Ngaba Unokuba Nalo Ithemba Lokuphila Ngonaphakade?

UGQR. James R. Smith, unjingalwazi webhayoloji yeeseli uthi: “Kukho into eqhubekayo emzimbeni womntu emisela ubude beminyaka eli-115 ukusa kweli-120 ekunokwenzeka ukuba umntu ayiphile. Kukho umda—kodwa asiyazi into ewumiselayo.” Isazi sebhayoloji uGqr. Roger Gosden uthi ngenxa yoku, akumangalisi ke ngoko ukuba “izazinzulu kusafuneka zifumane indlela yokwandisa ubomi bomntu, yaye zimbalwa ezikucingayo oku.” Ngaba oku sele kuza kuguquka?

Ukujamelana “Nowona Mbuzo Ubaluleke Kakhulu”

Nangona ininzi gqitha into ethethwayo ngokunyanga ukwaluphala, inkoliso yeengcali ivumelana noGqr. Gene D. Cohen, umongameli weGerontological Society of America, ukuba “yonke le mizamo ibonakala ililize.” Ngoba? Kuba okokuqala, umbhali wenzululwazi uNancy Shute, uthi kwiU.S.News & World Report, “akakho umntu osele esazi unobangela wokwaluphala nomphumo wako ongenakuphepheka, ukufa. Yaye ukunikela unyango lwesigulo xa ungawazi unobangela waso kukungalungelelani ngeyona ndlela.” UGqr. Gosden naye uthi ukwaluphala kuseyinto entsonkothileyo: “Kuyabonakala kuthi ngabanye kodwa owona nobangela wako useyinto engaqondakaliyo.” Uthi “owona mbuzo ubalulekileyo wokuba kutheni abantu besaluphala” awunikelwa ngqalelo ingako.a

Kuyabonakala ukuba, ekubeni umntu engenakubaleka ngaphezu kwesantya esithile, engenakutsiba ngaphezu kobude obuthile, engenakuntywila ngaphezu kobunzulu obuthile, kukwakho nezinto umntu angenakukwazi ukuzicacisa ngokuzicingela nokuziqiqela ngokwakhe. Yaye ekuphenduleni “owona mbuzo ubaluleke ngokwenene wokuba kutheni” kuyabonakala ukuba lo mbuzo ungaphaya kwamandla ethu. Ngoko ke, ekuphela kwendlela enokufunyanwa ngayo impendulo kukuphethukela kumthombo ongaphezu kwemida yolwazi lomntu xa engancediswanga. Yiloo nto kanye incwadi yamandulo yobulumko, iBhayibhile, ecebisa ukuba uyenze. Ithetha ngoMdali, “ithende lobomi,” iBhayibhile iyasiqinisekisa isithi: “Ukuba nithe namquqela, nomfumana.” (INdumiso 36:9; 2 Kronike 15:2) Ngoko ke, iLizwi likaThixo, iBhayibhile, lityhila ntoni ngesona sizathu sokuba umntu afe?

Oyena Nobangela Wokufa

IBhayibhile isixelela ukuba xa uThixo wadala abantu bokuqala, ‘kwanephakade walinikela ezintliziyweni zabo.’ (INtshumayeli 3:11) Noko ke, uMdali wanika abazali bokuqala babantu okungakumbi kunomnqweno wokuphila ngonaphakade; wabanika kwanethuba lokuba benjenjalo. Badalwa baba nemizimba neengqondo ezifezekileyo, yaye babekunandipha ukuphila kwimeko-bume enoxolo. UMdali wayenenjongo yokuba aba bantu bokuqala baphile ngonaphakade yaye ekuhambeni kwexesha umhlaba uzale yinzala yabo efezekileyo.—Genesis 1:28; 2:15.

Noko ke, ubomi ngaphandle kokufa babuxhomekeke kokuthile. Babuxhomekeke ekuthobeleni uThixo. Ukuba uAdam wayengamthobeli uThixo, wayeya “kufa.” (Genesis 2:16, 17) Okubuhlungu kukuba, abantu bokuqala abazange bathobele. (Genesis 3:1-6) Ngokwenjenjalo, baba ngaboni, kuba ‘isono kukuchas’ umthetho.’ (1 Yohane 3:4) Ngenxa yoko, babengasenalo ithemba lokuphila ngonaphakade, kuba “umvuzo isono esiwuhlawulayo kukufa.” (Roma 6:23) Ngoko ke, xa ebagweba abantu bokuqala, uThixo wathi: “Ngokuba uluthuli, uya kubuyela kwaseluthulini.”—Genesis 3:19.

Ngaloo ndlela, emva kokuba abantu bokuqala bonayo, umphumo owawuxelwe kwangaphambili wesono wahlala kumzila wabo wemfuza, baza ubomi babo bamiselwa umda. Ngenxa yoko, baluphala, baza bafa. Ukongezelela koko, emva kokugxothwa kwabo kwikhaya labo lokuqala eliyiParadesi, elalibizwa ngokuba yiEden, abantu bokuqala bajamelana nomnye uthunywashe olutshaba kubomi babo—imeko-bume engumqobo ngaphandle kwe-Eden. (Genesis 3:16-19, 23, 24) Ufuzo lwabo olunesiphako nemeko-bume enzima yachaphazela abantu bokuqala nenzala yabo yexesha elizayo.

Isigwebo Nesithembiso

Ekubeni olu tshintsho luyingozi ebomini babo lwenzeka ngaphambi kokuba abantu bokuqala babe nabantwana, babenokuvelisa kuphela inzala efana nabo—engafezekanga, enesono neyaluphalayo. IBhayibhile ithi: “Ukufa kwasasazeka kubo bonke abantu ngenxa yokuba bonke bonayo.” (Roma 5:12; thelekisa INdumiso 51:5.) Incwadi ethi The Body Machine—Your Health in Perspective ithi: “Siphethe iziqinisekiso zokufa ezibhalwe kwiiseli zethu.”

Noko ke, oku akuthethi ukuba akukho themba ngobomi ebungenasiphelo—ubomi ngaphandle kokwaluphala nokufa. Okokuqala, kusengqiqweni ukukholelwa ukuba uMdali onobulumko wobomi bomntu nezinye izinto eziphilayo ngokwahlukahlukana kwazo okumangalisayo unokuphilisa nakuphi na ukungafezeki kwemizila yemfuza aze anikele amandla afunekayo ukuze ubomi bomntu buqhubeke ngonaphakade. Okwesibini, oku koko kanye uMdali athembise ukuba uza kukwenza. Emva kokuwisa isigwebo sokufa kubantu bokuqala, injongo kaThixo ngabantu awayityhila kangangezihlandlo eziliqela ukuba baphile ngonaphakade emhlabeni ayikaguquki. Ngokomzekelo, uyasiqinisekisa esithi: “Amalungisa aya kulidla ilifa ilizwe, ahlale kulo ngonaphakade.” (INdumiso 37:29) Umele wenze ntoni ukuze ukubone ukuzaliseka kwesi sithembiso?

Indlela Yokwandisa Ubomi Bakho—Ngonaphakade

Okubangela umdla kukuba, emva kokuba umbhali wenzululwazi uRonald Kotulak enze udliwano-ndlebe nabaphengululi bezonyango abangaphezu kwama-300, wathi: “Izazinzulu kudala zisazi ukuba umvuzo, umsebenzi nemfundo zezona zinto zixela kusengaphambili impilo yabantu nobude bexesha abaya kuliphila. . . . Kodwa yimfundo evela njengeyona nto ephambili ebuxela kusengaphambili ubude bobomi.” Wacacisa esithi: “Kwanjengokuba ukutya esikutyayo kunika inkqubo yethu yokuzikhusela kwizifo amandla okulwa neentsholongwane ezasulelayo, imfundo isikhusela ekwenzeni ukhetho olubi.” Njengokuba omnye umphengululi watshoyo, “ngemfundo ufunda indlela onokuphumelela ngayo ehlabathini” nendlela “yokoyisa izinto ezisenokuba yimiqobo.” Ngenxa yoko, ngandlel’ ithile, imfundo, njengokuba umbhali uKotulak esitsho, “yimfihlelo yobomi obusempilweni nobude.”

Inyathelo lokuqala ekufumaneni ubomi obungunaphakade kwixesha elizayo ikwayimfundo—imfundo yeBhayibhile. UYesu Kristu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumeleyo, uYesu Kristu.” (Yohane 17:3) Ukungenisa ulwazi ngoYehova uThixo, uMdali, ngoYesu Kristu, kwanangelungiselelo lentlawulelo uThixo asenzele lona kuphela kohlobo lwemfundo oluya kulungiselela umntu ukuba athabathe inyathelo lokuqala kwindlela yobomi obungunaphakade.—Mateyu 20:28; Yohane 3:16.

AmaNgqina kaYehova anenkqubo yemfundo yeBhayibhile enokukunceda ufumane olu lwazi lweBhayibhile olunik’ ubomi. Tyelela enye yeeHolo zoBukumkani zawo ukuze ufumanise ngakumbi ngale nkqubo yesisa, okanye wacele akutyelele ngexesha elikulungeleyo. Uya kubona ukuba iBhayibhile iqulethe ubungqina obaneleyo bokuba ixesha likufuphi xa ubomi bungasayi kuphazanyiswa yimiqobo okanye sisiphelo. Enyanisweni, ukufa bekusoloko kulawula kangangamawaka eminyaka, kodwa kungekudala kuya koyiswa ngonaphakade. Hayi indlela elivuyisa ngayo elo themba ngokufanayo kubantu abakhulileyo nabaselula!

[Umbhalo osemazantsi]

[Imifanekiso ekwiphepha 13]

Inyathelo lokuqala lokufumana ubomi obungunaphakade yimfundo yeBhayibhile