Imbono YeBhayibhile

Ngaba Inzululwazi NeBhayibhile Ziyavumelana?

IINQWELO-MOYA neebhombu zeathom neeseli ezilawulwa yimizila yemfuza nokudityaniswa kweembewu zeegusha ezingafaniyo, zonke ezo zinto zibonisa ukuba inkulungwane yethu yama-20 ibizaliswe bubugcisa bezenzululwazi. Izazinzulu ziye zathabatha umntu zaya kumbeka enyangeni, zazibetha zaya kuxela iingqakaqha, zenza iinguqu kwiindlela zolimo, zaza zeza neendlela ezilula zokunxibelelana ehlabathini lonke. Ngoko, akumangalisi ukuba xa izazinzulu zithetha, abantu bebaz’ iindlebe. Kodwa zithini izazinzulu ngeBhayibhile, ukuba phofu ikho into ezinokuyithetha ngayo? Ibe kwelinye icala, iBhayibhile isixelela ntoni ngenzululwazi?

Ngaba Imimangaliso Ayinanto Yokwenza Nenzululwazi?

Intyilalwazi yakutshanje ithi: “Abantu abayithandayo inzululwazi bayakholwa ‘kukwenza into yenzeke.’ Bavakalelwa kukuba yonke into eyenzekayo ngokuqhelekileyo yenzeka ngendlela engokwemvelo.” Kwanabafundi beBhayibhile bayayamkela imigaqo emiselwa yinzululwazi. Noko ke, bayaqonda ukuba iBhayibhile isoloko ixubusha ngeziganeko ezingummangaliso ezingenakuchazwa ngokwenzululwazi ngokolwazi lwanamhlanje. Imizekelo lilanga elema ngxi ngomhla kaYoshuwa nokuhamba kukaYesu phezu kwamanzi. (Yoshuwa 10:12, 13; Mateyu 14:23-34) Noko ke, le mimangaliso iboniswe njengebangelwe ngamandla kaThixo asebenza ngendlela engaphezu kweyemvelo.

Le ngongoma ibaluleke gqitha. Ukuba iBhayibhile yayithe abantu banokuhamba phezu kwamanzi ngaphandle koncedo lukaThixo okanye oko kubonakala ngathi kukuhamba kwelanga esibhakabhakeni kunokuphazanyiswa nje ngaphandle kwesizathu, isenokubonakala iphikisana nezibakala ezingokwenzululwazi. Noko ke, xa isithi izenzo ezinjalo zenziwa ngamandla kaThixo, ayiphikisani kangako nenzululwazi kunoko ixubusha ngombandela inzululwazi engekabi nakuwuqonda.

Ngaba IBhayibhile Iyaphikisana Nenzululwazi?

Kwelinye icala, kuthekani ngeemeko apho iBhayibhile ixubusha ngeziganeko eziqhelekileyo kubomi babantu okanye ithethe nje ngezityalo, izilwanyana, okanye isiganeko esingokwemvelo? Okubangela umdla kukuba, awukho umzekelo obubungqina bokuphikisa kweBhayibhile izibakala ezaziwayo ezingokwenzululwazi xa kuqwalaselwe umongo wengxelo leyo.

Ngokomzekelo, iBhayibhile isoloko isebenzisa ulwimi olubumbongo xa ichaza iingcamango zabantu ababephila kumawaka eminyaka eyadlulayo. Xa incwadi kaYobhi ithetha ngokukhanda okanye ukuyila kukaYehova isibhakabhaka “esiqinileyo njengesipili esityhidiweyo,” isichaza kakuhle isibhakabhaka njengesipili sentsimbi esibonisa ngokucacileyo. (Yobhi 37:18) Akukho mfuneko yokuwujonga ngokoqobo lo mzekeliso, kanye njengokuba ungenakuwujonga ngolo hlobo umzekeliso womhlaba ‘onezikhondo zeentsika’ okanye ‘ilitye lembombo.’—Yobhi 38:4-7.

Oku kubalulekile ngenxa yokuba abahlalutyi abaliqela baye bayijonga ngokoqobo imizekelo enjalo. (Bona eyesi-2 kaSamuweli 22:8; INdumiso 78:23, 24.) Baye bagqiba ngelithi iBhayibhile ifundisa izinto ezinjengezi, ezicatshulwe kwiThe Anchor Bible Dictionary.

“Umhlaba ohlala uluntu kucingwa ukuba uyinto engqukuva eqinileyo, mhlawumbi icwecwe elingqukuva, elidada phezu kwamanzi amaninzi angenamda. Ngaphezulu, kukho amanye amanzi amaninzi angqamene nala angaphantsi angenamda ngendlela efanayo, ibe kulapho amanzi ehla khona ephuma kwimingxuma nemijelo yamanzi amaninzi asezulwini. Inyanga, ilanga nezinye izikhanyiso zimi njengegophe phezu komhlaba. Esi ‘sisibhakabhaka’ esiqhelekileyo (rāqîa‛) ekuthethwa ngaso ngabefundisi.”

Ngokucacileyo, le ngcaciso ayivumelani nenzululwazi yanamhlanje. Kodwa ngaba le yindlela efanelekileyo yokuqonda imfundiso yeBhayibhile ephathelele amazulu? Akunjalo konke konke. IThe International Standard Bible Encyclopaedia ithi indlela ochazwa ngayo umhlaba ngesiHebhere “ngokwenene isekelwe ubukhulu becala kwiingcamango ezaziqhelekile eYurophu ebudeni bamaXesha Obumnyama kungekhona kwinkcazelo yokwenene ekwiT[estamente] E[ndala].” Yayivela phi loo nkcazelo yamaxesha aphakathi? Njengoko uDavid C. Lindberg echaza kwiThe Beginnings of Western Science, yayisekelwe ubukhulu becala kwinzululwazi yommandla wendalo yesithandi sobulumko samandulo esingumGrike uAristotle, esasineencwadi ekwakusekelwe kuzo uninzi lwezifundo zamaxesha aphakathi.

Bekungayi kuba nentsingiselo ibe bekuya kuphazamisa ukuba uThixo ebeya kubhala iBhayibhile ngolwimi obeluya kuqondwa sisazinzulu senkulungwane yama-20. Endaweni yokusebenzisa amagama asetyenziswa yinzululwazi, iBhayibhile iqulethe imizekelo ecacileyo ethatyathwe kubomi bemihla ngemihla babantu ababengabokuqala ukuyibhala—ineenkcazelo ezicace gca nezinempembelelo engekaphelelwa lixesha unanamhla.—Yobhi 38:8-38; Isaya 40:12-23.

Ulwazi Oluvela Kumthombo Ongasentla

Noko ke, okubangela umdla kukuba, ezinye iimbekiselo zeBhayibhile ziye zibonakale zibhekisela kulwazi lwenzululwazi olwalungafumaneki kubantu ababephila ngelo xesha. UYobhi uchaza uThixo ‘njengowaneka izulu langasentla enyanyeni, axhome ihlabathi phezu kokungeni.’ (Yobhi 26:7) Ingcamango yokuba umhlaba uxhonywe “phezu kokungeni” yayahluke lee kwiintsomi zabantu abaninzi ababephila kudala, ababesithi wawumi phezu kweendlovu okanye iimfudo zaselwandle. UMthetho kaMoses waba nemigaqo yempilo ephucuke lee kunolwazi lwezamayeza lwelo xesha. Imithetho eyalela ukuba abantu ekurhanelwa ukuba baneqhenqa bavalelwe bodwa nokwalelwa kokuchukunyiswa kwezidumbu ngaphandle kwamathandabuzo yasindisa ubomi bamaSirayeli amaninzi. (Levitikus 13; Numeri 19:11-16) Ngokwahluke kwaphela koko, iindlela zokunyanga zama-Asiriya zichazwa “njengomxube wonqulo, ukuvumisa nobudemon” ibe zaziquka ukunyanga ngelindle lenja nomchamo womntu.

Njengoko ubani enokulindela kwincwadi ephefumlelwe nguMdali, iBhayibhile inenkcazelo echanileyo ngokwenzululwazi eyodlula lee eyexesha layo, nangona ingangeni nzulu kwiinkcazelo ezingokwenzululwazi ezazinokungabi nantsingiselo okanye zibadide abantu ababephila kudala. IBhayibhile ayiphikisi nasinye kwizibakala ezaziwayo zenzululwazi. Kwelinye icala, iBhayibhile iqulethe inkcazelo eninzi engavumelaniyo neengcamango ezingenasihlahla, njengengcamango yendaleko.

[Amagama acatshulweyo akwiphepha 17]

Amazwi kaYobhi abonisa ukuba umhlaba ‘uxhonywe phezu kokungeni’ atyhila ulwazi ababengenalo abantu ababephila ngomhla wakhe

[Inkcazelo Ngomfanekiso okwiphepha 16]

NASA