Ngaba Anokutshintsha Ngokwenene?

“Akakho umntu onokunyanzela omnye ukuba atshintshe. Umntu ufanele azitshintshele ngokuthanda kwakhe.”—UVIVIEN STERN, A SIN AGAINST THE FUTURE—IMPRISONMENT IN THE WORLD.

ISIKHOKELO esibalulekileyo sotshintsho lokwenene kumabanjwa sixhomekeke kwimfundo nokutshintsha kwemilinganiselo nendlela azijonga ngayo izinto. Ngaphandle kwamathandabuzo, bakho abantu abanyanisekileyo abenza imigudu yokufundisa nokunceda amabanjwa. Umsebenzi omhle nowokunyaniseka wabantu abanjalo ngokwenene uyaxatyiswa ngamabanjwa amaninzi.

Abantu abaninzi bema ngelithi inkqubo yeentolongo xa iyonke ayinakulungiseka yaye akunakwenzeka ukuba amabanjwa atshintshe kwimeko enjalo. Ngoxa kusenokuba yinyaniso ukuba ukuvalela kukodwa akubetheleli milinganiselo mitsha, imfundo yeBhayibhile iye yabanceda abanye batshintsha indlela abaphila ngayo. Oku kubonisa ukuba umntu unako ukutshintsha.

Namhlanje, ngoncedo lweBhayibhile, amanye amabanjwa enza utshintsho olubangela ukucinga nokuziphatha ngendlela efanelekileyo. Njani? Ngokuthobela isiluleko seBhayibhile esithi: “Musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Kufezwa njani oku?

Indima YeBhayibhile

Abantu abaninzi bavakalelwa kukuba unqulo lunokudlala indima ephambili ekuncedeni amabanjwa aguquke kwizenzo zawo zangaphambili. Kambe ke, eyona ngxaki iphambili ngoku kukuba naluphi na utshintsho lobuntu oluvele emva kwezitshixo lusenokuphela lakukhululwa ibanjwa. Elinye ibanjwa lithi: “Uninzi lwabantu lumfumana apha uKristu—kodwa xa lusimka lumshiya ngasemva uKristu!”

Amava aye abonisa ukuba kumele kwenzeke utshintsho lokwenene ngaphakathi—engqondweni nasentliziyweni yesaphuli-mthetho—yaye lumele lusekelwe kwinguquko yokwenene ngenxa yezono zangaphambili. Inkqubo yemfundo yeBhayibhile inokumnceda umntu afumanise indlela avakalelwa ngayo uThixo ngobungendawo nesizathu sokuba buphosakele. Oku kunokumnika izizathu ezinamandla zokungafuni ukuqhubeka nelo khondo.

AmaNgqina kaYehova aqhuba inkqubo enjalo yemfundo yeBhayibhile kwiintolongo ezahlukeneyo ehlabathini lonke, yaye afumana imiphumo emihle. (Bona iphepha 10) “Siye sancedwa ukuze sibone oko kuthethwa yiBhayibhile ngenjongo yobomi neentsikelelo uluntu oluziphathelwe likamva,” latsho njalo elinye ibanjwa laza longezelela lisithi: “Le yimfundo emangalisayo!” Elinye ibanjwa lagqabaza lathi: “Senza izigqibo ezisekelwe kwisiluleko sikaThixo. . . . Senza utshintsho ebomini bethu. Yaye siyazazi izinto eziza kuqala ebomini.”

Kakade ke, imfuneko yotshintsho idlulela nangaphaya kweendonga zentolongo. Isicombululo sokwenene seengxaki zentolongo sixhomekeke ekupheliseni imfuneko yeentolongo. Enye yezona nyaniso zizukileyo zeBhayibhile eye yachukumisa iintliziyo zamabanjwa amaninzi iboniswa kweli dinga likaThixo: “Abenzi bobubi baya kunqunyulwa . . . Amalungisa aya kuwudla ilifa umhlaba, ahlale kuwo ngonaphakade.”—INdumiso 37:9, 29.

Xa oko kusenzeka, imilinganiselo ephakamileyo kaThixo iya kukhuthazwa ngurhulumente ongenakonakala onothando nongqongqo, uBukumkani bukaThixo basemazulwini phantsi koKristu—urhulumente amaKristu aye afundiswa ukuba amthandazele. (Mateyu 6:10) Kwelo hlabathi litsha, mmi ngamnye uya kutshintshwa ngokufunda imithetho ephakamileyo kaThixo. Ngoko kunanini na ngaphambili kuya kungqineka kuyinyaniso ukuba “umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.” (Isaya 11:9) Uya kuba yintoni umphumo? Abemi abathobela umthetho beli hlabathi litsha ‘baya kuziyolisa ngokugqibeleleyo ngobuninzi boxolo.’—INdumiso 37:11.

[Ibhokisi/Imifanekiso ekwiphepha 10]

Ukuwanika Ithemba

Ngaphezu kweminyaka engama-20, amatsha-ntliziyo angamaNgqina kaYehova aye aqhuba inkqubo enempumelelo nesekelwe eBhayibhileni yemfundo kwisisele saseAtlanta, eGeorgia, eUnited States. Ebudeni belo xesha, angaphezu kwama-40 amabanjwa aye ancedwa aba ngabalungiseleli ababhaptiziweyo bamaNgqina kaYehova, yaye amanye amabanjwa angaphezu kwama-90 nawo aye angenelwa kufundisiso oluthe rhoqo lweBhayibhile.

Kutshanje uVukani! uye wathetha nabafundisi beBhayibhile abahlukeneyo abaye ngokungazingci basebenza kuloo ntolongo.

◼ Kutheni imfundo yeBhayibhile iluncedo kangaka ekukhuthazeni amanye amabanjwa ukuba atshintshe indlela aphila ngayo?

UDavid: Amabanjwa amaninzi akazange alufumane uthando kwasebuntwaneni bawo. Ngoko xa efumanisa ukuba uThixo uyawathanda aze aphalaze imbilini yawo kuye ngomthandazo aze ayiphendule imithandazo yawo, uba ngumntu wokwenene kuwo. Iintliziyo zawo zishukunyiselwa ekumthandeni.

URay: Elinye ibanjwa endandifundisisa nalo laxhatshazwa lisengumntwana. Xa ndalibuza ngoko kwakulitsalela kuYehova, lathi xa ufunda inyaniso yeBhayibhile, uye ubone ukuba uYehova uyakuqonda ngokwenene. Oku kwalenza lafuna ukufunda okungakumbi ngobuntu boThixo onothando olunjalo.

◼ Abanye bathi amabanjwa athanda unqulo ngenxa yezinye iinjongo—ukuze anciphise isigwebo sawo okanye ngeenjongo nje zokuhambisa ixesha. Nifumanise ntoni nina?

UFred: Xa amabanjwa esiza kwizifundo zethu, asizabalazeli kuwachukumisa. Sifundisisa kunye nawo iBhayibhile. Kungekudala afumanisa ukuba, aza kufundiswa iBhayibhile yaye senza loo nto ke. Amanye aye andicela ndiwancede kumatyala awo asenkundleni. Andikuxubushi nawo oku. Oko kuphumela ekubeni, lawo eza kufundisisa aze ahlale kangangethuba elithile ngokwenene afuna ukufunda oko kuthethwa yiBhayibhile.

UNick: Enye into endiyiphawuleyo lutshintsho olwenziwa ngala mabanjwa ngoxa ekwesi sisele. Amanye aye aba ngabalungiseleli ababhaptiziweyo yaye atyhubela ubunzima ngenxa yamanye amabanjwa. Iimeko zimandundu kakhulu kuwo. Ukuba iBhayibhile ibingazichukumisanga iintliziyo zawo, ebengenakukwazi ukuhlala ethembekile ngaphantsi kwezo meko.

UIsrael: Ngokuqhelekileyo angabantu abanomnqweno onzulu wokufunda ngoYehova, yaye oku bakubonisa ngendlela emangalisayo. Uyazibonela nje ukuba le nto isuka entliziyweni.

UJoe: Lawo aba ngamaKristu okwenyaniso aye aqonda ukuba kuye konakala phi kwindlela aphila ngayo. Kwakhona aye aqonda ukuba likho ithemba lokuba izinto zingatshintsha—ithemba elivulelekileyo kuwo. Ngoku anokukuqonda ngokunyanisekileyo ukuzaliseka kwamadinga kaYehova kwikamva.

◼ Kutheni intolongo iyodwa ingenakuzitshintsha izaphuli-mthetho?

UJoe: Injongo yenkqubo yokuvalela, asikokutshintsha, kodwa kukugcina izaphuli-mthetho zikude nebutho labantu liphela. Ilapho ke eyona ngxaki—yindlela ayijonga ngayo la madoda intolongo.

UHenry: Inkqubo yentolongo ayikwazi kutshintsha iintliziyo zaboni. Uninzi lwaba bantu baza kuziphinda izono zabo besakuphuma.

[Umfanekiso okwiphepha 8, 9]

Intarhantarha yamabanjwa iye yancedwa ukuba ifunde inyaniso yeBhayibhile