Ngaba Ubaphatha Ngesidima Abanye Xa Ubaluleka?

HAYI indlela ekulunge nekuyingenelo ngayo ukululekwa ngesidima! UEdward uthi: “Ukululekwa ngobubele, ngolwazelelelo, nangenyameko kuphumela kulwalamano oluhle.” UWarren uthi: “Xa uvakalelwa kukuba lowo ukululekayo ukubonisa imbeko yaye uyakuhlonela ngokukulungela ukuphulaphula oko wena ukutshoyo, kulula ngakumbi ukusamkela eso siluleko.” UNorman uthi: “Xa lowo undilulekayo endiphatha ngentlonelo, kuba lula ngam ukuthetha naye, ndimcele andiluleke.”

Ilungelo Lomntu Lokwemvelo Lokuphathwa Ngesidima

Isiluleko sobubele, sobuhlobo, nesothando sisoloko samkelekile. Ukululeka abanye ngendlela ongathanda ukululekwa ngayo kuyingenelo. (Mateyu 7:12) Umluleki olungileyo uzinika ixesha lokuphulaphula yaye uzama ukumqonda lowo ululekwayo—indlela acinga ngayo, imeko yakhe neemvakalelo zakhe—kunokumgxeka nokumgweba.—IMizekeliso 18:13.

Abaluleki banamhlanje, kuquka abadala abangamaKristu, kufuneka bakuphaphele ukubaphatha ngesidima abanye xa bebaluleka. Ngoba? Ngenxa yesizathu esilula sokuba isimo sengqondo esixhaphakileyo ebuthweni kukuqhubana ngendlela engabonisi sidima nabanye. Yaye oku kuyasulela. Ngokufuthi abo ulindele ukuba bakuphathe ngesidima baba ngabokuqala ukungenzi njalo, enokuba zizifundiswa, iinkokeli zonqulo okanye abanye. Ngokomzekelo, kwindawo yengqesho ukugxothwa emsebenzini kungamava abuhlungu nabangela uxinezeleko kumqeshi nakumqeshwa. Kuyingozi ekuzixabiseni kukabani, ngokukodwa ukuba lowo ugxothwayo akaphathwanga ngesidima. IThe Vancouver Sun ithi abaphathi emsebenzini xa besenza oku bamele bafunde indlela yokuchaza “ezi ndaba zibuhlungu ngendlela yokuba zivakale ngokucacileyo yaye bangathethi izinto ezingeyomfuneko, nangendlela echubekileyo, baze bangasiphazamisi isidima saloo mntu.” Ewe, bonke abantu bafanele baphathwe ngesidima.

INgqungquthela yeZizwe Ezimanyeneyo ithi: “Bonke abantu bazalwa bekhululekile yaye belingana ngesidima nangamalungelo. Banikwe amandla okuqiqa nesazela yaye bafanele baphathane ngomoya wobuzalwana.” Ekubeni isidima sabantu sihlaselwa, kungezizathu ezivakalayo le nto uMgaqo-siseko weZizwe Ezimanyeneyo nentshayelelo yeSibhengezo Sazwenibanzi Samalungelo Abantu zilugqala olu phawu. Zivakalisa “ukukholwa kumalungelo abantu asisiseko, kwisidima nokufaneleka komntu.”

UYehova Wamdala Umntu Wanesidima

UYehova nguThixo wesidima. Ngokuchanileyo iLizwi lakhe eliphefumlelweyo lithi, “Yindili nobungangamela phambi kwakhe,” libuye lithi, “Uwambathise amazulu ngendili [yakhe].”—1 Kronike 16:27; INdumiso 8:1.

NjengoThixo onesidima noMongami Wendalo Iphela, uzinika isidima zonke izidalwa zakhe, ezisezulwini nezisemhlabeni. Esona sibalaseleyo kwezo zinikwe le mbeko nguNyana wakhe onobuqaqawuli nolawulayo, uKumkani, uKristu Yesu. Eprofeta uDavide wabhala wathi: “Ubeka phezu kwakhe indili nobungangamela.”—INdumiso 21:5; Daniyeli 7:14.

Okulusizi kukuba, eli lungelo labantu lisisiseko liye lasetyenziswa kakubi gqitha ukutyhubela imbali. Isithunywa sezulu esinamandla, esathi ngezenzo zaso saba nguSathana uMtyholi, sakucel’ umngeni ukulunga, ubulungisa nokufaneleka kolongamo lukaThixo. Ngokwenjenjalo sabonisa ukungamhloneli uYehova saza asaliphatha ngambeko igama lakhe elinesidima ngoxa sasicel’ umngeni ilungelo lakhe lokulawula. Sabanga isidima esigqithiseleyo. NjengoMtyholi, ookumkani babantu abanamandla, njengoNebhukadenetsare ngamaxesha okubhalwa kweBhayibhile, baye baqhayisa ‘ngobuhandiba nobungangamsha babo.’ Baye basihlasela isidima sikaYehova, bezinika bona isidima ngokungekho ngqiqweni. (Daniyeli 4:30) Ulawulo olucinezelayo lukaSathana, phezu kwehlabathi labantu, luye lwasihlasela ibe lusaqhubeka lusihlasela isidima sabantu.

Ngaba sakha sajongelwa phantsi isidima sakho? Xa ululekwa, ngaba wakha wenziwa waziva unetyala, uneentloni, uhlazekile okanye uthotywe ngokugqith’ emgceni? UAndré uthi: “Andizange ndibone nto ibonisa inkxalabo, imfesane, nesidima. Ndenziwa ndaziva ndingento yanto,” aze ongezelele athi: “Oku kwakhokelela kwiimvakalelo zokudana nexhala, kwanodandatheko.” ULaura uthi: “Kunzima ukusamkela isiluleko xa sivela kuthile ovakalelwa kukuba akayikhathalele intlalo-ntle yakho.”

Ngenxa yesi sizathu, abaveleli abangamaKristu babongozwa ukuba bawuphathe ngentlonelo nangembeko umhlambi kaThixo. (1 Petros 5:2, 3) Ukuba kuvela iimeko ezibangela kube yimfuneko yaye kube yingenelo ukululeka abanye, unokuzikhusela njani ekucingeni nasekuziphatheni njengabantu behlabathi abathi, ngaphandle kokulibazisa, basisingele phantsi isidima sabanye? Yintoni enokukunceda usilondoloze isidima samanye amaKristu, kwakunye nesakho?—IMizekeliso 27:6; Galati 6:1.

Imigaqo Elondoloza Isidima

ILizwi likaThixo liyathetha ngalo mbandela. Umluleki onobuchule uya kukholosa ngokupheleleyo ngesiluleko seLizwi likaThixo, kunokukhangela kubulumko beli hlabathi. IMibhalo eNgcwele iqulethe amacebiso axabisekileyo. Xa elandelwa, enza lowo ululekayo nalowo ufundiswayo babe nesidima. Ngaloo ndlela, uPawulos wayalela umveleli ongumKristu uTimoti wenjenje: “Indoda enkulu musa ukuyithethisa kabukhali, yiyale njengoyihlo; amancinane, njengabazalwana; abafazi abakhulu, njengoonyoko; abancinane, njengoodade, unobunyulu bonke.” (1 Timoti 5:1, 2) Hayi indlela olunokuphetshwa ngayo usizi, ukwenzakaliswa kweemvakalelo, nokuphoxeka ngokubambelela kule migaqo!

Phawula ukuba undoqo wokululeka ngokunempumelelo yintlonelo efanelekileyo ngomnye umntu nelungelo lakhe lokuphathwa ngendlela enesidima nenkathalo. Abadala abangamaKristu, kuquka nabaveleli abahambahambayo, bafanele bazabalazele ukulandela eli cebiso, bezama ukufumanisa isizathu sokuba lowo kufuneka elungisiwe acinge yaye enze izinto ngendlela enza ngayo. Bafanele bafune ukuva imbono yakhe, baze bazame kangangoko ukukuphepha ukwenza lowo uncedwayo azive eneentloni, ethotyiwe okanye ehlazekile.

Njengomdala, menze umzalwana wakho azi ukuba umkhathalele yaye ufuna ukumnceda kwiingxaki zakhe. Wenjenjalo ugqirha onobuchule xa utyelele iofisi yakhe ufuna ukuxilongwa. Ingcamango yokukhulula kwigumbi elinganiki mdla, elingenazintsholongwane isenokukushiya uneentloni yaye uhlazekile. Hayi indlela omxabisa ngayo ugqirha obonisa ulwazelelelo ngokuzixabisa kwakho nokuphatha ngesidima ngokukunika into yokwambatha ngoxa eqhubeka ekuxilonga ukuze afumane unobangela wokugula kwakho! Ngokufanayo, umluleki ongumKristu obonisa intlonelo efanelekileyo ngomntu unobubele yaye akagungqi kokulungileyo, ukanti umambathisa isidima lowo amlulekayo. (ISityhilelo 2:13, 14, 19, 20) Ngokuchasene noko, isiluleko esingqwabalala, esingenabubele, nesibonisa ukungabi nazimvakalelo sifana nokukhulula kokomfuziselo okukwenza uzive uneentloni, uhlazekile yaye uhlutywe isidima sakho.

Abaveleli beSikolo Sobulungiseleli Sobuthixo bakuphaphela ngokukodwa ukululeka ngesidima. Xa beluleka abakhulileyo, babonisa uthando olufanayo ebebeya kulubonisa kubazali babo bokwenyama. Banolwazelelelo, banobuhlobo yaye banobubele. Ulwazelelelo olunjalo luyimfuneko. Lukhulisa umoya olungele ukunikelwa nokwamkelwa ngokufanelekileyo kwesiluleko.

Badala, khumbulani ukuba isiluleko esisebenzisekayo siyavuselela, siyakhuthaza, siyakha yaye singqalile. Eyabase-Efese 4:29 ithi: “Makungaphumi nanye intetho ebolileyo emlonyeni wenu; mayibe yesukuba ilungele ukuxuma [“ukwakha,” NW] oko kuluncedo, ukuze ibabale abevayo.”

Akukho mfuneko yakusebenzisa intetho, amazwi okanye ukuqiqa ngendlela engqwabalala. Kunoko, ukuhlonela omnye umntu nomnqweno wokulondoloza iimvakalelo zakhe zokuzixabisa nokuzihlonela kukushukumisela ukubeka imicimbi ngendlela engqalileyo neyakhayo. Ngaphambi kwawo nawaphi na amagqabaza mncome ngokunyanisekileyo ngazo naziphi na iingongoma okanye iimpawu zakhe ezintle, kunokubethelela iimbono ezimenza azive edanile okanye engento yanto. Ukuba ukhonza njengomdala, sebenzisa ‘igunya lakho ukuba wakhe, ungachithi.’—2 Korinte 10:8.

Ewe, umphumo waso nasiphi na isiluleko esinikelwe ngumveleli ongumKristu ufanele ube kukukhuthaza njengokuba kufuneka, ukubabala. Asifanele sidimaze okanye ‘soyikise.’ (2 Korinte 10:9) Kwanalowo wenze isiphoso esinzulu ufanele aboniswe umlinganiselo othile wentlonelo nesidima. Isiluleko simele silungelelaniswe namazwi obubele, kodwa angqongqo okukhalimela ukuze amshukumisele kwinguquko.—INdumiso 44:15; 1 Korinte 15:34.

Okuphawulekayo kukuba uMthetho kaThixo kumaSirayeli wawunale migaqo ifanayo. Wawukuvumela ukunikelwa kwesiluleko kwanengqeqesho yasemzimbeni, ngoxa kwangaxeshanye wawulondoloza ilungelo laloo mntu lesidima sakhe njengomntu. Ukubethwa imivumbo “ngokulingene nokungabi ndawo . . . , ngokwenani” kwakuvumelekile, kodwa kwakungamele kugqithiswe. Kwakumiselwe inani lemivumbo emayibethwe ukuze umenzi wobubi ‘angacukucezwa [“angahlaziswa,” NW]’—Duteronomi 25:2, 3.

KwanoYesu wayezixhalabele iimvakalelo zabenzi bobubi abaguqukayo. Eprofeta ngaye, uIsaya wathi: “Ingcongolo evikivekileyo akayi kuyaphula, umsonto oqhumayo akayi kuwucima; uya kuphumelelisa okusesikweni ngokwenyaniso.”—Isaya 42:3; Mateyu 12:17, 20; Luka 7:37, 38, 44-50.

Okuyibethelela ngakumbi imfuneko yovelwano ngamazwi kaYesu kwiNtshumayelo yaseNtabeni: “Zonke izinto ngoko enisukuba ninga bangazenza abantu kuni, yenzani ezikwanjalo nani kubo.” (Mateyu 7:12) Lo mgaqo ubaluleke ngokwenene ekukhuliseni ulwalamano oluhle kangangokuba ngokuqhelekileyo ubizwa ngokuba nguMthetho Omkhulu. Njengomdala ongumKristu, unokukunceda njani ubaphathe ngobubele nangesidima abanye xa ubaluleka?

Khumbula ukuba nawe uyazenza iimpazamo. Njengokuba uYakobi waphawulayo, “siyakhubeka kaninzi sonke.” (Yakobi 3:2) Ukukhumbula oku kuya kukunceda uwabale amazwi akho yaye uzilawule iimvakalelo zakho xa kufuneka uthethe nabanye ngeentsilelo zabo. Ukhumbula ukuba nabo baneemvakalelo. Oku kuya kukunceda ukuphephe ukugxeka ngokugqithiseleyo, utsalela ingqalelo kwiimpazamo okanye iintsilelo ezingenamsebenzi. UYesu wakubethelela oku xa wathi: “Musani ukugweba, ukuze ningagwetywa. Kuba ngogwebo enigweba ngalo, niya kugwetywa kwangalo nani; nangomlinganiselo enilinganisela abanye ngawo, niya kulinganiselwa kwangawo nani.”—Mateyu 7:1, 2.

Baphathe Ngesidima Abanye—Mchase UMtyholi

Amaqhinga kaSathana enzelwe ukukuhluba isidima, ukukwenza ube neemvakalelo zokuhlazeka, zokungabi nto yanto nokuphelelwa lithemba. Phawula indlela awamsebenzisa ngayo uthunywashe ongumntu ukuze akhulise iimvakalelo ezingakhuthaziyo kuYobhi othembekileyo. UElifazi ongumhanahanisi wathi: “[UYehova] akakholwa ngabakhonzi bakhe, nezithunywa zakhe [ezingcwele] uthi zingabaphosisi; bangabeka phi na ke abahlala ezindlwini zodaka [abantu abanesono], abasiseko siseluthulini, abatyunyuzwa njengamanundu?” (Yobhi 4:18, 19) Ngoko ngokutsho kwakhe, uYobhi wayengaxabisekanga ngaphezu kwenundu kuThixo. Eneneni, isiluleko sikaElifazi namaqabane akhe, kunokuba sibe sesakhayo, sasiya kumshiya uYobhi engasawakhumbuli namaxesha amnandi. Ngokwembono yabo ukuthembeka kwakhe kwangaphambili, uqeqesho awalunikela kwintsapho yakhe, ulwalamano lwakhe noThixo nezipho zakhe zenceba zazingabalulekanga nganto.

Ngokufanayo namhlanje, abenzi bobubi abaguqukayo basenokuba nazo iimvakalelo ezinjalo, yaye kukho ingozi yokuba basele ‘bedliwa kukuba buhlungu ngokugqithiseleyo.’ Badala, xa niluleka abanjalo, “luzinziseni uthando” lwenu kubo ngokubavumela babe nomlinganiselo othile wesidima. (2 Korinte 2:7, 8) UWilliam uthi: “Ukuphathwa ngendlela engabonisi sidima kwenza kube nzima ukwamkela isiluleko.” Kubalulekile ukuqinisa inkolelo yabo yokuba baxabisekile emehlweni kaThixo. Bakhumbuzeni ukuba uYehova ‘akanantswela-bulungisa ukude awulibale umsebenzi wabo, nomzamo wothando abalubonakalalisa kulo igama lakhe’ ebudeni beminyaka edlulileyo yokukhonza ngokuthembeka.—Hebhere 6:10.

Ngabaphi oothunywashe abongezelelekileyo abanokukunceda ubaphathe ngesidima abanye xa ubaluleka? Khumbula ukuba ngokwemvelo bonke abantu banelungelo lokuphathwa ngesidima, ekubeni benziwe ngokomfanekiselo kaThixo. Baxabisekile kuYehova uThixo noYesu Kristu; ilungiselelo lentlawulelo nelovuko liyasingqinela eso sibakala. UYehova uwanika isidima esongezelelekileyo amaKristu ‘ngokuwamisela ebulungiselelini,’ ewasebenzisa ukuba abongoze isizukulwana esingendawo ukuba sixolelaniswe noThixo.—1 Timoti 1:12.

Badala, khumbulani ukuba inkoliso yabazalwana benu abangamaKristu inethemba lokuba ngabaseki bebutho elitsha loluntu kumhlaba ocociweyo. Njengabantu abaxabiseke kangako, bafanelwe banikwe imbeko. Xa niluleka, khumbulani indlela uYehova noYesu abababonisa ulwazelelelo ngayo, nize niqhubeke nisenza okusemandleni enu ukunceda abazalwana benu balondoloze imvakalelo yokuzixabisa xa bejamelene nocelomngeni lukaSathana.—2 Petros 3:13; thelekisa eyoku-1 kaPetros 3:7.

[Ibhokisi ekwiphepha 29]

Isiluleko Esinesidima

(1) Ncoma ngokunyanisekileyo. (ISityhilelo 2:2, 3)

(2) Yiba ngumphulaphuli olungileyo. Yichaze ngokucacileyo nangobubele ingxaki nesizathu sesiluleko. (2 Samuweli 12:1-14; IMizekeliso 18:13; ISityhilelo 2:4)

(3) Isiluleko sakho sisekele eZibhalweni. Yiba ngowakhayo, osengqiqweni, nokhuthazayo, yaye bonisa uvelwano. Mgcine lowo umlulekayo enesidima yaye ezihlonela. (2 Timoti 3:16; Tito 3:2; ISityhilelo 2:5, 6)

(4) Mqinisekise lowo umlulekayo ukuba uya kusikelelwa ngokusamkela nokusisebenzisa isiluleko. (Hebhere 12:7, 11; ISityhilelo 2:7)

[Umfanekiso okwiphepha 26]

Abadala abangamaKristu kufuneka babaphathe ngesidima abanye xa bebaluleka