Iphulo Lokufuna Unqabiseko

KUBANTU ngabantu, unqabiseko luthetha izinto ezahlukeneyo. Omnye uziva enqabisekile xa ephangela; omnye usenokucinga ukuba kufuneka abe sesingawothiyo umlilo isinhanha; omnye yena ukunqabiseka kukuhlala kwindawo engenalwaphulo-mthetho. Wena ucinga ukuba luyintoni unqabiseko?

Enoba ucinga ukuba luyintoni na, akuthandabuzeki ukuba uye uwe uvuka uzama ukuba unqabiseke kanye ngale ndlela ufuna ngayo. Yiva ukuba abantu baseYurophu benza ntoni na ukuze noko bazive benomnconwana wokunqabiseka.

Imfund’ Enomsila

UJacques Santer, oyingqadada yembalarha kwiBhunga laseYurophu, wakha wayitsho ke into yokuba, ama-20 ekhulwini abantu abaselula kwiEuropean Union abaphangeli. Yiloo nto ke le ibangela ukuba, xa sele bekule ntanga bazixhalabise ngokuba, Azi ndakuwufumana na umsebenzi oya kundenza ndinqabiseke? Abaninzi kubo ke bacinga ukuba ukuze bafikelele olo sukelo kubhetele bakhe bazame imfund’ enomsila, nto leyo ke ethi iThe Sunday Times yaseLondon inceda abafundi “batyibilike emafutheni xa befuna umsebenzi.”

Ngokomzekelo, iNassauische Neue Presse inikela ingxelo yokuba, phaya eJamani “abantu bahamba ngezantya befuna ukuba zizifundiswa okanye izibenga kwezemfundo.” Kwelo lizwe izifundo zaseyunivesithi zixabisa ubuncinane malunga nee-R278000, kodwa loo nto ayibenzi bayeke ukufunda.

Sifanele sibothulel’ umnqwazi abantu abaselula abazimiseleyo emfundweni nabafuna ukufumana imisebenzi ebenza bazive benqabisekile. Ibe umntu onobuchule neemfaneleko ezithile usoloko enentlahla xa efuna umsebenzi. Kodwa ngaba xa unemfund’ enomsila usoloko ufumana umsebenzi okwenza uzive unqabisekile? Kaloku wakha wathi omny’ umfundi: “Ndayiqonda zibekwa nje into yokuba akukhw’ apho ndiya khona nezifundo endizenzayo kuba azinakundenza ndifumane umsebenzi ova mna nokumgangatho ophezulu ibe ndandingayi kuziva ndinqabisekile.” Asinguye yedwa ke okule nyula. Komnye wale minyaka yakutshanje, bakhe bayinkungu nelanga abantu abanezidanga zaseyunivesithi abangaphangeliyo eJamani.

Eliny’ iphephandaba lithi, eFransi abantu abaselula baya eyunivesithi ngenxa yokuba ukuphumelela nje kwizikolo zamabanga aphakamileyo kukudlala upuca xa ukhangela indlela ulutsha oluninzi olungaphangeli ngayo. Noko ke, abafundi baseyunivesithi abaninzi bayayazi into yokuba nokuba bangagqiba ezo zifundo zabo “abazi kuba zeziya zinqol’ intaba izinhanha kuba nje benezidanga.” Kaloku ithi iThe Independent phaya eBritani “ukuxinezeleka ngenxa yokufunda kubaphathel’ imbengwane abafundi.” Kuthiwa kunokuba abafundi bancedakale baze baxhobele ukunganqabiseki, indlela ekunzima ngayo eyunivesithi maxa wambi kubakho iingxaki ezifana noxinezeleko, ukunxunguphala nokungazixabisi.

Xa ufunde ubuchule obuthile, okanye unobuxhofololwana bemfundo ethile kwezorhwebo kusoloko kulula kakhulu ukufumana umsebenzi onqabisekileyo kunaxa unesidanga saseyunivesithi.

Ngaba Kwanele Ukuba Nezinto Ezingama-10 000?

Abantu abaninzi bacinga ukuba imfihlelo yokunqabiseka kukuba sisigwili. Oku kusenokubonakala kusengqiqweni, kuba xa unemali eyaneleyo ebhankini uba nento onokubhenela kuyo ngamaxesha kaxakeka. Kaloku ithi iBhayibhile “imali ingumthunzi.” (INtshumayeli 7:12) Noko ke, ngaba ukuba sesiya singawothiyo umlilo isinhanha kukwenza unqabiseke ngakumbi?

Eneneni akunjalo. Khawucinge nje ngendlela obebufunjwa ngayo ubutyebi kwiminyaka engama-50 edluleyo. Ekupheleni kweMfazwe Yehlabathi II, umMbo nomXesibe kubemi baseJamani washiywa ungenaye nondancama. Lithi iphephandaba laseJamani, kunamhlanje nje umntu oqhelekileyo eJamani unezinto ezingama-10 000. Ukuba phofu luchanile uqikelelo olwenziwa kwezoqoqosho, izizukulwana ezilandelayo ziza kuthi chatha ukutyikatyikeka emafutheni. Kodwa ngaba lo mdliva wobutyebi uya kuzisa unqabiseko? Hay’ khona. Kaloku xa bekupecululwa kusenziwa uhlolisiso kweliya laseJamani kufunyaniswe ukuba abantu aba-2 kwaba-3 bathi akusanqabisekanga ngendlela ekwakuyiyo kwiminyaka engama-20 okanye engama-30 eyadlulayo. Ngoko ukuba nobutyebi obungangengca akukhange kubenze abantu banqabiseke ngakumbi.

Oku kusengqiqweni kuba kaloku kwinqaku elandulela eli, sithe ukunganqabiseki kungumthwalo othe zinzi kwindlela esivakalelwa ngayo. Ibe ke umthwalo onento yokwenza nendlela esivakalelwa ngayo awunakuze uthiwe xibilili bubutyebi bezinto eziphathekayo. Phofu liyinene elokuba, ubutyebi obu noko buyakwazi ukuyigxoth’ ikat’ eziko ibe buluncedo ngamaxesha kaxakeka. Kodwa ke kwezinye iimeko, waba nayo imali, akwabi nayo kuyafana nje, ngokuba neengxaki.

Ngenxa yaloo nto ke, ukuzijonga ngolungelelwano izinto eziphathekayo kuya kusinceda sikhumbule ukuba ngoxa ubutyebi bunokuba yintsikelelo, azingomtya nethunga nonqabiseko. Esesemhlabeni, uYesu Kristu wabakhuthaza ngolu hlobo abalandeli bakhe: “Kwanaxa umntu enentabalala ubomi bakhe abuphumi kwizinto anazo.” (Luka 12:15) Kukho nto yimbi engaphezu kobutyebi bezinto eziphathekayo, enokumenza umntu anqabiseke ngokwenene.

Abo sele bekhulile, abathandi izinto eziphathekayo nje ngenxa yexabiso lazo kodwa kuba zinento ethile eziyenzayo kwiimvakalelo zabo. Eyona nto ke bayivundlele gqitha abantu abakhulileyo ngaphezu kobunewunewu kukuba ngamaxhoba olwaphulo-mthetho.

Lumka!

Incwadana ethi Practical Ways to Crack Crime, eyapapashwa eBritani ithi: “Ulwaphulo-mthetho . . . beluyingxubakaxaka egqugqisileyo ehlabathini kuyo yonke le minyaka ingama-30 idluleyo.” Imikhosi yamapolisa izilahlele nofele kumsebenzi wayo. Basinda njani ke abany’ abantu?

Ukuzigcina ukhuselekile kuqala ekhaya. Khangela nje ngokomzekelo phaya eSwitzerland, kukho esinye isangxa esiyila izindlu ekunzima ukuqhekeza kuzo ezinamaqhaga awomeleleyo, oomankankela beengcango neefestile ezivalwa ngentsimbi. Kubonakala ukuba abanini bezi zindlu basithabatha njengento yokwenene isaci sesiNgesi esidume ngokwenene esithi: “Umzi wam yinqaba yam.” Kaloku iphephancwadi leendaba eliyiFocus, lathi, ezi zindlu ziyabiza, kodwa abantu bazifuna emanzini.

Abemi bezinye iindawo baye baqulunqa imibutho yabalindi bengingqi ukuze bahlale benqabisekile ngaphakathi nangaphandle kwamakhaya abo. Abemi beminye imimandla esezidolophini benze nengakumbi, yokuqesha iinkampani zabalindi ukuze zilinde indawo abahlala kuyo kangangeeyure ezithile. Abantu abaninzi baye bakubona kufanelekile ukuba bangahambi bodwa ebusuku kwizitrato zesixeko ezingenabantu. Ibe abazali, ababaxhalabele ngokwenene abantwana babo, banokwenza konk’ okusemandleni abo ukuze bakhusele abantwana babo. Khawuhlolisise amacebiso afumaneka kwibhokisi ekweli phepha.

Kodwa asinguye wonke umntu onokukwazi ukuthenga indlu ekunzima ukuqhekeza kuyo. Ngaphezu koko, imibutho yabalindi bengingqi nokulindwa kommandla othile ayinakuluphelisa ulwaphulo-mthetho xa lulonke; into esuka yenzeke yile yokuba izilwangangubo ziya kwimimandla engakhuselekanga. Ngenxa yoko ke, ulwaphulo-mthetho luya kuhlala luyeyona nto ibangela abantu banganqabiseki. Ukuze sinqabiseke ke, kukho enye into esinokuyenza kunokuzinikela nofele ekulweni nolwaphulo-mthetho.

Kuza Kufuneka Kubethw’ Iinqontsonqa—Kungahlalelwa Amasolotya Nje Kuphela

Akukho namnye kuthi ofuna ukuphila ubomi obunganqabisekanga, ibe sibambe yona xa sithabatha amanyathelo asengqiqweni naluncedo ukuze silufumane. Kodwa ulwaphulo-mthetho, ukungaqeshwa nazo zonke ezinye izinto ezisenza singanqabiseki, ngamasolotya nje engxubakaxaka elubeth’ ilosele uluntu xa lulonke. Ukuze unyangwe ke lo mhlola, kuza kufuneka kubethwe eyona nqontsonqa nentsusa-mabandla yawo, kungahlalelwa amasolotya nje kuphela.

Yintoni kanye kanye le isenza singanqabiseki? Senze ntoni ukuze kuthiwe siyibeth’ entloko kuze ukunganqabiseki kube yinto yezolo ngonaphakade? Iza kukhe isontshwe le nyewe kwinqaku elilandelayo.

[Ibhokisi ekwiphepha 6]

Iindlela Zokukhusela Abantwana Abancinane

Kuba ke ukuxhatshazwa kwabantwana, ukuqweqwediswa nokubulawa kwabo sele kusisonka semihla ngemihla, abazali abaninzi baye bakufumanisa kuluncedo ukufundisa abantwana babo ezi zinto zilandelayo:

1. Mabale—kuphele—xa nokuba ngubani na efuna ukuba benze into abavakalelwa kukuba iphosakele.

2. Bangavumeli nabani na abambe amalungu abo omzimba afihlakeleyo—ngaphandle kokuba ngugqirha okanye umongikazi—nalapho kufuneka abekho umzali.

3. Babaleke, bakhwaze, batshwede okanye bacele uncedo kumntu okhulileyo okufutshane xa besengozini.

4. Umntwana axelele abazali bakhe nangasiphi na isiganeko okanye incoko engamonwabisiyo.

5. Bangabi namagumgedle abawafihlayo kubazali babo.

Okokugqibela, abazali bafanele balumke xa bekhetha umntu oza kugcina abantwana babo.

[Umfanekiso okwiphepha 5]

Ukuze sinqabiseke ke, kukho enye into esinokuyenza kunokufuna imfundo, ubutyebi okanye ukuzinikela nofele ekulweni nolwaphulo-mthetho