Ngaba Uyasihlonela Isidima Sabo?

BEVALELWE okwezilwanyana yaye befakwe kwindawo emdaka nenevumba elibi, abemi baseAfrika bahanjiswa ngenqanawa njengomthwalo besiya kumazwe aseMerika. Ubuncinane isiqingatha sabo kwakulindeleke ukuba sife kwanangaphambi kokuba sifike apho. Amalungu entsapho ahlukaniswa kabuhlungu, ukuze angaze aphinde abonane kwakhona. Urhwebo lwamakhoboka lwaluphakathi kwezona ziganeko zibi zokuphathana kwabantu ngenkohlakalo. Ezinye iziganeko zenzeka xa abeyisi belawula abantu abangenakuzilwela.

Eneneni, ukuhluba ubani isidima sakhe kusenokuba buhlungu ngaphezu kokumbetha emzimbeni. Kumenza ubani adakumbe. Nangona ubukhoboka buye babhangiswa kumazwe amaninzi, ukusijongela phantsi isidima sabantu kusaqhubeka nanamhlanje, mhlawumbi ngeendlela ezichulwe ngakumbi.

AmaKristu okwenyaniso, kwelinye icala, alwela ukusebenzisa isiluleko sikaYesu Kristu ‘sokuthanda ummelwane wawo njengawo siqu.’ Ngenxa yoko, azibuza oku, ‘Ngaba ndiyasihlonela isidima sobuqu sabanye?’—Luka 10:27.

Ukubonakaliswa Kwesidima

Isidima, ngokwesichazi-magama, luphawu okanye imeko yokuba ngoxatyiswayo, ukubekwa okanye ukugqalwa unguthile. Enjani yona ukufaneleka ingcaciso yewonga loMongami Wendalo Iphela, uYehova uThixo! Enyanisweni, iZibhalo ngokuphindaphindiweyo zinxulumanisa uYehova kwanolongamo lwakhe kunye nesidima. UMoses, uIsaya, uHezekile, uDaniyeli, umpostile uYohane, kwanabanye baba nelungelo lokubona umbono ophefumlelweyo woseNyangweni kwanenkundla yakhe yasemazulwini, yaye iingcaciso zabo ngokufuthi zazibonisa ubungangamsha obumangalisayo nesidima. (Eksodus 24:9-11; Isaya 6:1; Hezekile 1:26-28; Daniyeli 7:9; ISityhilelo 4:1-3) Kumthandazo wokudumisa, uKumkani uDavide wathi: “Bobakho, Yehova, ubukhulu, namandla, nozuko, noloyiso, nendili. Ewe, konke okusezulwini nokusehlabathini kokwakho.” (1 Kronike 29:11) Enyanisweni, akukho namnye onemfaneleko yokubekeka kwanokuxabiseka kunoYehova uThixo.

Ekudaleni umntu ngokomfanekiselo nangokufana naye, uYehova wanika umntu umlinganiselo wemfaneleko, ukuzihlonela kwanesidima. (Genesis 1:26) Ngoko ke, xa siqhubana nabanye, sifanele sinike mntu ngamnye imbeko nentlonelo efanelekileyo. Xa sisenjenjalo, ngokungathi kunjalo, siyawamkela uMthombo wesidima somntu, uYehova uThixo.—INdumiso 8:4-9.

Isidima Kwiinkqubano Zentsapho

Ngokuphefumlelweyo, umpostile uPetros, owayeyindoda etshatileyo, wabongoza amadoda amaKristu ukuba anike abafazi babo “imbeko njengesitya esibuthathaka ngakumbi.” (1 Petros 3:7; Mateyu 8:14) Umpostile uPawulos wacebisa: “Kwelinye icala, umfazi ufanele abe nentlonelo enzulu ngendoda yakhe.” (Efese 5:33) Ngoko ke, emtshatweni, ukubeka kwanokuhlonela isidima sobuqu seqabane likabani yimfuneko ngokutsho kweBhayibhile. Oku kunokubonakaliswa ngaziphi iindlela?

Njengamanzi omeleza isityalo esikhulayo, intetho enobubele kwanezenzo ezilungileyo phakathi kwendoda nomfazi, ekuhleni nangasese, zisenokuluqinisa ulwalamano lwabo lothando. Intetho ehlaselayo, engqongqo kwanekhubekisayo okanye ukuthetha ngokungenambeko nangendlela ethoba isidima, njengoko sisiva kwimidlalo ehlekisayo kamabonwakude, kuyatshabalalisa. Kusenokumbangela ubani azive engaxatyiswanga, edandathekile, ekwanengqumbo; kusenokumbangela axheleke ngaphakathi nto leyo engenakuphola lula.

Ukuhlonela isidima sobuqu sabanye kukwathetha ukubamkela njengoko benjalo, kungekhona ukuzama ukubenza babe ngendlela abangeyiyo okanye ubathelekise ngokungafanelekanga nabanye. Oku kubaluleke ngakumbi phakathi kwamadoda nabafazi. Apho unxibelelwano kwanokubonakaliswa kweemvakalelo kuhamba ngokukhululekileyo nangokulula yaye kungekho bani owoyika ukugxekwa okanye ukungxoliswa, kuya kukhula ulwalamano. Xa umntu enokuba nguye emtshatweni, ngoko ngokuyinyaniso ikhaya liba likhusi kwihlabathi langaphandle elikhohlakeleyo nelingqongqo.

Abantwana baphantsi komyalelo ongokweZibhalo wokuhlonela nowokubathobela abazali babo. Ngenxa yoko, abazali abalumkileyo nabanothando benza kakuhle ukubaphatha ngesidima abantwana babo. Ukumncoma ngokufudumeleyo ngenxa yesimilo esihle, kuquka nokuqeqesha ngomonde xa kuyimfuneko, kuluncedo ekomelezeni ‘ukweyiselwa kwengqondo kuYehova.’ Ukusoloko ubagxeka, ubangxolisa, kwanokubathuka njengokuthi “usisidenge” okanye “usisiphukuphuku” kuphela kuya kubacaphukisa.—Efese 6:4.

Omnye umKristu ongumdala kwanongutata, okhulisa oonyana abathathu kwaneentombi ezintathu, uthi: “KwiHolo yoBukumkani, sasinikela uqeqesho olufunekayo ngokuzolileyo kangangoko kunokwenzeka. Ukukrweca okanye ukujezula nje, ngokuqhelekileyo kwakwanele. Ukuba kwakufuneka uqeqesho olunzulu, sasilunikela ngasese ekhaya yaye kude nabanye abantwana. Ngoku ngenxa yokuba abantwana bebadadlana, uqeqesho luquka ukunikela ngamnye icebiso elinothando nelinobulumko elisuka kwiLizwi likaThixo ngokuvisisana neemfuno zabo. Siyazama ukuyigcina imibandela yobuqu iyimfihlelo, ngoko sibonakalisa intlonelo ngelungelo lomntwana ngamnye lokuba nombandela oyimfihlo nokuhlonela isidima sakhe.”

Into engafanele ityeshelwe yimfuneko yokubonakalisa intlonelo ngokwamazwi nangezenzo entsatsheni. Ukuqhelana akufanele kusenze singawakhathaleli amazwi anjengokuthi “khawundincede,” “enkosi,” “uxolo” kwanelithi “ndicela uxolo.” Imikhwa emihle ibalulekile kokubini ekugcineni isidima sikabani kwanokuhlonela esabanye.

Kwibandla LamaKristu

UYesu wathi: “Yizani kum, nonke nina nixhamlekayo nenisindwa ngumthwalo, yaye ndiza kunihlaziya.” (Mateyu 11:28) Abacinezelekileyo, abadandathekileyo, kwanabantwana abancinane, bonke ngokungazenzisiyo babetsaleleka kuYesu. Babenyeliswa ngabefundisi neenkokeli ezinekratshi nezizenza amalungisa aloo mihla. Kodwa kuYesu bafumana umntu owababonisa isidima ababesifanele.

Ngokuxelisa uYesu, nathi sifuna ukuwahlaziya amakholwa esikunye nawo. Oku kuthetha ukufuna amathuba okuwakha ngamazwi kwanangezenzo zethu. Kusoloko kufanelekile ukuba nesisa ngokunyanisekileyo kwintetho yethu enamazwi anobubele nakhayo. (Roma 1:11, 12; 1 Tesalonika 5:11) Sibonisa ukuba siyazikhathalela iimvakalelo zabanye ngokukulumkela oko sikuthethayo kwanendlela esikuthetha ngayo. (Kolose 4:6) Ukunxiba nokuzilungisa ngokufanelekileyo kwiintlanganiso zamaKristu kusoloko kubonisa intlonelo enzulu ngesidima soThixo wethu, unqulo lwakhe kwanabo sikhonza nabo.

UYesu wasihlonela isidima sabantu kwanaxa wayebanceda ngokuthile. Akazange aziphakamise ngokuthi abathobe abanye. Xa oneqhenqa weza kuye efuna ukuphiliswa, uYesu akazange ayigxothe loo ndoda njengengacocekanga nengaxabisekanga, engazange acele njezu. Kunoko, xa oneqhenqa wabongoza uYesu esithi, “Nkosi, ukuba nje uyafuna, unako ukundenza ndihlambululuke,” wamphatha ngesidima oneqhenqa ngokuthi, “Ndiyafuna.” (Luka 5:12, 13) Enjani yona into ukuba ntle xa singancedi abo bafuna uncedo nje kuphela kodwa sikwabaqinisekisa ukuba abangomthwalo kodwa bayafunwa yaye bayathandwa! Abo baneentloni, badandathekileyo kwanabo bayimilwelwe ngokuqhelekileyo bayatyeshelwa, benziwe amakheswa, okanye bathotywe isidima ehlabathini. Kodwa bafanele bafumane ubudlelane bokwenyaniso kwanokwamkelwa xa bephakathi kwabazalwana noodade babo abangamaKristu. Simele siphumeze indima yethu ngokufak’ isandla kulo moya.

UYesu wayebathanda abafundi bakhe ‘njengabakhe’ yaye “wabathanda de kwasekupheleni” phezu kwazo nje iziphoso kwanobuntu babo obabuguquguquka. (Yohane 13:1) Kubo wabona iintliziyo ezinyanisekileyo kwanenkonzo yomphefumlo wonke kuYise. Ngokufanayo, akufanele sibonise iintshukumisa ezimbi ngabo sikholwa nabo kuba nje bengazenzi izinto ngendlela yethu okanye kuba imikhwa yabo okanye ubuntu babo busenokusicaphukisa. Ukuhlonela isidima sabazalwana bethu kuza kusishukumisela ekubeni sibathande yaye sibamkele njengoko benjalo, sinethemba lokuba nabo bayamthanda uYehova yaye bamkhonza ngeentshukumisa ezinyanisekileyo.—1 Petros 4:8-10.

Ingakumbi abadala, bafanele balumke ukuba bangabenzi baxhalabe ngokungafanelekanga abo baphathiswe ukuba babanyamekele. (1 Petros 5:2, 3) Xa behlanganisana nelungu lebandla eliye lona, kuya kuba kuhle ukuba abadala bathethe amazwi obubele nanolwazelelelo baze bakuphephe ukubuza imibuzo engapheliyo ebangela iintloni. (Galati 6:1) Kwanokuba ukukhalimela ngamandla okanye isohlwayo sifanelekile, baya kuqhubeka belihlonela ilungelo lokuphathwa ngesidima nelokuzihlonela komoni.—1 Timoti 5:1, 2.

Ukulondoloza Isidima Sobuqu

Ngokuba sidalwe ngokomfanekiselo kaThixo kwanangokufana naye, kufanele sibonakalise, kangangoko kunokwenzeka, iimpawu zikaThixo ezibalaseleyo—kuquka isidima sakhe—kubomi bethu bemihla ngemihla. (Genesis 1:26) Ngokufanayo, okucacileyo kumyalelo ‘wokuthanda ummelwane wethu njengathi siqu’ yimfuneko yokusixabisa isidima sobuqu kwanokuzihlonela ngokulungeleleneyo. (Mateyu 22:39) Ingongoma ikukuba ukuba sifuna abanye babonakalise intlonelo kuthi baze basiphathe ngesidima, simele sibonise ukuba oku kuyasifanela.

Ingongoma ebalulekileyo yokuhlala uzihlonela uze ulondoloze isidima sobuqu kukuhlala unesazela esicocekileyo. Ukutyiwa sisazela kwanokuziva unetyala ngokulula kukhokelela kwiimvakalelo zokungazixabisi, udano kwanodandatheko. Ngenxa yoko, ukuba umntu wenze isono esinzulu, ufanele athabathe amanyathelo akhawulezileyo ukuze aguquke yaye afune uncedo lokomoya lwabadala ukuze anandiphe “amaxesha okuhlaziya . . . evela kuYehova ngenkqu.” Okubandakanyekileyo ekuhlaziyeni kukubuyiselwa kwesidima sobuqu kwanokuzihlonela.—IZenzo 3:19.

Kanti okona kubhetele kukwenza umgudu oqhubekayo wokulondoloza isazela sethu esiqeqeshwe yiBhayibhile, singavumeli nantoni na isingcolise okanye isenze buthathaka. Ukuqhelisela ukuzeyisa kwiinkalo zonke zobomi bemihla ngemihla—ukutya, ukusela, ishishini, ukuzonwabisa, ukuqhubana nabo besini esahlukileyo—kuya kusinceda sigcine isazela esicocekileyo kwaye kusenze sikwazi ukubonakalisa uzuko kwanesidima sikaThixo kubomi bethu.—1 Korinte 10:31.

Kuthekani ukuba ukuziva sinetyala ngeziphoso zethu akupheli? Okanye kuthekani ukuba iinkumbulo zokuxhatshazwa ziqhubeka zibangela iintlungu? Ezi zisenokusiphelisa isidima sobuqu zize zibangele udandatheko olunzulu. Hayi indlela athuthuzela ngayo amazwi oKumkani uDavide afumaneka kwiNdumiso 34:18 athi: “Usondele uYehova kwabantliziyo zaphukileyo, abasindise abamoya utyumkileyo”! UYehova ukulungele yaye unomdla wokuqinisa abakhonzi bakhe xa kufuneka bahlangabezane nodandatheko kwaneemvakalelo zokuziva bengaxatyiswanga. Ukukhunga kwanokufuna uncedo kwabo bafanelekileyo ngokomoya, njengabazali abangamaKristu, abadala kwabanye abaqolileyo ebandleni, yindlela yokubuyisela ukuzihlonela kwanesidima sobuqu.—Yakobi 5:13-15.

Kwelinye icala, sifanele siwazi umahluko phakathi kwesidima sobuqu nekratshi. Isiluleko seZibhalo sikukuba ubani “angazicingeli ngakumbi kunokuba kuyimfuneko ukuzicingela; kodwa makacinge khon’ ukuze abe nengqondo ephilileyo, ngamnye njengoko uThixo amabele umlinganiselo wokholo.” (Roma 12:3) Nangona kufanelekile ukuhlakulela ukuzihlonela, asifuni ukukubaxa ukuxabiseka kwethu okanye sibhidanise isidima somntu kwanokuzingca kwanemigudu engaphaya abanye abayenzayo ukuze babonakale bengoothile kwabanye.

Ewe, ukuhlonela isidima somnye yimfuneko yamaKristu. Amalungu entsapho kwanamanye amaKristu onke ayakufanelekela yaye ayakufuna ukuhlonelwa, ukubekwa kwanokugqalwa njengothile. UYehova unike ngamnye wethu umlinganiselo wesidima kwanokuhlonelwa esifanele siwamkele size siwulondoloze. Kodwa ngaphezu kwako konke, kumele sihlakulele intlonelo ngesidima esibalaseleyo kwanobungangamsha boBawo wethu wasemazulwini, uYehova uThixo.

[Umfanekiso okwiphepha 31]

Abaselula basenokubonakalisa intlonelo kwabo bayimilwelwe