Umntu Ulwa Nendalo

“Namhlanje ngumntu ofanele avume ukuba ubophelelekile ngezilwanyana ezininzi kangaka eziphelayo.”—UJANE GOODALL, UMLONDOLOZI WENDALO.

IZINTO eziphila emhlabeni ziyanda kwaye zihlobene. Thina bantu singabona babalulekileyo kuzo. Sixhomekeke kwizinto eziphilayo ukuze sifumane ukutya namayeza, ioksijini esiyiphefumlayo, nezinto ezibumba umzimba wethu. Ngokuqhelekileyo mini nganye, abantu abasehlabathini basebenzisa ezinye izinto eziphilayo ezingaphezu kwama-40 000. Zizonke izinto eziphilayo emhlabeni zibumba umanyano oluntsonkothileyo nolumangalisayo lobomi.

Noko ke, iingcali ezininzi ezihlolisisa olu manyano luntsonkothe kangaka zivakalelwa kukuba luyahlaselwa! Mhlawumbi ukhe weva ngomkhombe osengozini, izingwe, iipanda neminenga. Ezinye izazinzulu zithi ama-50 ekhulwini azo zonke izityalo nezilwanyana anokuphela emhlabeni kwiminyaka engama-75. Abaphengululi banoloyiko lokuba ezinye izinto eziphilayo zisenokuphela ngokukhawuleza ngomlinganiselo ophindwe kangangama-10 000 kunoko izazinzulu zikubiza ngokuba ngumlinganiselo wokuphela kwazo. Enye ingcali iqikelela ukuba ngokomlinganiselo kwizinto eziphilayo kufa enye ngemizuzu eli-10 nengama-20.

Izazinzulu zikholelwa kwelokuba kude kudala, ukuphela kwezinto eziphilayo kwakubangelwa ubukhulu becala zizizathu ezingokwemvelo. Kodwa bathi intlekele yakutshanje inesizathu esahlukileyo. Kuyabonakala ukuba, ukuphela kwazo namhlanje kubangelwa zizinto ezenziwa ngumntu. Esinye isazinzulu sabhekisela ebantwini “njengezinto eziphilayo ezitshabalalisayo.”

Ngaba izinto ezenziwa ngabantu ngokwenene zingunobangela wokuphela okungathethekiyo kwezinto ezahlukeneyo eziphilayo? Ukuba kunjalo, yenzeka njani loo nto? Ngaba sinokuphila ngaphandle kwezinto eziphilayo ezahlukahlukeneyo emhlabeni? Ngaba ikho into eyenziwayo ukuphelisa oko abaninzi bavakalelwa kukuba yintlekele yokuphela kwezinto eziphilayo?

[Inkcazelo Ngemifanekiso ekwiphepha 19]

WHO

NOAA