Sanikwa Umnqweno Wokuphila
UMARY wayedandatheke ngokwenene enazo nezinye izigulo. Noko ke, akazange abhekele kwintsapho yakhe okanye asebenzise utywala okanye iziyobisi. Imeko kaMary yenza kucace ukuba akuyomfuneko ukuba kude kubekho iimeko eziyingozi ngaphambi kokuba abantu benze imigudu yokuzibulala.
Kangangethuba elide kwabonakala ngathi uMary uya kuba phakathi kwabantu ababonisa indlela abantu abakhulileyo ababucima ngayo ubomi babo. Kangangeentsuku eziliqela wayefe isiqaqa, engathethi, kwicandelo labagulela ukufa kwisibhedlele sasekuhlaleni, noko kwakusabonakala ukuba usaphila. Umyeni wakhe owayesentlungwini, uJohn, wayesoloko ekufuphi kuye. Oogqirha baxelela uJohn nentsapho yakhe ukuba uMary usenokungaphili yaye ukuba uye waphila uya kuphazamiseka engqondweni ngokusisigxina.
UMary wayetyelelwa suku ngalunye ngummelwane wakhe, uSally, oliNgqina likaYehova. USally uthi: “Ndayibongoza le ntsapho ukuba ingaphelelwa lithemba. Umama, onesifo seswekile, wayefe isiqaqa kangangeeveki eziliqela kwiminyaka emininzi eyadlulayo. Oogqirha baxelela intsapho yakuthi ukuba akasoze aphile, kodwa uyaphila. Ndandidla ngokumbamba ngesandla uMary ndize ndithethe naye, njengokuba ndandidla ngokwenza kumama, yaye ndandimva eshukuma kancinane.” Ngosuku lwesithathu, waya esomelela noko, yaye uMary wabonakala ebanakana abantu, nangona wayengakwazi ukuthetha.
‘Ngaba Ngendikuthintele?’
USally uthi: “UJohn wayeziva enetyala gqitha. Wayeqinisekile ukuba nguye obangele yonke le nto.” Oku kuqhelekile xa umntu omthandayo eye wazibulala okanye wazama ukuzibulala. “Ndamkhumbuza ukuba uMary wayenyangwa ngenxa yokuxinezeleka ngokugqithiseleyo. Wayegula yaye engakwazi ukunyamezela ukugula kanye njengokuba nayo le ndoda yayingenakukunceda ukugula kwayo emzimbeni.”
Abo banabantu ababathandayo abazibulalayo basoloko bengcungcutheka bakuzibuza lo mbuzo, Yintoni engendiyenzile ukuthintela le nto? Ukuphaphela iimpawu ezilumkisayo neengozi kunokuthintela amalinge okuzibulala. Kodwa ukuba akukhange kube njalo, khumbula ukuba akubophelelekanga ngokuzibhubhisa komnye umntu. (Galati 6:5) Kubaluleke ngakumbi ukukhumbula oku kwimeko apho ilungu lentsapho elifuna ukuzibulala ngabom lifuna ukwenza abanye bazive benetyala. UGqr. Hendin ocatshulwe ngaphambilana, uthi: “Kufanele kukhunjulwe ukuba amalinge ayingozi okuzibulala asoloko esenziwa ngabantu abafuna ukuphembelela okanye balawule iimvakalelo zabanye abantu nangona bengazi kubakho ukuze babone ukuphumelela okanye ukusilela kwemigudu yabo.”
UGqr. Hendin uqhubeka esithi: “Kubantu abakhulileyo abadla ngokufuna ukuzibulala kusoloko kukho abantwana abasele bekhulile kwakunye nabantwana babo okanye amaqabane omtshato athi umguli afune ukubaphembelela, abalawule, okanye abanyanzele ukuba bamkhusele ngakumbi. Usoloko efuna abantu bamenzele izinto ekunzima ukuzenza, yaye umguli udla ngokungafuni enye into, yaye amalinge okuzibulala angeyongozi kangako adla ngokuphela sele eyingozi.”
Amalungu entsapho akwimeko enjengale asenokuvakalelwa kukuba axinezeleke gqitha, ngokungaphaya kwamandla awo. Kodwa, ungaze ulibale ukuba uYehova uThixo uyabavusa abafileyo yaye oko kusenokuquka abathandekayo bethu abathe ngenxa yoxinezeleko, ukugula ngengqondo, okanye ukuphelelwa lithemba bazibulala.—Bona elithi “Imbono YeBhayibhile: Abantu Abazibulalayo—Ngaba Lukho Uvuko Kubo?” kuVukani! kaSeptemba 8, 1990, iphepha 26-7.
Ngoxa ukuzibulala kungathetheleleki, kuyathuthuzela ukwazi ukuba amathemba ekamva abo sibathandayo axhomekeke kuThixo oqondayo ukuba ubuthathaka bunokukhokelela umntu ukuba abhuduzele. IBhayibhile ithi ngoYehova: “Injengokuphakama kwezulu phezu komhlaba, ukuba namandla, inceba yakhe kwabamoyikayo; kunjengokuba kude kwempumalanga entshonalanga, ukulukhwelelisa kwakhe kuthi ukreqo lwethu; kunjengokusikwa yimfesane koyise kubantwana, ukusikwa yimfesane kukaYehova kwabamoyikayo. Ngokuba uyakwazi yena ukubunjwa kwethu, ekhumbula ukuba siluthuli.”—INdumiso 103:11-14.
Umphumo Ovuyisayo
Kangangeentsuku ezimbini uMary wayephakathi kokufa nokuphila, kodwa waphila. Ngokuthe ngcembe zaya zibuya iingqondo yaye uJohn wagoduka naye, wafika endlwini onke amayeza etshixelwe. Ngoku uMary utyelelwa rhoqo ngoonontlalontle bempilo yengqondo yaye uthi akakwazi kuchaza okanye alikhumbule kwaukulikhumbula ilifu elimnyama elaphantsa lambulala.
Ngoku uSally, ongummelwane kaJohn noMary, ubaqhubela isifundo seBhayibhile veki nganye. Baye bafunda eBhayibhileni ukuba ezi ngxaki zibonakala zingenakuconjululwa, ingakumbi ngabantu abasele bekhulile, ziya kuconjululwa nguThixo kungekudala. USally uthi: “Kambe ke isifundo seBhayibhile ngokwaso asinyangi nto. Ufanele ungqinisise ngokusuka kwiZibhalo ukuba la madinga ayinyaniso, uze ke usebenzise oko ukufundayo. Kodwa ndicinga ukuba uJohn noMary banethemba lokwenene lekamva.”
Ukuba ikamva lakho libonakala limfiliba yaye ungathanda ukufumana ithemba lokwenene, kutheni ungaqhagamshelani namaNgqina kaYehova nje? Wavumele angqine, njengoko uMary noJohn benzayo, ukuba akukho zingxaki uThixo angenako nangasayi kuzicombulula kwikamva elingekude. Enoba izinto zisenokukhangeleka zimbi kangakanani ngoku, kukho isicombululo. Nceda uhlolisise nathi ithemba eliqinisekileyo eliye lahlaziya umnqweno wabanye wokufuna ukuphila.
[Ibhokisi ekwiphepha 16]
Iingozi Nemiqondiso Elumkisayo
IThe Journal of the American Medical Association ithi: “Iingozi zokuzibulala kubantu abasele bekhulile zingaphezu kwezabo baselula.” Ezo ngozi ziquka “ukwanda kokusetyenziswa kakubi kotywala noxinezeleko, ukusetyenziswa kwezona ndlela zibulala gqitha zokuzibulala, nokuzikhetha ebantwini. Ukongezelela, abantu abasele bekhulile . . . banezigulo ezingakumbi nezibakhathazayo.” Incwadi ethi Suicide, ebhalwe nguStephen Flanders, idwelisa ezi ngozi zilandelayo, nganye kuzo ifuna ukunikelwa ingqalelo.
Uxinezeleko olungapheliyo:
“Abaphengululi banikela ingxelo yokuba ama-50% okanye ngaphezulu abo bazibulalayo banembali ende yoxinezeleko oluqatha.”
Ukuphelelwa lithemba:
Kolunye uhlolisiso, nabantu abangabonakali bexinezelekile badla ngokuzibulala xa bengenathemba lekamva.
Ukusebenzisa kakubi utywala neziyobisi:
“Kuqikelelwa ukuba phakathi kwe-7% nama-21% [kubantu abazintyintya ngotywala] bayazibulala, xa kuthelekiswa ne-1% yabemi abaqhelekileyo.”
Impembelelo yentsapho:
“Uhlolisiso lutyhila ukuba amalungu entsapho yomntu oye wazibulala asengozini enkulu yokuzibulala nawo ngokwawo.”
Ukugula:
“Uloyiko olubangelwa kukuba buthathaka komzimba, okubangela ukuba basiwe kumakhaya okunyamekela abagulayo, lulodwa nje lunokubangela ukuba abantu abasele bekhulile bafune ukuzibulala.”
Ukulahlekelwa:
“Isenokuba yilahleko evakalayo, njengokulahlekelwa liqabane okanye umhlobo, umsebenzi okanye impilo. Isenokuba yiyo nento engavakaliyo. Ngokomzekelo isenokuba kukuziva engaxabisekanga, ngenxa yomgangatho akuwo, okanye ukuziva engakhuselekanga.”
Ukongezelela kwezi ngozi, incwadi kaFlanders idwelisa le miqondiso ilumkisayo nengamele ithatyathwe lula.
Xa ebekhe wazama ukuzibulala ngaphambili:
“Ngowona mqondiso uphambili wokuba umntu angazibulala.”
Ukuthetha ngokuzibulala:
“Ukumana esithi ‘Akuzi kuphinda kube yimfuneko ukuba bazikhathaze ngam’ okanye ‘Banokuphila ngaphandle kwam’ kuzizisongelo ezicacileyo.”
Amalungiselelo okugqibela:
“Lawo aquka ukwenza umyolelo, ukuphisa ngezinto ezixabisekileyo nokulungiselela izilwanyana zasekhaya.”
Ukutshintsha kobuntu okanye kwesimilo:
Xa oku “kuphelekwa ngamazwi okuzijongela phantsi okanye ukuphelelwa lithemba,” kunokuba “ngumqondiso woxinezeleko onzulu kangangokuba ude ukhokelele ekuzitshabalaliseni.”
[Umfanekiso okwiphepha 17]
Abo baseleyo kufuneka bancedwe bahlangabezane nokuzibulala kweqabane