Ngaba Ikamva Lakho Limiselwe Kwangaphambili?

UKUBA ubusinde kwingozi enkulu, ngaba ubuya kuvakalelwa kukuba usinde ngenxa yokuba ixesha lakho lokufa belingekafiki? Okanye kunoko ngaba ubuya kuba nombulelo ngenxa yokuba kwenzekile ukuba ube kwindawo elungileyo ngexesha elifanelekileyo?

Indoda esisilumko uSolomon yathi: “Ndabuya ndabona phantsi kwelanga, ukuba ukugidima asikokwabanamendu, imfazwe asiyoyamagorha; kananjalo isonka asisesezilumko; kananjalo ubutyebi asibobanengqiqo; kananjalo ubabalo asilolwabanokwazi; ngokuba bonke bephela bafikelwa lixesha nasisihlo [esingabonwa kwangaphambili, NW].” (INtshumayeli 9:11) Hayi indlela ezenzeka ngokufuthi ngayo izinto ezingalindelekanga! Imbaleki ebekulindeleke ukuba iza kuphumelela iyenzakala, ize leyo ibingajongelwanga ntweni iphumelele. Imeko eguquguqukayo nengalindelekanga ibangela ukuba usomashishini onyanisekileyo abhange, ivumela ukuba lowo unganyanisekanga ukhuphisana naye abe sisityebi. Kodwa ngaba uSolomon wakujonga oku kungalungelelani njengelishwa? Nakanye. Le yimiphumo nje ‘yexesha nesihlo esingabonwa kwangaphambili.’

UYesu Kristu wathetha into efanayo. Ebhekisela kwisiganeko ekubonakala ukuba abo babemphulaphule babesazi, uYesu wabuza oku: “Hi, bona abo balishumi elinesibhozo, bawelwa yinqaba eseSilowa, yababulala; niba na babenetyala ngaphezu kwabo bonke abantu abemiyo eYerusalem?” (Luka 13:4) UYesu akazange athi oku kufa kwabantu kwakubangelwa lilishwa elithile elingenakuqondwa okanye kukuthanda kukaThixo, ibe akazange akholelwe ukuba ngandlel’ ithile loo maxhoba ayebekek’ ityala ngaphezu kwabanye. Loo ngozi imanyumnyezi yayingomnye nje umzekelo wokusebenza kwexesha nesihlo esingaziwa kwangaphambili.

Akukho apho iBhayibhile iyixhasa khona ingcamango yokuba uThixo ulimisele kwangaphambili ixesha lokufa kwethu. Liyinyaniso elokuba iNtshumayeli 3:1, 2 ithi: “Into yonke inexesha elimisiweyo, nomcimbi wonke unexesha lawo phantsi kwezulu, ukuzala kunexesha lako, ukufa kunexesha lako; ukutyala kunexesha lako, ukunyothula okutyelweyo kunexesha lako.” Kanti uSolomon wayechaza nje umjikelo oqhubekayo wobomi nokufa okuthwaxa uluntu olungafezekanga. Siyazalwa, yaye xa ixesha lifika, xa sifikelele kubudala obulindelekileyo ebomini—ngokufuthi emva kweminyaka engama-70 okanye engama-80 okanye ngaphezulu—siyafa. Sekunjalo, elona xesha lichanileyo lokufa alimiselwanga kwangaphambili nguThixo kanye njengoko kunjalo ngexesha umlimi agqiba kwelokuba ‘atyale’ ngalo okanye ‘anyothule okutyaliweyo.’

Enyanisweni, kamva uSolomon ubonisa ukuba umntu usenokufa ngaphambi kwexesha, esithi: “Musa ukuba ngongendawo ngokukhulu, ungazenzi isidenge; yini na ukuba ufe lingekabi lixesha lakho?” (INtshumayeli 7:17) Esi siluleko besiya kuba sengqiqweni njani ukuba ixesha lokufa kukabani belimiselwe kwangaphambili ngokungenakuguqulwa? Ngaloo ndlela iBhayibhile iyayichasa ingcamango yelishwa. UThixo wawagxeka kanobom amaSirayeli awexukileyo awathi amkela le ngcamango yobuhedeni. UIsaya 65:11 uthi: “Ke nina nimshiyileyo uYehova, niyilibeleyo intaba yam engcwele, nimlungiselayo uThamsanqa isithebe, nimzaliselayo uSihlo iwayini ephithikeziweyo.”

Ngoko, hayi indlela ekububudenge ngayo ukuthi iingozi okanye izinto ezimbi ezenzekayo zibangelwa lilishwa okanye, okubi ngakumbi, ukuthi zibangelwa nguThixo ngokwakhe! IBhayibhile ithi, “uThixo uluthando,” yaye ukumtyhola ngokuthi ungumthombo weenkxwaleko zoluntu kuphikisana ngokungqalileyo nale nyaniso isisiseko.—1 Yohane 4:8.

Injongo KaThixo Ngekamva

Noko ke, kuthekani ngamathemba ethu okusindiswa? Ngaba inyaniso yokuba ubomi bethu abulawulwa lilishwa elingenakuphepheka ithetha ukuba simele siphile nje ubomi obungenanjongo? Akunjalo konke konke, kuba uThixo uye walungiselela abantu bonke. IBhayibhile ithetha ngokudalwa ‘komhlaba omtsha apho kumi ubulungisa.’—2 Petros 3:13.

Ukuze akufeze oku, uThixo uya kungenelela ngokungqalileyo kwimicimbi yoluntu. Ungazi, usenokuba uye wakuthandazela oku ukuba kwenzeke ngokucengceleza umthandazo othi: “Mabufike ubukumkani bakho, makwenziwe ukuthanda kwakho nasemhlabeni, njengokuba kusenziwa emazulwini.” (Mateyu 6:10) Obu Bukumkani bungurhulumente wokwenene omiselwe emazulwini. Ngokubuthandazela ukuba bufike, uthandazela ukuba obo Bukumkani buluthabathe ulawulo lomhlaba koorhulumente banamhlanje.—Daniyeli 2:44.

Ukuqinisekisa Elakho Ikamva

Indlela ezi ziganeko ziphawulekayo eziya kulichaphazela ngayo ikamva lakho ayixhomekekanga kwilishwa okanye kwanakwixesha nesihlo esingabonwa kwangaphambili, kodwa ixhomekeke kwikhondo okhetha ukulilandela. Khumbula intlekele yenqaba yaseSilowa. UYesu wasebenzisa eso siganeko sasilusizi ukuze afundise isifundo esinzulu. Amaxhoba awa naloo nqaba awazange abe nako ukukuphepha okwawehlelayo. Kwelinye icala, abaphulaphuli bakaYesu babenokuyiphepha intshabalalo eyayibangelwa kukungamkholisi uThixo. UYesu wabalumkisa esithi: “Nothi, xa sukuba ningaguquki, nitshabalale kwangokunjalo nonke.” (Luka 13:4, 5) Ngokucacileyo, babenokuzikhethela ikamva labo.

Nathi sinikwe ithuba elifanayo namhlanje—lokuba silusebenze silufeze usindiso lwethu. (Filipi 2:12) UThixo unqwenela ukuba “bonke abantu . . . babe nolwazi oluchanileyo lwenyaniso.” (1 Timoti 2:4, NW) Yaye ngoxa ngamnye wethu echatshazelwa ngokomlinganiselo othile yimfuza nemvelaphi yakhe, uThixo usinike inkululeko yokuzikhethela—amandla okugqiba ngendlela esifuna ukubusebenzisa ngayo ubomi bethu. (Mateyu 7:13, 14) Sinokwenza okulungileyo okanye okuphosakeleyo. Sinokuba nokuma okuhle noYehova uThixo size sifumane ubomi, okanye sinokumnikel’ umva size sife.

Abaninzi bakhetha ukuzimela geqe kuThixo. Ubomi babo babunikele ekusukeleni izinto eziphathekayo, ulonwabo okanye udumo. Kodwa uYesu walumkisa esithi: “Lumkani, nizilinde ngasekubaweni; ngokuba ubomi bomntu abumi ngabuninzi bempahla yakhe.” (Luka 12:15) Ngoko, ubomi bethu buxhomekeke entwenini? Kweyoku-1 kaYohane 2:15-17, iBhayibhile ithi: “Musani ukulithanda ihlabathi, kwanezinto ezisehlabathini. . . . Konke okusehlabathini, inkanuko yenyama, nenkanuko yamehlo, noqhankqalazo lobu bomi, asikokuphuma kuye uYise, kokuphuma ehlabathini. Ihlabathi ke liyadlula, nenkanuko yalo; ke yena owenza ukuthanda kukaThixo uhleli ngonaphakade.”

Ukukhetha Ubomi

Unokuqiniseka njani ukuba ngokwenene wenza ukuthanda kukaThixo? UYesu wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” (Yohane 17:3) Ulwazi oluchanileyo olufumaneka eBhayibhileni lusinika isiseko sokholo. “Lungekho ukholo, akunakubakho ukumkholisa kakuhle; kuba lowo uzayo kuThixo, umelwe kukukholwa ukuba ukho, nokuba ungumvuzi wabo bamfunayo.” (Hebhere 11:6) Ulwazi ofanele ulufumane luyafumaneka. AmaNgqina kaYehova aye anceda izigidi ukuba zilufumane ngesifundo seBhayibhile esiqhutywa rhoqo.a

Ukuze umkholise uThixo, kuya kufuneka ukuba wenze iinguqulelo ezithile. Kusenokuba kukho imikhwa emibi omele uyoyise okanye kwanoqheliselo lokuziphatha okubi omele uluyeke. Musa ukuncama, ngokungathi akunakuguquka. Ingcamango yokuba izinto azinakuguquka yenye nje yeengcamango ezivela kwimfundiso yobuxoki yelishwa. Ngoncedo lukaYehova, kunokwenzeka ngaye nawuphi na umntu ukuba ‘abe kumila kumbi’ nokuze afumane “ubuntu obutsha.” (Roma 12:2; Efese 4:22-24, NW) Imigudu yakho yokukholisa uThixo ayiyi kuba lilize. Usoloko ekulungele ukubasikelela abo benza ukuthanda kwakhe.

Kuyavunywa ukuba ukufunda iBhayibhile akuyi kuzicombulula zonke iingxaki zakho. Abakhonzi abanyanisekileyo bakaThixo bayazifumana iingozi neemeko ezibandezelayo, njengoko kunjalo nangabanye. Noko ke, uThixo unokusinika ubulumko bokujamelana nembandezelo. (Yakobi 1:5) Kwakhona ubani uba novuyo lokwazi ukuba unolwalamano oluhle noThixo. IMizekeliso 16:20 ithi: “Okholose ngoYehova, hayi uyolo lwakhe!”

KwiParadisi ebuyiselweyo phantsi koBukumkani bukaThixo, asiyi kuphinda sizive sisoyika ixesha nesihlo esingabonwa kwangaphambili. Eneneni, uThixo uya kushenxisa zonke izinto ngoku ezonakalisa ulonwabo loluntu. IBhayibhile ithembisa oku: “Azisule uThixo zonke iinyembezi emehlweni [ethu], kungabi sabakho kufa, kungabi sabakho nasijwili, nakukhala, nantlungu.” (ISityhilelo 21:4) Amaxhoba amaninzi eengozi aya kuvuswa.—Yohane 5:28, 29.

Ngaba uya kulizuz’ ilifa eli kamva lizukileyo? Xa amaSirayeli ayesele eza kungena kwiLizwe Ledinga, uMoses wawaxelela oku: “Ndibeke phambi kwenu ubomi nokufa, intsikelelo nesiqalekiso. Nyula ke ubomi, ukuze uphile, wena nembewu yakho; ukuba umthande uYehova uThixo wakho, uliphulaphule ilizwi lakhe, unamathele kuye: ngokuba bubomi bakho nokolulwa kweemini zakho.”—Duteronomi 30:19, 20.

Asingawo amaxhoba angenakuzenzela nto alawulwa lilishwa elingenanceba. Ulonwabo lwakho lwekamva, eneneni ikamva lakho likanaphakade, lisezandleni zakho. Sikubongoza ukuba ukhethe ubomi.

[Umbhalo osemazantsi]

[Amagama acatshulweyo akwiphepha 5]

UThixo wawagxeka kanobom amaSirayeli awexukileyo awathi amkela ingcamango yobuhedeni yelishwa