Istroke!

OYENA nobangela uphambili wokufa noweziphene ezingapheliyo kumazwe ahambele phambili aseNtshona sistroke. Kwaigama elithi “stroke” lithetha indlela olwenzeka ngequbuliso ngayo “uhlaselo lobuchopho.” Ngalo mzuzu, usenokuziva uphile qete, yaye kumzuzu olandelayo, uvakalelwa ngokungathi ubethwe ngumbane—istroke esinzulu sisenokubuguqula kakhulu ubomi bakho. Singenalusizi sisenokukutsho ube sisilima, ungakwazi nokuthetha, sikonakalisa iimvakalelo, siguqule ubuntu bakho kwanamandla akho okuqonda, size sikuthwalise uxanduva olungapheliyo lokubuyela kubomi obuqhelekileyo owawubuphila wena nentsapho yakho.

Cinga ngoEllen Morgan.a NgoLwesithathu, uEllen oneminyaka engama-64 ubudala wayedlamkile, engabikwa nowempumlo. NgoLwesine, ngoxa wayethenga ezivenkileni ekunye nendoda yakhe, ngequbuliso uEllen waba sisimumu, yaye ubuso bakhe bajijeka. Umzimba wakhe watyhafa, waza wahexa ngokungathi wayenxilile. UEllen wayefunyenwe sistroke esinzulu!

Ngenxa yomphumo westroke, uEllen wayengumlwelwe kangangokuba wayengakwazi kwanokwenza nezona zinto zilula, ezinjengokuzihlamba okanye ukuzinxibisa. Engakwazi ukubhala, ukunitha, okanye ukuthunga, wayesoloko ekhala ngokungathuthuzelekiyo yaye wayedinwa ngokungathethekiyo. Ngalo lonke eli xesha, ingqondo kaEllen yayisebenza kakuhle; noko ke, wayesiba neentloni xa mhlawumbi evakalelwa kukuba abanye babemjonga njengesiphukuphuku. Kamva, uEllen uthi: “Bambalwa abayiqondayo indlela umothuko wokuguquka kwezinto ngequbuliso ozichaphazela ngayo iimvakalelo kwanengqondo kabani. Ndaphantse ndavakalelwa ngokungathi esi yayisisiphelo sobomi bam njengomntu.”

Yintoni ebangela istroke? Ngaba wonke ubani ofunyanwa sistroke simchaphazela ngendlela efanayo? Abasindileyo emva kokuhlaselwa sesi sifo baye bahlangabezana njani naso? Iintsapho zabo baye basinda emva kokuhlaselwa sistroke zihlangabezana njani noku? Sinokwenza ntoni xa sisonke ukuze sinikele uncedo? UVukani! uhlolisisa imibuzo enjalo aze akunike ulwazi oluphangaleleyo ngobomi babo baye basinda emva kokuhlaselwa sistroke kwaneentsapho zabo abasulana imiqolo.

[Umbhalo osemazantsi]