Abantu Abafileyo Baza Kuphila Kwakhona!

KWENYE imovie eyayidlala kwiminyaka eliqela edluleyo, kukho umfana omi ecaleni kwengcwaba lomntu awayemthanda. Lo mfana uthi:“Umama wayedla ngokuthi ukufa yinto emele yenzeke.” Uhlabela mgama athi: “Akwaba bekungenjalo.”

Izigidi ngezigidi zabo baye bafelwa ngabantu ababathandayo zivakalelwa ngendlel’ efanayo. Ukufa lutshaba ngokwenene. Sekunjalo, uThixo uyathembisa: “Olokugqibela utshaba oluya kutshitshiswa kukufa.” (1 Korinte 15:26) Ekubeni kucacile ukuba sidalwe sanengqondo enokusenza siqhubeke sikwazi ukufunda izinto ezininzi, kutheni sisifa? Kuya kupheliswa njani ukufa?

Isizathu Sokuba Saluphale Size Sife

Ithetha ngoYehova uThixo, uMdali wethu, iBhayibhile ithi: “Iindlela zakhe zisesikweni.” (Duteronomi 32:4; INdumiso 83:18) Umntu wokuqala, uAdam, wadalwa efezekile, yaye wayeza kuphila ngonaphakade kwiParadesi yase-Eden uThixo awayembeke kuyo. (Genesis 2:7-9) Kwakutheni ukuze uAdam aphulukane naloo Paradesi aze aluphale, ekugqibeleni afe?

Ngamafuphi nje singathi: UAdam akazange athobele umyalelo wokungatyi kwisiqhamo somthi othile. UThixo wamxelela ngesohlwayo awayeza kusifumana xa engawuthobeli lo myalelo, wathi: “Uya kufa ngokuqinisekileyo.” (Genesis 2:16, 17) UAdam noEva abazange bawuthobele loo myalelo, ngoko uThixo wabagxotha e-Eden. Isizathu sokuba uThixo abagxothe ngoko nangoko sicacile. IBhayibhile ithi: “Ukuze [uAdam] angoluli isandla sakhe aze athabathe nakwisiqhamo somthi wobomi [owawusemyezweni], adle aze aphile [ngonaphakade].”—Genesis 3:1-6, 22.

Ngenxa yokungathobeli kwabo, uAdam noEva bafa, kodwa yintoni ebangela ukuba inzala yabo yaluphale ize ife? Kungenxa yokuba yazuza ilifa isono kuAdam, yaye ngenxa yoko ayifezekanga yaye iyafa. IBhayibhile ithi: “Ngenxa yoko, kanye njengokuba isono sangena ngamntu mnye [uAdam] ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”—Roma 5:12.

Sinako Ukuphila Kwakhona

Njengoko siye safunda ngasentla, ‘ukufa kuza kutshitshiswa’—kuya kupheliswa ngonaphakade! (1 Korinte 15:26) Njani? IBhayibhile ithi: “Kwanangesenzo esinye sothethelelo umphumo kubantu bazo zonke iintlobo ukukuvakaliswa kwabo bengamalungisa afanelwe bubomi.” (Roma 5:18) Yintoni ebangela ukuba uThixo agqale abantu bengamalungisa baze bakwazi ukuphila ubomi obungunaphakade?

Lilungiselelo lokuphelisa isono abantu abasizuza ilifa kumntu wokuqala uAdam. IBhayibhile ithi: “Isipho uThixo asinikayo bubomi obungunaphakade ngoKristu Yesu iNkosi yethu.” (Roma 6:23) Xa wayethetha ngokuvakaliswa kwabantu bengamalungisa afanelwe kukuphila, uYesu wathi: “UThixo walithanda kakhulu ihlabathi [loluntu] kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16.

Cinga ngendlela abasithanda ngayo uThixo noNyana wakhe uYesu Kristu, owabandezelekayo ngenxa yethu. Umpostile uPawulos wathi: ‘UNyana kaThixo wandithanda waza wazinikela ngenxa yam.’ (Galati 2:20) Kodwa ke, kutheni inguYesu kuphela ‘owayenokunikela ngomphefumlo wakhe ukuba ube yintlawulelo,’ aze asihlangule esonweni nasekufeni?—Mateyu 20:28.

NguYesu kuphela owayenokunikela ngomphefumlo wakhe ukuba ube yintlawulelo, kuba nguye kuphela ongenaso isono somntu wokuqala uAdam. Kwakutheni ukuze angabi nasono? Kungenxa yokuba ubomi bukaYesu bafuduselwa ngokungummangaliso kwisibeleko sikaMariya, owayeyintombi enyulu. Ngoko, ingelosi yathi kuMariya, unyana wakhe ‘ungcwele, nguNyana kaThixo.’ (Luka 1:34, 35) Ngenxa yoko uYesu kuthiwa ‘nguAdam wokugqibela’ yaye akazange azuze isono ‘somntu wokuqala uAdam.’ (1 Korinte 15:45) Njengomntu ongenasono, ngoko uYesu “waba yintlawulelo”—ubomi bakhe babulingana nobomntu wokuqala owayefezekile nowayengenasono.—1 Timoti 2:6.

UThixo wenza ilungiselelo lentlawulelo ukuze sikwazi ukufumana oko kwalahlwa nguAdam wokuqala, oko kukuthi ubomi obungunaphakade kumhlaba oyiparadesi. Noko ke, abantu abaninzi kuya kufuneka bavuswe ekufeni, ukuze bafumane le ntsikelelo. Elinjani ukumangalisa ithemba! Noko ke, ngaba ithemba lovuko liphupha nje?

Isizathu Sokuba Sikukholelwe Oku

Ngaba kunzima ukuyikholelwa into yokuba uYehova uThixo, owadala umntu, anganamandla okuvusa umntu owakha waphila? Kaloku, nguThixo owabangela ukuba ibhinqa lokuqala likwazi ukukhawula okanye ukukhulelwa. “UAdam waba neentlobano zokwazana noEva,” yaye malunga neenyanga ezisithoba, bazala usana olufana nabo. (Genesis 4:1) Akukabikho mntu uyiqondayo nangoku indlela eyakhula ngayo loo mveku esibelekweni sikaEva!—INdumiso 139:13-16.

Kodwa, kuba kuzalwa abantu yonk’ imihla, lo mmangaliso sele ugqalwa njengento nje eqhelekileyo, kangangokuba abantu abaninzi abayikholelwa into yokuba abafileyo baya kuphinde baphile. Xa uYesu wayethulisa abantu ababekhalela intombazana efileyo, “bamhleka ngokugculelayo” kuba babesazi ukuba ifile. Kodwa uYesu wathi kuloo ntombazana ifileyo: “‘Vuka!’ Yavuka ngoko nangoko intombi yaza yahambahamba.” Le ngxelo ithi: “Bathi phithi kwaoko [abo babekho] bethabatheke ngokugqithiseleyo.”—Marko 5:39-43; Luka 8:51-56.

Xa uYesu wacela ukuba kuvulwe ingcwaba lomhlobo wakhe othandekayo uLazaro, uMarta, udadeboLazaro wathi: “Kungoku nje umele ukuba uyanuka, kuba ziintsuku ezine.” Hayi indlela abavuya ngayo xa uYesu evusa uLazaro! (Yohane 11:38-44) Abaninzi babeyiqhelile imimangaliso eyayisenziwa nguYesu. Xa uYohane umBhaptizi wayesentolongweni, abafundi bakaYohane bamxelela ngezinto ezazisenziwa nguYesu, besithi: “Abafileyo bayavuswa.”—Luka 7:22.

Abavusiweyo Baya Kuphinda Baphile

Kwakutheni ukuze uYesu enze loo mimangaliso, ekubeni abo wabavusayo baphinda bagula baza bafa? Wayefuna ukubonisa ukuba sinokuphinda sibufumane ubomi esaphulukana nabo ngenxa ka-Adam, ubomi obungunaphakade kwiparadesi esemhlabeni. Ngokuvusa kwakhe abantu, uYesu wayebonisa ukuba ekugqibeleni, izigidi zabantu ‘ziya kuwudla ilifa umhlaba zize zihlale kuwo ngonaphakade.’—INdumiso 37:29.

Okuvuyisayo kukuba, sinokuba phakathi kwabo banethemba lokuphila ngonaphakade ukuba ‘sinozinikelo lobuthixo.’ IBhayibhile ithi uzinikelo olunjalo, “lusinika ithemba kobu bomi nakobo buzayo.” ‘Obo bomi buzayo’ bukwabizwa ngokuba ‘bubomi benene.’—1 Timoti 4:8; 6:19.

Makhe sihlolisise ukuba buya kuba njani obu bomi benene kwihlabathi elitsha lobulungisa.

[Umfanekiso okwiphepha 6]

“Bathi phithi kwaoko bethabatheke ngokugqithiseleyo”