Imbono YeBhayibhile

Ngaba Ubuhlwempu Buyabuthethelela Ubusela?

“Ubuhlwempu lutshaba olukhulu lolonwabo lomntu; ngokuqinisekileyo butshabalalisa inkululeko yaye benza ukuba kube nzima ukwenza okulungileyo, kube ngumqobo.”—USamuel Johnson, umbhali wenkulungwane ye-18.

UMTHANDI WESIZWE waseRoma uMagnus Aurelius Cassiodorus wathi: “Ubuhlwempu bungunozala wolwaphulo-mthetho.” Ezi mbono zikhangeleka zibonisa ukuba iintlobo ezithile zolwaphulo-mthetho yimiphumo eqhelekileyo yobuhlwempu. Abaninzi namhlanje bayakungqina oku, ingakumbi xa ulwaphulo-mthetho ibubusela.

Inkolelo yokuba ingcinezelo nobuhlwempu ziyabuthethelela ubusela yinto edume kakhulu. Cinga ngeengoma zembali zesiNgesi ezidumileyo zenkulungwane ye-14 ezinjengoRobin Hood, ezibalisa ngesaphuli-mthetho sasentsomini esaphanga izityebi saza sanikela ngezo zinto kumahlwempu. Kangangeenkulungwane ebegqalwa njengegorha.

Liyinyaniso elokuba abaninzi namhlanje bathwaxwa bubunzima obugqithiseleyo bezoqoqosho. IBhanki Yehlabathi inikele ingxelo yokuba kutshanje abantu abaliwaka lezigidi ezisisi-1,3 baphila yimali engaphantsi kweerandi ezine ngosuku. Kolunye uhlolisiso ama-70 ekhulwini kumaFilipino azigqala engamahlwempu. EBrazil abona bantu bazizityebi bangama-20 ekhulwini bafumana umvuzo owuphindaphinda kangangama-32 owamahlwempu angama-20 ekhulwini. Iimeko ezinjalo zisenokubanxunguphalisa abanye abantu kuse kwinqanaba lokuba basebenzise naziphi na iindlela, kwanobusela, ukuze nje banelise iimfuno zemihla ngemihla zokuphila.

Ngokucacileyo iBhayibhile iyabugweba ubusela. Owesibhozo kwiMithetho Elishumi uthi: “Uze ungebi.” (Eksodus 20:15) Sekunjalo, abaninzi abakholelwa eBhayibhileni batyekele ekubuthetheleleni ubusela xa isela lishukunyiswe ziimeko ezinzima zezoqoqosho.

Oku kuphakamisa imibuzo ebalulekileyo: Ngaba ubuhlwempu ngokwenene buyabuthethelela ubusela? Umntu unokwenza ntoni ukuba ukwimeko enzima gqitha ngokwezoqoqosho? Kuthekani ukuba unabantwana abagulayo nabalambileyo ekufuneka ebanyamekele? Ngaba uYehova uThixo ebeya kubuvumela ubusela kwiimeko ezinjalo, ingakumbi xa izinto ezithathiweyo zizezabo ekusenokwenzeka ukuba abanakuziqonda nokuziqonda?

Uthini UThixo?

Ekubeni uYesu wayebonakalisa ubuntu bukaYise, umzekelo wakhe unokusinceda siqonde imbono kaThixo. (Yohane 12:49) Xa wayesemhlabeni, uYesu wayenovelwano kakhulu ngendlela awayeqhubana ngayo nabo basweleyo. IBhayibhile ithi “akubona izihlwele wazisizela.” (Mateyu 9:36) Sekunjalo, akazange, naphantsi kwaziphi na iimeko, abungxengxezele ubusela. Ngokufanayo, nangona uThixo enenkxalabo ngamahlwempu, akabugqali ubuhlwempu njengento ethethelela ubusela. KuIsaya 61:8, iBhayibhile isixelela ukuba uThixo ‘ukuthiyile ukuphanga ngokugqwetha.’ Yaye nompostile uPawulos wachaza ngokucacileyo kuba amasela akayi kubudla ilifa uBukumkani bukaThixo. Ngoko ke asinamathandabuzo ngembono kaThixo.—1 Korinte 6:10.

Noko ke, IMizekeliso 6:30 ithi “alidelwa isela, xa lithe labela ukwanelisa umphefumlo walo, xa lithe lalamba.” Ngaba le ngxelo isinika imvume yobusela? Akunjalo konke konke. Umongo ubonisa ukuba uThixo ujonga isela njengelifanele ukohlwaywa ngesiphoso salo. Indinyana elandelayo ithi: “Lifunyenwe, lihlawula kasixhenxe, lirhola bonke ubuncwane bendlu yalo.”—IMizekeliso 6:31.

Nakuba isela eliba ngenxa yokulamba lingamangaleleki njengelo liba ngenxa yokunyoluka okanye ngenjongo yokubangela umonakalo kwixhoba lalo, abo banomnqweno wokwamkelwa nguThixo abamele babe netyala lwalo naluphi na uhlobo lobusela. Nakwiimeko ezigqithiseleyo zobuhlwempu, ubusela buhlazisa uThixo. IMizekeliso 30:8, 9 ithi: “Ndihlafunise isonka endisimiselweyo; . . . hleze ndihlwempuzeke, ndibe, ndilicukuceze igama likaThixo wam.” Ewe, isela lingcikiva igama likaThixo. Ekubeni ubusela busisenzo esingabonakalisi uthando, busisono kungakhathaliseki enoba benziwa kumntu osisityebi okanye olihlwempu. Kwabo bamthandayo uThixo nommelwane, ubusela abunakuthethelelwa.—Mateyu 22:39; Roma 13:9, 10.

Into yokuba umntu olihlwempu unelungelo lokuba ayikho ngqiqweni. Ukutsho njalo kuya kufana nokuthi umdlali ongakhekanga ngokomzimba unelungelo lokusebenzisa iziyobisi ezingavumelekanga ukuze aphumelele. Enoba angaphumelela, usebenzise iindlela ezinganyanisekanga. Ngokufanelekileyo abanye baya kuvakalelwa kukuba uboyise ngendlela ezingekho mthethweni. Oku kukwanjalo nangesela. Lithabatha oko kukokwabanye ngokunganyanisekanga. Imeko yalo yobuhlwempu ayibuthetheleli ubusela.

Naliphi na isela elifuna ukwamkelwa nguThixo limele liguqule indlela yalo. IBhayibhile iyasiluleka: “Lowo ubayo makangabi seba, kodwa kunoko makenze umsebenzi onzima, esenza oko kungumsebenzi olungileyo ngezandla zakhe.” (Efese 4:28) Amasela angaphambili aguquke ngokunyanisekileyo anokuba nesiqinisekiso sokuba uYehova uya kuwaxolela.—Hezekile 33:14-16.

Yintoni Enokwenziwa Ngamahlwempu?

IBhayibhile iyathembisa: “UYehova akawuyeki ulambe umphefumlo welungisa; ke imbimbithelo yabangendawo uyayisunduza.” (IMizekeliso 10:3) UThixo akanakubanceda abo baphula umthetho wakhe ngabom ukuze banelise iminqweno yabo. Kodwa unovelwano ngabo bathi ngokunyanisekileyo bazame ukumthobela, yaye uya kuyisikelela imigudu yabo yokufumana oko kuyimfuneko.—INdumiso 37:25.

Izigidi sele zifumanise ukuba xa zilandela imigaqo engokobuthixo, iimeko zobomi bazo ziyaphucuka. Ngokomzekelo, ukusebenzisa isiluleko seBhayibhile sokuba nenkuthalo yaye uphephe imikhuba emibi, enjengokungcakaza, ubunxila, ukutshaya, nokusebenzisa kakubi iziyobisi, kuye kwabenza bazifumana ezona nto zininzi eziyimfuneko. (Galati 5:19-21) Oku kufuna babe nokholo, yaye abo baye benjenjalo bafunde ukuba “ulungile uYehova” yaye uyabanceda abo bakholose ngaye.—INdumiso 34:8.

[Inkcazelo Ngomfanekiso okwiphepha 20]

Robin Hood: General Research Division/The New York Public Library/Astor, Lenox and Tilden Foundations