Ubukhoboka Bale Mihla—Buza Kuphela Kungekudala!
“Inkululeko yomntu omnye iyinxalenye ebalulekileyo yenkululeko yehlabathi lonke. Akunakunyathela omnye angenzakali omnye.”—UVictor Schoelcher, Umchola-choli Weendaba Nowezobupolitika Ongumfrentshi, Ngowe-1848.
“YINTONI le imbi emntwini nesoloko imbangela ukuba adelele, agagamele aze athobe isidima abanye?” babuza ngelitshoyo abahleli beThe UNESCO Courier. “Yaye kutheni ulwaphulo-mthetho olunjalo olwenziwa ebantwini lungohlwaywa ukususela oko kwamiselwa Amalungelo Abantu?”
Impendulo inzima. Ukubawa kungunobangela wokuqotywa kwabantwana bahlawulwe imali encinane nale nto yokusetyenziswa kwabantu kuba behlawulela amatyala. Ubuhlwempu nokungafundi kubangela ukuba amantombazana athengiswe ukuze abe ngoonongogo aze atshatiswe ngenkani. Imigaqo yonqulo nengcamango yezithethe ingunobangela wobukhoboka obungokwesithethe. Yaye into ebangela ukuba amadoda atyelele eBangkok okanye eManila ukuze afumane amakhwenkwe okanye amantombazana aselula angenaye uGawulayo, kukuba afuna isini esigqwethekileyo nokuziphatha kakubi. Konke oku kuyinxalenye yehlabathi apho abantu ‘bengabazithandayo, abathandi bemali, bengenawo umsa wemvelo, . . . abangenakuzeyisa, iindlobongela,’ ngokutsho kukampostile uPawulos, umfundi wokuqala womthetho. (2 Timoti 3:1-5) Kuyinxalenye yehlabathi apho ‘into egoso ingenakolulwa, nento engekhoyo ingenakubalwa,’ ngokutsho kwegosa laseburhulumenteni lamandulo uSolomon.—INtshumayeli 1:15.
Ukutshintsha Ingqondo
Ngaba oku kuthetha ukuba akukho nto inokwenziwa okanye iya kwenziwa ukuphelisa kuthi nyaa ubukhoboka—enoba buboniswa ngendlela yamandulo okanye yakutshanje? Akunjalo!
IOfisi yeZizwe Ezimanyeneneyo yoMphathiswa Oyintloko Wamalungelo Abantu (OHCHR [Office of the High Commissioner for Human Rights]) ithi ubukhoboka “busengqondweni,” isongezelela ngelithi: “Nokuba sele buphelisiwe, ubukhoboka bushiya imitshithi. Bunokuhlala busengqondweni—kumaxhoba nakwinzala yawo nakwababufunde kwababebenza—kangangethuba elide emva kokupheliswa kwabo ngokusemthethweni.”
Ngoko enye indlela yokuphelisa ubukhoboka kukutshintsha indlela yokucinga—kutshintshwe intliziyo—ehlabathini lonke. Yaye oko kuya kuquka ukutshintshwa kohlobo lwemfundo—kufundiswe abantu ukuthandana nokuhlonela izidima zabanye abantu. Kuthetha ukunceda abantu baphelise ukubawa ezintliziyweni zabo baze baphile ngemilinganiselo ephakamileyo yokuziphatha. Ngubani onokunikela imfundo enjalo? IOHCHR ithi “wonke umntu unegalelo ekwenzeni inkqubo yehlabathi engasayi kuze ikunyamezele ukuxhatshazwa kwabantu ngolunya.”
Cinga nje ngemfundo ebiqhutywa liqela lamaKristu elingamaNgqina kaYehova. Le nkqubo iye yaphumelela ekufundiseni abantliziyo zinyanisekileyo ukuba bangakunyamezeli okanye bakukhuthaze ukuxhatshazwa kwabantu ngolunya. Ngenxa yayo izigidi zabantu kumazwe angaphezu kwama-230 ziye zafundiswa ukuphatha abanye abantu ngesidima. Kutheni le nkqubo iphumelela?
Kungenxa yokuba isekelwe eBhayibhileni, incwadi ephefumlelwe nguMdali womntu. Iyincwadi ekhuthaza ukuphathwa kwabantu ngesidima. Abantu abafundiswe iBhayibhile ngenkqubo yemfundo yamaNgqina kaYehova bafunda ukuba uMdali wethu, uYehova, unguThixo onesidima. (1 Kronike 16:27) Uyinika isidima yonke indalo yakhe. Oku kuquka amadoda nabafazi, beentlanga, iimvelaphi, neemeko zoqoqosho ezahlukeneyo.—Bona ibhokisi ethi “Inkululeko Nesidima Sabantu—Sivela Kuwuphi Umthombo?”
Ukulingana Nokuhlonela Isidima
IBhayibhile ifundisa ukuba uThixo “wazenza ngokuphuma kumntu omnye zonke iintlanga zabantu, ukuba zihlale kumphezulu uphela womhlaba.” (IZenzo 17:26) Ngenxa yoko, akakho umntu ongaphezu kwabanye abantu okanye onelungelo lokucinezela okanye ukuxhaphaza abanye. Abantu abakulungeleyo ukufunda bayasixabisa isibakala sokuba “uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35) Bayaqonda ukuba uthando lukaThixo luquka abantu bonke, ekubeni ilungelo lolwalamano naye livulekele wonke umntu. Enyanisweni, “uThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.”—Yohane 3:16.
Le mfundo isekelwe eBhayibhileni inempembelelo enamandla kubuntu. Ngenxa yayo iintliziyo neengqondo zabantu “zinokwenziwa ntsha ngokupheleleyo.” (Efese 4:22-24, Today’s English Version) Iyabakhuthaza ukuba baphathe abantu ngesidima nangembeko. Bazimisele ‘ukusebenza oko kulungileyo kubo bonke.’ (Galati 6:10) Akakho umntu onokuba ngumKristu wokwenyaniso aphinde abe negalelo ekuxhatshazweni kwabantu ngolunya nasekucinezelweni kwabantu. AmaNgqina kaYehova ayakuvuyela ukuba liqela lamaKristu njengebandla lamaKristu lenkulungwane yokuqala, apho ‘kwakungekho mYuda namGrike, kungekho khoboka nokhululekileyo, kuba onke ayengumntu omnye ngokumanyene noKristu Yesu.’—Galati 3:28.
Ukutshintsha Korhulumente
Noko ke, ukuze ziphele kuthi cwaka zonke iintlobo zobukhoboka, kufuneka kubekho utshintsho olukhulu ebantwini. I-International Labor Organization ithi ukuze kupheliswe ukuxhatshazwa kwabantu, kufuneka “kutshintshwe imeko-bume evumela ize ikhuthaze” izinto ezinjalo. Intshukumo yehlabathi, intsebenziswano yehlabathi nokuzimisela kwehlabathi, zizinto ezingakumbi ezacetyiswa ngulo mbutho.
Ngokusengqiqweni oku kuya kufuna igunya elinokukwazi ukulawula sonke isijikelezi-langa sethu, igunya elikwaziyo ukuqinisekisa inkululeko yehlabathi lonke. UBoutros Boutros-Ghali, owayesakuba ngusosiba-jikelele weZizwe Ezimanyeneyo, wathi eyona ngxaki ithwaxa isijikelezi-langa sethu imele iconjululwe “ehlabathini lonke.” Kodwa asinguye wonke umntu oqinisekileyo ukuba le nto iya kuze yenzeke. Izinto ezenzeke kwixesha elidluleyo zibonisa ukuba abantu abasemagunyeni bazingca gqitha yaye bayazicingela befuna ezabo izilangazelelo nosukelo yaye abanakusebenzisana ngolo hlobo ehlabathini lonke.
Noko ke, iBhayibhile—laa ncwadi ifundise izigidi zabantu ukuba zihlonele izidima zabanye abantu—ibonisa ukuba uThixo unenjongo yokumisela urhulumente onjalo wehlabathi. EBhayibhileni uya kufumana amadinga amaninzi ehlabathi elitsha lobulungisa. (Isaya 65:17; 2 Petros 3:13) Kuyinjongo kaThixo ukucoca bonke abo bangathandi uThixo nommelwane emhlabeni. UThixo uye wayityhila injongo yakhe yokumisela urhulumente wehlabathi lonke phezu koluntu oya kulawula umhlaba ngobulungisa. UYesu wasikhuthaza ukuba sibuthandazele obo burhulumente koko ngokuqhelekileyo kubizwa ngokuba nguMthandazo weNkosi, okanye uBawo wethu Osezulwini.—Mateyu 6:9, 10.
Ukuxhatshazwa kwabantu nalo naluphi na olunye uhlobo lobukhoboka luya kuphela phantsi kolawulo lwalo rhulumente ngokuba uKristu onguKumkani uya kulawula “ngokusesikweni nangobulungisa.” (Isaya 9:7) Abacinezelweyo baya kukhululwa phantsi kolawulo lwakhe, kuba iBhayibhile ithi: “Uya kulihlangula ihlwempu elizibikayo, nabaziintsizana abangenaluncedo; abenzele inceba abasweleyo nabangamahlwempu; asindise imiphefumlo yamahlwempu; akhulule imiphefumlo yawo ekuxinezelweni nasekugonyamelweni.”—INdumiso 72:12-14.
Ukuba ulangazelela ukubona ubukhoboka bupheliswa—zonke iindidi zobukhoboka—siyakumema ukuba ufunde ngakumbi ngenjongo kaThixo yokumisela lo rhulumente wehlabathi uza kukhulula abantu. AmaNgqina kaYehova kummandla okuwo aya kukuvuyela ukukunceda wenze oku.
[Ibhokisi/Umfanekiso okwiphepha 11]
INKULULEKO NESIDIMA SABANTU—SIVELA KUWUPHI UMTHOMBO?
Sonke sizalwa sinomnqweno ongaphakathi wokufuna ukuphathwa ngesidima nokunikwa inkululeko. UKofi Annan, usosiba-jikelele weZizwe Ezimanyeneyo, waphinda indlela abantu ehlabathini jikelele abavakalelwa ngayo xa wabuza ukuba: “Ngubani onokuyiphika into yokuba sonke sifuna ukuphila ngaphandle kokoyika, ukungcungcuthekiswa nokucalucalulwa? . . . Ukhe wamva na umntu okhululekileyo efuna ukuphela kwenkululeko? Ngaba ukhe waliva ikhoboka limela ubukhoboka?”
Ezo ngcamango azikho ntsha. Siphelisa ingcamango yokuba abanye abantu bazalelwa ukuba ngamakhoboka, isithandi sobulumko saseRoma senkulungwane yokuqala uSeneca, sabhala sathi kwincwadi ethi Letters to Lucilius: “Khumbula ukuba le ndoda uthi likhoboka lakho yazalwa ngendlela efanayo nawe, ingaphantsi kwesi sibhakabhaka sihle ungaphantsi kwaso nawe, iphefumla njengawe, iyaphila njengawe, ifa kanye njengawe!”
UImamʽAlī, owayehlonelwa njengenkokeli yesine yamaSilamsi emva koMuḥammad, wathi bonke abantu “badalwa balingana.” USaʽdī, imbongi yasePersi yenkulungwane ye-13, wathi: “Abantwana baka-Adam bangamalungu omnye elomnye yaye badalwa ngento enye. Xa ihlabathi lihlungisa elinye ilungu, elinye alifumani kuphumla.”
Ingxelo yembali ephefumlelwe nguThixo efumaneka eBhayibhileni ibalaselisa isidima somntu wonke. Ngokomzekelo, iGenesis 1:27 ichaza ukudalwa komntu isithi: “Wamdala ke uThixo umntu ngokomfanekiselo wakhe; wamdala ngokomfanekiselo kaThixo; wadala indoda nenkazana.” UMdali wethu nguThixo wenkululeko. Umpostile uPawulos wathi: “Apho ukhoyo umoya kaYehova kukho inkululeko.” (2 Korinte 3:17) Xa wayedala umntu ngokomfanekiselo wakhe ngokufana naye, uYehova wajizeka abantu ngomlinganiselo wokuxabiseka, ukuzihlonela nesidima. Ngokukhulula indalo yakhe “ekukhotyokisweni kukonakala,” uya kuqinisekisa ukuba abantu bayayinandipha loo nkululeko nesidima ngonaphakade.—Roma 8:21.
[Umfanekiso okwiphepha 9]
Wonke umntu unelungelo lokufumana isidima nenkululeko
[Imifanekiso ekwiphepha 10]
IMFUNDO YEBHAYIBHILE IKHUTHAZA UKUHLONELWA KWESIDIMA SABANTU YAYE ISINIKA ITHEMBA NGEKAMVA
Isifundo seBhayibhile sentsapho eBenin
Ubuhle bezi ngxangxasi zeBlue Nile e-Ethiopia busikrobisa kwiparadesi ebuyiselweyo