Imbono YeBhayibhile
Ngaba Inzululwazi Inokuzisa Ubomi Obungunaphakade?
KWIMINYAKA eyadlulayo, lo mbuzo wawukhangeleka ungekho ngqiqweni. Noko ke, ngoku abantu bacingisisa nzulu ngawo. Kungoku nje, izazinzulu ziye zakwazi ukusebenzisa iindlela ezibandisa ngokuphindwe kabini ubomi bezinambuzane ezitya iziqhamo nemibungu, zisebenzisa iindlela ezicinga ukuba zisenokusetyenziswa kuluntu.
Uphando luye lwabonisa ukuba iiseli zomntu eziqhelekileyo ziyafa, ziphindaphindeka kuphela izihlandlo ezilinganiselweyo. Emva koko ziyayeka ukuphindaphindeka. Yinkqubo eye yathelekiswa newotshi engaphakathi elawula iminyaka yobudala bomntu nexesha lokufa. Ngoku izazinzulu zimaxhaphetshu zizama ukujija le wotshi.
Enye ingcamango edumileyo ithi eyona nto ibangela ukwaluphala ikwimiqukumbelo yemicu yeDNA nganye, mmandla lowo obizwa ngokuba yitelomere. Iitelomere ezi ziye zathelekiswa nemiqukumbelo yeplastiki esekupheleni kwemitya yezihlangu, eyenzelwe ukukhusela imitya ekudlekeni. Izazinzulu ziye zafumanisa ukuba sihlandlo ngasinye iiseli ziphindaphindana, iitelomere ziba mfutshane ngathi yirhuluwa etshayo. Ekugqibeleni, kubonakala ngathi iitelomere ziya zisiba mfutshane de iseli iyeke ukuphindaphindana. Noko ke, ngokutsho kwale ngcamango, ngenxa ye-enzyme ethile, iitelomere azide ziphele. Ngoko, ngokwale ngcamango, loo nto inganika iiseli amandla okuqhubeka ziphindaphindana ngonaphakade. Igosa eliphambili lenye inkampani eyayibandakanyekile kulo msebenzi lathi: “Siyaqala ukukhe siqikelele indlela ekunokwenzeka ngayo ukuba umntu angafi.” Kodwa asizizo zonke izazinzulu ezikuvumayo oko.
Indlela Okwabakho Ngayo Ukufa
Kambe ke, abantu abanokholo eBhayibhileni bebekholelwa kangangamawaka eminyaka ukuba abantu baza kuphila ngonaphakade. Abathembelanga kwizazinzulu ezingabantu kodwa kwiSazinzulu Esikhulu, esadala zonke izinto eziphilayo, uYehova uThixo.—INdumiso 104:24, 25.
IBhayibhile ibonisa ukuba ukufa kwabantu kwakungeyonxalenye yenjongo yoMdali. Isibini sokuqala esingabantu sasidalwe ngokomfanekiselo kaThixo saza sabekwa kumyezo oyiparadesi. Sasifezekile, singenasiphako engqondweni okanye emzimbeni. Ngaloo ndlela, sasinethemba lokuphila ngonaphakade emhlabeni. UThixo wayebanqwenelela loo nto. Wabayalela ukuba bazale abantwana baze ngokuthe ngcembe bandise iParadesi emhlabeni wonke.—Genesis 1:27, 28; 2:8, 9, 15.
Njengoko kuboniswe kwiGenesis isahluko 3, uAdam wathi esazi ukuba isohlwayo sikukufa, wamvukela ngabom uThixo. Ngaphezulu, ngokuthabatha ikhondo lokungathobeli, wabangela isono nokufa kubantwana bakhe awayengekabazali. Wayichaza ngolu hlobo le nto umpostile uPawulos: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Ngamanye amazwi, ngenxa yokona kuka-Adam, umzimba wakhe wawungasafezekanga. Ngokuthe ngcembe waluphala waza wafa. Inzala yakhe yazuza eso siphako.
Ngenxa yoko ukufa kwabakho ngenxa yemvukelo ka-Adam nesigwebo sikaThixo esalandelayo. Abantu ke abanakukwazi ukusibuyisela umva eso sigwebo. Nangona inzululwazi iye yenza inkqubela kwezamayeza, amazwi aphefumlelweyo kaMoses, awabhalwa kwiminyaka engama-3 500 eyadlulayo, aseyinyaniso: “Imihla yeminyaka yethu yiminyaka engamashumi asixhenxe; yaye ukuba ithe ngenxa yamandla akhethekileyo yangamashumi asibhozo, ukuzingisa kwayo kusenkathazweni nakwizinto ezenzakalisayo; kuba imele idlule ngokukhawuleza, siphaphazele simke.”—INdumiso 90:10.
Ilungiselelo LikaYehova Lobomi Obungunaphakade
Okuvuyisayo kukuba, likho ithemba! Nangona ngoku lonke uluntu ekugqibeleni lusifa, akuyonjongo kaYehova ukuba le meko iqhubeke ngonaphakade. Nangona uAdam noEva babefanelwe kukufa, uThixo wayesazi ukuba phakathi kwabantwana babo abangekazalwa babeya kuba baninzi ababeya kuba noxabiso lukhokelo lwakhe olunothando. Abantu abanjalo wabalungiselela ubomi obungapheliyo emhlabeni. Umdumisi wabhala wathi: “Amalungisa aya kuwudla ilifa umhlaba, ahlale kuwo ngonaphakade.” (INdumiso 37:29) Kodwa kuya kufezwa njani oku?
Akusayi kubangelwa kukufumanisa kwabantu imfihlelo yokusebenza kweDNA. Kunoko, ubomi obungunaphakade busisipho uYehova aya kusinika abo babonisa ukholo kuye. Eqonda ukuba inzala ka-Adam noEva ifuna ukuhlangulwa, walungiselela indlela yokuba ifumane ubomi obungunaphakade—idini lentlawulelo likaYesu Kristu. UYesu wabhekisela kweli lungiselelo xa wathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16.
NjengoAdam, uYesu wayengumntu ofezekileyo. Ngokungafaniyo noAdam, uYesu wamthobela ngokupheleleyo uThixo. Ngaloo ndlela uYesu wakwazi ukuncama ubomi bakhe bobuntu obufezekileyo ukuze ahlawulele isono sika-Adam. Ngesi senzo sothando, esalungelelanisa izikali zokusesikweni, abantwana baka-Adam bakhululwa ekugwetyelweni kwabo ukufa. Ngokomphumo, bonke abo babonisa ukholo kuYesu baya kufumana isipho sikaThixo sobomi obungunaphakade.—Roma 5:18, 19; 1 Timoti 2:5, 6.
Ukuba abantu bebekwazi ukoyisa ukungafezeki baze babangele ubomi obungunaphakade, bekungasayi kubakho mfuneko yentlawulelo. IBhayibhile inikela esi siluleko sobulumko: “Musani ukukholosa ngezidwangube, nangonyana womntu wasemhlabeni, lowo ungenalo usindiso. Uyaphuma umoya wakhe, abuyele yena emhlabeni wakhe; ngaloo mini ziyatshabalala iingcamango zakhe. Unoyolo lowo unoncedo olunguThixo kaYakobi, othemba lakhe likuYehova uThixo wakhe, uMenzi wezulu nomhlaba, wolwandle, nowazo zonke izinto ezikuzo, Lowo ugcina inyaniso ukusa kwixesha elingenammiselo.”—INdumiso 146:3-6.
Ubomi obungunaphakade abuyi kuvela kuphando lwenzululwazi, kodwa buya kuvela kuYehova. Nantoni na uThixo azimisele ukuyenza, unokuyenza yaye uya kuyifeza. “UThixo akavakalisi nto ingenakwenzeka.”—Luka 1:37.
[Inkcazelo Ngomfanekiso okwiphepha 26]
© Charles Orrico/SuperStock, Inc.