Uvuyo Lokwenza Ukuthanda KukaThixo Ubomi Bam Bonke

Kubalisa uBill Yaremchuk

NgoMatshi 1947 emva kweeveki ezimbalwa ndiphumelele kwiklasi yesibhozo yeSikolo seBhayibhile seWatchtower saseGiliyadi, ngelo xesha sasiqhutyelwa eSouth Lansing, eNew York, eUnited States. Ndenjenjeya ndisiya kwisabelo sam kwilizwe lasemzini—eSingapore.

UDAVE FARMER owayengumkhaya wam owayephumelele kwiklasi yesixhenxe yaseGiliyadi sasiza kusebenza kunye esabelweni. Sanduluka ngenqanawa eyayisakusetyenziswa ngumkhosi iMarine Adder eSan Francisco, eKhalifoniya.

Safikela kwizibuko laseHong Kong. Asizange siyikholelwe into esayibona apho. Ingqushu yeMfazwe yeHlabathi Yesibini yayibonakala kuyo yonke indawo—abantu babelala ecaleni kwendlela, inxele likaKetsekile lalizenzela yaye bebonakala ukuba baza kumnabela uqaqaqa. Sabuyela kwasenqanaweni saza sasinga eManila, kwikomkhulu lePhilippines.

Nalapho yayibonakala ingqushu yemfazwe. Ukwehla kwethu ezibukweni sadibana nobugoxo beenqanawa ezazibethwe zibhombu nabantu ababehlwempuzekile. Sakhawulelwa liqaqobana lamaNgqina kaYehova, laza lasisa kwiHolo yoBukumkani. Nangona imeko yayimaxongo babonwabile.

Izibuko elilandelayo esamisa kulo lelaseBatavia (ngoku elibizwa ngokuba yiJakarta) eIndonesia. Kwakugquba imfazwe yamakhaya yaye asizange sivunyelwe ukuba sihle enqanaweni ekubeni kwakusiliwa kufutshane nezibuko. Njengokuba sasisinge eSingapore ingqondo yayithath’ ibeka njengoko sasingazi ukuba sasilindele ntoni. Ngaba kwakusele nje obu bugoxo kuphela kumazwe aseMpuma esasifunde ngawo kwiincwadi zokhenketho?

Kwintsuku nje ezingephi amathandabuzo am aphela. Kwakuza kwenzeka ummangaliso owawuza kubonisa ngaphandle kwamathandabuzo ukuba umsebenzi wam noDave wawuxhaswa nguThixo.

Indlela Esayifumana Ngayo Imvume Yokuhlala

Emva kwenyanga sindulukile eSan Francisco, inqanawa yethu yemisa kwisiqithi saseSt. Johns, indawo ezimiswa kuyo iinqanawa ngaphambi kokuba zingene ezibukweni eSingapore. Amagosa ahlola abantu abasuka kwamanye amazwe, ahlola iincwadi zethu zokundwendwela aza azigximfiza ngesitampu esiqinisekisa ukuba samkelekile. Ngentsasa elandelayo inqanawa esasihamba ngayo yemisa ezibukweni. Emva kokuba amaphepha ehlolwe ngamagosa enqanawa sehla.

Ngosuku olulandelayo sabuyela ezibukweni siyokuthi ndlela ntle kubavangeli basemazweni esasihamba nabo. Babeqhubeka nohambo lwabo olwalusiya eIndiya naseCeylon (ngoku eyiSri Lanka). Wathi akusibona umphathi wenqanawa weza ngqo kuthi, eligqabi ngumsindo esithi besifanele singehli kule nqanawa. Ngoxa sasiseselwandle, uMnu. uHaxworth owayengumphathi wamagosa ahlola abantu abasuka kwamanye amazwe wayemyalele ukuba angasivumeli ukuba sehle enqanaweni xa sifika ezibukweni. Thina negosa elalisivumele ukuba sehle sasingawazi loo myalelo.

Sasiwa kuMnu. Haxworth owayenobuso obuntshingintshingi. Wasinkqangisa esithi asivumelekanga ukuba singene eSingapore. Ekubeni sasingayazi loo nto sambonisa iincwadi zethu zokundwendwela ezazigximfizwe amagama athi “Ningehla.” Wazithi hlasi ezo ncwadi zethu zokundwendwela waza wawacima amagama athi “Ningehla.” Okulusizi kukuba inqanawa yayisele ihambile. Emva kokuzigcina unyaka wonke uMnu. Haxworth wazibuyisela kuthi zigximfiziwe ngokutsha.

Intsimi YaseSingapore Enemveliso

Ekufikeni kwethu ngoAprili 1947, indoda egama linguJoshua yayikuphela kweNgqina elalikho eSingapore. Wakhonza njengomshumayeli wexesha elizeleyo okanye uvulindlela de kwasekufeni kwakhe ngasekuqaleni kweminyaka yee-1970. Akuzange kube kudala bambi ababefunda iinyaniso zeBhayibhile baqalisa ukwabelana ngazo nabanye. Imithandazo yethu yokuba kubekho abasebenzi abangakumbi kumsebenzi wokomoya wokuvuna yaphendulwa.—Mateyu 9:37, 38.

Ngowe-1949, ngoxa uMnu. uHaxworth wayesekhefini e-Ngilani, kwafika abavangeli basemazweni abathandathu ababephumelele kwiklasi ye-11 yaseGiliyadi. Ebudeni belo xesha, uDave owayengumvangeli wasemazweni nam kangangeminyaka eliqela wayishiya iSingapore ngenxa yempilo enkenenkene. Wafudukela eOstreliya yaye wakhonza ngokuthembeka de kwasekufeni kwakhe ngowe-1973. Phakathi kwabo bavangeli basemazweni bathandathu kwakukho uAileen Franks endatshata naye ngowe-1956.

Ukutyhubela iminyaka siye safunda iBhayibhile nabantu abaninzi abaye baba ngamaNgqina nabantwana babo. Nanamhl’ oku bambi babantwana babo ngabashumayeli bexesha elizeleyo kwamanye amazwe. Amanye amava achukumisayo ngawesibini saseMerika uLester noJoanie Haynes esasihlala eSingapore. Saqalisa ukufunda naso iBhayibhile ngeminyaka yee-1950. Senza inkqubela ekhawulezileyo saza sabhaptizwa sakuba sibuyele eUnited States. Kamva uLester noJoanie banandipha intsimi enemveliso. Banceda abantu abaninzi ukuba babe ngamaNgqina kuquka nabantwana babo abathathu.

UJoanie wabhala wathi: “Xa ndicinga ngesiganeko esenzeka ngaloo nyaka eSingapore sayitshintsha ngokupheleleyo indlela esasiphila ngayo. Ukuba naningazange nisifundise inyaniso ngesisehla sinyuka kweli hlabathi. Ndiyavuya ngokuba niye nafundisa uLes inyaniso kuba kwasekuqaleni namfundisa ukuthanda uYehova nabazalwana. Usenjalo nangoku.”

Ukukhonza Njengentsapho ESingapore

Ngowe-1962 kwenzeka into eyayingalindelekanga. Ugqirha wethu wafumanisa ukuba uAileen ukhulelwe. Sasifuna ukuqhubeka nomsebenzi wobuvangeli, kodwa sasiza kumkhulisa njani umntwana? UNathan H. Knorr, owayengumveleli womsebenzi wamaNgqina kaYehova ehlabathini lonke wasibhalela waza wandicebisa ukuba ndifune umsebenzi kwalapho eSingapore. Oku kwezisa ubunzima obungathethekiyo.

Inkoliso yabantu abavela kwamanye amazwe babenezikhundla eziphezulu kwiinkampani zangaphandle. Ndandingenamava kwezoshishino kuba ndandingumshumayeli wexesha elizeleyo emva kokuphuma kwam esikolweni kwiminyaka engama-23 eyadlulayo. Ndahlawula inkampani yaseLondon efunela abantu imisebenzi ukuze ichaze ngeemfaneleko zam njengomvangeli kumazwe asemzini yaye bayithumela kwiinkampani ezininzi zaseSingapore.

Zaziphendula zithi: “Silusizi ukukwazisa ukuba asinaso isithuba somntu onezi mfaneleko zakho.” Babendigqala njengomntu onamava kakhulu. Iinyanga zaqengqeleka de kwazalwa umntwana wethu uJudy. UMzalwana uKnorr wayetyelele eSingapore yaye waya kubona uJudy nonina esibhedlele. Wasiqinisekisa wathi: “Singahlala kwikhaya labavangeli basemazweni ndide ndifumane umsebenzi.”

Emva kweenyanga ezimbalwa ndafumana umsebenzi njengommeli wabathengisi kwinkampani yeenqwelo-moya yamazwe ngamazwe. Umvuzo eyayindihlawula wona wawanele nje ukuba ndikwazi ukuphila. Emva kweminyaka emibini ndaqeshwa yinkampani yaseMerika yeenqwelo-moya yaye umvuzo wam waphindwa kabini. Ekugqibeleni, ndandisaziwa kweli shishini, loo nto yandenza ndakwazi ukuchitha ixesha elingakumbi nentsapho yam nakubulungiseleli bamaKristu.

Ubomi bethu sabusekela kwinkonzo kaYehova, izinto zokomoya sizibeka kwindawo yokuqala. Lo nto yandenza ndaxhamla amalungelo aliqela entlanganweni. UAileen waba ngumshumayeli wexesha elizeleyo kwakhona. Ngelo xesha, umsebenzi wokushumayela ngoBukumkani wawuqhuba kakuhle eSingapore. Ebudeni beminyaka yee-1960 sathenga indlu enemigangatho emibini eyaba yiHolo yoBukumkani. Yayisetyenziswa ngamabandla amane.

Ukuvalwa Komsebenzi Wethu

Ekuhambeni kwexesha inkcaso yathukuthukuza. NgoJanuwari 14, 1972, njengokuba sasidla ngokwenza saya kwiintlanganiso ezaziqhutyelwa kwiHolo yoBukumkani. Safika isango livalwe ngetyathanga neqhaga. Kwakuxhonywe isaziso esithi iBandla laseSingapore LamaNgqina kaYehova alikho mthethweni. Sasivalwe umlomo!a

Ukuvalwa kweHolo yoBukumkani akuzange kusithintele ekunquleni uYehova kodwa ndandizibuza ukuba, ‘Kuyintoni ukuthanda kukaThixo ngentsapho yam?’ Ndandiqonda ukuba singanikwa uphum’ aphele asinakuze sikwazi ukubuyela eSingapore ukuze size kubona abahlobo bethu. Ndabuza umphathi wenkampani yethu ukuba andinakukwazi ukusebenza eKuala Lumpur, eMalaysia. Ngaloo ndlela sasiza kukwazi ukutyelela abazalwana. Okwandimangalisayo kukuba, wathi mandibe ngumphathi weofisi eseKuala Lumpur, lo msebenzi wawuza kuwuphinda kabini umvuzo wam.

Ndazibuza: ‘Ngaba kukuthanda kukaThixo ukuba ndishiye abazalwana bam eSingapore?’ Sathandaza kuYehova ngalo mbandela. Saqonda ukuba nguYehova osizise apha, sagqiba ekubeni sihlale. Umphathi wam wothuka akufumanisa ukuba andiwamkelanga lo msebenzi wawuza kundihlawula umvuzo oncumisayo.

Ukuphila nokusebenza kwindawo ekuvalwe kuyo umsebenzi kwakucinezela gqitha kuba sasisoloko sisongelwa ngokubanjwa nangokuvalelwa. Kwakukho izihlandlo ezaziwenza siwaxabise amazwi eNdumiso 34:7 athi: “Ingelosi kaYehova imisa inkampu macala onke kwabo bamoyikayo ize ibahlangule.”

Isabelo Esitsha

Ekugqibeleni ngowe-1993 emva kokukhonza kangangeminyaka engama-46 eSingapore sacelwa ukuba sifudukele eNew Zealand ukuze sikhonze kwindawo esasingazukucinezeleka kangako kuyo. Saba buhlungu xa sashiya abahlobo bethu esasibathanda gqitha. Sakhuthazwa kukwazi ukuba ukholo lwabo lwalunesiseko esomeleleyo kuba lwalwakhiwe ngezinto ezingatshiyo. Labenza bema nkqi naphantsi kweemvavanyo ekwakufuneka beqhubeke bezinyamezele.—1 Korinte 3:12-14.

Ngoku emva kweminyaka eli-14 siseNew Zealand, nangona sele sikhulile sisabuthanda ubulungiseleli bethu njengabashumayeli bexesha elizeleyo abakhethekileyo. Abakhuluwa bam uMike oneminyaka engama-94 ubudala noPeter oneminyaka engama-90 ubudala basadl’ amazimba, bakhonza uYehova ngokuthembeka eKhanada.

Ngowe-1998, intombi yethu uJudy yabuyela eSingapore yaza yakhonza khona iminyaka eliqela. Kwenye yeeleta awasibhalela zona wathi: “Ndinombulelo ongazenzisiyo suku ngalunye kuYehova ngelungelo lokukhonza apha. Ndibamba ngazibini kuni nobabini ngoqeqesho nokuzincama kwenu ukuze ndikwazi ukukhonza apha.” Ngowama-2003 wabuyela eNew Zealand ukuze asincede.b

Siyambulela uYehova ngokuba iimeko zethu zaye zasivumela sakwazi ukusabela kubizo lweNkosi lwabasebenzi abangakumbi kumsebenzi wokuvuna. Lo msebenzi uye wasizisela uvuyo olungathethekiyo. Xa ‘ihlabathi lidlula’ njengokuba iBhayibhile isitsho, siya kunandipha ukuzaliseka kwesithembiso sikaThixo esimangalisayo esithi: “Lowo wenza ukuthanda kukaThixo uhleli ngonaphakade.”—1 Yohane 2:17.

[Imibhalo esemazantsi]

[Umfanekiso okwiphepha 29]

Ekufikeni kwethu ngoAprili 1947, uJoshua yayikuphela kweNgqina elalikho eSingapore

[Umfanekiso okwiphepha 29]

Ngowe-1947, ndikunye noDave Farmer eHong Kong sisinge eSingapore

[Umfanekiso okwiphepha 29]

Ndikunye noAileen ngowe-1958

[Umfanekiso okwiphepha 31]

Sikunye nentombi yethu uJudy

[Inkcazelo]

Kimroy Photography

[Inkcazelo Ngomfanekiso okwiphepha 28]

Kimroy Photography