Ibali Lobomi

UYehova Uyabavuza Abo Bagcina Indlela Yakhe

KUBALISA UROMUALD STAWSKI

Xa kwaqalisa imfazwe yehlabathi yesibini ngoSeptemba 1939, umlo wawushushu emantla ePoland. Njengogqada-mbekweni wenkwenkwana oneminyaka esithoba ubudala nowayefuna ukwazi yonk’ into le, ndasondela kufuphi kuloo mmandla wedabi. Into endayibonayo apho yayihlasimlis’ umzimba—izidumbu zazithe saa, kuzele nje umsi otsarhayo. Nakuba ngoku ndandisele ndicinga ngendlela yokuya kufika ekhaya ndikhuselekile, kodwa kwakunkenteza le mibuzo engqondweni: “Kutheni uThixo evumela ukuba izinto ezimbi kangaka zenzeke? Uxhasa liphi icala kule mfazwe?”

NGASEKUPHELENI kwemfazwe, ulutsha lwanyanzelwa ukuba lusebenzele urhulumente waseJamani. Nabani na owalayo wayexhonywa emthini okanye ebhulorhweni kuze kubhalwe “umngcatshi” okanye “umvukeli” esifubeni sakhe. Idolophu yakowethu, iGdynia, yayimi phakathi kwamazwe amabini alwayo. Xa sisiya kukha amanzi cebu kuhle edolophini, iimbumbulu neebhombu zaziletsheza phezu kweentloko zethu, yaye zabulala umninawa wam uHenryk. Ngenxa yezi meko zimbi, umama wasithabatha thina bantwana sobane wasisa kwigumbi elingaphantsi ukuze sikhuseleke. Apho umntakwethu oneminyaka emibini ubudala, uEugeniusz, wabulawa sisifo somqala.

Kwakhona ndazibuza: “Uphi uThixo? Kutheni evumele konke oku kubandezeleka?” Nangona ndandingumKatolika onenzondelelo ndisiya rhoqo ecaweni, andizange ndifumane mpendulo.

Ndamkela Inyaniso YeBhayibhile

Iimpendulo zemibuzo yam zavela apho ndandingalindelanga kuzifumana khona. Imfazwe yaphela ngowe-1945, yaye ebutsheni bowe-1947, kwafika elinye iNgqina likaYehova ekhaya eGdynia. Lathetha nomama yaye ndaziva ezinye izinto ababezithetha. Zavakala zisengqiqweni, ngoko savuma ukuya kwintlanganiso yamaKristu elalisimemela kuyo. Emva nje kwenyanga, nangona ndandingayiqondi ngokupheleleyo inyaniso yeBhayibhile, ndahamba neqela lamaNgqina asekuhlaleni ndaza ndashumayela kwabanye ngehlabathi elibhetele, elingenazimfazwe nenkohlakalo. Oku kwandivuyisa gqitha.

NgoSeptemba 1947, ndabhaptizwa kwindibano yesiphaluka eSopot. NgoMeyi wonyaka olandelayo, ndaba nguvulindlela othe ngxi, ndinikela phantse ngexesha lam lonke ekushumayeleni isigidimi seBhayibhile kwabanye. Umfundisi wasekuhlaleni wawuchasa ngokukrakra umsebenzi wethu waza waphembelela abantu ukuba basiphathe ngogonyamelo. Ngesinye isihlandlo sahlaselwa lihlokondiba elinomsindo, elasigibisela ngamatye laza lasibetha kanobom. Ngesinye isihlandlo oonongendi nabefundisi basekuhlaleni baphembelela iqela labantu ukuba lisihlasele. Sabalekela kwisikhululo samapolisa, kodwa eli hlokondiba larhangqa esi sakhiwo, lisithi liza kusibetha. Ekugqibeleni kweza amapolisa angakumbi aza ahamba nathi.

Ngelo xesha, kwakungekho bandla apho sasishumayela khona. Maxa wambi sasilala emahlathini. Yayisivuyisa into yokuba sikwazi ukuqhubeka sishumayela phantsi kwezo meko. Namhlanje, kukho amabandla aqhuba kakuhle kuloo ndawo.

Ukukhonza EBheteli Nokubanjwa

Ngowe-1949, ndamenyelwa eBheteli eŁódź. Hayi indlela ekwakulilungelo ngayo ukukhonza apho! Okubuhlungu kukuba, andizange ndihlale xesha lide apho. NgoJuni 1950, kwinyanga ngaphambi kokuba umsebenzi wethu uvalwe ngokusemthethweni, ndabanjwa nabanye abazalwana baseBheteli. Ndasiwa entolongweni, ndaza ndancinwa ngenkohlakalo.

Ngenxa yokuba utata wayesebenza kwinqanawa eyayisoloko isiya eNew York, amagosa awayesenza uphando azama ukundenza ndivume ukuba wayeyintlola esebenzela iUnited States. Ndancinwa ngenkohlakalo. Ngaphezu koko, amanye amagosa amane azama ukuba ndinikele ubungqina nxamnye noMzalwan’ uWilhelm Scheider, owayesongamela umsebenzi wethu ePoland. Bandibetha ngeentonga ezithendeni. Njengoko ndandithe tywaa phantsi ndisopha, ndiziva ukuba andisakwazi ukunyamezela, ndakhala ndathi, “Yehova ndincede!” Aba batshutshisi bamangaliswa baza bayeka ukundibetha. Kwimizuzu nje embalwa, babiwa bubuthongo. Kwathi qabu ndaza ndaphinda ndaba namandla. Oku kwandenza ndaqiniseka ukuba uYehova uyabaphulaphula abakhonzi bakhe abazahlulele kuye xa bekhalela uncedo. Kwalomeleza ukholo lwam kwaza kwandifundisa ukukholosa ngoThixo ngokupheleleyo.

Ingxelo yokugqibela yolu phando yaquka ubungqina bobuxoki ekwakusithiwa bunikelwe ndim. Xa ndingazange ndivumelane noku, igosa lathi, “Uya kuphendula enkundleni!” Indoda enobubele endandivalelwe nayo esiseleni yathi mandingazikhathazi, kuba umtshutshisi wasemkhosini umele aqinisekise ukuba ingxelo yokugqibela ichanile, nto leyo eya kundinika ithuba lokuyikhaba ngawo omane loo ngxelo ibubuxoki. Oko kwaba njalo kanye.

Umsebenzi Wesiphaluka Nokubanjwa Kwakhona

Ndakhululwa ngoJanuwari 1951. Emva kwenyanga, ndaba ngumveleli ohambahambayo. Nangona umsebenzi wethu wawuvaliwe, ndasebenza nabanye abazalwana ndisomeleza amabandla ndinceda amanye amaNgqina awayesasazekile ngenxa yamapolisa. Sakhuthaza abazalwana ukuba baqhubeke nobulungiseleli babo. Kwiminyaka ethile kamva, ngenkalipho aba bazalwana baxhasa abaveleli abahambahambayo baza baqhubeka nomsebenzi wokushicilela nokusasaza iincwadi zeBhayibhile ngokufihlakeleyo.

Ngenye imini ngoAprili 1951, xa ndandibuya kwintlanganiso yamaKristu, ndabanjwa ngamagosa okhuseleko ekwakukudala endibek’ esweni. Kuba ndandingafuni ukuphendula imibuzo yawo, andisa kwintolongo yaseBydgoszcz aza aqalisa ukundincina kwangobo busuku. Kwathiwa mandime ngeenyawo ndize ndayame ngodonga kangangeentsuku ezintandathu kwigumbi elizaliswe ngumsi wecuba laloo magosa, ndinganikwa kutya okanye into eselwayo. Ayendibetha ngegqudu aze anditshise nangomdiza. Xa ndayobayo, andigalela ngamanzi aza aqhubeka nokundincina. Ndacela uYehova ukuba andiphe amandla okunyamezela, kwaye wandixhasa.

Ukuba sentolongweni yaseBydgoszcz kwaba neengenelo ezithile. Apho ndakwazi ukushumayela inyaniso yeBhayibhile kubantu eyayingenakufikelela kubo. Eneneni, ayemaninzi amathuba okunikela ubungqina. Ngenxa yemeko yawo elusizi nenganiki themba, amabanjwa ayeziphulaphula ngolangazelelo iindaba ezilungileyo.

Iinguqulelo Ezimbini Ezibalulekileyo

Kungekudala emva kokuba ndikhululiwe ngowe-1952, ndadibana noNela, udade onguvulindlela onenzondelelo. Wayenguvulindlela kumazantsi ePoland. Kamva wasebenza kwindawo esasiyibiza ngokuba “ngumzi wokubhaka izonka,” indawo efihlakeleyo apho iincwadi zethu zazishicilelwa khona. Lowo yayingumsebenzi onzima owawufuna ubani aphaphe yaye azincame. Satshata ngowe-1954, saza saqhubeka nenkonzo yexesha elizeleyo de kwazalwa intombi yethu, uLidia. Ngoko ke sagqiba kwelokuba ukuze ndiqhubeke nomsebenzi wokuhambahamba, uNela kuza kufuneka ayeke inkonzo yexesha elizeleyo, abuyele ekhaya aze anyamekele intombi yethu.

Kwangaloo nyaka, kwafuneka senze esinye isigqibo esibalulekileyo. Ndacelwa ukuba ndibe ngumveleli wesithili kwindawo egubungela isinye kwisithathu sommandla wasePoland. Saye sathandaza ngalo mbandela. Ndandiyazi indlela ekwakubaluleke ngayo ukomeleza abazalwana bethu ngoxa umsebenzi uvaliwe. Abazalwana abaninzi babevalelwa, ngoko lwalufuneka ngokwenene ukhuthazo lokomoya. Ndixhaswa nguNela, ndasamkela eso sabelo. UYehova wandinceda ndawenza lo msebenzi kangangeminyaka engama-38.

Ukunyamekela “Imizi Yokubhaka Izonka”

Ngezo mini, umveleli wesithili wayenyamekela “imizi yokubhaka izonka,” ekwiindawo ezifihlakeleyo. Amapolisa eyesoloko esemva kwethu, ezama ukufumana ezo ndawo sishicilela kuzo ukuze azivale. Maxa wambi ayephumelela, kodwa asizange khe sikuswele ukutya kokomoya. Kwakucacile ukuba uYehova uyasinyamekela.

Ukuze ubani amenywe ukuza kwenza umsebenzi wokushicilela onzima noyingozi, kwakufuneka abe ngumntu onyanisekileyo, ophaphileyo okulungeleyo ukuzincama nothobekileyo. Zezo mpawu ezenza ukuba “umzi wokubhaka izonka” uqhubeke usebenza ngokukhuselekileyo. Kwakunzima ukufumana indawo efanelekileyo yokushicilela ngokufihlakeleyo. Ezinye iindawo zazibonakala zifanelekile, kodwa abazalwana balapho bengalumkanga kangako. Ukanti kwezinye iindawo nangona abazalwana babelumkile zona zazingafanelekanga. Abazalwana babekulungele ukuzincama nangayiphi na indlela. Ndibothulel’ umnqwazi bonke abo bazalwana noodade endaba nelungelo lokusebenza nabo.

Ukukhusela Iindaba Ezilungileyo

Kuloo minyaka inzima, sasisoloko sityholwa ngokwenza umsebenzi ongekho mthethweni nongaqondakaliyo size sisiwe enkundleni. Oku kwakuba yingxaki kuba sasingenamagqwetha okusimela. Amanye amagqwetha ayenovelwano, kodwa uninzi lwawo lwalusoyika abantu yaye lwalungafuni ukuzibeka engozini yokungakholisi abasemagunyeni. Noko ke, uYehova wayekuqonda oko sikufunayo, yaye ngexesha elifanelekileyo walungisa imicimbi.

UAlojzy Prostak, umveleli ohambahambayo waseKraków, waphathwa ngenkohlakalo xa wayencinwa kangangokuba kwafuneka asiwe kwisibhedlele sasentolongweni. Ukuma kwakhe eqinile nangona wayengcungcuthekiswa kwenza amanye amabanjwa asesibhedlele amhlonela yaye amothulel’ umnqwazi. Omnye wawo yayiligqwetha uWitold Lis-Olszewski, owachukunyiswa yinkalipho kaMzalwan’ uProstak. Wathetha naye izihlandlo ezininzi waza wenza esi sithembiso, “Ndakuba nje ndiphumile apha yaye ndivunyelwe ukuba ndiqhubeke nomsebenzi wam, ndiya kuwamela amaNgqina kaYehova.” Waligcina ilizwi lakhe.

UMnumzana Olszewski wayeneqela lakhe lamagqwetha, awayezimisele ngokwenene ukusinceda. Xa kanye inkcaso yayikrakra, amela abazalwana kumatyala amalunga nama-30 ngenyanga—ityala elinye ngosuku! Ngenxa yokuba uMnumzana Olszewski wayefuna ukuwazi kakuhle la matyala, ndacelwa ukuba ndisoloko ndinxibelelana naye. Ndasebenza naye iminyaka esixhenxe kwiminyaka ye-1960 neye-1970.

Ngezo mini ndafunda okuninzi ngomsebenzi wamagqwetha. Ndandidla ngokubakho ematyaleni, ndiphulaphule izinto ezithethwa ngamagqwetha—ezintle nezimbi—iindlela zokuzikhusela ngokusemthethweni nobungqina bamanye amakholwa atyholwayo. Konke oku kwaba luncedo gqitha kubazalwana bethu, ingakumbi abo kwakufuneka babe ngamangqina, ukuze bazi oko bamele bakuthethe naxa kufuneka bethe cwaka enkundleni.

Xa kukho ityala elixoxwayo uMnumzana Olszewski wayedla ngokulala emakhayeni amaNgqina kaYehova. Oku wayengakwenzi kuba engenakukwazi ukuhlawula imali yasehotele, kodwa njengokuba wakha watsho esithi, “Ngaphambi kwetyala, ndifuna ukuba kunye nani ukuze ndiyiqonde kakuhle eyona nto niphezu kwayo.” Ngenxa yoncedo lwakhe, amatyala amaninzi sawaphumelela. Wandimela izihlandlo ezininzi, yaye akazange khe afune nesenti kum. Ngesinye isihlandlo, wala ukwamkela intlawulo yamatyala angama-30. Ngoba? Wathi, “Ndifuna nje ukukhe ndenze nokuba yinto engaphelelanga ukuze ndifake isandla kumsebenzi wenu.” Loo msebenzi wokusimela kwakhe ngewawusityabule kanobomi kuba wawungabizi mali incinane. Umsebenzi kaMnumzana Olszewski neqela lakhe wawubonwa ngabasemagunyeni, kodwa oko akuzange kumdimaze ekubeni asincede.

Kunzima ukuchaza ubungqina obuhle obanikelwa ngabazalwana bethu ebudeni bokuchotshelwa kwaloo matyala. Abaninzi babesiya ezinkundleni ukuya kuphulaphula nokomeleza abazalwana abatyholwayo. Xa kwachotshelwa awona matyala maninzi, ngonyaka omnye, baba ngama-30 000 bebonke abezayo ukuza kunikela inkxaso. Ngokwenene eso yayisisihlwele esikhulu samaNgqina!

Isabelo Esitsha

Ngowe-1989 umsebenzi wethu wavulwa. Emva kweminyaka emithathu kwakhiwa iofisi yesebe entsha yaza yanikezelwa. Ndamenywa ukuba ndiye kusebenza apho kwiSebe Lenkcazelo Yezibhedlele, yaye ndasamkela ngovuyo eso sabelo. Njengoko sasisebenza njengeqela sibathathu, saxhasa abazalwana bethu ababejamelene nombandela wegazi saza sabanceda ukuba beme beqinile kwisigqibo sabo esisekelwe kwisazela sabo njengamaKristu.—IZenzo 15:29.

Mna nenkosikazi yam siye salixabisa gqitha ilungelo lokukhonza uYehova kubulungiseleli basesidlangalaleni. UNela ebesoloko endixhasa yaye endikhuthaza. Ndiya kusoloko ndinombulelo ngento yokuba nanini na ndixakekile zizabelo zobuthixo okanye ndisentolongweni, akazange akukhalazele ukungabikho kwam ekhaya. Ngamaxesha anzima, wayethuthuzela abanye kunokuba abe buhlungu ngokugqithiseleyo.

Ngokomzekelo, ngowe-1974, ndabanjwa kunye nabanye abaveleli abahambahambayo. Abanye abazalwana ababesazi ngoku babefuna ukuxelela inkosikazi yam ngobunono. Xa bambonayo, bambuza, “Dade Nela, ngaba ukulungele ukuva iindaba ezimbi?” Ekuqaleni, wothuka wabanda, ecinga ukuba ndifile. Xa wafumanisa oko kwenzekileyo ngokwenene, kuthe qabu, wathi: “Usaphila! Akaqali kubanjwa.” Kamva abazalwana bandixelela ukuba bachukumiseka gqitha sisimo sakhe sengqondo.

Nangona sikhe saba kwiimeko ezibuhlungu kwixesha elidluleyo, uYehova uye wasivuza ngokwenene ngokuhlala kwindlela yakhe. Isivuyisa gqitha into yokuba intombi yethu, uLidia nomyeni wakhe, uAlfred DeRusha, baye bangumzekelo kwizibini ezingamaKristu. Baye bakhulisa oonyana babo, uChristopher noJonathan, baba ngabakhonzi bakaThixo abazahluleleyo, nto leyo esenza sonwabe ngakumbi. Umninawa wam uRyszard, nodade wethu u-Urszula, nabo baye baba ngamaKristu athembekileyo kangangeminyaka.

UYehova akazange asishiye, yaye sifuna ukuqhubeka simkhonza ngentliziyo epheleleyo. Siye sakubona ukuba yinyaniso kwamazwi eNdumiso 37:34 athi: “Thembela ngoYehova ugcine indlela yakhe, uya kukuphakamisa uwudle ilifa umhlaba.” Sikhangele phambili ngentliziyo yethu yonke kwelo xesha.

[Umfanekiso okwiphepha 17]

Kwindibano eyayiqhutyelwa kwigadi yomnye umzalwana eKaraków, ngowe-1964

[Umfanekiso okwiphepha 18]

Ndikunye nomfazi wam, uNela, nentombi yethu, uLidia, ngowe-1968

[Umfanekiso okwiphepha 20]

Ndikunye nenye inkwenkwe eliNgqina ngaphambi kokuba yenziwe utyando lwentliziyo ngaphandle kwegazi

[Umfanekiso okwiphepha 20]

Ndikunye noGq. Wites, ugqirha oyintloko wotyando lwentliziyo lwabantwana ngaphandle kwegazi, kwisibhedlele saseKatowice

[Umfanekiso okwiphepha 20]

Ndikunye noNela, ngowama-2002