Imbono Yebhayibhile
Ngaba Ukuzibandeza Uyolo Kunika Ubulumko?
“OONKOM’ EDLA YODWA babesithi hatya amakhamandela entsimbi, amatyathanga, imibhinqo ehlabayo neekhola ezitsolo . . . Abanye babeziqikaqika emeveni abanye bezityisa ngamarhawu, beziyeka ngabom bantsentsethwe zizinambuzane, baze bazitshise ngomlilo ibe babewatyakatya loo manxeba de abe bhutyubhutyu bubovu. Babezilambisa abanye bade benze engakumbi yokutya kuphela ukutya okubolileyo okanye ukutya nje okwenyanyisayo.”—The Saints, nguEdith Simon.
Aba bantu ke babengafuni kwanto idibene noyolo. Kwakutheni ukuze bazintlonde ngolo hlobo? Kwincwadi ethi For the Sake of the World—The Spirit of Buddhist and Christian Monasticism, ababhali bathi “ukususela ngexesha likaSocrates (ngenkulungwane yesihlanu B.C.E.) ubuncinane, abantu abaninzi bebesazi into yokuba ukuphila ubomi obuphantsi gqitha, ukunganelisi inkanuko yenyama nokungabi nabunewunewu bezinto eziphathekayo, kwakububulumko bokwenene.” Aba babengafuni kwanto idibene noyolo babecinga ukuba ukuzijaca kwakuya kubenza bathi qwaa ngokomoya okanye batsho bakhanyiseleke.
Kunzima ukuyichaza kakuhle le nto yokuzibandeza uyolo. Kwabanye, ithetha nje ukuziqeqesha okanye ukuzivimba okuthile. AmaKristu okuqala ayezixabisa iimpawu ezilolo hlobo. (Galati 5:22, 23; Kolose 3:5) KwanoYesu Kristu wancomela ukuphila ubomi obulula nobungaphazanyiswa ngamaxhala abangelwa kukuba nezinto eziphathekayo. (Mateyu 6:19-33) Noko ke, ukuzibandeza uyolo kusoloko kuhambisana neendlela ezingqongqo nezigabadele gqitha, ezifana nezi zichazwe ngasentla. Ngaba ezi zenzo zokuzibandeza uyolo, ingakumbi ezo zigabadeleyo, ngokwenene zinika ubulumko?
Kusekelwe Kwiingcamango Eziphosakeleyo
Phakathi kweentanda-bulumko eziye zabangela abantu bazibandeza uyolo kukho ingcamango yokuba izinto eziphathekayo nokuziyolisa zimbi gqitha ibe zingumqobo ekuhambeleni phambili ngokomoya. Enye ingcamango entyontyela ukuzibandeza uyolo yinkolelo yabantu abaninzi yokuba umntu unomzimba nomphefumlo. Abo bangafuni kwanto edibene noyolo bakholelwa kwelokuba umzimba yintolongo yomphefumlo nokuba inyama lutshaba lwawo.
Ithini iBhayibhile? IZibhalo zibonisa ukuba xa uThixo wagqibayo ukudala emhlabeni, wavakalisa ukuba yonke into ayenzileyo—yonke indalo yakhe ebonakalayo—‘yayilunge kunene.’ (Genesis 1:31) UThixo wayefuna indoda nomfazi banandiphe izinto eziphathekayo kumyezo wase-Eden. Igama elithi Eden lithetha “uYolo” okanye “uChulumanco.” (Genesis 2:8, 9) UAdam noEva babefezekile ibe babenandipha ulwalamano oluhle noMdali wabo de bona. Ukususela ngelo xesha ukusa phambili, ukungafezeki kwaba ngumqobo phakathi koThixo nomntu. Sekunjalo, ukwanelisa iminqweno esengqiqweni yabantu okanye ukunandipha uyolo abalunikwe nguThixo xa kusenziwa ngokuvisisana nemithetho kaThixo yokuziphatha akunakuze kubangele umqobo phakathi koThixo nabakhonzi bakhe!—INdumiso 145:16.
Ukongezelela, iBhayibhile ifundisa ngokucacileyo ukuba umntu, obunjwe ngothuli nowenziwe ngenyama, ungumphefumlo. IZibhalo aziyixhasi ingcamango yokuba umphefumlo yinto engabonakaliyo nengafiyo engaphakathi emzimbeni okanye ingcamango yokuba ngandlel’ ithile inyama ithintela ukuba ubani abe nolwalamano olusondeleyo noThixo.—Genesis 2:7.
Ngokucacileyo, ingcamango yokuzibandeza uyolo ityhila imbono egqwethekileyo umntu anayo ngolwalamano lwakhe noThixo. Umpostile uPawulos walumkisa ngelithi abanye abazibanga bengamaKristu babeya kukhetha iintanda-bulumko ezikhohlisayo kuneenyaniso ezisisiseko zeBhayibhile. (1 Timoti 4:1-5) Umbhali-mbali wonqulo uthi ngabo banale mbono: “Inkolelo yokuba into ephathekayo yayiphosakele . . . neyokuba umphefumlo womntu umele ukhululwe kumakhamandela ento ephathekayo, yaphembelela ukuzibandeza uyolo ngendlela egabadeleyo ngokwalela ukutyiwa kwenyama, ukuba neentlobano zesini nezinye izinto, nto leyo enokuthotyelwa ngabakumgangatho ophezulu ‘abafezekileyo’ okanye iiperfecti eziye kwizikolo ezikhethekileyo.” Ukucinga ngolo hlobo akuxhaswa yiBhayibhile ibe amaKristu okuqala ayengakholelwa kuko.—IMizekeliso 5:15-19; 1 Korinte 7:4, 5; Hebhere 13:4.
Akuyomfuneko Ukuzibandeza Uyolo
UYesu nabafundi bakhe babengazibandezi uyolo. Banyamezela izilingo neembandezelo ezininzi, kodwa ezi mbandezelo zazingabangelwa ngabo. Umpostile uPawulos walumkisa amaKristu ukuba alumke hleze iintanda-bulumko zabantu ezikhohlisayo ziwalukuhle kwinyaniso yeLizwi likaThixo zize ziwakhokelele ekwenzeni izinto ezingekho ngqiqweni nezigabadeleyo. UPawulos wakhankanya ngokukhethekileyo ‘impatho eqatha yomzimba.’ Wathi: “Zona kanye ezo zinto, eneneni, zinembonakalo yobulumko kuhlobo lonqulo olunguzenzele nentobeko yenkwalambisa, ziyimpatho eqatha yomzimba; kodwa azinaxabiso ekulweleni ukwanelisa inyama.” (Kolose 2:8, 23) Ukuzibandeza uyolo akumenzi umntu abe ngungcwele-ngcwele okanye atsho akhanyiseleke.
Liyinyaniso elokuba, ukuthobela kwamaKristu kufuna ukuzibhokoxa ngamandla nokuziqeqesha. (Luka 13:24; 1 Korinte 9:27) Ubani kufuneka azibhokoxe ukuze afumane ulwazi ngoThixo. (IMizekeliso 2:1-6) Kwakhona, iBhayibhile inikela isiluleko esiqatha nxamnye nokuba ngamakhoboka “eminqweno neziyolo” nokuba ‘ngabathandi beziyolo kunokuba ngabathandi bakaThixo.’ (Tito 3:3; 2 Timoti 3:4, 5) Noko ke, ezi zicatshulwa zeZibhalo azithi phambili nokuzibandeza uyolo. UYesu Kristu, indoda efezekileyo, wanandipha izihlandlo eziyolisayo ezaziquka ukutya, iziselo, umculo, nokudanisa.—Luka 5:29; Yohane 2:1-10.
Ubulumko bokwenene bunengqiqo, abuzibaxi izinto. (Yakobi 3:17) UYehova uThixo wayidala imizimba yethu yanamandla okunandipha izinto ezininzi eziluyolo ebomini. Ufuna sonwabe. ILizwi lakhe lisixelela oku: “Ndiyazi ke ukuba akukho nto ilungileyo phakathi kwabo, ingekukuvuya nokuzizuzela okulungileyo ebomini babo. Kwanokuba wonke umntu adle, asele, abone okulungileyo emigudwini yakhe yonke: sisipho sikaThixo eso.”—INtshumayeli 3:12, 13.
[Inkcazelo Ngomfanekiso okwiphepha 12]
Saint Jerome in the Cavern/The Complete Woodcuts of Albrecht Dürer/Dover Publications, Inc.