Ukunceda Abo BaneMCS
UKUNGEVANI nezinto eziqhelekileyo, enoba ziziqholo okanye zizinto zokucoca, akubangeli abaguli bagule kuphela, kodwa kubabangela babe nengxaki nabantu. Kungokwemvelo ukuba abantu bathande ukuhlala kunye, kodwa ukungevani ngokupheleleyo nemichiza (MCS) kukhokelela abantu abanobubele, abathanda ukonwaba ukuba babe ngamalolo. UShelly oneMCS uthi: “Ndikhe ndanezinye izigulo ngaphambili, kodwa esi sihamba sodwa. Eyona nto inzima ngaso kukuba sikwenza unkom’ idla yodwa.”
Okulusizi kukuba, abantu abaneMCS maxa wambi badla ngokujongwa njengabangaqhelekanga. Kambe ke, esinye isizathu sikukuba iMCS yingxubakaxaka elingekaqhelani nayo ihlabathi. Kodwa ukungabi nalwazi ngeMCS akumele kube ngunobangela wokuba bakrokrelwe abo banayo. Ulindixesha iAmerican Family Physician uthi: “Aba baguli basengxakini ngokwenene ngenxa yeempawu zabo.”
Kunokuba sibakrokrele abantu abaneMCS ngenxa yokuba isigulo sabo sisothusa yaye singaziwa kakuhle, umntu olumkileyo umele alawulwe ngulo mgaqo ukwiMizekeliso 18:13: “Ukuba nabani na uphendula umbandela ngaphambi kokuwuva, bubudenge obo kuye nokuthotywa.” Hayi indlela ekulunge ngakumbi ngayo ukubonisa uthando olufana nolukaKristu kubo bonke abagulayo, ngaphandle komkhethe! Asisayi kuzisola ngokubonisa uthando ngolo hlobo, enoba inzululwazi yezamayeza ivelise ntoni kwikamva.
Ukubonisa Uthando Olufana NolukaKristu
Uthando olufana nolukaKristu lufana nedayimani enamacala amahle ukuze afanele isihlandlo esithile okanye imfuno. Xa umhlobo eneMCS, uthando olufana nolukaKristu lufanele lusibangele sibonise uvelwano, lusenza sizibeke endaweni yakhe. Kwakhona, uthando “alufuni ezalo izilangazelelo”—okanye sisenokuthi, amalungelo alo. Lubeka kuqala impilontle yabanye. Lusinceda ukuba ‘sizeke kade umsindo, sithwale izinto zonke, sikholelwe izinto zonke, size sinyamezele izinto zonke.’ Uthando olunjalo “aluze lutshitshe.”—1 Korinte 13:4-8.
UMary akanaMCS, kodwa abanye babahlobo bakhe banayo. UMary ubhala athi: “Mna ndiyasithanda isiqholo, kodwa ndikhetha ukungasisebenzisi xa ndityelela abo baneMCS.” Ngendlela yakhe, exelisa uYesu, uMary uthi, ‘Ndithanda ukunceda.’ (Marko 1:41) UTrevor waba neMCS eseyimveku. Unina uthi: “Abantu endiye ndasebenza nabo baye bahlengahlengisa ukuze kungenelwe unyana wam.” UJoy, ongomnye wamaNgqina kaYehova ohlala eOstreliya nemphethe kakubi gqitha iMCS, uthi ukhuthazwa ngabahlobo nezalamane abamtyelela rhoqo nababonisa ukuba bayayiqonda ingxaki yakhe.
Kwelinye icala, abantu abaneMCS bafanele bazame ukubanyamezela abo basebenzisa iziqholo bekho. UErnest, ocatshulwe kwinqaku elandulelayo, wathi kuVukani!: “Isigulo sethu ngumthwalo esifanele siwuthwale. Abanye abantu nabo baneengxaki zabo, ngoko siyabaxabisa xa besincedisa kwezethu.” Ewe, ukucela intsebenziswano, ungayinyanzelisi, kusoloko kulelona cebo. ULorraine uthi: “Xa umntu osebenzise isiqholo endibuza ukuba kutheni ndikhangeleka ndingaphilanga nje, ndiyamxelela ukuba, ‘ndinengxaki neziqholo yaye ingathi iqatsele ngokuhlwanje.’ Idla ngokwanela loo nto kubantu abanengqiqo.” Kambe ke, loo nto ayithethi ukuba ukuba uneMCS akunakubakhumbuza ngobubele abahlobo ukuba ufuna uncedo lwabo.
Kwelinye icala uPam, ocatshulwe ngaphambilana ubhala athi: “Zonke iinzingo esizifumanayo zezokwexeshana.” Kutheni uPam esithi “zezokwexeshana”? Kungenxa yokuba ithemba lakhe elisekelwe eBhayibhileni lelokuba uBukumkani bukaThixo buya kususa konke ukubandezeleka emhlabeni. Buya kude butshayele nokufa—into ajamelana nayo noyena mntu uphilileyo.—Daniyeli 2:44; ISityhilelo 21:3, 4.
Okwangoku, bonke abo kufuneka benyamezele izigulo ezinganyangekiyo okwangoku banokukhangela phambili kwixesha apho, phantsi kolawulo loBukumkani bukaThixo, ‘kungayi kubakho mntu uthi: “Ndiyagula.”’ (Isaya 33:24) Njengoko sinyamezela naziphi na izilingo kule nkqubo ikhoyo yezinto, sonke masizabalazele ukuba njengoYesu size sikhangele kumvuzo obekwe phambi kwethu.—Hebhere 12:2; Yakobi 1:2-4.
[Ibhokisi/Umfanekiso okwiphepha 25]
Ukuthandana
Le migaqo yeBhayibhile ilandelayo inokukunceda ukuba unomhlobo okanye isalamane esingevani kwaphela nemichiza (MCS) okanye ukuba nawe unayo:
“Zonke izinto, ngoko, enifuna abantu bazenze kuni, yenzani ngokunjalo nani kubo.”—Mateyu 7:12.
“Uze umthande ummelwane wakho njengawe siqu.”—Mateyu 22:39.
“Masinyamekelane, sivuselelane eluthandweni nasemisebenzini emihle, singakutyesheli ukuhlanganisana kwethu ndawonye, njengoko kulisiko labathile ukwenjenjalo, kodwa masikhuthazane, ngokungakumbi njengoko nibona ukuba imini iyasondela.” (Hebhere 10:24, 25) Sonke siyakufuna ukukhuthazwa ngokomoya, ingakumbi xa sigula. Kuyancomeka ukuba, amaKristu amaninzi aneMCS enza umgudu wokubakho kwiintlanganiso zebandla; abanye abagula kakhulu maxa wambi babakho ngokunxibelelana ngomnxeba. Kwezinye iimeko kuye kwalungiselelwa iindawo ezingenaziqholo kwiiHolo zoBukumkani kusenzelwa abantu abaneMCS. Kodwa oku kusenokungasoloko kusenzeka.
“Musani ukulibala ukwenza okulungileyo . . . , kuba uThixo uyakholiswa yimibingelelo enjalo.” (Hebhere 13:16) Phawula ukuba ukwenza okuhle kusoloko kufuna ukuba sincame okuthile. Ngaba ukulungele ukuncama okuthile ukuze uncede umntu oneMCS? Kwelinye icala, abantu abaneMCS kufuneka babe sengqiqweni ngezinto abazilindele kwabanye. Ngokomzekelo, abadala abangamaKristu abanakwenza imigaqo ngokusetyenziswa kweziqholo, okanye basoloko besenza izaziso ngoko. Ukongezelela, abantu abasandul’ ukuba nomdla neendwendwe ezifake iziqholo ziyeza kwiintlanganiso—yaye siyazamkela. Ngokuqinisekileyo asifuni kubaphoxa okanye sibenze bazive bemadolw’ anzima kuba besebenzisa iziqholo.
‘Funa uxolo uze uluphuthume.’ (1 Petros 3:11) Licacile elokuba, imibandela yempilo ayifanele iwahluthe uxolo amaKristu. UYakobi 3:17 uthi: ‘Ubulumko obuvela phezulu boboxolo, bunengqiqo, buzele yinceba.’ Abantu abanoxolo, enoba baneMCS okanye abanayo, abasayi kuzibaxa izinto okanye banyanzelise ngokuphathelele ukusetyenziswa okanye ukungasetyenziswa kwemichiza. Ngokufanayo, abantu abanengqiqo ‘abazele yinceba’ baya kukuphepha ukunyanzelisa ilungelo labo lokusebenzisa iziqholo ukuba bayaqonda ukuba ziyayichaphazela impilo yomnye umntu. Ngale ndlela babonisa ukuba nabo bafuna ‘iimeko zoxolo’ yaye “benza uxolo.”—Yakobi 3:18.
Kwelinye icala, isimo sengqondo sokungabi bhetyebhetye, nokungabi sengqiqweni, enoba siboniswa ngulowo uneMCS okanye ngomnye umntu, sifana nento eyahlulahlula abantu. Isimo sengqondo esinjalo asincedi mntu yaye sinokulwenzakalisa ulwalamano lwakhe noThixo.—1 Yohane 4:20.
Kambe ke, amaKristu anesixhobo esiluncedo—umoya kaYehova. Njengoko ngokuthe rhoqo ebongoza uYehova ukuba awanike umoya wakhe, ahlakulela iziqhamo zawo ezimangalisayo, ingakumbi uthando—“umxokelelwane ogqibeleleyo womanyano.” (Kolose 3:14) Kwangaxeshanye, ngomonde avumela loo moya ukuba ukhulise iimpawu ezifana nezikaKristu kwabanye.—Galati 5:22, 23.
[Umfanekiso okwiphepha 26]
Abantu abaneMCS bafuna abahlobo ngaphezu kokuba abanye abantu benjalo