Uthando LukaKristu Lusenza Sithande Abanye

“UYesu, ebathandile abakhe ababesehlabathini, wabathanda de kwasekupheleni.”—YOH. 13:1.

1, 2. (a) Yintoni ebalaseleyo ngothando lukaYesu? (b) Ngawaphi amathuba okubonakalisa uthando esiza kufunda ngawo kweli nqaku?

UYESU wamisela umzekelo ogqibeleleyo wothando. Yonke into awayeyenza—indlela awayethetha nawayesenza ngayo izinto, iimfundiso zakhe nokufa kwakhe okulidini—yabonisa uthando lwakhe. UYesu wabonakalisa uthando kwabo wayedibana nabo ingakumbi kubafundi bakhe de kwasekufeni kwakhe.

² UYesu wamisela abalandeli bakhe umzekelo obalaseleyo wothando nabafanele bawuxelise. Usenza sithande abazalwana noodadewethu bokomoya nabanye abantu. Kweli nqaku, siza kufunda indlela abadala abanokumxelisa ngayo uYesu ngokubonakalisa uthando kwabo benze iziphoso nabo benze izono ezinzulu. Siza kuxubusha nendlela uthando lukaYesu oluwakhuthaza ngayo amaKristu ukuba ancede abazalwana bawo ngamaxesha obunzima, entlekele naxa begula.

3. Nangona uPetros wenza impazamo enzulu, uYesu wamjonga njani?

³ Ngobusuku obungaphambi kokuba uYesu afe, umpostile wakhe uPetros wamkhanyela izihlandlo ezithathu. (Marko 14:66-72) Kodwa emva kokubuya kwakhe, njengoko uYesu wayetshilo, wamxolela. UYesu wanika uPetros iimbopheleleko ezininzi. (Luka 22:32; IZe. 2:14; 8:14-17; 10:44, 45) Yintoni esiyifundayo kwindlela uYesu awabaphatha ngayo abo babenze izono ezinzulu?

Bonisa Isimo Sengqondo SikaKristu Kwabo Bonileyo

4. Yiyiphi imeko ekudla ngokufuneka kubonakaliswe isimo sengqondo sikaKristu kuyo?

⁴ Kunzima kakhulu ukubonakalisa isimo sengqondo sikaKristu, ingakumbi xa kukho umntu owone ngokunzulu entsatsheni okanye ebandleni. Okubuhlungu kukuba, kule nkqubo kaSathana ifikelela esiphelweni, umoya wehlabathi uya usiba nempembelelo ngakumbi. Isimo sengqondo esibi sehlabathi sinokusosulela enoba sisebatsha okanye sibadala size siyeke ukuhamba ngendlela emxinwa. Ngenkulungwane yokuqala, abanye kwafuneka basuswe kwibandla lobuKristu ukanti abanye babekelwa imiqathango. Kuyafana nanamhlanje. (1 Kor. 5:11-13; 1 Tim. 5:20) Sekunjalo, xa abadala abasingatha iingxaki ezinjalo bebonisa uthando olufana nolukaKristu, lowo wonileyo unokuncedakala.

5. Abadala banokusibonakalisa njani isimo sengqondo sikaKristu kwabo bonileyo?

⁵ Abadala bafanele babambelele kwimilinganiselo kaYehova yobulungisa njengoYesu ngalo lonke ixesha. Xa besenjenjalo babonisa ukuba banobulali, ububele nothando njengoYehova. Xa umntu eguquke ngokwenene, ‘aphuke intliziyo’ yaye ‘enomoya otyumkileyo’ ngenxa yesono asenzileyo, kuya kuba lula ukuba abadala ‘bamlungise ngomoya wobulali umntu onjalo.’ (INdu. 34:18; Gal. 6:1) Kodwa bafanele bamphathe njani umntu ovukelayo nongabonakalisi kuzisola?

6. Yintoni abafanele bayiphephe abadala xa bethetha nomntu owonileyo, yaye ngoba?

⁶ Xa umntu owonileyo engasamkeli isiluleko seZibhalo okanye ebek’ ityala kwabanye, abadala nabanye abantu basenokucaphuka. Kuba besazi umonakalo owenziwe nguloo mntu, basenokufuna ukuvelisa izimvo zabo ngesenzo nesimo sengqondo sakhe. Noko ke, umsindo uyingozi yaye awubonisi ukuba umntu ‘unengqondo kaKristu.’ (1 Kor. 2:16; funda uYakobi 1:19, 20.) UYesu wayengagwegwelezi xa elumkisa abanye, kodwa wayengathethi kakubi okanye abakhubekise. (1 Pet. 2:23) Kunoko, wayevulela lowo wonileyo ithuba lokuba aguquke aze abuyele kuYehova. Eneneni, esinye sezizathu eziphambili zokuza kukaYesu emhlabeni ‘yayikukuze asindise aboni.’—1 Tim. 1:15.

7, 8. Luluphi ukhokelo olusetyenziswa ngabadala xa besingatha imicimbi yokugweba?

⁷ Umzekelo kaYesu kule nkalo ufanele usenze sibajonge njani abo bafanele bohlwaywe ebandleni? Khumbula ukuba ilungiselelo leZibhalo lekomiti egwebayo yebandla likhusela umhlambi yaye linokumnceda umoni ukuba aguquke. (2 Kor. 2:6-8) Okubuhlungu kukuba abanye abaguquki yaye kuye kufuneke basuswe kubudlelane, kodwa kuyavuyisa ukwazi ukuba abaninzi babo babuyela kuYehova nasebandleni lakhe. Xa abadala benesimo sengqondo sikaKristu, benza kube lula ngomntu owonileyo ukuba aguquke aze abuyele ebandleni. Emva kwexesha, abanye kwaba bonileyo basenokuzilibala ezinye zeziluleko zeZibhalo abazifumana kubadala, kodwa ngokuqinisekileyo baya kuhlala bekhumbula ukuba babaphatha ngesidima nothando.

⁸ Ngoko abadala, bafanele babonakalise “isiqhamo somoya,” ingakumbi uthando olufana nolukaKristu kwanaxa kunzima. (Gal. 5:22, 23) Abafanele bakhawuleze ukumsusa ebandleni umntu owonileyo. Bafanele babonise ukuba bafuna abantu abonileyo babuyele kuYehova. Ngoko ke xa umoni eguquka, njengoko abaninzi bedla ngokwenjenjalo, uya kuba nombulelo kuYehova ‘nakwizipho ezingabantu’ eziye zenza kwaba lula ukuba abuyele ebandleni.—Efe. 4:8, 11, 12.

Ukubonisa Uthando Olufana NolukaKristu Kweli Xesha Lesiphelo

9. Zekelisa indlela uYesu awabonisa ngayo uthando kubafundi bakhe.

⁹ ULuka uchaza indlela uYesu awabonakalisa ngayo uthando. Esazi ukuba ekuhambeni kwexesha amajoni amaRoma ayeza kurhangqa isixeko saseYerusalem nto leyo yayiza kwenza kube nzima ukuphuma kuso, ngothando uYesu walumkisa abafundi bakhe: “Xa niyibona iYerusalem ingqongwe yimikhosi emise iintente, yazini ke ukuba kusondele ukuphanziswa kwayo.” Yintoni ababefanele bayenze? UYesu wabanika imiyalelo ecacileyo nengqalileyo. “Mabandule abo bakwelakwaYuda basabele ezintabeni, nabo baphakathi kuyo mabemke, nabo bakwiindawo ezisemaphandleni mabangangeni kuyo; ngokuba yimihla yokuphunyezwa kokusesikweni leyo, ukuze kuzaliseke konke okubhaliweyo.” (Luka 21:20-22) Emva kokubona umkhosi wamaRoma urhangqe iYerusalem ngowama-66 C.E., abafundi abathobelayo benza ngendlela ababeyalelwe ngayo.

10, 11. Ukucinga ngokusaba kwamaKristu eYerusalem ngenkulungwane yokuqala kunokusinceda njani ukuze siyixhobele “imbandezelo enkulu”?

¹⁰ Xa ayesaba eYerusalem, amaKristu kwafuneka abonise uthando olufana nolukaKristu kwamanye amaKristu kanye njengoko uKristu wabonisa uthando kuwo. Kwafuneka abelane ngezinto awayenazo. Kodwa inzaliseko yesi siprofeto sikaYesu ayizange iphelele kweso sixeko samandulo. Waxela kwangaphambili: “Kuya kubakho imbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona.” (Mat. 24:17, 18, 21) Ngaphambi kokuba loo ‘mbandezelo inkulu’ ifike, nasebudeni bayo, nathi sisenokujamelana nobunzima. Xa sinesimo sengqondo sikaKristu siya kukwazi ukunyamezela.

¹¹ Ngelo xesha, kuya kufuneka silandele umzekelo kaYesu wokubonisa uthando lokungazingci. Ebhekisela kule nkalo, uPawulos wathi: “Ngamnye wethu makakholise ummelwane wakhe koko kulungileyo ukuze akheke. Kuba kwanoKristu akazange azikholise yena ngokwakhe. . . . Ngamana ke uThixo onika unyamezelo nentuthuzelo anganenza nibe nesimo sengqondo esifanayo neso wayenaso uKristu Yesu.”—Roma 15:2, 3, 5.

12. Luhlobo luni lothando esifanele sibe nalo ngoku yaye ngoba?

¹² UPetros, owaxhamlayo kuthando lukaYesu wabongoza amaKristu ukuba abe ‘nomsa wobuzalwana ongenaluhanahaniso’ yaye ‘athobele inyaniso.’ Afanele ‘athandane kakhulu ngokusuka entliziyweni.’ (1 Pet. 1:22) Ezo mpawu zikaKristu sifanele sizibonise ngakumbi namhlanje. Bonke abantu bakaThixo bajamelene nobunzima. Akukho namnye ofanele athembele kweli hlabathi liwohlokayo njengoko oku kubonakala kwimeko yalo yezoqoqosho emaxongo. (Funda eyoku-1 kaYohane 2:15-17.) Kunoko, njengoko le nkqubo isondela esiphelweni, kufuneka sisondele ngakumbi kuYehova nakwamanye amaKristu asebandleni. UPawulos wathi: “Ngokuphathelele uthando lobuzalwana yibani nomsa omnye komnye. Ekuboniseni imbeko omnye komnye khokelani.” (Roma 12:10) NoPetros wakubethelela oku, wathi: “Ngaphezu kwezinto zonke, yibani nothando olunzulu omnye ngomnye, kuba uthando lugubungela inkitha yezono.”—1 Pet. 4:8.

13-15. Abanye abazalwana baye balubonisa njani uthando olufana nolukaKristu emva kokuthwaxwa kwabanye ziintlekele?

¹³ Ehlabathini lonke, amaNgqina kaYehova aziwa ngokuba nothando olufana nolukaKristu. Cinga ngamaNgqina anikela uncedo emva kokuba isiphango nenkanyamba zihlasele emazantsi eUnited States ngowama-2005. Exelisa umzekelo kaYesu, amatsha-ntliziyo angaphezu kwama-20 000, anceda abazalwana ababethwaxwe yiloo ntlekele yaye amaninzi awo ayeshiya amakhaya atofotofo nemisebenzi ehlawula imivuzo encumisayo.

¹⁴ Kwelinye ilizwe, emva kokuna kwesiphango, amanzi olwandle agubungela ummandla omalunga nama-80 eekhilomitha aza anyuka aya kufikelela kwiimitha ezili-10 ukuphakama. Akuba amanzi ewuthile, kwabakho umonakalo kwizindlu zabantu nakwezinye izakhiwo. Amatsha-ntliziyo angamaNgqina avela kumazwe aliqela afika eze kuncedisa, ephethe izixhobo zokusebenza nezinto zokwakha. Abanye oodade ababini abangabahlolokazi abazalwa kunye bapakisha impahla yabo elorini baza bahamba umgama ongaphezu kweekhilomitha ezingama-3 000 beye kuncedisa kuloo mmandla. Omnye wabo usancedisa kwikomiti yalapho yokunceda amaxhoba entlekele yaye unguvulindlela othe ngxi.

¹⁵ Kuye kwakhiwa okanye kwalungiswa amakhaya amaNgqina nawabanye abantu angaphezu kwama-5 600. Avakalelwa njani amaNgqina alapho ngale nkxaso ingaka yothando? Omnye udade onomzi owonakaliswa sesi siphango wafudukela kwikharavan encinane enophahla oluvuzayo yaye isitovu sakhe sasaphukile. Abazalwana bamakhela indlu efanelekileyo. Ezaliswe ngumbulelo kuYehova nakubazalwana bakhe, akazange akwazi ukuzibamba iinyembezi xa wayemi phambi kwendlu yakhe entle eyayisandul’ ukwakhiwa. Nasemva kokuba imizi yawo ilungisiwe, amanye amaNgqina aliqela aqhubeka ehleli kwiindawo ayexhwarhe kuzo kangangonyaka nangaphezulu. Kwakutheni? Ayevulele amatsha-ntliziyo awayeqhubeka nomsebenzi wokuncedisa ukuba ahlale kuloo mizi yawo yayisandul’ ukulungiswa. Angumzekelo omhle ngokwenene ekuxeliseni isimo sengqondo sikaKristu!

Ukubonisa Isimo Sengqondo SikaKristu Kwabagulayo

16, 17. Sinokusibonisa njani isimo sengqondo sikaKristu kubantu abagulayo?

¹⁶ Bambalwa kuthi abaye bahlaselwa ziintlekele zemvelo ezoyikekayo. Kodwa ke, sonke siba neengxaki zempilo okanye sigulelwe ngamalungu eentsapho zethu. Umzekelo wendlela uYesu awayebaphatha ngayo abantu abagulayo, uyasinceda kule nkalo. Ekubeni wayenothando, wayebasizela. Xa izihlwele zazisa abantu abagulayo kuye, “wabaphilisa bonke ababephatheke kakubi.”—Mat. 8:16; 14:14.

¹⁷ Namhlanje, amaKristu akanikwanga amandla okuphilisa njengoYesu, kodwa anovelwano ngabantu abagulayo. Alubonisa njani? Abadala babonisa isimo sengqondo sikaKristu ngokwenza amalungiselelo okuba kuncedwe abantu abagulayo ebandleni, belandela umgaqo okuMateyu 25:39, 40.a (Yifunde.)

18. Oodade ababini balubonisa njani uthando lokwenene, yaye waba yintoni umphumo?

¹⁸ Kakade ke, asingobadala kuphela abafanele bancede abanye. Cinga ngoCharlene oneminyaka engama-44 ubudala, owayenomhlaza waza waxelelwa ukuba uza kufa kwisithuba seentsuku ezilishumi. Bebona indlela umyeni wakhe owayexakeke ngayo emnyamekela, uSharon noNicolette bamncedisa kwezo ntsuku zakhe zokugqibela. Kwadlula iiveki ezintandathu esaphila, kodwa aba dade bamnyamekela de wafa. USharon uthi: “Kunzima xa usazi ukuba umntu akazukuphila. Kodwa uYehova wasomeleza. Oku kwasenza sasondela kuye kwaza nathi kwasimanyanisa.” Umyeni kaCharlene uthi: “Soze ndiyilibale indlela abasinceda ngayo aba dade babini banobubele. Banceda uCharlene wam othembekileyo ukuba akwazi ukunyamezela yaye nam bandomeleza. Ndibabulela ngokungazenzisiyo. Umoya wabo wokuzincama womeleza ukholo lwam kuYehova yaye wandenza ndanoxabiso ngothando lobuzalwana.”

19, 20. (a) Ziziphi iindlela ezintlanu uKristu awabonisa ngazo isimo sengqondo esihle esixubushe ngazo? (b) Yintoni ozimisele ukuyenza?

¹⁹ Kula manqaku mathathu, siye safunda iindlela ezintlanu uYesu awabonisa ngazo isimo sengqondo esihle nendlela esinokumxelisa ngayo. Masibe ‘nomoya wobulali size sithobeke ngentliziyo,’ njengoYesu. (Mat. 11:29) Masizame ukuphatha abanye ngobubele, nangona bengafezekanga yaye benobuthathaka. Masithobele yonke imithetho kaYehova kwanaxa sijamelene neemeko ezinzima.

²⁰ Okokugqibela, masithande bonke abazalwana bethu njengokuba noKristu wenjenjalo, “de kwasekupheleni.” Olo thando lungqina ukuba singabalandeli bakaYesu bokwenene. (Yoh. 13:1, 34, 35) Ewe, “uthando lwenu lobuzalwana maluqhubeke.” (Heb. 13:1) Ungazibandezi ekuboniseni uthando kwabanye! Zimisele ukudumisa uYehova nokunceda abanye! UYehova uya kukusikelela ngemigudu oyenzayo.

[Umbhalo osemazantsi]

Ngaba Ungachaza?

• Abadala banokusibonisa njani isimo sengqondo sikaKristu kubantu abonileyo?

• Kutheni kubaluleke ngakumbi ukubonisa uthando njengoKristu kule mihla yokugqibela?

• Sinokusibonisa njani isimo sengqondo sikaKristu kwabagulayo?

[Umfanekiso okwiphepha 17]

Abadala bafuna abo bonileyo babuyele kuYehova

[Umfanekiso okwiphepha 18]

AmaKristu awasaba eYerusalem asibonisa njani isimo sengqondo sikaKristu?

[Umfanekiso okwiphepha 19]

AmaNgqina kaYehova ayaziwa ukuba anothando olunjengolukaKristu