Indlela Yokuhlangabezana Nocelomngeni Lokuziphatha Olubangelwa Bubuhlwempu

“ABANTU bangamahlwempu ngenxa yokuba besenqena. Isixeko sizele ngoomahlalela. Ukuba bebewufuna ngokwenene umsebenzi, bebenokuwufumana. Ayikho imfuneko yokuba nabani na abe lihlwempu namhlanje.” Watsho njalo omnye ugqirha waseAfrika.

Alithandabuzeki elokuba abantu abathile bayenqena nokuba ukwenqena kunokukhokelela kubuhlwempu. IBhayibhile ithi: “Intwana yobuthongo, intwana yokozela, intwana yokukhwabusha izandla ukuba ndilale: Boza ubuhlwempu bakho njengomphangi; nokuswela kwakho njengendoda enengweletshetshe.” (IMizekeliso 24:33, 34) Noko ke, abantu abaninzi abangamahlwempu abenqeni. Ngokomzekelo, qwalasela indoda eyabhala oku: “Kude kwaleli lixa langoku silamba, sinxanwa, sihamba ze, sintlithwa, singenasikhundla.” (1 Korinte 4:11) Ngaba yayingumahlalela ongenakuncedwa? Nakanye. Loo mazwi abhalwa ngumpostile uPawulos. Wakhetha ukuphila ubomi bokungabi nazinto zininzi ziphathekayo ukuze abuqhube kakuhle ubulungiseleli bobuKristu. Ubuhlwempu bakhe babubangelwa naziimeko awayengenamandla akuzilawula, njengentshutshiso engokonqulo.

Namhlanje, inkoliso yabo bangamahlwempu ehlabathini ingamaxhoba eemeko engenakuzilawula—mhlawumbi ukuswela imfundo, imeko yasekuhlaleni yezoqoqosho ewohlokayo, okanye iziphendu zobupolitika. Abaninzi babulaleka ukususela ngonyezi kude kuse ezinzulwini zobusuku baze sekunjalo bangabi nemali eyaneleyo yokubaxhasa. Ngaloo ndlela amathuba okuzuza imali ngondlela mnyama abonakala enomtsalane, ade abonakale eyimfuneko. Kaloku, bambi basenokuqiqa ngelokuba iBhayibhile iyakugwebela ukutyeka ekuziphatheni okuhle ngamathuba athile! Ngapha koko, ithi: “Alidelwa isela, xa lithe labela ukwanelisa umphefumlo walo, xa lithe lalamba.” Yaye indoda esisilumko yathandaza yathi: ‘Kwanga ndingangahlwempuzeki, ndibe.’—IMizekeliso 6:30; 30:8, 9.

Ukunyaniseka—Imbono YeBhayibhile

Ngaba ezi ndinyana zeBhayibhile ngokwenene ziyakuvumela ukunganyaniseki? Kaloku, makhe sihlolisise umongo wazo. Emva kokuvuma ukuba alidelwa ihlwempu elibela ukuzalisa isisu salo, IMizekeliso 6:31 iqhubeka ithi: “Lifunyenwe, lihlawula kasixhenxe, lirhola bonke ubuncwane bendlu yalo.” Ngamanye amazwi, xa isela libanjiwe, lijongana nesohlwayo esipheleleyo somthetho. Liyasihlawulela isono salo! Ngoko ke, kunokukhuthaza ubusela, la mazwi alumkisa abantu abangamahlwempu ngokuba ubusela bunokubangela ilahleko engakumbi ngokwezoqoqosho, ihlazo kubo neentsapho zabo, nokuphelelwa kukuzihlonela.

Kodwa kuthekani ngomthandazo wendoda esisilumko? Yacela ukuba ingahlwempuzeki ize ‘ibe, nokuze ilicukuceze igama likaThixo wayo.’ (IMizekeliso 30:9) Ewe, ukunganyaniseki komntu othi ukhonza uYehova kunokuzisa ugculelo kwigama likaThixo nakwibandla labantu Bakhe. Umpostile uPawulos wabhala oku: “Wena ke uvakalisa ukuthi, makungebiwa, uyeba?” Ukuba abathile abathi bangamaKristu bayeba, oku kunokubangela ukuba ‘igama likaThixo linyeliswe phakathi kweentlanga.’—Roma 2:21, 24.

Ngoko, ngesizathu esifanelekileyo iBhayibhile ithi: “Lilungile ihlwempu elihamba ngengqibelelo yalo, ngaphezu komjibilizi ondlela mbini, nakuba esisityebi.” (IMizekeliso 28:6) Nangona umpostile uPawulos naye ngamathuba athile wayengenazinto zaneleyo, akazange akubethe ngoyaba okanye abhenele kukunganyaniseki. Endaweni yoko, wabhala oku: “Lowo ubayo makangabi seba; kanye ke makabulaleke esebenza okulungileyo ngezandla zakhe, ukuze abe nako ukwabela osweleyo.”—Efese 4:28.

Isicombululo: Ukukholosa NgoThixo

Kuthekani ngabo basebenza nzima kodwa bangenako ukufumana umvuzo owaneleyo wokunyamekela iintsapho zabo? Ngaba ukunganyaniseki okanye kwanobusela bufanelekile kwimeko yabo, ingakumbi ukuba ilungu lentsapho lihlaselwa kukugula okanye kuvela enye imeko engxamisekileyo? Bambi abantu bacinga njalo. Omnye ummi welizwe laseAfrika wathi: “Kwilizwe lethu, ukuba unyanisekile, akuyi kuphila. Ukuba ufuna ukuphila, ufanele ube namagophe ambalwa endleleni yakho yobomi.”

Kanti, kulo lonke elaseAfrika umntu uwabona ngokufuthi amagama athi “Kholosa ngoThixo” ebhalwe kwiilori, ekumacwecwe esinyithi okuhombisa iindonga, ebhalwe ezimpahleni nakwiinqwelo-mafutha. IBhayibhile ithi: “Kholosa ngoYehova ngentliziyo yakho yonke.” (IMizekeliso 3:5) Ukunganyaniseki akunakuze kuvisisane neso sibongozo seBhayibhile. Kodwa ngaba ukukholosa ngoThixo ngokwenene kusisicombululo esisebenzisekayo kucelomngeni lokuziphatha olubangelwa bubuhlwempu?

Njengomlungiseleli kaThixo, umpostile uPawulos waba namava obunzima ‘obunjengokulamba nokunxanwa, ukuzila ukudla, iingqele nobuze.’ (2 Korinte 11:27) Ngokuqinisekileyo, uPawulos umele ukuba wayezibuza indlela awayeya kuphila ngayo! Kodwa emva kweminyaka engama-25 yamava obuKristu, waba nokubhala athi: “Ndiyazana nobuhlwempu, ndiyazana nobutyebi; kuko konke, nasezintweni zonke, ndiqhelanisiwe nokuhlutha kwanokulamba, nokutyeba kwanokuswela. Ndinokuzenza izinto zonke, ndikulowo undomelezayo.” (Filipi 4:12, 13) Ewe, uPawulos wayekholose ngoThixo.

UPawulos wayeqonda ukuba imigaqo engokweZibhalo ayingomazwi angenantsingiselo nangasebenzisekiyo. Iyimiyalelo esuka kuThixo ophilileyo olangazelela ukunceda nokuxhasa abo bafunayo ukuyisebenzisa. Umprofeti wamandulo wathi: “Ngokuba uYehova, amehlo akhe asingasinga ehlabathini lonke, ukuba azomelezele abantliziyo ziphelele kuye.”—2 Kronike 16:9.

Ukusikelelwa Ngenxa Yokukholosa NgoThixo

Kutheni kunzima kangaka ngabantu abaninzi ukukholosa ngoThixo? Alithandabuzeki elokuba kungenxa yokuba unqulo lwabo alubanikanga isizathu esanelisayo sokwenjenjalo. Iicawa ziye zamenza uThixo wabonakala engongenagama, engengomntu, engenakuqondwa ngabantu. Kodwa ngofundisiso lweBhayibhile, amaNgqina kaYehova aye amazi uThixo, kungekhona njengamandla angengomntu, kodwa njengoMntu onegama. (INdumiso 83:18; Hebhere 9:24) Aye afunda ukuba uneempawu ezenza ukuba kube kokufanelekileyo ukuba sikholose ngaye. Ngokomzekelo, ngokutsho kwe-Eksodus 34:6, uYehova ‘unguThixo onemfesane, onobabalo, ozeka kade umsindo, omninzi ngenceba nenyaniso.’ AmaNgqina akholose ngoThixo ibe ayaqonda ukuba ‘mninzi ngenyaniso.’ Ngenxa yoko, anentembelo epheleleyo kwidinga lakhe lokuzisa ihlabathi elitsha elingenabo ubuhlwempu obutshabalalisayo ngoku obuthwaxa abaninzi kangaka kwisizwe sabantu.—2 Petros 3:13.

Ngoko ke izigidi zamaNgqina kaYehova ziye zangqina ukuba kusengqiqweni ukukholosa ngoThixo. Ngokomzekelo, uRosaline, iNgqina laseSierra Leone, usebenza nzima ukususela ngeyesihlanu ekuseni kude kube sezinzulwini zobusuku ukuze akwazi ukuthengela yena nabantwana bakhe abathandathu ukutya neempahla. Uthi: “Abantu abaninzi bathi kuyinto engenakwenzeka ukuphila ubomi bokunyaniseka, kodwa ndiyazi ukuba oku akuyonyaniso. Maxa wambi ndiba nazo iingxaki kwaye ndingayazi nendlela eziya kuconjululwa ngayo. Kodwa ndiyazi ukuba ukuba ndiphila ubomi obunyanisekileyo, zonke izinto ziya kundihambela kakuhle. Ngoko ndizama ngamandla ukuba ndingabi ngongamkholisiyo uYehova.”

Omnye umbhali wathi: “Indoda elihlwempu engenanto esiswini sayo ifuna ithemba . . . ngaphezu kwesonka.” Ewe, ukungabi nathemba, ukutyhafa nokungonwabi okungapheliyo ziinkxwaleko ezinokuba buhlungu ngaphezu kwendlala. Kodwa ubani ofikelela ekumazini nasekumthembeni uThixo akuyomfuneko ukuba atyhafe. URosaline wongezelela athi, “Ngoku ndisebenza nzima, kodwa ndiyavuya kuba ndiyazi ukuba kuza ilixa apho kungasayi kuba yimfuneko ukuba ndisebenze nzima ngolu hlobo. Ngoku ndisebenzela ukuzifumanela mna nentsapho yam ukutya, kodwa kwihlabathi elitsha likaYehova, kuya kubakho intabalala yokutya. Ngoko ngoku ndinethemba novuyo endingazange ndibe nalo ngaphambi kokuba ndimazi uYehova.”—Thelekisa uIsaya 25:6; ISityhilelo 21:3, 4.

Liyinyaniso elokuba, abo bakholosa ngoThixo basenokuba namava eengcinezelo ezingokoqoqosho, njengoko kwakunjalo ngompostile uPawulos. Kodwa akuyomfuneko ukuba babhenele ekwaphuleni imithetho kaThixo ukuze baphumelele ngokwezoqoqosho. Umdumisi uDavide wathi: “Ndakha ndamtsha, kungokunje ndimdala; ukanti andizanga ndilibone ilungisa lishiywa, nembewu yalo ivukela ukutya.” (INdumiso 37:25) Ewe, uThixo uyabanyamekela aze abasikelele abo babeka kuqala izilangazelelo zakhe ebomini babo.—Mateyu 6:25-33.

Ngoko ukuba ulihlwempu, ‘musa ukutha amandla ekwenzeni okulungileyo.’ (2 Tesalonika 3:13) Ungaze ubhenele ekuyekeleleni imigaqo yokuziphatha okuhle. Yakha ulwalamano noThixo uze ukholose ngaye ukuze akuncede ukuba uhlangabezane neengxaki neenzima zobomi. Abo bakhonza uYehova baze bakholose ngaye bayabongozwa: “Zithobeni . . . ngaphantsi kwesandla esinamandla sikaThixo, ukuze aniphakamise ngexesha elifanelekileyo. Lonke ixhala lenu liphoseni phezu kwakhe, ngokuba yena enikhathalele.”—1 Petros 5:6, 7.

[Amagama acatshulweyo akwiphepha 6]

“Indoda elihlwempu engenanto esiswini sayo ifuna ithemba . . . ngaphezu kwesonka”

[Umfanekiso okwiphepha 7]

AmaNgqina kaYehova anceda abantu ukuba bakholose ngoThixo