Ibhokisi Yemibuzo

◼ Ziintoni esifanele sizilumkele xa sishumayela kumabanjwa?

Ubuncinane ehlabathini lonke kukho amabanjwa azizigidi ezisibhozo, yaye amanye kuwo anomdla kwiindaba ezilungileyo. (1 Tim. 2:4) Enye iofisi yesebe ifumana iileta ezili-1 400 nyanga nganye ezivela kumabanjwa neentsapho zawo, zicela ukuba athunyelelwe uncwadi okanye atyelelwe. Ngoxa amabanjwa amaninzi enomdla onyanisekileyo, amanye aye azenza ngathi anomdla, kuba efuna ukuxhaphaza abantu bakaThixo. Ngenxa yaloo nto, sonke sifanele silumkele ezi zinto zilandelayo xa sishumayela kumabanjwa.

Ixesha elininzi amabanjwa adla ngokushunyayezwa ngembalelwano. Ayinconyelwa kwaphela into yokuba oodade babhalelane namabanjwa angamadoda, enoba kungenjongo yokuwanceda ngokomoya. Loo mbopheleleko ifanele isingathwe ngabazalwana abafanelekayo kuphela. Oodade abafanelekayo banokwabelwa ukuba babhalelane namabanjwa angamabhinqa anomdla onyanisekileyo kwinyaniso yeBhayibhile. Amabanjwa akafanele athunyelelwe imali okanye izipho, enoba ayazicela.

Xa ibanjwa linomdla, igama nedilesi yalo ifanele idluliselwe kwibandla elikufutshane nentolongo elikuyo. Ngokuqhelekileyo abazalwana abafanelekayo kuloo mmandla baya kukwazi ukusingatha naziphi na iimeko ezinokuvela. Ukuba ibandla lalapho alaziwa, inkcazelo ifanele ithunyelwe kwiofisi yesebe.

Akukho nto iphosakeleyo ngabazalwana abafanelekayo ukuqhuba iintlanganiso namabanjwa ngenjongo yokufundisisa nawo ngaxeshanye. Noko ke, abavakalisi abafanele banxulumane ngokukhululekileyo namabanjwa ezintolongweni. Ukongezelela, akukhuthazwa ukuba abavakalisi baye entolongweni bengenzanga malungiselelo kwangaphambili yaye abafanele banxulumane ngokusondeleyo namabanjwa.

Ngamana ‘singalumka njengeenyoka size sibe msulwa njengamahobe’ njengoko sishumayela iindaba ezilungileyo kumabanjwa.—Mat. 10:16.