Ukuhlangabezana Nemiphumo Yaso
ELELI kwibhedi yasesibhedlele efe amalungu, uGilbert wabuza ugqirha wakhe: “Ngaba ndiya kukwazi ukuyisebenzisa ingalo kwanomlenze wam kwakhona?” UGilbert wafumana impendulo elucelomngeni: “Okukhona uzibhokoxa, kokukhona uya kuchacha, yaye uya kukhawuleza.” Waphendula esithi: “Ndikulungele!” Ukwenza umthambo nesimo sengqondo esikhuthazayo samnceda, ekwiminyaka yama-65 ubudala, wayeka ukuhamba ngesitulo esinamavili wazihambela encediswa sisixhobo sokuhamba emva koko wasimelela ngentonga waza wabuyela emsebenzini.
“Inkoliso yeendawo zanamhlanje zonyango emva kokuhlaselwa si-stroke zingqinela ukuba xa omnye ummandla wobuchopho wonzakele, eminye imimandla yobuchopho inokuwenza umsebenzi walowo wonzakeleyo. Injongo yezonyango kukuzama ukufumana uncedo lwaloo mimandla ibingawenzi loo msebenzi zize zincede nobuchopho bukwazi ukuzilungelelanisa buziqhelanise nale meko intsha,” utsho umphengululi uWeiner, uLee noBell. Noko ke, ukuchacha kukwabandakanya ezinye iinkalo, njengendawo esikuyo kwanobungakanani bestroke, impilo yaloo mntu, ubunjani bezonyango, kwanenkxaso yabanye.
Inkxaso Yentsapho Kwaneyabahlobo
UErikka wayesenza umthambo kangangeminyaka emithathu, efunda ukuhamba kwanokusebenzisa isandla sakhe sasekunene ukuze ancedise isandla sakhe esingasebenziyo sasekhohlo. Uchaza oko kwamncedayo ukuze akwazi ukuhlangabezana noko: “Eyona nto ibalulekileyo yayikukuba umyeni wam kwanabahlobo bam bahlala benyanisekile kum. Ukwazi ukuba babendithanda kwandomeleza, yaye xa bandikhuthazayo ukuba ndinganikezeli, oko kwandichukumisa.”
Amalungu entsapho anendima enkulu gqitha ekuchacheni kwabo babathandayo. Afanele abuze imibuzo kubantu bezonyango yaye baqwalasele unyango ekusenokufuneka lwenziwe ekhaya ukuze umguli angabuyeli umva. Umonde, ububele, ukuqonda, kwanothando olubonakaliswa ngamalungu entsapho nabahlobo lumenza ubani akhuseleke ngokweemvakalelo nto leyo enokumbangela aphinde akwazi ukufunda ukuthetha, ukufunda, kwanobunye ubugcisa bemihla ngemihla.
Ezama ukulungelelana phakathi kokunyanzelisa nokunyamekela, uJohn wazibhokoxa ekuncedeni umfazi wakhe uEllen ngomthambo nonyango. Ucacisa imigudu yentsapho yakhe esithi: “Sasingamvumeli uEllen ukuba afikelwe ngamaxesha okuzisizela. Maxa wambi sasingamcengi xa sifuna enze into, kodwa sasisoloko sizilumkele iintsilelo zakhe yaye simxhasa. Ukhathazeka msinya, ngoko ndenza umgudu ukuze ndingamenzi axinezeleke.”
Njengoko uEllen wayefunda ukuthetha kwakhona ngoncedo lwengcali yokuthetha, uJohn wayemncedisa. “Ukwenza izinto kunye kwakuyindlela yokumkhuthaza, ngoko sasifundelana iBhayibhile ngokuvakalayo, nto leyo eyamncedayo ekuphuculeni ekuthetheni. Kwakhona, ngokuthe ngcembe, saba nesabelo kubulungiseleli, njengoko singamaNgqina kaYehova. Ngale ndlela uEllen wayenokwabelana nabanye ngethemba esinalo ngekamva. Olu yayikwalunyango kuEllen.” Ekupheleni kweminyaka emithathu, uEllen wayeselehambele phambili kakhulu.
Ukhuthazo kwanolomelezo olunokunikelwa ngabahlobo alumele luthatyathwe lula, kuba lusenokuba nemiphumo ekuchacheni kwalowo usinde emva kokuhlaselwa sistroke. Ulindixesha wezamayeza iStroke wanikela ingxelo yokuba “kufunyaniswe ukuba inkxaso epheleleyo yasekuhlaleni isenokubangela ukuchacha okukhawulezileyo nokubuyela kwezinto kwimeko yangaphambili, kwanakubaguli abane-stroke esiqatha.”
UBernie wayixabisa kakhulu inkxaso yabahlobo bakhe. Usikhumbuza oku: “Amatyelelo abahlobo abaluleke gqitha ekuchacheni. Ilizwi elibonakalisa uvelwano kwanesimo sengqondo esibonakalisa inkathalo sikhuthaza gqitha. Nangona ubani engafanele asoloko ethetha ngesiphene saloo mntu, ukuchaza ukuba uyaphucula kuyakhuthaza kakhulu.” Sinokwenza ntoni ukuze sinikele inkxaso kwabo bahlangabezana nomphumo westroke? UBernie ucebisa esithi: “Mphathele iintyatyambo loo mntu, okanye wabelane naye ngeengcamango ezisekelwe eZibhalweni okanye ngamava. Oko kwandinceda kakhulu.”
UMelva, owayesekhulile ngeminyaka osinde emva kokuhlaselwa sistroke, wakufumanisa kuluncedo ukuba omnye wabazalwana bokomoya athandaze naye. UGilbert naye uyakuncomela oku, esithi: “Kubonisa ukuba unenkathalo ngokwenene ukuba uthandaza nomntu othile.” UPeter, esamshiya istroke engaboni kakuhle, uyayixabisa into yokuba abanye baziqonde iintsilelo zakhe yaye bachithe ixesha bemfundela.
Ukumnceda ubani umse uze ubuye naye kwindawo anyangwa kuyo kukwayimbonakaliso yothando. Ukuqinisekisa ukuba indlu yexhoba lestroke ikhuselekile kukwayimfuneko. Xa ungakwazi kuxhathisa kulula ukuwa. Ngokomzekelo, uGilbert waluxabisa uncedo lwabahlobo bakhe abathi, phakathi kwezinye izinto, bafakela intsimbi yokubambelela kwindawo yakhe yokuhlambela ukuze angawi.
Ukufunda Ukunikela Inkxaso
Ukutshintshatshintsha kweemvakalelo kwanotyekelo lokufuna ukukhala kusenokubangela iintloni kwixhoba lestroke, kwanokuphazamiseka kwabo babukeleyo abasenokungazi ukuba benze ntoni. Noko ke, ukufunda ukulixhasa, abahlobo basenokunceda ixhoba lingazivi lililolo. Ngokuqhelekileyo, lidla ngokuyeka ukusoloko lifuna ukukhala. Kodwa xa elila, hlala uzolile uze uhlale ecaleni kwaloo mntu, uthethe oko ubuya kufuna ukukuva ukuba ubukwimeko akuyo.
Phezu kwako konke, hlakulela uthando lobuthixo kwabo okuye ukugula kwaguqula ubuntu babo obubazi. Bayayiva indlela ovakalelwa ngayo, yaye ngenxa yoko kuyayichaphazela indlela abasabela ngayo kuwe. UErikka ugqabaza esithi: “Andisokuze ndibe ngumntu ofanayo kwakhona. Kodwa akumele kubekho nabani na olindele oko kwixhoba le-stroke. Izalamane kwanabahlobo bafanele bafunde ukumthanda loo mntu ngohlobo alulo. Ukuba bazama ukuhlolisisa ubuntu bakhe, baya kufumanisa ukuba ezona iimpawu zakhe zintle ebenazo ngaphambili usenazo.”
Ukuzihlonela kuyaphela xa ubani engakwazi ukuthetha okanye engaviwa. Ngokwenza umgudu wokuthetha nabo, abahlobo basenokubaqinisekisa ukuba baxabisekile abo banengxaki yokuthetha. UTakashi uthi: “Oko ndikucingayo kwanendlela endivakalelwa ngayo entliziyweni akutshintshanga. Noko ke, abantu batyekela ekubeni bakuphephe ukuthetha nam kuba bengakwazi ukuncokola nam. Kunzima ngam ukuya ebantwini, kodwa xa umntu esiza kuthetha nam, kuyakhuthaza kakhulu oko yaye kundenza ndonwabe kakhulu!”
Olu lulandelayo lukhokelo oluthile olunokusinceda sonke sikwazi ukuxhasa size sikhuthaze abo bangakwazi ukuthetha kakuhle.
Ngamaxesha amaninzi iintlaselo ze-“stroke” aziwachaphazeli amandla okucinga. Inkoliso yabantu abasindileyo emva kokuhlaselwa sistroke iingqondo zabo ziyakuqonda okuqhubekayo, nangona intetho yabo kusenokuba nzima ukuyiqonda. Ungaze uthethe nabo ngendlela yokubathoba isidima okanye utekete xa uthetha nabo. Baphathe ngesidima.
Phulaphula ngenyameko. Basenokufuna ixesha lokulungelelanisa ingcinga ethile okanye ukugqiba igama, ibinzana okanye isivakalisi. Khumbula ukuba, oyena mphulaphuli unenkathalo ngumphulaphuli onomonde.
Musa ukuzenza ovileyo xa ungevanga. Ngobubele vuma: “Uxolo. Andikuva kakuhle. Siya kuphinda sithethe.”
Cothisisa xa uthetha uze uthethe ngokucacileyo nangesandi esiqhelekileyo selizwi.
Sebenzisa izivakalisi ezifutshane namagama aqhelekileyo.
Sebenzisa imibuzo efuna uewe okanye uhayi, yaye ukhuthaze ukuba aphendule. Khumbula ukuba basenokungakwazi ukuwaqonda amazwi akho.
Makungabikho ngxolo eninzi.
Ukuhlangabezana Naso, Ngenkxaso KaYehova Enothando
Nakuba kubalulekile ukwazi ngonobangela westroke onaso, ekubeni oko kukwenza ukwazi ukuthabatha amanyathelo kwanokunciphisa ingozi yeentlaselo zestroke kwixesha elizayo, ukukwazi ukulawula uloyiko oluhamba naso nako kubalulekile. UEllen uthi: “Amazwi kaThixo kuIsaya 41:10 ngokukhethekileyo ayandithuthuzela. Apho uthi: ‘Musa ukoyika, kuba ndinawe mna; musa ukubhekabheka, kuba ndinguThixo wakho; ndikukhaliphisile, ewe, ndikuncedile, ndikuxhasile ngesandla sam sokunene sobulungisa bam.’ UYehova uye waba ngowokwenene kum, endenza ndizive ndingoyiki.”
Kwakhona iBhayibhile inceda uAnand ekuhlangabezaneni nokungabi nathemba: “Indinika inkxaso engaphaya, njengokuba ngokuthe rhoqo indivuselela yaye indihlaziya.” Ingxaki kaHiroyuki yayiyindlela anokungenelwa ngayo kwiZibhalo, ekubeni wayengakwazi ukuzikisa ingqondo. Uthi: “Ndiye ndafumana intuthuzelo ngokuphulaphula iincwadi zeBhayibhile kwiikhasethi.”
Umpostile uPawulos wathi: “Xa ndibuthathaka, ndithi ke ndibe namandla.” (2 Korinte 12:10) Yayingumoya kaYehova owanceda uPawulos ekuphumezeni oko wayengenakukwazi ukukwenza ngamandla akhe. Abo basinde emva kokuhlaselwa sistroke nabo banokukholosa ngoYehova ukuze abomeleze ngokomoya. UErikka wacacisa esithi: “Xa sisempilweni yaye sisenza zonke izinto ngamandla ethu, sisenokungamniki uYehova ithuba lokusinceda. Kodwa ukuba nesiphene kwam kuye kwandenza ndaqinisa ulwalamano lwam naye ngendlela ekhethekileyo.”
Abanyamekela Abaguli Bafumana Inkxaso
Abanyamekeli babaguli bafuna inkxaso kumsebenzi wabo obalulekileyo. Basenokuphethukela phi xa befuna inkxaso? Indawo yokuqala kusentsatsheni yabo. Lungu ngalinye lifanele libe nesabelo kumthwalo wokunyamekela umguli. UYoshiko uchaza indlela oonyana bakhe ababemxhasa ngayo ngokweemvakalelo: “Babeziphulaphula iingxaki zam ngokungathi zezabo.” Amalungu entsapho afanele afumane yonke inkcazelo efumanekayo ukuze afunde indlela yokunyamekela ixhoba lestroke kwanendlela yokuqhubana notshintsho lobuntu balowo uthandekayo.
Ngubani omnye onokuxhasa abo banyamekela umguli? UDavid kwanentsapho yakhe baya kwintsapho yabo yokomoya kwibandla lamaNgqina kaYehova ukuze bafumane uncedo ngoVictor: “Basabela kwintswelo yethu. Betshintshana, ngamanye amaxesha babesiza baze balale ekhaya ukuze banyamekele uVictor ubusuku bonke.”
Ngamnye onyamekela umguli ufanele aluve uthando olufudumeleyo kwanenkxaso yentsapho yakhe yokomoya. Kodwa abanye basenokukufumanisa kunzima ukucela uncedo. UHaruko ucacisa esithi: “Ndisoloko ndixelelwa oku: ‘Ukuba ufuna ukuncedwa nakwintoni na, ungazivi umathidala ukusixelela.’ Kodwa ekubeni ndisazi indlela umntu wonke axakeke ngayo, kunzima ukucela uncedo. Bendingakuvuyela ukuba abantu bebenikela uncedo ngendlela engqalileyo: ‘Ndisenokukunceda ekucoceni. Luluphi olona suku lufanelekileyo?’ ‘Ndinokuhamba ndikuyele ezivenkileni, ngoko ngaba kulungile ukuza ekhayeni lakho ngoku?’”
Umfazi kaKenji wahlaselwa sistroke; noko ke, wakwazi ukunikela uncedo awayelufuna. Wafumanisa ukuba ngomthandazo wayenokuphosela umthwalo wakhe kuYehova. Ekugqibeleni, umfazi wakhe akazange akwazi ukuthetha, yaye ngenxa yoko, uKenji waphulukana neqabane awayenokuthetha nalo. Kodwa ufunda iBhayibhile imihla ngemihla. Uthi: “Indikhumbuza ngokuthantamisa kukaYehova abo bacinezelekileyo emoyeni, yaye oku kuye kwandithintela ekubeni ndidandatheke okanye ndibe lilolo.”
Ukukholosa ngomoya kaYehova kusenokunceda xa kubonakala ukuba siyoyisakala ngokweemvakalelo. UYoshiko, ohlangabezana nokutshitsha kobuntu bomyeni wakhe kwanokucaphuka msinya emva kokuba efunyenwe sistroke, uthi: “Maxa wambi ndiziva ngathi ndingakhala kakhulu. Ngaloo maxesha ndidla ngokuthandaza kuYehova, yaye umoya wakhe ubundinceda ndizole.” Ekuxabisa ukunyaniseka kukaYehova kuye, akavumeli nantoni na imphazamise kwindlela yakhe yobomi bobuKristu. Uya rhoqo kwiintlanganiso zamaKristu, abe nenxaxheba kubulungiseleli, aze abe nofundisiso lweBhayibhile lobuqu. UYoshiko uthi: “Ngokufeza indima yam, ndiyazi ukuba uYehova akasokuze andishiye.”
Xa ndiqalisa ukuxhalaba, uYehova usoloko ekho ukuba aphulaphule. UMidori, onomyeni osindileyo emva kokuhlaselwa sistroke, ufumana intuthuzelo ngenxa yokuba, ngokomfuziselo, uYehova uye watha zonke iinyembezi ebenazo “entsubeni.” (INdumiso 56:8) Ekhumbula amazwi kaYesu athi: “Ningaze nixhalele imini elandelayo.” Uthi: “Ndiye ndagqiba kwelokuba ndibe nomonde de ihlabathi elitsha lifike.”—Mateyu 6:31-34.
Ukujamelana Neentsilelo Ezinkulu
Liyinyaniso elokuba kwindawo abanyanyekelwa kuyo abanye bayachacha, kodwa abanye abaphumeleli kangako ekubeni baphinde bakwazi ukwenza izinto ebabezenza ngaphambi kokuhlaselwa sistroke. Yintoni enokunceda abo bangaphumelelanga ukuze bajamelane nocelomngeni lokwamkela iintsilelo zabo, nangona zisenokuba zinkulu yaye ziza kuhlala ixesha elide?
UBernie, owayengakwazi ukushukuma ngenxa yestroke, uphendula esithi: “Uvuyo lwethemba ngobomi obungunaphakade kwiparadesi ezayo esemhlabeni kwanomthandazo kuBawo wasemazulwini, uYehova, wandinceda ndazamkela iintsilelo zam ngokuzolileyo.”
Elo themba lanceda uErikka nomyeni wakhe, uGeorg, bazamkele iintsilelo zakhe baza babunandipha ubomi. UGeorg ucacisa esithi: “Sinedinga likaThixo lokuphiliswa ngokupheleleyo ngenye imini. Ngoko asitsaleli yonke ingqalelo yethu kwesi siphene. Kambe ke, sisaqhubeka sisenza konke esinokukwenza ngenxa yempilo kaErikka. Kodwa unokufunda ukuphila nokusebenza ngemisipha engalungelelananga uze unikele ingqalelo engakumbi kwizinto ezakhayo.”—Isaya 33:24; 35:5, 6; ISityhilelo 21:4.
Kwiimeko apho ubani engachachi kuyaphi, inkxaso yentsapho kwaneyabahlobo ibaluleke ngakumbi. Basenokunceda ixhoba linyamezele de kube lixesha likaThixo lokuphilisa zonke iinkxwaleko zempilo.
Ukwazi ukuba kukho ikamva elizukileyo lamaxhoba estroke kwaneentsapho zawo xa siya kube sibuyiselwe empilweni entle kubenza bangaxhaleli ingomso. Ngoko banokulindela ngomonde ukukhululwa ekubandazelekeni, kwihlabathi elitsha likaThixo eliza kubakho kamsinya. (Yeremiya 29:11; 2 Petros 3:13) Okwangoku, bonke abaphethukela kuYehova banokuba nethemba lokuba kwanangoku uya kubanceda aze abaxhase ekuhlangabezaneni nemiphumo eyenzakalisayo yestroke.—INdumiso 33:22; 55:22.
[Amagama acatshulweyo akwiphepha 12]
Intsapho kwanabahlobo basenokunceda ixhoba linyamezele de kube lixesha likaThixo lokuphilisa zonke iinkxwaleko zempilo
[Ibhokisi/Umfanekiso okwiphepha 10]
Ukuthintela Istroke
“EYONA ndlela onokulwa ngayo ne-stroke kukuzama ukusithintela,” utsho uGqr. David Levine. Yaye eyona nto iphambili enxulumene nokuhlaselwa sistroke luxinzelelo lwegazi oluphezulu.
Kubantu abaninzi, uxinzelelo lwegazi oluphezulu lunokulawulwa ngokutya ukutya okunepotassium eninzi nokunetyuwa, amafutha amaninzi, necholesterol encinane. Kubalulekile ukungaseli ngokugqithiseleyo. Ucwangciso oluthe rhoqo lokwenza umthambo olufanelekele iminyaka kwanokomelela kukabani lusenokunceda ekwehliseni iikhilogram, nto leyo enokwehlisa uxinzelelo lwegazi oluphezulu. Amayeza asenokuba yimfuneko—phantsi kolwalathiso lukagqirha, njengokuba kukho amayeza amaninzi afumanekayo.
Isifo soonothumela icarotid sehlisa umlinganiselo wokuthunyelwa kwegazi ebuchotsheni yaye seso siphambili ekubangeleni istroke. Kuxhomekeke kwinqanaba lokuvaleka, utyando olwaziwa njengecarotid endarterectomy oluvula oonothumela abavalekileyo lusenokucebiseka. Uhlolisiso luye lwabonisa ukuba abantu ababebonakalise iimpawu zokugula nabaye bancitshiselwa oonothumela babo baye bangenelwa kutyando nakunyango lwezamayeza. Noko ke, kusenokubakho iingxaki ngokuphathelele utyando, ngoko lumele luqwalaselwe kakuhle.
Isifo sentliziyo sisenokwandisa ingozi yestroke. Iatrial fibrillation (ukungabethi kakuhle kwentliziyo), esenokubangela amahlwili egazi aze aye ebuchotsheni, isenokunyangwa zizinto ezinqanda ukopha. Ezinye iingxaki zentliziyo zisenokufuna utyando kwanamayeza ukuze kuhliswe ubungozi bestroke. Isifo seswekile sinenxaxheba enkulu ekubangeleni istroke, ngoko ukusilawula kusenokunceda ekunqandeni istroke.
Itransient ischemic attacks, iTIA, zizilumkiso ezicacileyo zokuba ubani usenokuhlaselwa sistroke. Qiniseka ukuba azityeshelwa. Bona ugqirha wakho, yaye usingathe unobangela okhoyo, njengokuba iTIA isandisa ingozi yestroke kwaneengxaki ezininzi.
Ubomi obunempilo nobufanelekileyo bunokwenza lukhulu ekuthinteleni istroke. Ukutya ngokulungeleleneyo nokwenza umthambo ngokuthe rhoqo kwanokungaseli tywala kakhulu nokuphepha ukutshaya kusenokunceda ukugcina oonothumela besempilweni yaye kusekwanokubangela iinguquko ezisempilweni kwabo sele bonakele. Ukutya iziqhamo kwanemifuno kwanokutya okuziinkozo, ngokohlolisiso, kuyanceda ukuthothiseni ingozi yestroke.