Amanani Awothusayo KaGawulayo!

NGUMBHALI KAVUKANI! EMZANTSI AFRIKA

UTHEMBEKA yintombazana eneminyaka eli-12 ubudala ehlala kumaphandle asemazantsi eAfrika. Abazali bakhe babulawa nguGawulayo, waza wasala enyamekela oodadewabo abathathu, omnye eneminyaka elishumi, omnye emithandathu nomnye emine ubudala. Enye intatheli ithi: “La mantombazana akanamali yaye axhomekeke ekulizweni ngabamelwane. . . ngokubanika isonka, iitapile ezimbalwa.” Umfanekiso wala mantombazana mane aziinkedama wawuvele ngaphambili kwiphephandaba laseMzantsi Afrika elalinikela ingxelo ngeNgqungquthela Ye-13 Yezizwe Ngezizwe EngoGawulayo, eyaqhutywa ngoJulayi 2000 eThekwini, eMzantsi Afrika.

Izigidi ngezigidi zeenkedama ezingenabazali ngenxa kaGawulayo zikwimeko efana nekaThembeka noodadewabo. Kule ngqungquthela kwaxutyushwa iindlela zokuhlangabezana nengxaki eyandayo kaGawulayo, njengokufundisa abantu ngendlela yokuzikhusela kuGawulayo ngokusebenzisa iicondom; ukusetyenziswa kwamayeza angabizi mali ingako okunyanga uGawulayo, ngoku afumanekayo; nokunikela ngemali ukuze kwenziwe izitofu nxamnye noGawulayo. Kwathethwa nangokuba sesichengeni kwamabhinqa ingakumbi amantombazana aselula.

Okulusizi kukuba, iinkedama ezibazali bazo babulewe nguGawulayo zifunwa ngamadoda acinga ukuba xa eneentlobano zesini nentombi enyulu aya kunyangeka kwizifo ezidluliselwa ngeentlobano zesini. Ngaphezu koko, amadoda amaninzi akatshati nentombi de izale umntwana. Ngoko ukusetyenziswa kweecondom kungumqobo wokutshata nokuvelisa abantwana.

Ngelishwa, amantombazana amaninzi akabazi ubungozi bukaGawulayo. Iphephandaba laseMzantsi Afrika iSowetan lagqabaza lathi ngengxelo yeUnited Nations Children’s Fund (UNICEF): “Kuphengululo oluye lwafunyaniswa yiUnicef kuye kwafunyaniswa ukuba ama-51 ekhulwini amantombazana aneminyaka eli-15 ukuya kweli-19 ubudala eMzantsi Afrika ebengayazi into yokuba umntu okhangeleka esempilweni unokuba neHIV aze ayisulele kuwo.”

Enye inkalo ebangela ukwanda kukaGawulayo kukuxhatshazwa ngokwesini kwamabhinqa. URanjeni Munusamy, owayekho kule ngqungquthela, wanikela le ngxelo kwiSunday Times yaseGauteng, eMzantsi Afrika: “Ugonyamelo nxamnye namabhinqa, eyona ndlela iphazamisayo yokusetyenziswa kwamandla obudoda, luseyeyona nto iphazamisana nokukhuselwa nokunyanyekelwa kweHIV. Iindlela zalo ezahlukeneyo—ukudlwengula, ukubethwa kwabafazi nokuxhatshazwa ngokwesini—loo nto ibonisa ukuba isini siyanyanzeliswa, ngozi leyo ebangela ukwasulelwa nguGawulayo.”

Amanani ekwathethwa ngawo kule ngqungquthela ayesoyikisa, njengoko isicangca esingezantsi sibonisa. Mini nganye kuqikelelwa ukuba abantu abaselula abangama-7 000 neentsana ezili-1 000 zasulelwa yiHIV. Ngonyaka omnye, we-1999, abantwana abamalunga nama-860 000 kwimimandla yaseAfrika engezantsi kweSahara baye baphulukana nabafundisi-ntsapho babo ngenxa kaGawulayo.

Ngokohlolisiso olwapapashwa yiMedical Research Council of South Africa, abantu abazizigidi ezingama-4,2 eMzantsi Afrika baneHIV, nto leyo ebonisa ukuba ngummi om-1 kwabali-10. Imeko yamazwe aselumelwaneni ithe kratya. IThe Natal Witness yathi xa yayinikela ingxelo ngophengululo olwenziwa yiU.S. Census Bureau: “Inani labantu abathwaxwa nguGawulayo kumazwe aseAfrika liza kwehla kungekudala njengoko izigidi zibulawa sesi sifo, yaye iminyaka ephilwa ngabantu iya kuhla iye kutsho kwiminyaka engama-30 ekupheleni kweli shumi leminyaka.”

Ubhubhane onguGawulayo ububungqina obungakumbi bokuba uluntu luphila ‘kumaxesha amanqam ekunzima ukujamelana nawo,’ iBhayibhile eyawaxela kwangaphambili ukuba aya kufika “ngemihla yokugqibela.” (2 Timoti 3:1-5) Abathandi beLizwi likaThixo iBhayibhile, bakhangele phambili kwisicombululo esiya kuhlala sihleli sikaGawulayo nezinye iingxaki ezithwaxa uluntu. Kungekudala uBukumkani bukaThixo buya kuluthabathela kubo ulawulo lwemicimbi yomhlaba. Kwihlabathi elitsha lobulungisa, indlala nengcinezelo ziya kuba zizinto zexesha elidluleyo. (INdumiso 72:12-14; 2 Petros 3:13) Kunoko, abemi bomhlaba baya kunikwa impilo efezekileyo, yaye akukho namnye kubo oya kuze athi: “Ndiyagula.”—Isaya 33:24.

[Amagama acatshulweyo akwiphepha 14]

Ehlabathini lonke kukho iinkedama eziphulukene nabazali ngenxa kaGawulayo ezili-13 000 000

[Isicangca/Imaphu ekwiphepha 15]

(Ukuba ufuna inkcazelo ehlahlelwe kakuhle, yiya kwimpapasho)

INANI LABANTU ABAKHULILEYO (ABANEMINYAKA ELI-15 ukuya kwengama-49 UBUDALA) ABANEHIV/NOGAWULAYO, EKUPHELENI KOWE-1999

KuMntla-Merika 890 000

ECaribbea 350 000

KuMbindi noMzantsi Merika 1 200 000

ENtshona Yurophu 520 000

EMpuma nakuMbindi Yurophu 410 000

ENtshona Afrika nakuMbindi Mpuma 210 000

EMzantsi nakuMzantsi-mpuma Asia 5 400 000

EMpuma Asia nakwiPasifiki 530 000

EOstreliya naseNew Zealand 15 000

[Inkcazelo]

Source: UNAIDS

[Igrafu/Umfanekiso okwiphepha 15]

(Ukuba ufuna inkcazelo ehlahlelwe kakuhle, yiya kwimpapasho)

UMLINGANISELO WABANTU ABAKHULILEYO (ABANEMINYAKA ELI-15 ukuya kwengama-49 UBUDALA) ABANEHIV/NOGAWULAYO KUMAZWE ASEAFRIKA ALI-16, EKUPHELENI KOWE-1999

1 EBotswana 35,8%

2 ESwazini 25,2

3 EZimbabwe 25,0

4 ELesotho 23,5

5 EZambia 20,0

6 EMzantsi Afrika 20,0

7 ENamibia 19,5

8 EMalawi 16.0

9 EKenya 14.0

10 C.A.R. 14.0

11 EMozambique 13.2

12 EDjibouti 11.7

13 EBurundi 11.3

14 ERwanda 11.2

15 ECôte d’Ivoire 10.7

16 E-Ethiopia 10.6

[Inkcazelo]

Source: UNAIDS

[Umfanekiso]

UThembeka noodadewabo

[Inkcazelo]

Photo: Brett Eloff