokuba urhulumente waseSingapore ucinga ukuba abo bangavumiyo ukungenela inkonzo yomkhosi bavukela umthetho ibe bafanele bagwetywe, amanye amalungu akwintlanganiso yonqulo akafanele aphazanyiswe. . . .

“Kungeso sizathu sibhala ukuze sicele uRhulumente wenu:

1. ukuba angawavali umlomo amaNgqina kaYehova ukuze anandiphe inkululeko yonqulo nesazela;

2. ayeke ukubek’ ityala amalungu amaNgqina kaYehova aya nje kwiintlanganiso zonqulo.

3. akhulule loo malungu amaNgqina kaYehova aye abanjwa kutshanje ngenxa nje yokubandakanyeka kwimisebenzi yonqulo.”

[Umfanekiso okwiphepha 27]

AmaNgqina kaYehova enkundleni emva kokuba egwetyiwe

[Umfanekiso okwiphepha 27]

Eli Ngqina lineminyaka engama-71 ubudala layixelela oku ijaji: “Andisosisongelo kulo rhulumente.” Kodwa, lavalelwa entolongweni