Ukuziva Unqabisekile—Ngoku Ukunqabiseka Ngonaphakade
KUTHENI unqabiseko lungafumaneki lula, yaye ukuba lufumanekile, kutheni lulokwexeshana? Ngaba kusenokuba imbono esinayo ngonqabiseko isekelwe kwingcinga nje—koko sinethemba lokukufumana kunoko kunokufumaneka? Ukuzikhohlisa okunjalo kunokufaniswa nephupha.
Ukuphupha akusivumeli sicinge ngobomi bokwenene nokunganqabiseki kwabo, kunoko kusenza sicinge ngobomi obunqabisekileyo size sityeshele nantoni na esenza sibuyele ezingqondweni. Noko ke, ngesiquphe iingxaki esinazo zokwenene zisibuyisela ezingqondweni zize zisenze siphinde sicinge ngezinto zokwenene.
Makhe siqwalasele inkalo ethile abantu abalufuna kuyo unqabiseko—indawo. Ngokomzekelo, isixeko esikhulu sisenokubonakala sithembisa, sibonisa amathuba okuba namaxesha amnandi, umvuzo oncumisayo, neendawo zokuhlala eziphucukileyo. Ewe, oko kunokubonakala njengonqabiseko okudala lulindelwe. Kodwa ngaba le mbono yeyokwenene?
Indawo—Ngaba Sisixeko Esikhulu Okanye Liphupha Nje?
Kumazwe asakhasayo, izibhengezo zibangela abantu bacinge ukuba izinto zihamba kakuhle kwizixeko ezikhulu. Iintlangano ezixhasa izibhengezo ezinjalo azinamdla kunqabiseko lwakho kodwa, kunoko, kwintengiso yazo. Azithethi ngeengxaki zehlabathi lokwenene, kunoko zibalaselisa izinto ezibonisa unqabiseko. Ngaloo ndlela, unqabiseko lunxulunyaniswa naloo nto ziyibhengezayo nesixeko esikhulu.
Cinga ngale mizekelo ilandelayo. Kwesinye isixeko saseNtshona Afrika abasemagunyeni babeka iibhodi ezinkulu zezibhengezo ezibonisa ngokucacileyo ukuba ukutshaya akwahlukanga nakancinane ekutshiseni imali esetyenzelwe nzima. Leyo yayiyinxalenye yephulo lokulumkisa abemi baso ngokutshaya. Abenzi nabathengisi bemidiza baxhoma iibhodi ezinkulu zezibhengezo ezintle ezibonisa abantu abatshayayo kwiindawo ezintle zolonwabo neziphucukileyo. Ngaphezu koko, enye inkampani yemidiza yanxibisa abanye babaqeshwa bayo iiyunifomu ezintle neekepusi zebaseball eziqaqambileyo ukuze basasaze imidiza kubantu abaselula esitratweni, bekhuthaza ngamnye ukuba “awuzame.” Uninzi lwaba baselula oluvela kwiidolophana, yaye lungazi nto ngeendlela zokubhengeza ezinobuqhokolo, lwakhohliswa koku. Lwaba ziingedle zecuba. Aba baselula bavela kwiidolophana baye beza kwisixeko esikhulu ukuza kufuna unqabiseko ukuze bakwazi ukuxhasa iintsapho zabo okanye babe nemali eninzi. Kunoko, babetshisa imali eninzi ebabenokuyisebenzisela iinjongo ezibhetele.
Izibhengezo ezibonisa ubomi obunempumelelo kwisixeko esikhulu azisoloko zivela kubarhwebi. Zisenokuvela kubantu abaye bafudukela kwisixeko esikhulu baze baneentloni zokubuyela kwiidolophana zabo. Bengafuni ukubonakala bengoongantweni, baqhayisa ngobutyebi abenza ngathi banabo noko bakuphumezileyo abaye bakufumana kweso sixeko. Noko ke, xa lihlolisiswa ngenyameko iwonga abathi banalo, kuyabonakala ukuba indlela yabo yokuphila ayiphucukanga kunobomi babo kwidolophana yangaphambili; batsala nzima ngokwasemalini njengenkoliso yabanye abantu abahlala ezixekweni.
Ngokukhethekileyo kwizixeko ezikhulu abo bafuna unqabiseko abasandul’ ukufika baba ngamaxhoba okuqhathwa. Ngoba? Ngokuqhelekileyo, kungenxa yokuba abakabi nabahlobo abasondeleyo yaye bakude kumalungu entsapho. Ngoko abanabo abantu abangabacebisa nabanokubanceda baphephe imigibe yokuphila ubomi basedolophini bokuthanda izinto eziphathekayo.
UJosué akazange awele kumgibe wokutshaya. Ukongezelela, waqonda ukuba kunzima kakhulu ukuphila kwisixeko. Kwimeko yakhe, naphantsi kwezona meko zintle, amaphupha akhe ayengenakuzaliseka. Waqonda ukuba wayenganqabisekanga ngokwenene esixekweni; wayengengomntu walapho. Waziva engaxabisekanga, emncinane yaye edane gqitha kuba izinto zingamhambelanga kakuhle, yaye ekugqibeleni wazithoba waza wabuyela kwidolophana yakowabo.
Wayesoyika ukuba uza kugculelwa. Kunoko, intsapho nabahlobo bakhe bokwenene bamamkela ngezandla ezishushu ekhaya. Ngenxa yokwamkelwa yintsapho yakhe, nokuba kwiimeko aziqhelileyo zedolophana yakowabo, nothando lwabahlobo bakhe kwibandla lamaKristu, kungekudala waziva enqabiseke nangakumbi kunakwisixeko esikhulu, apho amaphupha amaninzi aguquka abe mabi. Engalindelanga, ukusebenza ngokuzibhokoxa kunye noyise emasimini kwamenza yena nentsapho yakhe bafumana imali eninzi kunemali awayengeyifumene kweso sixeko.
Imali—Yintoni Eyona Ngxaki?
Ngaba imali iza kukwenza uzive unqabisekile? ULiz waseKhanada uthi: “Ndiselula, ndandikholelwa ukuba imali yayiphelisa iingxaki.” Wathandana nendoda eyayinemali. Kungekudala batshata. Ngaba waziva enqabisekile? ULiz uhlabela mgama esithi: “Ukutshata kwam, sasinendlu entle neenqwelo-mafutha ezimbini, yaye ngemali esasinayo sasinokuba nayo nantoni na kwizinto eziphathekayo, sasinokukhenketha siye naphi na size sizihlaziye nangayiphi na indlela. Okothusayo kukuba, ndandisakhathazeka ngemali.” Uchaza isizathu esithi: “Kwakukuninzi esasinokulahlekelwa kuko. Kubonakala ngathi okukhona unokuninzi, kokukhona uziva unganqabisekanga. Imali ayizange iphelise ukukhathazeka namaxhala.”
Ukuba uvakalelwa kukuba akunamali yaneleyo yokuba uzive unqabisekile, zibuze, ‘Yintoni eyona ngxaki? Ngaba ngokwenene kukungabi namali, okanye kukungayisebenzisi ngobulumko imali?’ Ecinga ngobomi bakhe bexesha elidluleyo, uLiz uthi: “Ngoku ndiyaqonda ukuba unobangela weengxaki zentsapho yakowethu ngoxa ndandisengumntwana yayikukungayisebenzisi kakuhle imali. Sasithenga ngetyala, yaye ngaloo ndlela sasisoloko sinetyala. Oku kwakubangela ixhala.”
Noko ke, namhlanje uLiz nomyeni wakhe baziva benqabiseke ngakumbi, nangona bengenamali ingako. Xa bafunda inyaniso yeLizwi likaThixo, bayeka ukuphulaphula izinto ezilingayo ezithethwayo ngemali baza baqalisa ukuphulaphula kubulumko bukaThixo, nakula mazwi: “Yena ke ondiphulaphulayo, uya kuhlala ngonqabiseko aze angaphazamiseki ekunkwantyiseni kwentlekele.” (IMizekeliso 1:33) Babefuna ukuba ubomi babo bube nenjongo engakumbi kunokuba nemali eninzi ebhankini. Ngoku, njengabavangeli basemazweni kwilizwe elikude, uLiz nomyeni wakhe bafundisa abantu abazizityebi nabangamahlwempu ukuba kungekudala uYehova uThixo uza kuzisa unqabiseko lokwenene emhlabeni wonke. Lo msebenzi unikela ulwaneliseko olunzulu oluvela kwinjongo ephakamileyo nakwimilinganiselo ephakamileyo, kungekhona kwinzuzo yemali.
Khumbula le nyaniso: Ukuba sisityebi kuThixo kuxabiseke kakhulu kunokuba sisityebi ngokwezinto eziphathekayo. Kuzo zonke iZibhalo Ezingcwele, kugxininiswa, kungekhona ekubeni nezinto eziphathekayo, kodwa ekubeni nokuma okuhle noYehova, esinokukugcina ngokuqhubeka sisenza ukuthanda kukaThixo sinokholo. UKristu Yesu wasikhuthaza ukuba ‘sibe zizityebi kuThixo’ size sigcine “ubuncwane . . . emazulwini.”—Luka 12:21, 33.
Isikhundla—Sikusa Phi?
Ukuba ucinga ukuba isikhundla esiphezulu sikhokelela kunqabiseko, zibuze: ‘Ngubani okwisikhundla esiphezulu onqabiseke ngokwenene? Ndimele ndibe phezulu kangakanani ukuze ndilufumane?’ Umsebenzi ophumelelayo unokukuqhatha ubonakale unqabisekile, ukubangele uphoxeke, okanye okona kubi nangakumbi, uwe kabuhlungu.
Amava abonisa ukuba igama elihle noThixo likunika unqabiseko olungakumbi kunokuba negama elihle nabantu. NguYehova kuphela onokunika abantu isipho sobomi obungunaphakade. Oko kubandakanya ukubhala igama lethu, kungekhona nje kuludwe oluchaza iinkcukacha ngomntu ngamnye, kodwa kwincwadi kaThixo yobomi.—Eksodus 32:32; ISityhilelo 3:5.
Xa ukubekela ecaleni oko ukunqwenelayo, uyijonga njani imeko okuyo ngoku, yaye unokulindela ntoni kwixesha elizayo? Akukho mntu onayo yonke into. Kunjengokuba omnye umKristu onobulumko ekubeka, “Kwafuneka ndifunde ukuba ebomini akusoze ube nayo YONKE into.” Khawunqumame uze ufunde ibhokisi ethi “Ibali LaseBenin.”
Ngoku phendula le mibuzo: Luluphi usukelo olubalulekileyo ebomini bam? Yiyiphi indlela engqalileyo enokundifikisa apho? Ngaba kunokwenzeka ukuba ndikwindlela ende, enganqabisekanga nokuba oko ndikufunayo noko kunokwenzeka ngokwenene kunokufumaneka ngendlela elula?
Emva kokunikela icebiso ngokuxabiseka kwezinto eziphathekayo xa kuthelekiswa nokuxabiseka kwezinto zokomoya, uYesu wathi gcina iliso ‘lingenakumbi,’ okanye “lingqalile.” (Mateyu 6:22) Wakwenza kwacaca ukuba izinto eziphambili ebomini zizinto zokomoya nosukelo olusekelwe kwigama likaThixo noBukumkani bakhe. (Mateyu 6:9, 10) Ezinye izinto azibalulekanga kangako okanye, ngokungathi kunjalo, ziziphazamiso.
Iikhamera ezininzi namhlanje ngokuzenzekelayo zijolisa kwizinto ezikude nezikufuphi. Ngaba utyekele koko? Ngaba phantse yonke into oyibonayo “ungqala” kuyo—oko kukuthi, ibalulekile, iyanqweneleka yaye unqwenela ukuba ifumaneke? Ukuba oku kunjalo, eyona nto ibalulekileyo kumaKristu, uBukumkani, bunokulahleka ngokulula phakathi kwezinye izinto, nganye kuzo ifuna ingqalelo yakho. UYesu walumkisa esithi: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.”—Mateyu 6:33.
Ukunqabiseka Ngoku Nangonaphakade
Sonke sinokuphupha ngathi nangabo sibathandayo sinezinto ezintle. Noko ke, isibakala sokuba asifezekanga, siphila kwihlabathi elingafezekanga, yaye siphila ixesha elifutshane sisinyanzela ukuba singanqweneli ukuba nezinto ezininzi. Umbhali weBhayibhile wacacisa oku kwiminyaka engamawaka eyadlulayo: “Ndabuya ndabona phantsi kwelanga ukuba ukukhawuleza asikokwababalekayo, idabi asilolabanamandla, nokutya asikokwezilumko, nobutyebi asibobabanokuqonda, kwanobabalo asilolwabanokwazi; ngenxa yokuba bonke behlelwa lixesha nasisihlo esingenakubonwa kwangaphambili.”—INtshumayeli 9:11.
Maxa wambi sithi phithi bubomi bemihla ngemihla kangangokuba siyalibala ukubona izinto ezibaluleke ngakumbi zokuba singoobani, noko sikufuna ngokwenene ukuze sizive sinqabiseke ngokwenene. Cinga ngala mazwi amandulo obulumko: “Umntu oyinyolukeleyo imali soze imanelise; kanti ke noxhinele ubutyebi akaze aneliswe yingeniso yakhe. Umntu ophangelayo ulala athi yoyi, noba utya kancinci, okanye ke uyahlutha. Ke bona ubunewu-newu besityebi busitsho siphuthelwe.” (INtshumayeli 5:10, 12, IBhayibhile YesiXhosa Yowe-1996) Olwakho unqabiseko unokulufumana phi?
Ukuba ukwimeko kaJosué yamaphupha angenakufezeka, ngaba unokukuguqula oko uceba ukukwenza? Abo bakuthanda ngokwenene baya kukuxhasa, njengokuba yenjenjalo intsapho nabahlobo bakaJosué ebandleni lamaKristu. Unokunqabiseka nakakhulu kwiimeko ezihlelelekileyo ukunye nabo bakuthandayo kunakwisixeko nabo banokuzama ukukuxhaphaza.
Ukuba usele unokuninzi, njengokuba kwakunjalo ngoLiz nomyeni wakhe, ngaba unokulungelelanisa ubomi bakho ukuze uzibhokoxe ekuncedeni abantu, enoba bazizityebi okanye bangamahlwempu, ukuba bafunde ngoBukumkani, indlela yokufumana unqabiseko lokwenene?
Ukuba ubuzabalazela ukufumana isikhundla esiphezulu, mhlawumbi unokucinga ngokunyanisekileyo ngentshukumisa yakho. Kuyinyaniso kona ukuba, xa izinto zikuhambela kakuhle unokonwaba ebomini. Sekunjalo, ngaba uyakwazi ukunikela ingqalelo kuBukumkani—eyona ndlela yokwenene yokufumana unqabiseko oluhlala luhleli? Khumbula amazwi kaYesu athi: “Kunoyolo ngakumbi ukupha kunokwamkela.” (IZenzo 20:35) Ukuba unenxaxheba kwimisebenzi eyahlukahlukeneyo kwibandla lamaKristu, uya kuziva unqabisekile.
Abo bakholose ngokupheleleyo ngoYehova noBukumkani bakhe baba nonqabiseko olubangel’ imincili ngoku yaye bakhangele phambili kunqabiseko olupheleleyo kwixesha elizayo. Umdumisi wathi: “UYehova ndimbeka phambi kwam rhoqo. Ngenxa yokuba ungakwisandla sam sasekunene, andiyi kushukunyiswa. Ngoko ke intliziyo yam inemihlali, nozuko lwam lutyekele ekuvuyeni. Nenyama yam iya kuhlala inqabisekile.”—INdumiso 16:8, 9.
[Ibhokisi/Umfanekiso okwiphepha 6]
Ibali LaseBenin
Eli bali liye labaliswa amaxesha amaninzi ngeendlela ezahlukahlukeneyo. Kutshanje, omnye ummi osele ekhulile wedolophana yaseBenin, eNtshona Afrika, wabalisela abaselula eli bali.
Umlobi othile ubuyela ekhaya ekhwele iphenyana lakhe yaye udibana nengcali yelinye ilizwe esebenza kweli lizwe lisakhasayo. Le ngcali ibuza lo mlobi ngesizathu sokuba abuye ngokukhawuleza kangaka. Uphendula esithi ebesenokuhlala ixesha elidana kodwa sele ebambe ezaneleyo ukuze akwazi ukondla intsapho yakhe.
Le ngcali iyabuza: “Ngoku ke, wenza ntoni ngexesha analo?”
Lo mlobi uyaphendula: “Ndiyaloba kancinane. Ndidlale nabantwana bam. Sonke siyangqengqa xa kushushu. Ngokuhlwa, sidla isidlo sangokuhlwa kunye. Kamva, siyahlanganisa nabahlobo bam siphulaphule umculo, njalo njalo.”
Le ngcali imngen’ emlonyeni isithi: “Khangela, ndinesidanga saseyunivesithi yaye ndifunde gqitha ngezi zinto. Ndifuna ukukunceda. Ufanele ulobe ixesha elide. Uza kuzuza imali engakumbi yaye kungekudala uza kukwazi ukuthenga isikhephe esikhulu nangakumbi kuneli phenyane. Xa unesikhephe esikhulu, uya kuzuza imali engakumbi yaye kungekudala uza kukwazi ukuba neqela leenqanawa.”
Lo mlobi uyabuza: “Emva koko kwenzeke ntoni?”
“Wandule ke, kunokuba uthengise intlanzi kubantu nje, unokuthethathethana ngokuthe ngqo nomzi-mveliso okanye usenokuziqalela owakho umzi-mveliso wentlanzi. Uya kukwazi ukufudukela eCotonou, okanye eParis, okanye eNew York uze uqhube elo shishini ulapho. Mhlawumbi unokucinga nangokufaka ishishini lakho kwiziko lokuthenga izahlulo zamashishini uze ube sisityebi.”
Umlobi uyabuza: “Kuza kuthabatha ixesha elingakanani konke oko?”
Le ngcali iyaphendula: “Mhlawumbi iminyaka eli-15 ukusa kwengama-20.”
Lo mlobi uyaqhubeka esithi: “Emva koko kwenzeke ntoni?”
Le ngcali iyacacisa: “Kulapho ke buqalisa ukuba mnandi khona ubomi. Usenokwandula ke uthabathe umhlala-phantsi. Usenokufuduka kuloo ndawo iphithizelayo uze uye kwidolophana esemaphandleni.”
Umlobi uyabuza: “Ekugqibeleni kwenzeke ntoni?”
“Emva koko uya kuchitha nje ixesha elincinane uloba, udlale nabantwana bakho, ulale xa kushushu, ube nesidlo sangokuhlwa nentsapho yakho, uze uhlanganisane nabahlobo bakho nize niphulaphule umculo.”
[Imifanekiso ekwiphepha 7]
Ngaba ukunyuselwa kwisikhundla esiphezulu kuzisa ukunqabiseka?
[Imifanekiso ekwiphepha 8]
AmaKristu okhonza nawo anomdla ngokwenene kunqabiseko lwakho