Ihlabathi Elingenazo Izifo

“Onke amazwe kufuneka asebenzisane, azinikele ukuze aqinisekise ukuba bonke abantu bafumana unyango olusisiseko ekubeni ukuba sempilweni kwabantu kulo naliphi na ilizwe kubalulekile yaye kuyingenelo kuwo onke amazwe.”—IALMA-ATA DECLARATION, KASEPTEMBA 12, NGOWE-1978.

KWIMINYAKA engama-25 eyadlulayo, kwabonakala ngathi usukelo lokuba wonk’ umntu afumane unyango olusisiseko yinto enokufikelelwa. Iindwendwe ezazikwi-International Conference on Primary Health Care, eAlma-Ata, kwindawo ebizwa ngokuba yiKazakhstan ngoku, zenza isigqibo sokuba bonke abantu bagonywe ukuze bakhuselwe kwizifo eziphambili ezasulelayo malunga nonyaka wama-2000. Kwakhona zazinethemba lokuba kwangaloo nyaka, bonke abantu emhlabeni baya kube benenkqubo efanelekileyo yogutyulo namanzi acocekileyo. Onke amazwe angamalungu eWorld Health Organization (WHO) asityobela eso sivumelwano.

Ngokuqinisekileyo olo sukelo lwawo lwalufanele ukuqhwatyelw’ izandla, kodwa okwenziwayo emva koko kudanisa gqitha. Unyango olusisiseko alufunyanwa ngabo bonke abantu, yaye izifo ezasulelayo zisasongela impilo yamawaka ezigidi zabantu abaphilayo. Yaye ezi zifo zibulalayo zidla ngokuhlasela abantwana nabantu abadala abasenamandla.

Kwanesisongelo sezifo ezithathu uGawulayo, isifo sephepha nemalariya asikwazanga ukwenza amazwe “asebenzisane ngamxhelo-mnye.” INgxowa-mali Yehlabathi Yokulwa UGawulayo, Isifo Sephepha NeMalariya esandul’ ukusekwa ifuna oorhulumente bakhuphe imali engama-R90 amawaka ezigidi ukuze kuliwe ezi zifo zigqugqisayo. Noko ke, kwihlobo lowama-2002 kwafumaneka imali engaphezu nje kwe-R13 lamawaka ezigidi—kwakuloo nyaka mnye kuqikelelwa ukuba imali eyachithwa emkhosini ifikelela kwi-R4,8 sezigidi zezigidi! Okubuhlungu kukuba kweli hlabathi lanamhlanje liziintlaba-zahlukane, zimbalwa izinto ezisisisongelo ezikwaziyo ukwenza zonke izizwe zisebenzisane ngamxhelo-mnye.

Nokuba sele eneenjongo ezintle, amagunya ezempilo asuka angabi nawo amandla okulwa nezifo ezasulelayo. Oorhulumente basenokungabi nayo imali eyaneleyo efunekayo. Ngoku iintsholongwane ziyakwazi ukuxhathisa amayeza amaninzi, yaye nabantu basenokuqhubeka nendlela yokuphila ebabeka esichengeni sokwasulelwa zezi zifo. Ngaphezu koko, iingxaki ezikumazwe athile njengobuhlwempu, imfazwe nendlala zibangela ukuba iintsholongwane zihlasele izigidi zabantu.

Umdla Anawo UThixo Kwimpilo Yethu

Sikho isicombululo soku. Sinobungqina obucacileyo bokuba uYehova uThixo unomdla kwimpilo yabantu. Inkqubo yethu yokuzikhusela komzimba inikela ubungqina obubalaseleyo kule nkalo. Imithetho emininzi uYehova awayinika amaSirayeli amandulo ibonisa ukuba wayefuna ukuwakhusela kwizifo ezasulelayo.a

UYesu Kristu, oyimbonakaliso yobuntu bukaYise wasezulwini, unovelwano ngabantu abagulayo. Incwadi yeVangeli kaMarko ichaza ngokudibana kukaYesu nendoda eyayineqhenqa. Le ndoda yathi kuye: “Ukuba nje uyathanda, unako ukundenza ndihlambuluke.” UYesu waba nosizi xa wabona intlungu nokubandezeleka eyayikunyamezele. UYesu waphendula: “Ndiyathanda. Hlambuluka.”—Marko 1:40, 41.

Ukuphilisa ngommangaliso kukaYesu akuzange kupheleliselwe kwimbinana ethile yabantu. Umbhali wencwadi yeVangeli uMateyu unikela ingxelo yokuba uYesu “walijikeleza lonke elaseGalili, efundisa . . . eshumayela iindaba ezilungileyo zobukumkani kwaye ephilisa lonke uhlobo lwesifo nalo lonke uhlobo lobulwelwe ebantwini.” (Mateyu 4:23) Ukuphilisa kwakhe akuzange kuncede nje abantu abagulayo bakwaYuda nabaseGalili. Oko kuphilisa kwakhe kusenza sibe nofifi ngendlela eziya kupheliswa ngayo zonke izifo ekugqibeleni xa uBukumkani bukaThixo, awashumayela ngabo uYesu bulawula uluntu kungekho mntu ubuchasayo.

Ukuba Sempilweni Kwabantu Abasehlabathini Lonke Akulophupha Nje

IBhayibhile isiqinisekisa ukuba, ukuba sempilweni kwabantu bonke abasemhlabeni akulophupha nje. Umpostile uYohane wabona kusengaphambili ixesha xa ‘intente kaThixo iya kube iphakathi koluntu.’ Ngenxa yesi senzo sikaThixo, ‘akusayi kuphinda kubekho kufa, nakuzila nakukhala nantlungu kwakhona. Izinto zangaphambili ziya kube zidlule.’ Ngaba oku kubonakala njengento engenakwenzeka? Kwindinyana elandelayo, uThixo uvakalisa oku: “La mazwi athembekile yaye ayinyaniso.”—ISityhilelo 21:3-5.

Kakade ke, ukuze ziphele izifo kufuneka kuphele ubuhlwempu, indlala nemfazwe ekubeni ezi ntlekele zisoloko zisiba negalelo ekusasazekeni kweentsholongwane ezasulelayo. Ngoko, umsebenzi omkhulu uYehova uwabele uBukumkani bakhe, urhulumente wasezulwini olawulwa nguKristu. Ukuze kuphendulwe izigidi zemithandazo ezingisileyo, lo rhulumente uza kufika, yaye uza kuqinisekisa ukuba ukuthanda kukaThixo kuyenziwa apha emhlabeni.—Mateyu 6:9, 10.

Simele sikulindele nini ukufika koBukumkani bukaThixo? Ephendula loo mbuzo, uYesu waxela kwangaphambili ukuba ihlabathi laliya kubona ungcelele lweziganeko eziphawulekayo ezaziya kuba ngumqondiso wokuba uBukumkani sele buza kuthabatha inyathelo. Wathi esinye sezi ziganeko sasiya kuba kukuqhambuka ‘kweendyikitya zokufa kwiindawo ngeendawo.’ (Luka 21:10, 11; Mateyu 24:3, 7) Igama lesiGrike elithi ‘iindyikitya zokufa’ libhekisela kuso “nasiphi na isifo esasulelayo esibulalayo.” Ngokuqinisekileyo zininzi iindyikitya zokufa ezoyikekayo eziye zavela kwinkulungwane yama-20, phezu kwayo yonke inkqubela yenzululwazi yamayeza.—Bona ibhokisi ethi “Iindyikitya Zokufa Ukususela Ngowe-1914.”

Isiprofeto esikwincwadi yeSityhilelo, esivisisana namazwi kaYesu akwiincwadi zeVangeli, sichaza ngamadoda aliqela akhwele amahashe apheleka uYesu Kristu xa eqalisa ukulawula ezulwini. Indoda yesine ikhwele ihashe “eliluthuthu” ngombala yaye ihlwayela ‘isibetho esibulalayo.’ (ISityhilelo 6:2, 4, 5, 8) Xa ukhangela indlela ababulewe ngayo abantu zizifo eziphambili ezasulelayo ukususela ngowe-1914 uya kungqina ukuba le ndoda yokomfuziselo ibiphalisa nyhani ingadlali. Ukubandezeleka kwehlabathi lonke ngenxa ‘yesibetho esibulalayo’ bubungqina obungakumbi bokuba uBukumkani bukaThixo bukufuphi.b—Marko 13:29.

Nangona inzululwazi yamayeza iye yaphumelela ukunciphisa ukusasazeka kwezifo ezasulelayo kula mashumi eminyaka adluleyo, ukuqhambuka kwezifo ezitsha kuyoyikisa. Kucacile ukuba, sifuna isicombululo samandla angaphaya kwawomntu ukuze iconjululwe ngokupheleleyo le ngxaki. UMdali wethu uthembisa ukwenza kanye oko. Umprofeti uIsaya usiqinisekisa ukuba xa kulawula uBukumkani bukaThixo “akakho ummi . . . oya kuthi: ‘Ndiyagula.’” Ukongezelela koko, “[uThixo] uya kuginya ukufa ngonaphakade, yaye iNkosi enguMongami uYehova ngokuqinisekileyo iya kosula iinyembezi ebusweni bonke.” (Isaya 25:8; 33:22, 24) Ngaloo mini, izifo ziya kube zoyiswe ngokupheleleyo.

[Imibhalo esemazantsi]

[Ibhokisi ekwiphepha 28]

Iindyikitya Zokufa Ukususela Ngowe-1914

Olu luqikelelo nje. Noko ke, lubonisa umkhamo iindyikitya zokufa eziye zathwaxa ngawo uluntu ukususela ngowe-1914.

◼ INgqakaqha (iye yabulala phakathi kwama-300 nama-500 ezigidi) Akukho nyango lwengqakaqha luphumelelayo lwakha lwaveliswa. Iphulo lehlabathi lonke lokugonya lwada lwasitshayela esi sifo malunga nowe-1980.

◼ ISifo Sephepha (siye sabulala phakathi kwe-100 ne-150 lezigidi) Ngoku isifo sephepha sibulala abantu abamalunga nezigidi ezibini rhoqo ngonyaka, yaye umntu om-1 kwaba-3 ehlabathini unentsholongwane yesifo sephepha.

◼ IMalariya (iye yabulala phakathi kwama-80 ne-120 lezigidi) Kwisiqingatha sokuqala senkulungwane yama-20, imalariya yayibulala abantu abamalunga nezigidi ezibini ngonyaka. Eyona ndawo isenabantu abaninzi ababulawa yimalariya ngoku yisub-Saharan Africa, ibulala abantu abamalunga nesigidi rhoqo ngonyaka.

◼ Umbathalala (uye wabulala phakathi kwama-20 nama-30 ezigidi) Abanye ababhali-mbali bathi lingaphezulu kwelo inani labantu abafayo. Esi sifo sibulalayo sagqugqisa ihlabathi ngowe-1918 nangowe-1919, ngokukhawuleza emva kwemfazwe yehlabathi yokuqala. “Nkqu nobhubhani akazange abulale abantu abaninzi ngokukhawuleza ngolo hlobo,” itsho incwadi ethi Man and Microbes.

◼ ISifo Seentwala (sabulala malunga nama-20 ezigidi) Isifo seentwala sidla ngokubakho xa kukho imfazwe, yaye imfazwe yehlabathi yokuqala yabangela isifo seentwala esagqugqisa kwelo laseMpuma Yurophu.

◼ UGawulayo (ubulele ngaphezu kwama-20 ezigidi) Esi sibetho sanamhlanje ngoku sele sibulala abantu abazizigidi ezithathu minyaka le. Ukuza kuthi ga ngoku uqikelelo lwephulo leZizwe Ezimanyeneyo Lokulwa UGawulayo lubonisa ukuba “ngenxa yokungabikho kwendlela yokuthintela esi sifo nemigudu yokusinyanga, ngabantu abangama-68 ezigidi abaza kufa . . . phakathi kowama-2000 nowama-2020.”

[Imifanekiso ekwiphepha 27]

Xa kulawula uBukumkani bukaThixo, izifo ezifana nezi azisayi kuba sisisongelo

UGawulayo

Imalariya

Isifo sephepha

[Inkcazelo]

AIDS: CDC; malaria: CDC/Dr. Melvin; TB: © 2003 Dennis Kunkel Microscopy, Inc.

[Umfanekiso okwiphepha 29]

UYesu waphilisa zonke iintlobo zezifo nobulwelwe