Imibuzo Evela Kubafundi
Ukuba ubani uzibulele, ngaba kuvumelekile ukuba umKristu anikele intetho yomngcwabo?
UmKristu ngamnye ufanele azigqibele enoba isazela sakhe siyamvumela kusini na ukuba anikele intetho yomngcwabo womntu osenokuba uzibulele. Xa esenza isigqibo, ufanele acinge ngale mibuzo ilandelayo: UYehova ukujonga njani ukuzibulala? Ngaba ngokwenene lo mntu ufileyo uzibulele? Ngaba uzibulele ngenxa yokuphazamiseka engqondweni okanye ngokweemvakalelo? Abantu basekuhlaleni bakujonga njani ukuzibulala?
NjengamaKristu, sinomdla kwindlela uYehova akujonga ngayo ukuzibulala. Ubomi bomntu buxabisekile yaye bungcwele kuYehova. (Genesis 9:5; INdumiso 36:9) Ukuzibulala ngabom akumkholisi uThixo. (Eksodus 20:13; 1 Yohane 3:15) Ngaba oku kuthetha ukuba akufanele kunikelwe intetho yomngcwabo kumntu ozibuleleyo?
Khawucinge ngemeko kaKumkani uSawule wakwaSirayeli. Xa waqonda ukuba wayengenakusinda kwidabi lakhe lokugqibela namaFilisti, kunokuba avumele utshaba lwakhe lumphathe kakubi, “uSawule walithabatha ikrele waza waziwisa phezu kwalo.” Xa amaFilisti afumana isidumbu sakhe, asibethelela eludongeni lwesixeko saseBhete-shan. Xa bafumanisa oko amaFilisti akwenzileyo, abemi baseYabheshe-giliyadi basithabatha eso sidumbu baza basitshisa. Baza bathabatha amathambo akhe bawangcwaba. Bade bazila iintsuku ezisixhenxe, yaye elo yayilisiko lokuzila kwaSirayeli. (1 Samuweli 31:4, 8-13; Genesis 50:10) Xa uDavide, umthanjiswa kaYehova, wafumanisa oko bakwenzileyo abemi baseYabheshe-giliyadi, wathi: “Ngamana ningasikelelwa nguYehova, ngenxa yokuba nayenzela obu bubele bothando inkosi yenu, uSawule, ngokuthi nimngcwabe. Ke kaloku ngamana uYehova angabonakalisa kuni ububele bothando nenkoloseko.” (2 Samuweli 2:5, 6) IBhayibhile ayibonisi ukuba abemi baseYabheshe-giliyadi babekw’ ityala ngokwenza oko kunokugqalwa kulisiko lomngcwabo kaKumkani uSawule. Thelekisa oko nemeko yabo bangazange bangcwatywe ngenxa yokwenza kwabo okubi. (Yeremiya 25:32, 33) UmKristu usenokucinga ngengxelo engoSawule xa esenza isigqibo enoba anikele intetho yomngcwabo walowo uzibuleleyo kusini na.
Loo mntu usenokucinga nangenjongo yentetho yomngcwabo. Ngokwahlukileyo kubantu abakholelwa ukuba umphefumlo awufi, amaNgqina kaYehova akaqhubi mingcwabo enenjongo ephosakeleyo yokuthumela abafileyo kwenye indawo. Kunokuba kuzuze lowo ufileyo, eyona njongo iyintloko yokuba nentetho yomngcwabo kukuthuthuzela abo bafelweyo nokunikela ubungqina ngemeko yabafileyo kwabo beze emngcwabeni. (INtshumayeli 9:5, 10; 2 Korinte 1:3-5) Esinye isizathu esibalulekileyo sokuba nentetho yomngcwabo kukunceda abo bazileyo babone indlela ubomi obufutshane ngayo. (INtshumayeli 7:2) Ngaba oku kunokufezwa ngokunikela intetho yomngcwabo yalowo uzibuleleyo?
Liyinyaniso elokuba, abanye basenokuvakalelwa kukuba lo mntu uzibulele ngabom, esazi ngokupheleleyo ukuba wona uYehova. Kodwa ngaba kusoloko kulula ukuxhasa imvakalelo enjalo? Ngaba oko ukwenze nje engacingisisanga? Bambi abaye bazama ukuzibulala bayazisola yaye abaphindi bazame ukuzibulala. Umntu akanakuguquka koko akwenzileyo emva kokuba efile.
Enye inkalo ebalulekileyo kukuphazamiseka engqondweni okanye nangokweemvakalelo nto leyo ebangela abantu abaninzi ukuba bazibulale. Ngokwenene kusenokuthiwa aba abazibulalanga ngabom. Ngokwezinye iingxelo, abangama-90 ekhulwini abazibulalayo banengxaki ethile engqondweni, ngokweemvakalelo okanye bangamakhoboka okuthile. Ngaba uYehova uya kuba xolela abantu abazibuleleyo abakwimeko enjalo engqondweni? Asinakumgweba lowo ufileyo sisithi wenze isono esingenakuxoleleka kuYehova. UmKristu usenokuqwalasela iimeko nengxelo yokugula yomntu ofileyo xa ecinga enoba anikele intetho yomngcwabo yalowo uzibuleleyo.
Kwakhona kukho nenye inkalo enokuqwalaselwa: Abantu basekuhlaleni bakujonga njani ukuzibulala nokufa komntu? Oko kumele kubaxhalabise ngakumbi abadala, abanomdla ngendlela ibandla lasekuhlaleni lamaNgqina kaYehova elijongwa ngayo. Ngokuxhomekeke kwindlela ekujongwa ngayo ukuzibulala ekuhlaleni, yaye ingakumbi loo meko yeso sihlandlo, abadala basenokufuna ukungawubhengezi loo mngcwabo okanye bangawenzeli kwiHolo yoBukumkani.
Sekunjalo, ukuba umKristu ucelwa ukuba alungiselele umngcwabo, unokuzenzela isigqibo sokwenjenjalo. Ukuba ugqiba ukwenjenjalo, ufanele akulumkele ukuthetha amazwi aqinisekisayo ukuba lo mntu uza kuvuswa. Naliphi na ithemba lalowo ufileyo ngekamva lisezandleni zikaYehova, yaye akukho namnye unako ukugqiba enoba lowo ufileyo uya kuvuswa okanye akasayi kuvuswa kusini na. Loo mntu unokugxininisa kwiinyaniso zeBhayibhile ngokufa aze athuthuzele abo bafelweyo.