Ukunqabiseka Ngokupheleleyo

XA UTHIWE nkaa ngumkhuhlane, usenokutya ipilisi, ukuze noko ithi qabu intloko ebuhlungu uze mhlawumbi ke usebenzise namagaqa omkhenkce ukuze noko kungafani nakuqala. Nangona kunokuthi qabu emva kwezo pilisi namagaqa omkhenkce, kodwa azide zifike kanye phayaa emazantsi alo mkhuhlane. Ibe xa ngoku le mpilo yakho ithanda ukuba yinto ngobunto bayo, kuye kufuneke udibane nogqirha onamava.

Nale ke yokunganqabiseki koluntu sel’ ithande ukuba ngumkhuhlane ongapheliyo. Kona kulungile ukuthabatha amanyathelo ukuze noko khe sifumane isiqabu kulo mkhuhlane, kodwa mnye kuphela umntu onokuwunyanga kakuhle noyazi kakuhle imeko yethu. Ibe akukho namnye olwazi kakuhle uluntu ngaphezu koMdali wethu, uYehova uThixo. Uyayazi into yokuba asinqabisekanga ngenxa yeengxaki ezithiwe ngwanda phezu kwethu.

Unqabiseko Lonakaliswa Kwasekuqaleni

ILizwi likaThixo lisithela thsuphe ukuba uYehova wenza isibini sokuqala esingabantu safezeka waza wasibeka kwindawo enqabisekileyo. Sasipholelwe ngamalanga. Eyona nto ke yayifunwa nguThixo kukuba uluntu luphile ngonaphakade eparadesi, lunqabiseke ngokupheleleyo. Kule ndawo babehlala kuyo ke aba bantu bokuqala kwakukho “yonke imithi enqwenelekayo ngokukhangeleka, nelungele ukudliwa.” Phawula ukuba kwakunyanyekelwa neentswelo zabo zokwenyama; kucaca ke nokuba neemvakalelo zabo zazikokosiwe, ekubeni kusithiwa le ndawo babehlala kuyo ‘yayinqweneleka ngokukhangeleka.’ Asinakuyithandabuza nakancinane ke into yokuba esi sibini sokuqala sabekwa kwindawo ekwakuqinisekiwe ukuba ayinazinkathazo kwaphela.—Genesis 2:9.

UAdam noEva balutshijilela ulawulo lothando lukaThixo njengomongami, ngaloo ndlela ke, batyala amathandabuzo, uloyiko, usizi, ukuziva benetyala nokunganqabiseki kubomi babo. Emva kokutshijilela uThixo, uAdam wayitsho phandle into yokuba ‘wayesoyika.’ Abantu bokuqala bazambathisa baza bamzimela uMdali onothando, ekwakungangeni moya phakathi kwabo naye nababenolwalamano oluhle naye ngelo xesha.—Genesis 3:1-5, 8-10.

Laa njongo ke uYehova wayenayo phambili phayaa ayikaguquki. IBhayibhile ithi uMdali wethu unguThixo onothando, oya kuthi kungekudala anike abantu abamthobelayo amandla okubuyisela umhlaba kwimeko eyiparadesi baze banqabiseke ngonaphakade. Esebenzisa umprofeti uIsaya unikela esi sithembiso: “Ndidala amazulu amatsha nehlabathi elitsha; . . . yibani nemihlali nigcobe nanini.” (Isaya 65:17, 18) Ehlomla kwangala mazulu matsha nehlabathi elitsha, umpostile uPetros uthi: “Kwezi kuza kuhlala ubulungisa.”—2 Petros 3:13.

Iza kwenzeka njani ke le nto? Iza kwenziwa ngurhulumente omiselwe nguYehova. Bobaa Bukumkani uYesu Kristu waxelela abandeli bakhe ukuba bathi xa bebuthandazela: “Bawo wethu osemazulwini, malingcwaliswe igama lakho. Mabufike ubukumkani bakho. Makwenzeke ukuthanda kwakho nasemhlabeni, njengasezulwini.”—Mateyu 6:9, 10.

UBukumkani bukaThixo ke buya kuzithabatha iintambo koorhulumente babantu buze buzalisekise injongo kaThixo emhlabeni wonke. (Daniyeli 2:44) Amathandabuzo, uloyiko, usizi, ukuziva unetyala nokunganqabiseki nto ezo ebeziyintw’ ibila phezu koluntu ukususela ngexesha lika-Adam, ziya kuphela kuthi nya. Ithi ke iBhayibhile, obo Bukumkani sele bulaph’ ecaleni kwendlu. Nangoku, usekho umnconwana wonqabiseko kwabo babufun’ emanzini uBukumkani bukaThixo, nakuba eli hlabathi siphila kulo lingazinzanga.

Zibeke Kwindawo Yokuqala Izinto Zokomoya

UDavide wayengumkhonzi kaThixo owayekwazi ukuba kunjani ukuxhaxha luloyiko nokuba sentlungwini. Kodwa sekunjalo uDavide wakwazi ukubhala la mazwi akwiNdumiso 4:8: “Ndiya kulala phantsi, ndilale ubuthongo kwangoku, ndixolile, ngokuba wena, Yehova, undihlalisa ndikholosile, noko ndindedwa.” (Akekeliswe sithi.) UYehova wamenza uDavide waziva enqabisekile, nangona iinkathazo zaziye zikhwele zizehlela kuDavide maxa wambi. Sifunda ntoni ke thina kule nto? Sinokuwufumana njani loo mnconwana wonqabiseko kweli hlabathi linganqabisekanga?

Cinga nje ngengxelo ekwiGenesis engoAdam noEva. Baqala nini ukuziva benganqabisekanga? Baqala mhla bathabatha ulwalamano lwabo noMdali barhuqisa ngalo phantsi baza bayinikel’ umva injongo yakhe ngoluntu. Ngenxa yoko, ukuba senza into eyahlukileyo kuleyo ngokuba nolwalamano noYehova size sizame ukuphila ngokuvisisana nendlela afuna ngayo, nangoku sinokunqabiseka ngendlela engathethekiyo.

Ukwazi uYehova ngokufundisisa iBhayibhile kusinceda sazi intsingiselo yobomi. Kungelo xesha kanye esiye sazi abona bantu singabo kanye kanye nesizathu sokuba silapha. Sinokunqabiseka xa simthanda uThixo, siyazi injongo yakhe ngoluntu size sazi nendlela esingena ngayo thina kuyo. Kaloku loo nto yabonwa yindoda ekuthiwa nguPaul kwiminyaka eliqela eyadlulayo.

UPaul lo wazalwa waza wakhulela kwesinye seziqithi ezimi cebu kuhle kunxweme lwaseJamani. Ngenxa yezinto ezehlela abazali bakhe ebudeni beMfazwe Yehlabathi II, intsapho yakowabo yayingenamdla elunqulweni. UPaul uthi xa ethetha ngexesha lakhe lobufana: “Ndandingakholelwa nto, ndingahloneli mntu. Ndandidla ngokucim’ iintsizi ngokuzinkcinkca kanobom ngeenyembezi zentombi kaLudiza, ndizitshiza de kube kabini okanye kube kathathu ngeveki. Ndandinganqabisekanga tu kwaphela.”

Emva koko uPaul waba nengxubusho nelinye lamaNgqina kaYehova. UPaul walinyus’ elehlisa eli Ngqina, kodwa latheth’ into enye eyamenza wamis’ ingqondo wacinga. “Inkovu iphum’ ethangeni.” Ngamany’ amazwi, zonke izinto ezisingqongileyo eziyindalo zimele ukuba zinoMdali.

“Ndahlala ke ndijika-jikana nale nto ndiyicinga, de kwanyanzeleka ukuba ndoyisakale ndivume.” Ngoko uPaul wafundisisa iBhayibhile namaNgqina kaYehova waza wafunda ngoYehova. Uyavuma ukuba: “Ngaphandle nje kwabazali bam, uYehova wayengumntu wokuqala ebomini bam ukukha andenzele into ephucukileyo.” UPaul wabhaptizwa njengeNgqina ngowe-1977 ibe uthi: “Ngoku ndiyazi kakuhle injongo yobomi. Kaloku akukho nto ndiyinandipha ngathi kukuphila ngokuvisisana nokuthanda kukaYehova. Ndiziva ndinqabisekile, ekubeni ndisazi ukuba akukho nto inokwehlela mna okanye intsapho yam angenakuyilungisa uYehova kwikamva.”

Asifundisa ntoni ke thina la mava? UPaul wahlukana nokunganqabiseki—umthwalo ohlalele ukumkrun’ iimvakalelo—ngokuthi angazixakekisi ngobutyebi bezinto eziphathekayo kodwa azixakekise ngezinto zokomoya. Wakha ulwalamano oluluqilima noMdali. Nezinye ke izigidi zamaNgqina kaYehova zinandipha olo lwalamano. Oku kuwomeleza ngokwenene, nto leyo ewancedayo abonakalise umoya wokuzincama kwindlela aqhubana ngayo nabanye. Ngokuya emakhayeni abantu, amaNgqina kaYehova asebenzisa ixesha lawo ekuncedeni abanye abantu bazive benqabisekile ngokunikela ingqalelo kwizinto zokomoya. Kodwa amaNgqina akapheleli nje ekushumayeleni.

“Thandaza KuThixo Wakho, UYehova”

NgoJulayi 1997 xa uMlambo iOder wakhukulisa amahalatushe emihlaba emntla Yurophu, amaNgqina kaYehova aseJamani eva ngemeko emaxongo yabantu abakwiPoland eselumelwaneni. Ayeza kwenza ntoni ngaloo nto? Amanye amaNgqina aseBerlin nakufutshane nalapho abonisa ububele obumangalisayo ngokunikela ngokuzithandela imali engaphezu kwee-R586 000 kwiintsukwana nje ezimbalwa.

AmaNgqina awayezizikhwivivi zabakhi adukuda indlela kangangeeyure ezintandathu—konke ekwenza ngeendleko zawo—ukusuka eBerlin ukuya kummandla okufuphi eWrocław ePoland. Kwenye idolophana, izindlu ezininzi zazingamabhodlo nje. Omnye umzi wentsapho engamaNgqina wawuthe gabhu emanzini kangangeemitha ezintandathu. Intombi yalapho yayiceba ukutshata kwinyanga elandela leyo ize ihlale kuloo ndlu nomyeni wayo. Kwakuza kwenziwa ntoni ke ngoku ukuze kulungiswe loo ndlu kuze kuncedwe le ntsapho eyayilahlekelwe phantse yinto yonke?

Emva kokuba izikhukula ziwuthile, omnye ummelwane wabuza phofu ephoxisa esithi: “Kutheni ungathandazi kuThixo wakho, uYehova, ubone ukuba akanakukunceda na?” Kaloku indlela awathi xhungu ngayo lo mmelwane xa ngosuku olulandelayo wabona uthotho lweenqwelo-mafutha ezisuka eJamani zisiza kumzi wale ntsapho ingamaNgqina, ingaphaya kwamandla! Kwezo nqwelo-mafutha kwathi gxididi iqela labantu basemzini laza labeth’ uxam waphala lilungisa loo mzi. Lo mmelwane wabuza: “Ngoobani aba? Ngubani othenge ezi zinto zokwakha?” Le ntsapho ingamaNgqina yamxelela ukuba ezi ndwendwe zazingabazalwana bayo bokomoya yaye zizo ezazithenge ezi zinto zokwakha. Ayemi emqaleni kubemi baloo dolophu njengoko le ndlu yayilungiswa. Kwatshatiswa kanye ngaloo mhla wawubekiwe.

Le ntsapho yaqonda ukuba, ukuba yinxalenye yobuzalwana bezizwe ngezizwe bamaNgqina kaYehova akupheleli nje ekubeni neengenelo zokomoya kodwa kunomlinganiselo othile wonqabiseko kweli hlabathi linganqabisekanga. Asingabo bodwa ke abafumanisa le nto. Kuwo wonke lo mmandla wawehlelwe yintlekele, amakhaya neeHolo zoBukumkani zamaNgqina kaYehova zalungiswa. Nabamelwane abangengawo amaNgqina abazange babekelwe bucala. Kwafakw’ isandla kakhulu nasekulungiseni awabo amakhaya, nto leyo eyayixatyiswa gqitha.

Ubulungisa, Inzolo Nonqabiseko

Kaloku xa sisiba yimiqabaqaba emva komkhuhlane olingen’ oogqirha nezicaka, siye sintyontyele sibulela loo gqirha sishiy’ esingalaziyo! Hayi indlela esiya kudomboza ngayo ke sibulela uMdali wethu—xa lo mkhuhlane wokunganqabiseki uthe nqo uluntu utshayelwe ngonaphakade—buBukumkani bukaThixo! Ewe, nguye kanye osithembisa ngobomi ‘phantsi kobulungisa bokwenyaniso, inzolo nonqabiseko ukusa kwixesha elingenammiselo.’ Elinjani lona ukumangalisa ithemba!—Isaya 32:17, NW.

[Amagama acatshulweyo akwiphepha 10]

Sinokuwuthi xibilili umthwalo ohlalele ukusikrun’ iimvakalelo ngokuthi singazixakekisi ngobutyebi bezinto eziphathekayo kodwa sizixakekise ngezinto zokomoya

[Umfanekiso okwiphepha 8, 9]

UThixo uthembisa ihlabathi elitsha apho wonke umntu eya kunqabiseka ngokupheleleyo