Izifo Ezasulelayo—Ziyingozi Kodwa Zinokuthintelwa
NGOXA iinyikima ezitshabalalisayo nezikhukula ezonakalisayo zisiba ngumxholo ophambili kumaphephandaba, ukwanda okuthe ngcembe kwezifo ezasulelayo akufane kutsale ingqalelo yamaphepha-ndaba. Nangona kunjalo, ingxelo yeRed Cross/Red Crescent kaJuni 2000 ithi: “Inani labantu abafe ngenxa yezifo ezasulelayo (ezifana noGawulayo, isifo seengcongconi, izifo ezinxulumene nokuphefumla kunye nesifo sorhudo) lingaphezulu ngokuphindwe kali-160 kwinani labo babulewe ziintlekele zemvelo zalo nyaka uphelileyo. Yaye le meko iya isiba maxongo.”
Kuthiwa babini oothunywashe ababangela kubekho eli nani lothusayo. Omnye kukwanda kukaGawulayo okungayekeleliyo, obulala abantu abangama-300 iyure nganye. UPeter Walker, umalathisi kwicandelo leentlekele kwi-International Federation of Red Cross and Red Crescent Societies uthi uGawulayo “awusesiso isifo, kunoko uyintlekele. Isifo esisasazeke ngolu hlobo sibulala abasebenzi size sidodobalise ezoqoqosho.” Omnye uthunywashe kukuwohloka kwenkqubo yezempilo yoluntu ngokubanzi, ebangela ukuba kubuye ngamandla izifo zakudala ezifana nesifo sephepha, igcushuwa kunye nesifo seengcongconi. Ngokomzekelo, ilizwe laseAsia linikela ingxelo yabantu abangama-40 000 abatsha abasulelwa sisifo sephepha nyaka ngamnye. Kwelinye ilizwe elikwiMpuma Yurophu, ukwasulelwa yigcushuwa kwande ngama-40 ekhulwini kule minyaka ilishumi idluleyo.
Noko ke, impoxo kukuba, nangona izifo ezasulelayo zisuke zaba ziintlekele, ziphakathi kweentlekele ezininzi ezinokuthintelwa. Eneneni, ingxelo ithi kubantu abazizigidi ezili-13 abafe ngenxa yezifo ezasulelayo ngowe-1999, ukufa kwabo “ngekuthintelwe ngemali nje ezii-US$5 [ii-R40] umntu ngamnye.” Ukuba oorhulumente behlabathi bebezimisele ukuchitha benyamekela impilo yomntu omnye—isimbuku samawaka ezigidi azii-R230—cinga nje ukuba bangaphi abantu engebesinde ekufeni!
Nangona le iyimali eninzi gqitha, incinane kakhulu xa ithelekiswa noko ihlabathi likuchithayo kwezinye iinkonzo. Ngokomzekelo, kutshanje komnye unyaka osandul’ ukudlula, imali esetyenziswe kwezomkhosi ehlabathini lonke ibe ngaphezu kwezigidi zezigidi zeerandi ezisixhenxe—i-R1 120 umntu omnye. Cinga nje ngenkcitho eyenziwayo kulungiselelwa imfazwe kunokuba kuthintelwe ukwanda kwezifo ezasulelayo! Mhlawumbi ukuthintela ukwanda kwezifo ezasulelayo kungaphaya kwamandla omntu—ingekuba akukho mali yaneleyo, kodwa ngenxa yezizathu ezinzulu ngakumbi. Ngapha koko, oorhulumente babantu abakwazi nokucwangcisa izinto ngokubaluleka kwazo.
[Inkcazelo Ngemifanekiso ekwiphepha 12]
X ray: New Jersey Medical School—National Tuberculosis Center
Umfanekiso wendoda ekhohlelayo: WHO/Thierry Falise