Ukubolekisa Ngemali KumaKristu Okhonza Nawo

UPEDRO noCarlos babengabahlobo abasenyongweni.a Bobabini babengamaKristu, yaye ngokufuthi iintsapho zabo zazikunandipha ukunxulumana kunye ngothando. Ngoko xa uCarlos wayefunela ishishini lakhe imali, uPedro akazange athandabuze ukumboleka. UPedro uchaza esithi: “Ekubeni sasingabahlobo abasenyongweni, akuzange kube nzima.”

Noko ke, kwiinyanga nje ezimbini ezalandelayo, ishishini likaCarlos labhanga, yaye akazange akwazi ukuyibuyisa imali awayeyibolekile. UPedro wamangaliswa kukuva ukuba uCarlos wayesebenzise inxalenye enkulu yemali awayeyibolekile ekuhlawuleni amatyala angenakuthanani neshishini nokuhlawulela iindleko zokuphila ubomi obutofotofo ngokugqithiseleyo. Lo mbandela awuzange uconjululwe ngendlela awayelindele ngayo uPedro kwanasemva konyaka esiya kuye kwaye embhalela iileta. Ngenxa yokunxunguphala, uPedro waya kwabasemagunyeni waza wabangela ukuba uCarlos—umhlobo nomzalwana wakhe ongumKristu—aphoswe entolongweni.b Ngaba eli yayilikhondo elalifanele lithatyathwe? Siza kubona.

Ukungavisisani nokungaqondani ngokuphathelele iimali-mboleko kungunobangela oqhelekileyo wokonakaliswa kobuhlobo babantu ehlabathini jikelele. Maxa wambi kusenokude kube ngunobangela wokungavisisani phakathi kwamaKristu akhonza kunye. Kumazwe amaninzi kunzima ukufumana iimali-mboleko ezibhankini, ngoko kuqhelekile ngabantu ukuba baxakekele kubahlobo nakwizalamane zabo. Noko ke, amava abuhlungu kaPedro noCarlos abonisa ukuba ngaphandle kokuba lowo ubolekayo nalowo ubolekisayo bayilandela ngenyameko imigaqo yeBhayibhile, kunokuvela iingxaki ezinzulu. Ngoko, yiyiphi indlela efanelekileyo yokusingatha isicelo somKristu okhonza kunye naye sokuba umboleke imali?

Ukubala Iindleko Zokuboleka

IBhayibhile ayikukhuthazi ukuboleka okungeyomfuneko. Umpostile uPawulos uyala ngolu hlobo: “Musani ukuba natyala lanto mntwini, lingelilo elokuthandana.” (Roma 13:8) Ngoko ngaphambi kokuba ungene etyaleni, bala iindleko zokwenjenjalo. (Thelekisa uLuka 14:28.) Ngaba ikho ngokwenene imfuneko yokuboleka imali? Ngaba kungumbandela wokulondoloza ukuphila kwakho khon’ ukuze unyamekele intsapho yakho? (1 Timoti 5:8) Okanye ngaba kubandakanyeke umlinganiselo wokubawa—mhlawumbi umnqweno wokuphila tofotofo ngakumbi?—1 Timoti 6:9, 10.

Enye inkalo ephawulekayo kukuba akungethi na ukuzifaka etyaleni kukunyanzelele ukuba usebenze iiyure ezininzi okanye mhlawumbi uzityeshele iintlanganiso nenkonzo yasentsimini. Kwakhona, ngaba ngokwenene unako ukumelana nokubek’ esichengeni imali yomnye umntu? Kuthekani ukuba ishishini okanye elo phulo uliqalisayo liyasilela? Khumbula ukuba “uyaboleka ongendawo, angabuyisi.”—INdumiso 37:21.

‘Ukuthetha Inyaniso’ Kubabolekisi

Emva kokuqwalasela iinkalo ezinjalo, usenokuvakalelwa kukuba kuyimfuneko ukuboleka imali ukuze uqhube ishishini. Ukuba akukwazi ukuyifumana ngeendlela zehlabathi zokubolekisa imali, akunto iphosakeleyo ukuya kumKristu okhonza kunye naye, kuba kuyinto eqhelekileyo ukuxakekela kubahlobo, njengokuba uYesu watshoyo kuLuka 11:5. Sekunjalo ubani ufanele aqinisekise ukuba ‘uthetha inyaniso.’ (Efese 4:25) Zichaze ngokunyanisekileyo zonke iinkcukacha ezibandakanyekileyo—kuquka iingozi, kwanezo zisenokubonakala zincinane kakhulu. Yaye musa ukucaphuka ukuba lowo ulindele ukuba akuboleke imali ukubuza imibuzo emininzi engqalileyo khon’ ukuze aqiniseke ukuba unombono ochanileyo.c

Ngaba bekuya kuba kukuthetha inyaniso ukuboleka imali ngenxa yesinye isizathu uze uyisebenzisele esinye? Nakanye. Umphathi webhanki waseMbindi Merika uchaza oku: “Ibhanki iya kuyithabatha yonke imali onayo ebhankini, yaye ukuba akulihlawuli ngokukhawuleza ityala lakho, baya kufumana umyalelo wenkundla wokuba bathimbe izinto onazo.” Ukuba ubolekwe imali phantsi kwesivumelwano sokuba uya kuyisebenzisela ukwandisa ingeniso yeshishini, ukuyisebenzisela enye injongo ngokungathi kunjalo kubangela ukuba lowo ukubolekayo angaqiniseki enoba imali akuboleke yona uya kuyibuyiselwa kusini na. Liyinyaniso elokuba, usenokungoyiki izohlwayo ezingokwasemthethweni xa uboleka imali kumKristu okhonza kunye naye. Sekunjalo, ‘obolekayo ungumkhonzi endodeni embolekayo,’ yaye unembopheleleko yokunyaniseka kuyo.—IMizekeliso 22:7.

Ukusebenzisa UMthetho Omkhulu Kushishino

UYesu wathi: “Zonke izinto ngoko enisukuba ninga bangazenza abantu kuni, yenzani ezikwanjalo nani kubo.” (Mateyu 7:12) Hayi indlela ekubaluleke ngayo ukuba siwusebenzise lo mthetho xa siqhuba ishishini nekholwa esikhonza kunye nalo! Ngokomzekelo, uya kusabela njani ukuba umzalwana akasamkelanga isicelo sakho sokuboleka imali? Ngaba uya kuvakalelwa kukuba ubuphelisile ubuhlobo kunye nawe? Okanye ngaba uya kulihlonela ilungelo lakhe lokungavumi, uqonda ukuba usenokuba yena uyifuna ngamandla imali okanye usenokuba yena uyibona ingozi inzulu kunokuba wena uyibona? Usenokuba ngokunyanisekileyo uyakuthandabuza ukukwazi kwakho ukuyiphatha kakuhle imali. Kwimeko enjalo, ukwala kwakhe ngokufanelekileyo kunokuba luncedo nokubonakalisa uthando.—IMizekeliso 27:6.

Ukuba umhlobo uyavuma ukukuboleka imali, iinkcukacha zifanele zibhalwe ngokucacileyo, kuquka isixa-mali esibolekiweyo, injongo imali eya kusetyenziselwa yona, izinto onazo ezinokuthengiswa khon’ ukuze kubuyiswe loo mali ibolekiweyo xa ungenako ukuyibuyisa nendlela nexesha eya kubuyiswa ngalo. Kwezinye iimeko kukwabubulumko ukuba nesivumelwano esibhalwe okanye esihlolwe ligqwetha saza sagcinwa ngabasemagunyeni. Enoba nenza yiphi na into, sakuba nje isivumelwano sityotyelwe, “ilizwi lenu ke malibe nguewe, ewe; nguhayi, hayi.” (Mateyu 5:37) Musa ukuthi ngenxa yokulunga komzalwana wakho ungayithabathi nzulu imbopheleleko yakho kuye ngendlela obuya kwenza ngayo ebhankini.

Ababolekisi Abalumkileyo

Kuthekani ukuba uthile uza kuwe ngelithi mboleke imali? Okuninzi kuya kuxhomekeka kwiimeko ezibandakanyekileyo. Ngokomzekelo, umzalwana ongumKristu unokungena engxakini engokwemali, kungekhona ngenxa yemeko ayibangele ngokwakhe. Ukuba unayo indlela yokwenjenjalo, uthando lobuKristu luya kukushukumisela ukuba ‘umnike izinto eziwufaneleyo umzimba wakhe.’—Yakobi 2:15, 16.

Hayi indlela ebekuya kuba kukungabi naluthando ngayo ukwenza inzuzo ngokuxakeka komzalwana ngokubiza inzala kwimeko enjalo! UYesu wabongoza esithi: “Qhubekani nizithanda iintshaba zenu, nisenza okulungileyo yaye nibolekisa ngaphandle kwenzala, ningathembe mbuyekezo.”—Luka 6:35, NW; thelekisa iLevitikus 25:35-38.

Noko ke, kuthekani ukuba ucelwa nje ukuba uxhase ngokwemali ishishini elithile okanye umele ubani kwimali-mboleko ayenzileyo? Ngokuqhelekileyo, ubukhulu becala imibandela enjalo ijongwa njengendlela yokuzuza ingeniso. IBhayibhile ngokucacileyo isibongoza ukuba silumke isithi: “Musa ukuba phakathi kwababambana nomnye ngesandla, phakathi kwabamela into ebolekiweyo.”—IMizekeliso 22:26.

Ukuba kunjalo, kuqala ufanele ugqibe enoba ngokwenene ungakwazi ukumelana nendlela yokuzuza ingeniso. Ngaba iya kukuzisela ingxaki ngokwasezimalini ukuba ishishini aliphumeleli okanye ukuba ombolekileyo akakwazi ukuyibuyisa kwangexesha imali ayibolekileyo? Ukuba uyakwazi ukubolekisa ngemali kuze kwenziwe iingeniso ngayo, nawe unelungelo lokufumana kuyo ngokubiza inzala esengqiqweni ngemali obolekise ngayo. (Thelekisa uLuka 19:22, 23.) IMizekeliso 14:15 ilumkisa ngelithi: “Isinyabi sikholwa ngamazwi onke; onobuqili uyakuqonda ukunyathela kwakhe.” Bambi oosomashishini abanobuqili ngokuqhelekileyo baye benza ngokungakhathali xa beqhuba ishishini kunye namaKristu abakhonza kunye nawo. Umtsalane wemali enenzala ephakamileyo uye wabatsalela abanye ekuqaliseni indlela yokuzuza ingeniso engacingisiswanga kakuhle abathe kuyo baphulukana kokubini nemali nobuhlobo babo kunye namaKristu abakhonza kunye nawo.

Okubangel’ umdla kukuba ngokufuthi abaphathi beebhanki baqwalasela iinkalo ezintathu ukuze babone ubungakanani bengozi enokubangelwa kukuboleka imali: (1) uhlobo lomntu alulo lowo uboleka imali, (2) amathuba okukwazi kwakhe ukubuyisa imali (3) neemeko eziqhelekileyo kuhlobo lweshishini lakhe. Ngaba akuyi kubonakalisa “ubulumko obusebenzisekayo” ukuhlolisisa imibandela ngendlela efanayo xa ucinga ngokuboleka uthile imali yakho oyisebenzele nzima?—IMizekeliso 3:21, NW.

Ngokomzekelo, waziwa enjani lo mzalwana uboleka imali? Ngaba waziwa njengothembekileyo okanye njengongakhathaliyo nongazinzanga? (Thelekisa eyoku-1 kuTimoti 3:7.) Ukuba ufuna ukwandisa ishishini lakhe, ngaba ukwazile ukuliqhuba ngokunempumelelo ukuza kufikelela kweli nqanaba? (Luka 16:10) Ukuba akunjalo, uncedo olusebenzisekayo lokuphatha imali yakhe lunokuba lunokumnceda ngakumbi kwixesha elizayo kunokumboleka imali asenokuyiphatha kakubi.

Enye inkalo ibiya kuba ngamathuba okukwazi kwaloo mzalwana ukubuyisa imali. Ingakanani ingeniso yakhe? Ngawaphi amatyala anawo? Kusengqiqweni ukuba athethe kuwe ngokuphandle. Sekunjalo, kufanele kubonakaliswe uthando lobuKristu. Ngokomzekelo, usenokufuna ukuqiniseka ukuba imali obolekise ngayo iya kubuyiswa ngezinto ezinokuthengiseka zalo mzalwana. UMthetho kaMoses wawungakuvumeli ukuthimba enoba zizinto umntu aphila ngazo okanye anazo ngokusisiseko khon’ ukuze zimele imali ayibolekayo. (Duteromoni 24:6, 10-12) Ngaloo ndlela, umzalwana waseMzantsi Merika ongusomashishini uthi uya kuboleka umzalwana kuphela isixa-mali esifikelela kwisiqingatha sezinto ezinokuthengiswa anazo loo mzalwana. Ucacisa esithi: “Yaye andizigqali izixhobo zeshishini lakhe okanye indlu yakhe njengezinto ezinokuthengiswa ukuze kuhlawulwe ityala lakhe. Ngokuqinisekileyo andingethandi ukumkhuphela ngaphandle kwekhaya lakhe umzalwana wam ndize ndithimbe indlu yakhe khon’ ukuze ndibuyiselwe imali yam.”

Okokugqibela, ufanele uziqwalasele ngokunyanisekileyo iimeko eziqhelekileyo zoshishino kwindawo ohlala kuyo. Siphila ‘kwimihla yokugqibela’ ekuthi ebudeni bayo abantu babe ‘ngabathandi bemali, bengabancethezi.’ (2 Timoti 3:1-4) Ngoxa umhlobo nomzalwana wakho esenokuba unyanisekile, amaqabane, abaqeshwa bakhe nabathengi basenokungabi njalo. NjengomKristu, akanakubhenela ekunyobeni nasekuxokeni—ndlela ezo abasenokuzisebenzisa abo bakhuphisana naye khon’ ukuze bafumane inzuzo. Kwakhona okufanele kuqwalaselwe ngumonakalo obangelwa ‘lixesha nasisihlo esingabonwa kwangaphambili.’ (INtshumayeli 9:11, NW) Ixabiso lezinto ezithengiswayo linokuhla ngokukhawuleza. Ukunyuka kwamaxabiso ezinto okungalawulekiyo kunokulonakalisa ishishini okanye kuliphelise ixabiso lemali obolekise ngayo. Kwakhona ubusela, iingozi, ukonakalisa ngenkohlakalo nokwenzakala zizinto ezingathandekiyo ezikhoyo kushishino. Ufanele uziqwalasele zonke ezi nkalo xa usenza isigqibo.

Ukungaphumeleli

Maxa wambi, phezu kwawo onke amanyathelo obulumko, umKristu akakwazi ngokupheleleyo ukuyibuyisa imali ayibolekileyo. UMthetho Omkhulu ufanele umshukumisele ukuba anxibelelane rhoqo nalowo umboleke imali. Mhlawumbi usenokukwazi ukuhlawula imali encinane kuphela ngexesha. Sekunjalo, umKristu akafanele avakalelwe kukuba iintlawulo ezincinane ziyamthethelela ukuba angazincami ngokunyanisekileyo ekuzalisekiseni iimbopheleleko zakhe. (INdumiso 15:4) Kwakhona umKristu obolekise ngemali ufanele abonakalise uthando. Ukuba uvakalelwa kukuba uyaqhathwa, usenokusebenzisa isiluleko esikuMateyu 18:15-17.

Ukubandakanya amagunya ehlabathi, njengokuba wenzayo uPedro kwimeko ekhankanywe ekuqaleni, akufane kucebiseke. Umpostile uPawulos uthi: “Kukho na umntu kuni, enendawo ngakomnye, onobuganga bokummangalela phambi kwabangemalungisa, angammangaleli phambi kwabangcwele? . . . Kude akwabakho noko sisinye na isilumko phakathi kwenu, esingaba nako ukulamla phakathi kwabo abazalwana? Usuka umzalwana amangalelane nomzalwana, athi noku akwenze phambi kwabangakholiweyo. Seninciphile ke kanye ngokokuthi nimangalelane. Yini na ukuba ningathi kanye nivume ukoniwa? Yini na ukuba ningathi kanye nivume ukulunyukiswa?”—1 Korinte 6:1-7.

Kusenokubakho iimeko ezithile—njengaxa kubandakanyeke amaqabane angakholwayo, abarhwebi behlabathi okanye imicimbi yeinshorensi—ezenza kubonakale kuyimfuneko ukuconjululwa kombandela enkundleni yamatyala okanye ngamagosa aseburhulumenteni. Kodwa kwiimeko ezininzi, umKristu uya kukhetha ukulahlekelwa ngokwasemalini kunokuba alichanabe ibandla kwihlazo elinokubakho ngokusiwa komzalwana enkundleni ngenxa yemali ayibolekileyo angakwaziyo ukuyihlawula.

Kwiimeko ezininzi imiphumo emibi ngolo hlobo inokuphetshwa. Njani? Ngaphambi kokubolekisa okanye kokuboleka imali kumzalwana, zazi iingozi ezibandakanyekileyo. Yiba nenyameko nobulumko. Ngaphezu kwako konke, “zonke izinto zenu,” kuquka imicimbi yoshishino, “mazenziwe ninothando.”—1 Korinte 16:14.

[Imibhalo esemazantsi]