Ukungevani Ngokupheleleyo Nemichiza—Isifo Esingumnqa

Indlu kaPam yayiphakathi kwezindlu ezingqongwe ngamasimi omqhaphu. Iinqwelo-moya zazidla ngokufafaza imichiza yokubulala izityalo neyokubulala izinambuzane; yaye umoya wawudla ngokuthabatha amasalela ale michiza uwathumele kwimizi ekufutshane, kuquka nokaPam.

UPAM waqala ngokumana enkqenkqethwa yintloko aze abe nesicaphucaphu, yaye impilo yakhe yaya isiba maxongo. Ekuhambeni kwexesha wamana ukuguliswa ngamandla zizinto ezibonakala zingenanto yakwenza nemichiza yokubulala izinambuzane: izinto ezinjengeziqholo, izibulala-vumba, izithambiso zomzimba, izinto zokucoca, ipeyinti, ikhaphethi entsha, umsi wecuba, izinto zokunukisa kamnandi endlwini nezinye izinto. Iimpawu ezazibonakala kuPam ziphakathi kwezo zidla ngokufaniswa nesifo esikhwankqisayo sokungevani ngokupheleleyo nemichiza (MCS [Multiple Chemical Sensitivity]).a

UPam wamxelela oku uVukani!: “Xa ndirhogola imichiza mihla le, ndiqala ngokudinwa gqitha, kuthi siba, ndibe nesiyezi ndize ndifune ukugabha. Umzimba lo wam uthi fuku yaye maxa wambi ndidla ngokuba nombefu, ndisuke ndoyike nje, ndingakwazi ukuzibamba ukulila, ndibe nombilini, intliziyo ibethe ngamandla, nemiphunga izale amanzi. Oku kuye kwabangela inyumoniya.”

Ngoxa iimpawu zeMCS zisahluka kubantu ngabantu, zisenokuquka intloko ebuhlungu, ukudinwa ngokugqithiseleyo, ukuba buhlungu kwezihlunu, ukuba buhlungu kwamalungu, ukurhawuzela kolusu, irhashalala, iimpawu zomkhuhlane, isifuba, ukuba nengxaki yokuxinana kweempumlo, ukuba nexhala, uxinezeleko, ukuba nengxaki yokulibala, ukungakwazi ukunikela ingqalelo, ukungakwazi ukulala, ukungabethi kakuhle kwentliziyo, ukuthi fuku, ukuba nesicaphucaphu, ukugabha, ukuba neengxaki emathunjini, nokuxhuzula. Kambe ke, uninzi lwezi mpawu lunokubangelwa nazezinye izigulo.

IMCS—Ingxaki Eyandayo

EUnited States, uhlolisiso oluye lwenziwa kumaqela awahlukeneyo abantu lubonisa ukuba phakathi kwe-15 nama-37 ekhulwini abemi balapho bazigqala bechatshazelwa okanye bengadibani nemichiza eqhelekileyo okanye amavumba emichiza, njengomsi ophuma kwinqwelo-mafutha, umsi wecuba, indawo esandul’ ukupeyintwa, ikhaphethi entsha neziqholo. Noko ke, kuphela basisi-5 ekhulwini okanye ngaphantsi, kuxhomekeka kwabo kuye kwenziwa uhlolisiso kubo, abaye bathi bafunyaniswe beneMCS. Malunga neekota ezintathu kwaba ngamabhinqa.

Abaninzi abaneMCS bathi isigulo sabo sibangelwe sisibulali-zinambuzane nezinyibilikisi. Zombini ezi zinto zixhaphakile kwimekobume, ingakumbi izinyibilikisi. Izinyibilikisi zizinto eziwuthatha msinya umlilo (ezikhupha umphunga omninzi) izinto ezizalisa umoya okanye ezinyibilikisa ezinye. Ezo zizinto ezikwiipeyinti, iivanishi, izinto zokuncamathelisa, izibulali-zinambuzane, nemixube yokucoca.

Kumanqaku alandelayo, siza kukhe siyihlolisise ngokusondeleyo iMCS, sixubushe ngoncedo olufumanekayo kwabo banesi sigulo, size sibone indlela abantu abanaso nabo bangenaso abanokusebenzisana ngayo ukuze benze ubomi bube lula kwabo baneMCS.

[Umbhalo osemazantsi]