Ingakanani Ityhefu Esekhayeni Lakho?

IPHEPHANCWADI iScientific American lithi uhlolisiso olukhe lwenziwa kutshanje kubantu abangaphezu kwama-3 000 eUnited States naseKhanada lutyhile ukuba “abemi abaninzi basengozini yokusebenzisa izingcolisi ezinokuba yityhefu . . . kwiindawo ababekade becinga ukuba noko zicocekile, njengamakhaya iiofisi neenqwelo-mafutha.” Kwafunyaniswa ukuba eyona mithombo iyintloko yongcoliso lomoya emakhayeni ngumphunga osuka kwizinto eziqhelekileyo njengezinto zokucoca, izinto zokugxotha amanundu, izinto zokwakha, amafutha, izinto zokwenza umoya unuke kamnandi nezibulali-zintsholongwane, kwakunye nemichiza ekwimpahla ehlanjwe edry cleaner okanye izihlalo ezitsha ezenziwe ngamalaphu.

I-“space flu,” esisigulo esasithwaxa oosomajukujuku de wafunyanwa oyena nobangela waso, yayikwangulo msi, okanye “ukukhutshwa kweegesi.” Ukukhutshwa kweegesi ukuva xa ukhwele inqwelo-mafutha entsha okanye uhamba ngakwiishelfu ezinezinto zokucoca kubhazabhaza wevenkile, nangona zikwiinkonkxa ezivaliweyo. Ngoko xa indlu ivalwe ngci, masithi ngokomzekelo ngenxa yengqele yasebusika, ukukhutshwa kweegesi zemichiza eyahlukeneyo kunokuba negalelo ngandlel’ ithile kungcoliso lwasendlwini olulodlula lee ungcoliso lwangaphandle.

IMedical Post yaseKhanada ithi, abantwana, ingakumbi abo basabhadazayo bangabona basengozini yezingcolisi ezingaphakathi endlwini. Bakufutshane emgangathweni kunabantu abakhulileyo, baphefumla ngokukhawuleza kunabantu abakhulileyo; bachitha malunga nama-90 ekhulwini exesha labo endlwini; yaye ekubeni amalungu abo engekakhuli, imizimba yabo isenokuba sengozini yetyhefu. Banokutya ama-40 ekhulwini okutya okunelothe, ngoxa abantu abakhulileyo besitya malunga ne-10 ekhulwini.

Ukuhlala Ulungelelene

Ngenxa yokuba isizukulwana sabantu esikhoyo sisengozini kukusetyenziswa kwemichiza ngendlel’ engaphaya kwengqondo, iseninzi into ekufuneka ifundiwe ngeengxaki enokuzibangela, ngoko izazinzulu zisavundlile. Ukuba sengozini ngenxa yemichiza akuthethi kuthi ngokuzenzekelayo umntu makangcangcazel’ ingwatyu esoyika umhlaza okanye ukufa. Eneneni, abantu abaninzi babonakala bephila noko, ngenxa yoMdali womzimba womntu omangalisayo. (INdumiso 139:14) Kodwa ke kusafuneka sithabathe amanyathelo afanelekileyo, ngokukodwa xa siyisebenzisa rhoqo imichiza esenokuba netyhefu.

Incwadi ethi Chemical Alert! ithi “eminye imichiza inetyhefu ngohlobo lokuba iphazamisana nokulungelelana kweenkqubo [zomzimba] nto leyo eyenza ungaziva mnandi ncam.” Akufuneki side siyitshintshe kakhulu indlela esiphila ngayo ukuze siphephe ubungozi bemichiza kodwa incinane nje into esinokuyitshintsha kubomi bethu bemihla ngemihla. Khawuhlolisise amacebiso akwibhokisi ekwiphepha 28. Amanye awo anokukunceda.

Ngaphandle kokuthabatha amanyathelo afanelekileyo xa sisebenzisa imichiza, enye into enokusinceda kukungazixhalabisi ngokugqith’ emgceni, ingakumbi ngezinto esingenakukwazi ukuzinceda. KwiMizekeliso 14:30 iBhayibhile ithi: “Bubomi benyama intliziyo epholileyo.”

Noko ke, imichiza enetyhefu isababandezela ize ibalalise ngendlu abantu abaninzi, de maxa wambi ibaphos’ elukhukweni lokufa.a Kanye njengezigidi zabantu ezithwaxwa zezinye izigulo namhlanje, abo balaliswe phantsi yimichiza banezizathu ezibambekayo zokukhangela phambili kwikamva, kuba kungekudala umhlaba uya kuba ungenazityhefu ezibabeka phakathi kwenyama nozipho abemi bawo. Kwaneengcinga eziyityhefu, kwanabo baziquvileyo, ziya kuba zizinto zexesha elidluleyo, njengokuba inqaku lokugqibela kolu ngcelele liza kubonisa.

[Umbhalo osemazantsi]

[Ibhokisi/Umfanekiso okwiphepha 28]

Yenzelwe Ikhaya Elisempilweni Nelikhuselekileyo

Incinane kakhulu into ekufuneka uyenzile kwindlela ophila ngayo ukuze uphephe ukuchanwa yimichiza enokuba yingozi. Nanga amanye amacebiso anokukunceda. (Ukuze ufumane iinkcukacha ezongezelelekileyo, sicebisa ukuba uye kumzi wogcino-zincwadi okwindawo ohlala kuyo.)

1. Zama ukugcina imichiza ekhupha umphunga kwindawo apho ingayi kungcolisa umoya wekhaya lakho. Loo michiza ke iquka iformaldehyde nezinto ezinezinyibilikisi ezinokuba yingozi, njengepeyinti, ivanishi, izinto zokuncamathelisa, izibulali-zinambuzane, nezinto zokucoca. Izinto ezithatha umlilo zikhupha imiphunga enetyhefu. Phakathi kwazo kukho ibenzene, ekuthiwa xa uyisebenzisa kakhulu ixesha elide inokubangela umhlaza, ukuzala abantwana beneziphene nezinye iingozi ezinokwenzeka kwinkqubo yokuzala.

2. Qiniseka ukuba umoya ungena kakuhle kuwo onke amagumbi, kuquka igumbi lokuhlambela. Ukuvulela amanzi okuhlamba kusenokutshintsha izinto ezithile ezixutywe naloo manzi ezinjengechlorine. Loo nto ke isenokubangela ukufumba kwechlorine kwanechloroform.

3. Sula iinyawo zakho ngaphambi kokuba ungene endlwini. IScientific American ithi loo nto ilula ngolo hlobo, inokuthoba umlinganiselo welothe ekwikhaphethi ngokuphindwe kathandathu. Kwakhona yenza ukuba zingasetyenziswa kakhulu izibulali-zinambuzane, uninzi lwazo ezikhawuleza zithi shwaka ngaphandle ngenxa yelanga kodwa ebezinokuhlala iminyaka ekhaphethini. Eny’ into onokuyenza, esele ithand’ ukuqheleka kwamanye amazwe asehlabathini, kukukhulula izihlangu. Umatshini wokutshayela osebenza kakuhle, ingakumbi onebrashi ejikelezayo, unokuwuhlisa umlinganiselo wongcoliso olukwikhaphethi.

4. Ukuba ufaka isibulali-zinambuzane egumbini, musa ukufaka izinto zokudlala zabantwana kwelo gumbi ubuncinane kangangeeveki ezimbini, nangona kuloo nto uyisebenzisayo kusenokubhalwa ukuba kukhuselekile ukusebenzisa elo gumbi kwisithuba seeyure nje emva kokuba uyifakile. Kutshanje izazinzulu ziye zafumanisa ukuba izinto ezithile zeplastiki nogwebu olufumaneka kwizinto zokudlala zabantwana ziyawafunxa amasalela esibulali-zinambuzane kanye njengesiponji. Le tyhefu isenokubachana abantwana ngokungena kulusu lwabo nasemlonyeni.

5. Musa ukuzisebenzisa kakhulu izibulali-zinambuzane. Kwincwadi yakhe ethi Since Silent Spring, uFrank Graham, Omnci., ubhala athi izibulali-zinambuzane “ziluncedo ekhaya nasesitiyeni, kodwa ezentengiso ziye zeyisela abantu abaqhelekileyo abanezindlu ezidolophini ukuba bathenge intarhantarha yemichiza ukuze boyise isibetho seentethe zaseAfrika.”

6. Susa ipeyinti enelothe exobukayo kwindawo yonke uze upeyinte kwakhona ngepeyinti engenayo ilothe. Musa ukuvumela abantwana badlale kwindawo emdaka engcoliswe yipeyinti enelothe. Xa kurhanelwa ukuba kukho ilothe kwimibhobho yamanzi, itephu yamanzi abandayo ifanele ivulelwe kancinane de kutshintshe ubushushu bamanzi ibe amanzi akwitephu yamanzi ashushu akafanele aselwe.—Environmental Poisons in Our Food.

[Umfanekiso okwiphepha 29]

Abantwana abasabhadazayo bangabona basengozini yezingcolisi ezingaphakathi endlwini