Imbono YeBhayibhile

Ukubolekana Imali Kwabahlobo

“UYABOLEKA ONGENDAWO, ANGABUYISI; KE LONA ILUNGISA LIYABABALA, LIPHE.”—INDUMISO 37:21.

“MUSA ukuba ngumboleki, ungabi ngumbolekisi; kuba ngokufuthi kulahleka imali ebolekiweyo kwanobuhlobo.” Wabhala watsho umbhali wemidlalo yesiNgesi uWilliam Shakespeare, egxininisa ubulumko ekudala bukho. Ngokuqinisekileyo, zimbalwa izinto ezinamandla okubutshayela buthi tu ubuhlobo babantu njengokubolekana imali. Kwanokuba sele kucetywe kakuhle ngeyona ndlela yaye ngezona njongo zinyanisekileyo, izinto azisoloko zihamba kakuhle njengoko bekucingwa.—INtshumayeli 9:11, 12.

Kusenokuvela iimeko ezinokwenza kube nzima okanye angakwazi umboleki ukuzalisekisa izibhambathiso zakhe. Okanye ngequbuliso umbolekisi usenokuzifumanisa sele eyiswele loo mali ebebolekise ngayo. Xa kusenzeka izinto ezinjalo, njengoko uShakespeare watshoyo, ubuhlobo nolwalamano bunokuba kwimeko emaxongo.

Kakade ke, umntu usenokuba nezizathu ezivakalayo zokuboleka imali ethile. Ejamelene nengxaki yemali ngenxa yentlekele okanye ukulahlekelwa ngumsebenzi, oku usenokukubona njengokuphela koncedo olukhoyo. IBhayibhile ikhuthaza abo banako ukuba bancede abasweleyo xa bekwazi ukwenjenjalo. (IMizekeliso 3:27) Oku kusenokuquka ukubolekisa ngemali. Noko ke, amaKristu abandakanyeka koko amele azijonge njani izibhambathiso zawo?

Imigaqo Emele Iqwalaselwe

IBhayibhile asiyoncwadi yesikhokelo kwimicimbi yemali. Ayixubushi zonke iinkcukacha ezisenokufuneka ekubolekaneni. Imibandela enjalo njengokubiza okanye ukungabizi nzala kwanokuba imele ibe ngakanani ishiyelwa kwabo babandakanyekileyo.a Noko ke, leyo iBhayibhile iyinikelayo icacile, yimigaqo yothando emele ilawule iimbono nesimo sengqondo sakhe wonke ubani obolekayo okanye obolekisayo.

Qwalasela imigaqo esebenza kulowo ubolekayo. Umpostile uPawulos wabongoza amaKristu ukuba angabi “natyala lanto nakubani na, ngaphandle kwelokuthandana.” (Roma 13:8) Ngoxa uPawulos wayevakalisa umgaqo ochaphazela wonk’ ubani, ngokuqinisekileyo isiluleko sakhe sinokuthatyathwa njengesilumkisa nxamnye nokuzenzela ityala. Maxa wambi kubhetele ukuhlala ungenanto kunokuba netyala lemali komnye umntu. Ngoba? IMizekeliso 22:7 ithi “obolekayo ngumkhonzi endodeni embolekayo.” Lowo ubolekayo umele aqonde ukuba ubophelelekile. Ngokomgaqo, ubuncwane bakhe asibobakhe ngokupheleleyo. Ukuhlawula ityala lakhe ngokwendlela ekuvunyelenwe ngayo kumele kube yeyona nto iphambili ebomini bakhe, kungenjalo kusenokubakho iingxaki.

Ngokomzekelo, njengoko ixesha lihamba intlawulo ingafumaneki, umbolekisi usenokucaphuka. Izinto azenzayo umboleki njengokuthenga impahla, ukutya kwiindawo zokutyela, okanye aye kubethwa ngumoya zisenokumrhanisa umbolekisi. Usenokuqalisa ukuqumba. Ulwalamano phakathi kwabo naphakathi kweentsapho zabo lusenokuba lubi okanye kwenzeke into embi nangakumbi. Oko kusenokuba nemiphumo emibi ukuba umboleki akenzi ngokwelizwi lakhe.—Mateyu 5:37.

Kodwa ke kuthekani ukuba ngequbuliso umboleki akakwazi kuphumeza oko akuthembisileyo ngenxa yemeko engaphaya kwamandla akhe? Ngaba oku kuya kulicima elo tyala? Akunjalo. Umdumisi uthi umntu olilungisa ‘ufunga angajiki, nokuba kubi kuye.’ (INdumiso 15:4) Kwimeko enjalo, ukubonakalisa uthando nobulumko lowo ubolekiweyo umele ngokukhawuleza acacisele umbolekisi ngaloo meko. Banokwandula ke bavumelane ngezinye iindlela zokuhlawula. Oku kuya kuqinisekisa uxolo, yaye kuya kumvuyisa uYehova uThixo.—INdumiso 133:1; 2 Korinte 13:11.

Enyanisweni, umntu ubonisa okuninzi ngaye ngendlela awasingatha ngayo amatyala anawo. Ukuba nesimo sokungakukhathaleli ukuhlawula kubonisa ukungabakhathaleli abanye. Ngokungathi kunjalo, umntu onesimo sengqondo esinjalo ubonakalisa ukuzingca—iminqweno yakhe iza kuqala. (Filipi 2:4) UmKristu othi ngabom yaye esazi angafuni ukuhlawula amatyala akhe ubeka engozini ukuma kwakhe noThixo, yaye izenzo zakhe zisenokubonisa ukuba uyabawa, unentliziyo engendawo.—INdumiso 37:21.

Umbolekisi

Ngoxa imbopheleleko enkulu ilele kobolekayo, kukho nemigaqo esebenza kulowo ubolekisayo. IBhayibhile ibonisa ukuba xa sikwazi ukunceda abasweleyo, simele senjenjalo. (Yakobi 2:14-16) Kodwa oko akuthethi kuthi loo mntu unyanzelekile ukuba abolekise ngemali, nokuba lowo ubolekayo ngumzalwana wokomoya. IBhayibhile ithi: “Onobuqili ubona into embi, azifihle.”—IMizekeliso 22:3.

Eyazi yaye eyiqonda imigibe yokwenene yokubolekana imali, umntu olumkileyo uya kuziphonononga ngenyameko naziphi na izicelo ezenziwa kuye zokuboleka imali. Ngaba eso sicelo sifanelekile? Ngaba loo mntu ubolekayo uye wawuqwalasela ngenyameko lo mbandela? Ngaba lowo ubolekayo ulungelelene yaye kuthethwa kakuhle ngaye? Ngaba ukulungele ukutyobela uxwebhu olwandlala isivumelwano? (Thelekisa uYeremiya 32:8-14.) Ngaba ngokwenene ukulungele ukuhlawula?

Oku akuthethi ukuba amaKristu amele angamncedi umntu osweleyo nobonakala engenakukwazi ukuhlawula. Imbopheleleko yobuqu yomKristu kwabanye inabela ngaphaya kweenkqubo eziphumelelayo zoshishino. Umpostile uYohane wabuza: “Kodwa nabani na onazo izinto zokuxhasa ubomi zeli hlabathi aze abone umzalwana wakhe eswele ukanti aluvale ucango lweemfesane zakhe zofefe kuye, uthando lukaThixo luhlala ngayiphi na indlela kuye?” Ewe, amaKristu amele abonise ‘uthando, kungengalizwi okanye ngalulwimi, kodwa ngesenzo nenyaniso.’—1 Yohane 3:17, 18.

Kwezinye iimeko ubani usenokugqiba ekubeni angamboleki imali umzalwana wakhe osweleyo. Usenokukhetha ukumpha njengesipho okanye amncede ngenye indlela. Ngendlela efanayo, xa kuvela iingxaki koko kubolekana, umbolekisi usenokukhetha ukwenza inceba. Usenokunqwenela ukuqwalasela iimeko eziguqukileyo zomboleki aze amandisele ixesha lokuhlawula elo tyala, alinciphise ityala, okanye ade alicime elo tyala ngokupheleleyo. Ezi zizigqibo zobuqu ngamnye amele azenzele ngokwakhe.

AmaKristu amele ahlale ekhumbula ukuba uThixo ukhangela zonke izinto yaye simele siphendule ngendlela esiziphatha ngayo nesibusebenzisa ngayo ubuncwane bethu. (Hebhere 4:13) Ngokuqinisekileyo isiluleko seBhayibhile sokuba ‘yonke imicimbi yethu mayenzeke ngothando’ siyasebenza ekubolekaneni kwabahlobo.—1 Korinte 16:14.

[Umbhalo osemazantsi]

[Umfanekiso okwiphepha 16]

“The Money Changer and His Wife” (1514), by Quentin Massys

[Inkcazelo]

Scala/Art Resource, NY