Ngaba Ukuphumelela Ngokwezinto Eziphathekayo Kunokuqinisekisa Ulonwabo?
“KUBAFUNDI abamalunga nama-50 esikolweni sethu, kuphela yayingom-1 okanye aba-2 ababenxiba izihlangu,” ukhumbula oko uPoching oneminyaka engama-45 ubudala, owakhulela emazantsi eTaiwan ebudeni beyee-1950. “Sasingenamali yakuzithenga. Noko ke, asizange sizigqale singamahlwempu. Sasinako konke esasikufuna.”
Oko kwakumalunga neminyaka engama-40 eyadlulayo. Ukususela ngoko, ubomi buye baguquka kakhulu kuPoching nakubo bonke abemi abazizigidi ezingama-20 beso siqithi. Njengokuba incwadi ethi Facts and Figures—The Republic of China on Taiwan isitsho, “ITaiwan yatshintshwa isuka kwibutho lezolimo ukuya kwibutho elixakeke zezoshishino.” Ngasekupheleni kweyee-1970, iTaiwan yayigqalwa ‘njengebutho elizinzileyo neliphumelelayo.’
Eneneni, naphi na eTaiwan ubona ubungqina bokuphumelela. Ukususela kwizakhiwo zeeofisi ezingookrec’ izulu zezi mini eziye zakhiwa ngokukhawuleza kweso siqithi ukusa koohola beendlela abanyakazela iinqwelo-mafutha ezibiza imali eninzi nezivela kwamanye amazwe, amazwe asakhasayo akubawela ngenene ukuphumelela ngokwezinto eziphathekayo kwaseTaiwan. IChina Post, iphephandaba lolwimi lwesiNgesi elihamba phambili eTaiwan, liqhayisa ngelokuba namhlanje “abantu baseTaiwan bakowona mgangatho uphakamileyo wokuphila kwimbali yamaTshayina.”
‘Inkitha Yeengxaki Ezinzima’
Ngaba konke oku kuphumelela ngokwezinto eziphathekayo kuye kwazisela abantu ulonwabo nolwaneliseko lokwenyaniso? Ngoxa lingathandabuzeki elokuba abantu baseTaiwan banezinto ezininzi abazingomb’ izifuba ngazo, kukho okwahlukileyo koku kuphumelela. IChina Post iqhubeka ikhankanya oku: “Oku kuma kakuhle kukumgangatho ophakamileyo kuye kwazisa inkitha yeengxaki ezintsonkothileyo nezinzima.” Ukuphumelela ngokwezinto eziphathekayo kweTaiwan kuye kwaneengxaki zako.
Ngokuphathelele “inkitha yeengxaki ezintsonkothileyo nezinzima” ezikhathaza esi siqithi sasikade singenalwaphulo-mthetho ngokwentelekiso, iChina Post ithi: “Kwiminyaka yakutshanje ulwaphulo-mthetho nokungabikho kocwangco kuye kwanda ngokothusayo kwibutho lethu elimi kakuhle, kubangela isisongelo esikhulayo kubomi nakwizinto zabemi abathobela umthetho.” Kwinqaku elalinomxholo othi “Ubutyebi Benza ITaiwan Ilizwe Lenkanuko,” iPost ivakalisa iingxaki zokwanda ‘kweevenkile zokutyela neebhari ezinamantombazana anganxibanga’ nezindlu ezingekho mthethweni zamahenyukazi ezisebenza ngokungathi ziindawo zokucheba. Ukuphangwa nokuthinjwa kwabantu ngenjongo yokufumana imali yokubakhulula kuye kwaba yenye ingxaki. Enye ingxelo ithetha ngokubiwa kwabantwana ‘njengeshishini laseTaiwan elandayo.’ Abaninzi babhenela kulwaphulo-mthetho olunjalo ukuze bahlawule amatyala okungcakaza okanye ezinye iingxaki zemali.
Abantwana abangomaxhoba nje amsulwa olwaphulo-mthetho. Ngokwandayo babandakanyekile kulwaphulo-mthetho. Iingxelo zibonisa ukuba ngowe-1989 kuphela, inani lolwaphulo-mthetho olwenziwe ngabaselula lwaye lwanda ngama-30 ekhulwini. Bambi bathi olu lwando lususela ekuwohlokeni kweentsapho, yaye amanani abonakala ekuxhasa oku. Ngokomzekelo, ukususela ngowe-1977 ukusa kowe-1987, inani lezibini zaseTaiwan ezatshatayo lancipha, kodwa umlinganiselo woqhawulo-mtshato wanda ngokuphindwe kabini. Ekubeni ngokuqhelekileyo isithethe samaTshayina sigxininisa ukuba intsapho ibalulekile ukuze ibutho lizinze, alimangalisi elokuba abaninzi bexhalabe kangaka ngeemeko eziya zisiba mandundu.
Undoqo Wengxaki
Kuye kwanikelwa iingcaciso ezahlukeneyo kumgudu wokuqonda isizathu sokudodobala kocwangco lwasentlalweni kwibutho eliphumelelayo. Bambi abantu, phofu besebenzisa intandabulumko, bathi ngumvuzo nje wempumelelo. Kodwa ukubeka ityala ekuphumeleleni kunjengokubeka ityala ekutyeni ngenxa yobudlakudla. Asingabo bonke abatyayo abangamadlakudla, kwanjengokuba ingenguye wonk’ ubani ophumelelayo othanda izinto eziphathekayo okanye osisaphuli-mthetho. Akunjalo, kona ngokwako ukuphumelela ngokwezinto eziphathekayo akubangeli lwaphulo-mthetho nokungabikho kocwangco entlalweni.
Inqaku lomhleli kwiChina Post ladiza uthunywashe oyintloko ofaka isandla. Lathi: “Kumashumi eminyaka siye, sakubethelela gqitha ukuhambela phambili ngokwezinto eziphathekayo. Oku kungunobangela wokwehla kwemilinganiselo yokuziphatha neyokomoya kwibutho lethu namhlanje.” (Akekeliswe sithi.) Ewe, ukulubethelela kakhulu usukelo lwezinto eziphathekayo kukhokelela kumoya wokuthanda izinto eziphathekayo nokubawa. Kukhuthaza ukuzicingela. Kanye nguloo moya okhokelela ekuwohlokeni kweentsapho nokwanda kweengxaki entlalweni. Oko iBhayibhile yakuthethayo kwiminyaka engama-2 000 eyadlulayo kuseyinyaniso: “Ukuthanda imali [kungekhona imali ngokwayo] kuyingcambu yeento zonke ezimbi.”—1 Timoti 6:10.
Ingxaki Yehlabathi Lonke
Efuna uxolo nenzolo—nokhuseleko—amawaka abemi baseTaiwan aye afudukela kwamanye amazwe. Kodwa asiyoTaiwan kuphela ebhuqwa zezi ngxaki. Zigqugqisa ihlabathi lonke.
Kwiminyaka embalwa eyadlulayo olunye uhlolisiso lwabonisa ukuba owona mmandla ufumileyo eKhalifoniya, eUnited States, wawunowona mlinganiselo uphakamileyo woqhawulo-mtshato kwelo lizwe. Malunga nama-90 ekhulwini azo zonke izivumelwano zokuthenga imihlaba kwimimandla ethile yelo lizwe yayiziziphumo zemitshato eqhekekileyo. Kwanikelwa ingxelo yokuba kuphindwa kabini ngobuninzi ukuzibulala kumlinganiselo welo lizwe. Umlinganiselo wokusetyenziswa kotywala wawungomnye ophakamileyo kwelo lizwe, yaye kwathiwa kwakukho oogqirha bezigulo zengqondo nezinye iingcali zokunyanga ingqondo ezingakumbi kuloo mmandla ngokwesilinganiso kunakuyo nayiphi na indawo eUnited States.
UYesu Kristu wakhankanya inyaniso ebalulekileyo xa wathi: “Akaphili ngasonka sodwa umntu, uphila ngamazwi onke aphuma emlonyeni kaThixo.” (Mateyu 4:4) Izinto eziphathekayo, kungakhathaliseki ukuba zininzi kangakanani na, azinako ukwanelisa zonke iintswelo zomntu, zingenako nokuqinisekisa ulonwabo. Ngokwahlukileyo koko, kunjengokuba ngokufuthi isaci sesiTshayina sikubeka: “Xa ubani esondliwa kakuhle yaye efudumele, iingcinga zakhe ziphethukela ekuzificeni nakwiinkanuko zokwenyama.” Oku kuboniswe koko kuqhubekayo eTaiwan nakwezinye iindawo—ukuphumelela ngokwezinto eziphathekayo kukodwa ngokufuthi kuphumela ekuphembeni ukonakala kokuziphatha nokwasentlalweni neengxaki ezibangelwa koko.
Ngoko, yintoni efunekayo ukuze ukuphumelela ngokwezinto eziphathekayo kube yinxalenye yolonwabo lokwenene noluhlala luhleli? Ukuze ufumane impendulo, nceda ufunde inqaku elilandelayo.
[Amagama acatshulweyo akwiphepha 6]
“Xa ubani esondliwa kakuhle yaye efudumele, iingcinga zakhe ziphethukela ekuzificeni nakwiinkanuko zokwenyama.”—Isaci sesiTshayina
[Umfanekiso okwiphepha 5]
Ukuma kakuhle ngokwezinto eziphathekayo kwatshintshela iidolophu ezincinane ekubeni zizixeko ezinengxolo nezikhanyiswe ngombane