Imbono YeBhayibhile

Ngaba Ukuvumisa Ngeenkwenkwezi Kufanele Kubulawule Ubomi Bakho?

“YINTAPHANE YOLUTSHA NABANTU ABASELE BEKHULILE ABAFUNA IMIQONDISO ECHAZA IKAMVA LABO KWIINKWENKWEZI.”—UPOPU JOHN PAUL II.

NGOKUTSHO kolunye uhlolisiso, umntu om-1 kwaba-4 eMerika uvumisa ngeenkwenkwezi ngaphambi kokwenza izigqibo. Ukukhangela imiqondiso yeenkwenkwezi akuphelelanga kwelo lizwe. Phantse ehlabathini lonke, kukhangelwa icebiso elivela ezinkwenkwezini ngokuphathelele imibandela yemali, amalungiselelo okuhamba, ukutshintsha umsebenzi, imihla yokutshata, nemibandela yasemkhosini. Kuthiwa imiqondiso yeenkwenkwezi inokuchaza ukuba ngoobani abaza kutshata kunye kwikamva yaye inokuchaza nokuba liliphi iqabane elifanelekileyo. Ukusuka eMpuma ukuya kutsho eNtshona, ukuvumisa ngeenkwenkwezi kuthandwa zizigidi zabantu. Kodwa kwavela phi ukuvumisa ngeenkwenkwezi?

Imbali Yako

Iindidi ezahlukeneyo zokuvumisa ngeenkwenkwezi zisuka emva phayaa ukuqala kwempucuko. KwaneBhayibhile ithetha ‘ngamakroza ezulu.’ (2 Kumkani 23:5) Kuyabonakala ukuba kumaxesha amandulo amaHindu kwakunye namaTshayina, amaYiputa, amaGrike nezinye izizwe zazivumisa ngeenkwenkwezi. Noko ke, iimbekiselo zokuqala zemiqondiso yeenkwenkwezi zafunyanwa kwiBhabhiloni yamandulo.

AmaBhabhiloni avelisa ukuvumisa ngeenkwenkwezi ngelokuzama ukufumana inkcazelo engekamva. Njengoko ayebukele izinto ezisesibhakabhakeni, enza uludwe nezicangca. Ngezi zinto ayeqikelela imicimbi yabantu neziganeko zehlabathi. Kwiimeko ezininzi izigqibo zezobupolitika okanye ezasemkhosini zazingenziwa de kubizwe abavumisi ngeenkwenkwezi baze kunikela amacebiso. Kodwa udidi lwababingeleli olwalusithi lunobulumko obukhethekileyo namandla angaphezu kwendalo lwaya lusiba nempembelelo engakumbi. Enyanisweni, zonke iitempile eziphambili eBhabhiloni zazinendawo yokondela isibhakabhaka.

Kula maxesha anamhlanje imiqondiso yeenkwenkwezi isenendima ebalulekileyo kubomi babantu abaninzi. Nabo bathi abakholelwa kwiinkwenkwezi basenokuthi maxa wambi bazihlolisise ukuze nje bazonwabise okanye kuba nje befuna ukwazi. Liyinyaniso elokuba ezinye izinto eziye zaqikelelwa ngabo bavumisa ngeenkwenkwezi ziye zaphumelela. Kodwa ngaba loo nto ithetha ukuba ukondela iinkwenkwezi kuyingenelo? Eneneni, abakhonzi bakaThixo bamandulo babekujonga njani ukuvumisa ngeenkwenkwezi?

Iingozi Ongenakuzibona

Ngokwahlukileyo kubantu baseBhabhiloni, amaYuda athembekileyo ayengavumisi ngeenkwenkwezi—yaye ayefanele. UThixo wayewanike esi silumkiso sicacileyo: “Maze kungafunyanwa namnye kuwe . . . ovumisayo, noqhelisela umlingo, nohlaba izihlabo nokhafulayo, nobopha ngoomabophe, nobuza koneshologu, noyinkunkqele ekuxeleni iziganeko kwangaphambili, nobuzisa kwabafileyo. Kuba uYehova uyamcekisa wonke ubani ozenzayo ezi zinto.”a—Duteronomi 18:10-12.

Abakhonzi bakaThixo bema ngokuqinileyo nxamnye nokuvumisa ngeenkwenkwezi. Ngokomzekelo, uKumkani uYosiya othembekileyo “wabasusa emsebenzini . . . abo babeqhumisa umbingelelo kuBhahali, elangeni nasenyangeni nakumakroza ezulu.” Kuthiwa oko kwenziwa nguYosiya ‘kwakulungile emehlweni kaYehova,’ yaye uThixo wamsikelela ngenxa yako. (2 Kumkani 22:2; 23:5) Kodwa abanye basenokubuza, ‘Ngaba uqikelelo olwenziwa ngabavumisi ngeenkwenkwezi alukhe luphumelele?’

Okubangel’ umdla kukuba kwiZibhalo ZamaKristu ZesiGrike, sifunda ngentombazana ‘eyayifudula izinika iinkosi zayo inzuzo eninzi ngokuqhelisela ubugcisa bokuxela izinto kwangaphambili.’ Kuyabonakala ukuba ezinye izinto ezazichazwa kusengaphambili yile ntombazana zaziphumelela, ekubeni iinkosi zayo zazisenza ingeniso ngamandla ayo. Kodwa yintoni eyayincedisa le ntombazana ukuze ikwazi ukuxela kusengaphambili iziganeko zekamva? IBhayibhile ithi yayiphantsi kwempembelelo ‘yomoya, idemon yokuvumisa.’—IZenzo 16:16.

IBhayibhile ithi “ihlabathi liphela lisemandleni ongendawo,” uSathana uMtyholi. (1 Yohane 5:19) Belawula iziganeko ukuze baphumeze uqikelelo oluthile, uSathana needemon zakhe baye bathimba ingqalelo yezigidi.

Inyaniso ephandle yeyokuba ukuvumisa ngeenkwenkwezi kulelinye ‘lamaqhinga kaMtyholi,’ alisebenzisayo ukuze alawule aze aphembelele abantu ukuba baphumeze injongo yakhe. Ngenxa yoko, akumangalisi ukuba iBhayibhile ikhuthaze amaKristu ukuba ‘eme eqinile’ nxamnye nobuqili bukaSathana—obuquka ukuvumisa ngeenkwenkwezi. (Efese 6:11) Kodwa ngaba oku kuthetha ukuba sishiywe nje asanikwa sikhokelo sekamva?

IBhayibhile—Ukhokelo Olunokuthenjwa

Izigidi zabantu ziye zayifumanisa iBhayibhile ilukhokelo olunokuthenjwa ekwenzeni izigqibo. Ngokutsho kukamdumisi uDavide, “isikhumbuzo sikaYehova sikholosekile, simenza abe nobulumko ongenamava.” (INdumiso 19:7; 119:105) Oku akuthethi ukuba iBhayibhile ichaza ngokweenkcukacha oko umntu afanele akwenze kwimeko nganye. Kodwa iLizwi likaThixo linemigaqo enokusinceda ukuze siqeqeshe amandla ethu okucinga. Wona asenza sikwazi ukwahlula phakathi kokulungileyo nokubi aze asincede senze izigqibo zobulumko.—Hebhere 5:14.

Ngenxa yoko, amaKristu okwenyaniso akafanele azame ukuvumisa ngeenkwenkwezi, kwanokuba akwenzela ukuzonwabisa okanye afuna nje ukwazi. Kunoko, ngobulumko athobela izilumkiso ezikwiLizwi likaThixo nxamnye nempembelelo yeedemon kuquka neendlela ezichuliweyo zayo. Ngokuvumela iBhayibhile kungekhona ukuvumisa ngeenkwenkwezi kulawule ubomi bakho, unokunandipha iintsikelelo zikaThixo ngonaphakade.—INdumiso 37:29, 38.

[Umbhalo osemazantsi]

[Umfanekiso okwiphepha 16]

Ukuvumisa ngeenkwenkwezi eMpuma

[Umfanekiso okwiphepha 16]

Ukuvumisa ngeenkwenkwezi eNtshona