Ungazikhethela Ikamva Lakho
UMEMBI wezinto zakudala uJoan Oates uthi, ngoxa ukuvumisa kwakujongwa “njengeyona nto iphucukileyo kwihlabathi lamandulo, kwakububuchule obeza nabaprofeti abangamaHebhere.” Ngoba?
Nangona ayengqongwe ziintshaba ezazikholelwa ekumiselweni kwezinto kusengaphambili, amaSirayeli amandulo ayikhaba ngawo omane ingcamango yokuba ngokumfamekileyo kukho amandla amisela izinto kusengaphambili. Kwimiyalelo awayinika olo hlanga, uThixo wathi: “Maze kungafunyanwa namnye kuwe . . . ovumisayo, nolitola, nohlaba izihlabo, nokhafulayo, . . . nosiyazi.”—Duteronomi 18:10, 11.
Ngaphandle kwelishwa okanye ukusetyenziswa kwabaxeli-thamsanqa, amaSirayeli ayenentembelo kwikamva. Xa yayichaza isizathu saloo nto, intyilalwazi yamaKatolika yesiFrentshi iThéo ithi olu hlanga lwalukholelwa ekubeni “abantu nehlabathi babengengomaxhoba amandla athile amfamekileyo. UThixo wayenenjongo ngoluntu.” Yayiyintoni loo njongo?
Ukumiselwa Kwezinto Kusengaphambili Nelungelo Lokuzikhethela
UThixo wathembisa ukuba amaSirayeli ayeya kufumana uxolo nonqabiseko xa ethobela imithetho yakhe. (Levitikus 26:3-6) Ukongezelela, ayekhangele kuMesiya owayeya kuzisa ubulungisa emhlabeni. (Isaya, isahluko 11) Noko ke, isibakala sokuba uThixo enze esi sithembiso asithethi ukuba abantu bamele bangakhathali baze bavumele izinto zenzeke ngamabona-ndenzile. Ngokwahlukileyo, baxelelwa oku: “Yonke into esiyifumanayo isandla sakho ukuba siyenze, yenze ngamandla akho.”—INtshumayeli 9:10.
Enye into ekwathethwa ngayo yinkululeko yokuzikhethela. AmaSirayeli ayekhululekile ukuba akhonze uThixo aze azilungiselele ikamva lawo. UThixo wathi xa wayewathembisa: “Kothi, ukuba nithe nayiphulaphula ngenyameko imithetho yam endiniwiselayo namhla, yokuba nimthande uYehova uThixo wenu, nimkhonze ngentliziyo yenu yonke, nangomphefumlo wenu wonke; ndininike imvula yelizwe lenu ngexesha layo, ethambisayo nevuthisayo, uhlanganise ingqolowa yakho, newayini yakho entsha, neoli yakho.” (Duteronomi 11:13, 14) UThixo wayewasikelela amaSirayeli xa ethobela.
Ngaphambi nje kokuba lungene kwilizwe awayethembise ukulunika lona, uThixo walukhethisa uhlanga lwakwaSirayeli: “Khangela, ndibeke phambi kwakho namhla ubomi nokulunga, ukufa nobubi.” (Duteronomi 30:15) Ikamva lomntu ngamnye lalixhomekeke kwizenzo nezigqibo azenzayo. Ukukhonza uThixo kwakuya kubanika ubomi neentsikelelo, ngoxa ukwala ukwenjenjalo kwakuya kubazisela iinzima. Kodwa kuthekani namhlanje?
Yonke Into Eyenziwayo Inomphumo
Sibotshelelwa yimithetho yendalo eliqela eyenzelwe ukusinceda. Omnye wale mithetho ngowokuba yonke into eyenziwayo inomphumo okanye, njengokuba iBhayibhile icacisa, “Nantoni na umntu ayihlwayelayo, uya kuvuna kwayona.” (Galati 6:7) Sithi sakuwuqonda lo mgaqo, sibone ukuba zinako ukwenzeka kusini na ezinye iziganeko kwikamva.
Ukuba siqhuba ngesantya esiphakamileyo nangokungakhathali, sisenokwenzakala kunaxa siqhuba ngenyameko. Ukuba siyatshaya, maninzi amathuba okuba sibe nomhlaza kunaxa singatshayi. Kuyavunywa ukuba, iziganeko ezifana nokuhlasela kwabanqolobi okuchazwe kwinqaku lokuqala kolu ngcelele zisenokubonakala zingenakusehlela ibe ukucinga ngokuba ziya kwenzeka kusenokungabi yomfuneko. Noko ke, akukho apho siya khona ukuba siza kubhenela kwilishwa. Alisikhanyiseli ngento eyenzeka ngoku okanye esaya kwenzeka kwikamva. Ukukholelwa ubuxoki akunasiqinisekiso sekamva. Kunjalo ke nangokukholelwa ukuba uThixo ulawula ukwenzeka kwaso nasiphi na isiganeko.
Liya Kuba Njani Ikamva Lakho?
Ikamva lethu alibhalwanga phantsi kusengaphambili kodwa lixhomekeka kwizinto esizenza ngoku. Nangona ubomi busisipho esivela kuThixo, iBhayibhile ikubeka kucace ukuba sinendima ebalulekileyo ekugqibeni ngezinto esizenza ngoku nesisaya kuzenza kwikamva. Isibakala sokuba sinokhetho lokuvuyisa uThixo okanye lokumenza buhlungu, sibonisa ukuba uThixo usinike umlinganiselo othile wokulawula ubomi bethu.—Genesis 6:6; INdumiso 78:40; IMizekeliso 27:11.
Ukongezelela, iZibhalo Ezingcwele zikubethelela ngokuphindaphindiweyo ukuba ikamva lethu linento yokwenza nokunyamezela kwethu nendlela esiphila ngayo, zinto ezo ebezingayi kusebenza ukuba ikamva lethu beselimiselwe ngaphambili. (Mateyu 24:13; Luka 10:25-28) Ukuba, ngoko, sikhetha ukuthobela size sithembeke kuThixo, sinokulindela ikamva elinjani?
IBhayibhile ityhila ukuba uluntu lunekamva eliqaqambe gqitha. Umhlaba uya kuguqulwa ube yiparadesi kuze kwesamele uxolo nonqabiseko. (INdumiso 37:9-11; 46:8, 9) Elo kamva liqinisekisiwe ngenxa yokuba uMdali ongusomandla uya kuwazalisekisa amadinga akhe. (Isaya 55:11) Kodwa ukusikelelwa kwethu ngobomi eParadesi akuxhomekekanga kwilishwa; kodwa kuxhomekeke ekubeni ngokuthobeka senze ukuthanda kukaThixo ngoku. (2 Tesalonika 1:6-8; ISityhilelo 7:14, 15) UThixo usinike ilungelo lokuzikhethela ibe usikhuthaza esithi: “Nyula ke ubomi, ukuze uphile.” (Duteronomi 30:19) Uya kukhetha ntoni ke wena? Kunokuba ikamva lakho lilawulwe lilishwa, lixhomekeke kuwe.
[Imifanekiso ekwiphepha 28]
UThixo ulubekele ikamva elimangalisayo uluntu oluthobelayo